ސްކްރީން ލިޔުންތެރިންނަކީ ރާއްޖޭގައި ނިސްބަތުން މަދު ބައެކެވެ. ވަކިން ޚާއްޞަކޮށް، ތަފާތު ކޮންސެޕްޓަކަށް ސްކްރީންޕްލޭ ނުވަތަ ފިލްމު ސްކްރިޕްޓް ލިޔާ ލިޔުންތެރީންގެ އަދަދު އަތުގެ އިނގިލިތަކުންވެސް ގުނައިލެވޭނެއެވެ. ނޫނީ، ލިޔުންތެރިން އުޅުނަސް، ފުރުޞަތު ނުލިބެނީ ކަމަށްވެސް ވެދާނެއެވެ. ނަމަވެސް ފުރުޞަތު ލިބިއްޖެ ނަމަ، ދިވެހި ޒުވާނުންނަކީ “ތީތި ކަޑައޭ” ބުނަން ޑައިރެކްޓަރަކަށް ނުވަތަ ޕްރޮޑިއުސަރަކަށް ނުކެރޭނެހާ މޮޅަށް ލިޔާނެ ޒުވާނުންނެވެ. އެކަން މިވަނީ ޒުވާން ލިޔުންތެރިޔާ ‘ހޫދު އިބްރާހީމް’ ސާބިތުކޮށްދީފައެވެ.

ހޫދު އިބްރާހިމަކީ ލިޔުންތެރިއެއްގެ އިތުރުން ގްރެފިކްސް ޑިޒައިނަރެކެވެ. “ނާމާން” ސީރީޒްގެ 2ވަނަ ސީޒަން އާއި “ތީތި ކަޑައޭ” އަކީ ހޫދުގެ ހުނަރުވެރިކަން ބެލުންތެރިންނަށް ފެނިގެން ދިޔަ ދެ އުފެއްދުމެވެ. އެއަށްފަހު ބެލުންތެރިން އިންތިޒާރު ކުރަމުން އަންނަނީ ހޫދުގެ ސްކްރީންޕްލޭއަށް ހަދާ ފުރަތަ ފީޗާ ފިލްމު “ބަޅިނދު”ގެ ނާމާން، ބިރުވެރިކަން ބަލައިލަން ކެތްމަދުވެފައެވެ.

“ބަޅިނދު”ގެ ނާމާންކަން ބަލައިލާ ހިތުން ތިބި ފަރާތްތަކަށް ޑާކްރެއިންޝޯޓްސް އިން ދިން “ދަޢުވަތު” ވެގެން ދިޔައީ ހޫދުގެ އަމާން، އެހެނަސް ނާމާން ސިފައެއް ފެނިގެންދިޔަ އުފެއްދުމަކަށެވެ. ސްކްރީން ރައިޓިން ތެރެއިން އެކްޓިންއަށް ހޫދު ފުންމައިލީ “ދަޢުވަތު” ކުރު ފިލްމުން ރަނގަޅު އެކްޓިންއެއް ދައްކަމުންނެވެ.

https://www.youtube.com/watch?v=4LyElUw-BuA

ޑާކް ރެއިން އެންޓަޓެއިންމެންޓްގެ އުފެއްދުންތައް ކަމަށްވާ ފިލްމު “މާމުއި” އަދި “ނޮވެމްބަރ”ގެ ޕޯސްޓަރ ފަރުމާކޮށް ތައްޔާރުކުރީ ހޫދު އެވެ. މީގެ އިތުރުން ޑާކްރެއިންޝޯޓްސްގެ ކުރު ފިލްމުތަކުގެ ޕޯސްޓަރުތައް ވެސް ތަފާތެއް ދައްކަމުން ހަދަމުންދަނީ ހޫދު އެވެ.

ހޫދު އިބްރާހީމް އާ މުނިއަވަސް އިން ބައްދަލުކޮށްލައި ވާހަކަދައްކައިލީމެވެ.

ހޫދު އާ މުނިއަވަސް އިން މިހެން ބައްދަލުވާ ފުރަތަމަ ފަހަރަށް ވުމުން، ހޫދުގެ ކުރު ތަޢާރަފަކުން ފެށުން ރަނގަޅުވާނެ ދޯ. އެހެންވީމަ ހޫދުގެ ކުރު ތަޢާރަފެއް ދީބަލަ؟
އަޅުގަނޑުގެ ނަމަކީ ހޫދު އިބްރާހިމް. އުމުރުން މިހާރު 22 އަހަރު. މަސައްކަތް ކުރަނީ މަރކެޓިންގ އޮފިސަރެއް ގޮތަށް. އެއީ ގްރެޕިކްސް ޑިޒައިނިންގ އާ ފޮޓޯގްރަފީ އާ އެއްކޮށް. ދެން ހޮބީއެއް ގޮތުގަ ކުރާ ކަމެއް އެއީ ލިޔުމަކީ… ބައެއް ފަހަރު ހުސް ވަގުތުތަކުގަ ކުރެހުމުގަ ވެސް އުޅެން.

https://www.youtube.com/watch?v=snwaGNlLX28

ކިޔުންތެރިންނާ ހިއްސާކޮށްލަދީފާނަންތަ ސްކްރީން ރައިޓިންއާ ގުޅުނީ ކޮން ދުވަސްވަރެއްގައި އަދި ކިހިނެއްކަން؟
އަސްލު އެންމެ ކުޑަ އިރުއްސުރެވެސް އަބަދުވެސް ދިވެހި ވާހަކަ ފޮތް ކިޔަން ވަރަށް ގިނައިން. ސްކޫލް ލައިބަރަރީގަ ނުހުންނާނެ ނުކިޔާ ފޮތެއް. ދެން ބިންމާ، އައިކިއު މެން ކަހަލަ މޮޅެތި ލިޔުންތެރިންގެ ވާހަކަތައް ކިޔަމުން އައިސް ހިތަށް އެރީ ބޭނުމޭ އަޅުގަނޑުވެސް މިގޮތަށް ލިޔަން. އެގޮތަށް އެންމެ ފުރަތަމަ އުމުރުން 12 ވަރަކަށް އަހަރުގަ އަމިއްލައަށް ވާހަކަ ލިޔަން ފެށީ… އެއްވެސް މީހަކަށް ނުދެން ކިޔާކަށް. ލިޔެފަ ހުންނާނީ ފޮރުވާފަ.

ދެން އުމުރުން 15 އަހަރުގަ ވާހަކަ.ކޮމް އަށް ވާހަކަތައް އަޕްލޯޑް ކުރަން ފެށީ. މީހުންގެ ސަޕޯޓް ވަރަށް ލިބޭ އަސްލު ވެބްސައިޓުން. އެގޮތަށް އެއްފަހަރު ލިޔުނު “ހިލިހިލާ” ކިޔާ ވާހަކައެއް ފެނިގެން ޗެނަލް 13 އިން ގުޅީ އެއަށް ޓީވީ ސީރީޒް ހަދަން. އެއީ އެންމެ ފުރަތަމަ ސްކްރީން ރައިޓިންއަށް ވަދެވުނު ގޮތް. ލިޔެފަ އޮތް ވާހަކަ އަލުން ސްކްރީންޕްލޭ ފޯމެޓަށް ބަދަލު ކުރީ. އެހިސާބުން އެނގުނީ އަސްލު މިކަން ވެސް އެބަ ކުރެވޭކަން. އޭގެ ފަހުން ދެން ފުރުސަތު ލިބުނީ ވީޓީވީގެ ސީރީސް އެއް ލިޔަން. ޝާއްކޮ އައްމަޑޭއާ އައިކިއު އަދި ވާހަކަ.ކޮމްގެ އަބޯގެ ފަރާތުން ވަރަށް ބޮޑު ހެލްޕެއް ލިބުނު.

މިހާތަނަށް ކުރެވުނު އެންމެ ބޮޑު މަސައްކަތް “ބަޅިނދު” ފިލްމަކީ. ޑާކް ރެއިންގެ ދަށުން ޝިނާންގެ ފިލްމަކަށް ސްކްރީންޕްލޭ ލިޔަން ފުރުސަތު ލިބުމަކީ ވަރަށް ބޮޑު ހުވަފެނެއް ހަގީގަތަށް ވުން. ދެން މިހާރު ވެބް ސީރީޒެއްގެ މަސައްކަތް މި ކުރަނީ. ކުރިއަށްވެސް ބޮޑެތި ޕްރޮޖެކްޓްތައް އެބަހުރި ސްކްރީން ރައިޓންގް އިން.

https://www.youtube.com/watch?v=uYHn_rQooZg

ކުއްލިއަކަށް ކަހަލަ ގޮތަކަށް ކެމެރާ ކުރިމަތިން ފެންނަން ފެށީ ކީއްވެގެން؟
އަސްލު ނުވެސް ކެރޭ ކެމެރާ ކުރިމައްޗައް އަރާކަށް. އަމިއްލައަށް އެހާ ފޮޓޯވެސް ނަގާ މީހެއް ނޫން މީކީ. އެކްޓް ކުރުމުގެ އެއްވެސް ޚިޔާލެއްވެސް ނުގެންގުޅެން. ދެން މޮގާ ސަރ ބުނި ބުނުމަކަށް އަސްލު އެކްޓްކުރީ. ހިތަށް އެރީ ޓްރައި ކޮށްލާނަމޭ މިކަން ވެސް ވޭތޯ. ޗެލެންޖެއް ގޮތަށް ޓްރައި ކުރީ.
“ދަޢުވަތު” މިއީ ހޫދު ސްކްރީނުން ފެނުނު ފުރަތަމަ ފެނިލުންތަ؟
ނޫން. އެންމެ ފުރަތަމަ ފެންނާނީ “މާމުއި” ފިލްމްގަ. އެއީ ހަމަ އެންމެ ޝޮޓެއް. އޭގެ ފަހުން ފިލްމު “ނޮވެމްބަރ”ގަ ވެސް ކުޑަ ރޯލަކުން ފެންނާނެ. ލީޑް ކެރެކްޓަރ އެއް ގޮތަށް ފުރަތަމަ ފެންނާނީ “ދައުވަތު”ގަ.

ފިލްމު “މާމުއި” ގެ ޕޯސްޓަރެއް

ކިހިނެއް ”ދަޢުވަތު“ ކުޅެން ފުރުޞަތު ލިބުނީ؟
މޮގަރ ސަރ އެއް ދުވަހު ގުޅާލާފަ ބުނީ ވަރަށް އަވަހަށް ސްޓޫޑިއޯއަށް އަންނަން. އޭރުވެސް ނޭނގެ ކީއްކުރަން ކަމެއް. ސްޓޫޑިއޯ އަށް ދިޔައިމަ ބުނީ ދައުވަތުގެ މި ރޯލް ކުޅޭނަންހޭ. އެންމެ ފުރަތަމަ ނުވެސް ކެރުނު. ދެން ވަރަށް ވިސްނާފަ އެއްބަސްވީ. ސްކްރިޕްޓާ އެއްޗެހި ކިޔައިދިނީމަ އެކްސައިޓް ވީ ބޮޑަށް.
”ދަޢުވަތު“ގަ ކުޅެފައިވާ ރޯލާ ދޭތެރޭގަ ބުނެލާނީ ކީކޭ؟ ހިތްހަމަ ޖެހޭ ފެންވަރަށް އެކްޓްކޮށްލެވުނުތަ؟
ވަރަށް އާ އެކްސްޕީރިއަންސް އެއް އެއީ. ސްކްރީންޕްލޭ އެއްގައި މި ލިޔާ ޑައިލޮގުތައް ކެމެރާ ކުރިމަތީ ޕާރފޯމް ކުރަންވީމަ އެ ކުރެވޭ އިހުސާސް. އޭތި ގެޓުވި. ހިތް ހަމަ ޖެހޭ ކުރެވުނު މަސައްކަތާ ދޭތެރޭ. އެއަށްވުރެ ރަނގަޅަށްވެސް ކުރެވޭނެ. މޮގަރ ސަރއާ ޑައިރެކްޓަރ ޗިއްޕެގެ އެހީތެރިކަން ލިބުނު ވަރަށް ބޮޑަށް. ރައްޓެހިންނާ ގާތް މީހުން ބަލާފަ ބުނި ވަރަށް ރަނގަޅޭ.

ޑާކް ރެއިން ޓީމާއެކު “ހޫދު” – ފޮޓޯ: ޑާކް ރެއިން

“ދަޢުވަތު” ޑްރާމާގަ ޑައިރެކްޓަރ ބޭނުންވާ ފެންވަރަށް ”ޖިނާ”ގެ ކެރެކްޓަރ ހޫދުއަށް ދެއްކުނުތަ؟ ”ޖިނާ”ގެ ރޯލް ހިތްހަމަޖެހޭ ފެންވަރަށް ކުޅެވުނުތަ؟
ޗިއްޕެ ވަރަށް ރަނގަޅަށް ކިޔައިދިން. އަޅުގަނޑު ވަރަށް ޓްރައި ކުރިން ޗިއްޕެ ބޭނުންވި ގޮތަށް ކެރެކްޓަރ ގެނެވޭތޯ. ޗިއްޕެ ހިތްހަމަ ޖެހެންދެން ޝޮޓްތައްވެސް ޖެއްސިން. ޗިއްޕެގެ އެޕްރޫވަލް ލިބުނީމަ ވަރަށް ބޮޑަށް ހިތްހަމަ ޖެހުނު. ދެން ބެލުންތެރިންނަށް އެނގޭނީ ޖަޖްކުރަން.
ސްކްރީނަށް ވެސް ލިޔާ މީހެއްގެ ހައިސިއްޔަތުން، “ދަޢުވަތު”ގެ ސްކްރީންޕްލޭ އާމެދު ބުނާނީ ކީކޭ؟
ދައުވަތަކީ އަސްލު ވަރަށް ކުޑަ ވަގުތުކޮޅެއް ތެރޭ ވަރަށް ވަރުގަދަ ވާހަކައެއް ކިޔައިދޭ ސްކްރީންޕްލޭ އެއް. މީގަ އެކްޓް ކުރަން އެކްސައިޓްވި ސަބަބު އެއީ. ޗިއްޕެ ސްކްރިޕްޓް ނެރޭޓުކުރި އިރުވެސް މީތި ސިފަވި ވަރަށް ރަނގަޅަށް. ޗިއްޕެ ގެ ސަޅި މަސައްކަތެއް މީ.
ޗިއްޕެގެ ޑައިރެކްޝަން ކިހިނެއް؟
ރާއްޖޭގަ ނެރުނު އެންމެ ރަނގަޅު ފިލްމްތަކުގެ ތެރޭގަ ހިމެނޭނެ ޗިއްޕެގެ ޑައިރެކްޝަންތައް. ހާއްސަކޮށް އަދި ޑާކްރެއިންގެ މަސައްކަތްތައް. ޗިއްޕެގެ ޑައިރެކްޝަންގެ ދަށުން މަސައްކަތްކުރަން ލިބުމަކީ ވަރަށް ބޮޑު އުފަލެއް. ޝޫޓިންގެ ކުރިން ޝިފޫ އާ ސުނީ އާ އެއްކޮށް ރިހާސް ކުރި އިރުވެސް ވަރަށް ރަނގަޅަށް ކިޔައިދިން. ލޮކޭޝަންއަށް ގޮއްސަވެސް ކިޔާދޭ. ވަރަށް ފަސޭހަ ޗިއްޕެއާ އެއްކޮށް މަސައްކަތް ކުރަން.
ޑާކް ރެއިން އިން ބެލުންތެރިންނަށް ގެނެސްދޭން ފަށާފައި މިވަނީ ވަރަށް ސަޅި މަސައްކަތެއްދޯ. ޑާކް ރެއިން އާ މެދު ބުނެލާނީ ކީކޭ؟
ރާއްޖޭގަ އެންމެ ކުއަލިޓީ މަސައްކަތްތައް ފެންނަ އެއް ސްޓޯޑިއޯ ޑާކްރެއިން އަކީ. އަބަދުވެސް ބެލުންތެރިންނާ ހިސާބަށް ފިލްމު ނިންމާފަ ގެންދާއިރު އޭގެ ކުއަލިޓީ ޗެކް ކުރާނެ. ފިލްމް ތަކަށް އެކްޓަރުން ވަރަށް ރަނގަޅަށް ތަމްރީން ކުރޭ. ވޯކްޝޮޕްތައް ބާއްވާ. ފިލްމް އިންޑަސްޓްރީއަށް އެންމެ ބޮޑު ކޮންޓްރިބިއުޝަނެއް ދޭ ސްޓޫޑިއޯ އަކީ ޑާކްރެއިން. ބޮޑެތި ކާމިޔާބު ފިލްމްތަކެއް ގެނެސް ދިނުމަށްފަހު، ޑާކްރެއިން ޝޯޓްސް ހިލޭ ބެލޭގޮތަށް ގެނެސްދިނުމަކީ ހަމަ ވަރަށް ސަޅި ކަމެއް. ޑާކްރެއިން އިން ބެލުންތެރިންގެ އަގު ވަޒަން ކުރާކަން އެބަ އެނގޭ މިކަމުންވެސް. އެހެންވީމަ ޑާކްރެއިން އަކީ ހަމަ ނަންބަރ ވަން އަޅުގަނޑަށް.


މި ކުރު ފިލްމުގެ މަސައްކަތާ މެދު އޯވަރޯލްކޮށް ހޫދު ބުނެލާނީ ކީކޭ؟
ރަނގަޅު ތަފާތު އެކްސްޕީރިއަސެއް މީ. އެހެންވެ ވަރަށް ހިތްހަމަ ޖެހޭ. ގަބޫލު ކުރަން މިއަށްވުރެ ރަނގަޅަށް ކުރެވޭނެކަން އަދި.
މި ކުރުފިލްމާ ފިލްމުގެ މަސައްކަތާ މެދު އޯވަރޯލްކޮށް ހޫދު ބުނެލާނީ ކީކޭ؟
ރާއްޖޭގަ އަދި އަލަށް ކަންނޭނެގެ މިގޮތަށް ކުރު ފިލްމްތަކެއް ޔޫޓިއުބް ޗެނަލް މެދުވެރިކޮށް ހިލޭ މި ގެނެސްދެނީ. އެއީ ފާހަގަ ކޮށްލަންޖެހޭ ކަމެއް. ދެން މި ކުރު ފިލްމް ތަކުގެ ކުއަލިޓީ، ބޮޑެތި ފިލްމްތަކަށް ވުރެ ވަކި ދަށެއް ނުވާނެ. ކުރިއަށް އަންނަން ހުރި ބައިތައްވެސް ހަމަ ވަރަށް ސަޅި.
ފިލްމީ ދާއިރާގަ އެކްޓިން އިން ކުރިއަށް އޮތް ދުވަސްތަކުގަވެސް ފެންނާނެތަ؟ ހޫދުގެ ފުރަތަމަ މަސައްކަތް ބަލާފަ ބެލުންތެރިންގެ ފީޑްބެކް ހުރީ ކިހިނެއް؟
އެކްޓިންގ އިން ސީދާ ކުރިއަށް ދާނަމެކޭ ނުބުނާނަން. މީ އަސްލު ކެރިއަރ އެއް ނޫން. ހަމަ ހޮބީއެއް ގޮތަށް މި ކުރަނީ. މީހުންގެ ފީޑްބެކް ވަރަށް ރަނގަޅަށް އައީ. އެންމެންވެސް ބުނޭ ވަރަށް ރަނގަޅޭ. ދެން ރަނގަޅުކޮށްލަން ޖެހޭ ކަންކަންވެސް ފާހަގަކުރޭ.

ނިންމާލަމުން ފާހަގަކޮށްލަން ބޭނުންވާ އިތުރު ކަމަކީ ކޮބާ؟

ޑާކްރެއިން ކަހަލަ ސްޓޫޑިއޯއެއް މެދުވެރިކޮށް ޓެލްންޓް ދައްކަން ފުރުސަތު ލިބުމަކީ އަސްލު ކުޑަ ކަމެއް ނޫން! މޮގަރ ސަރ އަދި ލޯކީ އަށް ވަރަށްބޮޑަށް ޝުކުރު އަދާކުރަން އެކަމަށް. ޑާކްރެއިން ޝޯޓްސްގެ މަސައްކަތަށް ޗިއްޕެއަށް ޝުކުރު އަދާކުރަން. ދެން ބަޅިނދު ކަހަލަ ބޮޑު ފިލްމެއްގެ ސްކްރިޕްޓް ލިޔަން ފުރުސަތު ދިނީތީ ޝިނާންއަށް ވަރަށް ބޮޑަށް ޝުކުރު އަދާކުރަން. ވާހަކަ.ކޮމް އިން ލިޔުންތެރިންގެ ހުނަރުތަކަށް ފުރުސަތުދޭތީ އަބޯ އަށް ވެސް ވަރަށް ބޮޑަށް ޝުކުރު އަދާކުރަން. ދެން އެކި ކަންކަމުގަ ފޯރުކޮށްދޭ އެހީތެރިކަމަށާ ސަޕޯޓަށް އައިކިއު – އިގްބާލް އަށް ވަރަށް ބޮޑަށް ޝުކުރިއްޔާ. ދެން މިގޮތަށް ޝުކުރު އަދާ ކުރަން ޖެހޭ ބައިވަރު މީހުން އެބަތިބި. އެ އެންމެންގެ އަގުވެސް ވަޒަން ކުރަން ވަރަށް ބޮޑަށް.
މުނިއަވަސްގެ މަސައްކަތާ ދޭތެރޭގަ ހޫދު ދެކެނީ ކިހިނެއް؟
ދިވެހި ފިލްމް އިންޑަސްޓްރީގެ ޚަބަރުތަކާއި އަޕްޑޭޓްތައް އެންމެ އަވަހަށް އިތުބާރާއެކު ގެނެސްދޭ ތަނަކީ މުނިއަވަސް. ފިލްމް ތަކުގެ މަޢުލޫމާތުތައް ބެލުންތެރިންނާ ހަމައަށް ގެންގޮސްދޭން ތިޔަ ކުރާ މަސައްކަތަށް ހަމަ ވަރަށް ބޮޑަށް ޝުކުރިއްޔާ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: