މަރިޔަމް ވަހީދާ އަކީ ދުޅަހެޔޮ ސިއްޙަތެއްގައި ހުންނެވުމަށް ބަރާބަރަށް މިހާރުވެސް ކަސްތަރަތު ކުރައްވާ ބޭފުޅެކެވެ. ދުވުވެޑައިގެންނެވުމަކީ ވެސް މަރިޔަމް ކުރައްވަމުން ގެންދަވާ ކަަމެކެވެ. އެގޮތުން މެރަތަން ތަކުގަައި ދުވުމަކީ މަރިޔަމް ކުރައްވަމުން ގެންދަވާ ވަރަށް ލާމަސީލު ކަމެކެވެ. ނިމިގެން މިދާ ޑިސެމްބަރު މަހުގެ 24 ވަނަ ދުވަހު ތައިލެންޑް ގެ ޗިއަންގް މައި ގައި ކޮންމެ އަހަރަކު ބާއްވާ ‘މުއަންގް ތައި ޗިއަންގް މައި މެރަތަން 2017‘ ގައި ހާފް މެރަތަން ގައި މަރިޔަމް ކުރެއްވެވި ހިތްވަރަކީ ފާާހަގަކޮށްނުލައި ދޫކޮށްލެވޭ ވަރުގެ ކަމެއް ނޫނެވެ. 

ދުވުމުގައި ރާއްޖެއިން ބައިވެރިވީ 12 މީހުން – ފޮޓޯ: މަރިޔަމް

މި ދުވުމުގައި މަރިޔަމް ބައިވެރިވެލެއްވި ގޮތާއި ބެހޭގޮތުން މަޢުލޫމާތު އޮޅުންފިލުވައިލީމެވެ. މަރިޔަމް ވިދާޅުވީ މި މެރަތަން ގައި އެންމެ ފުރަތަމަ ބައިވެރިވެލެއްވީ 2016 ވަނަ އަހަރު އެވެ. އެއީ މަރިޔަމް ކަސްރަތު ކުރައްވަވަން ވަޑައިގަންނަވާ ޓީއެފްޖީ ޖިމް ގެ ފަރާތުން ލިބިލެއްވި ފުރުޞަތެކެވެ.

“ފުރަތަމަވެސް ދުވީ10 ކިލޯމީޓަރު.” 2016 ވަނަ އަހަރު މި ދުވުމުގައި ބައްވެރިވެލެއްވި ގޮތް އޮޅުންފިލުވައިދެއްވަމުން މަރިޔަމް ފާހަގަ ކުރެއްވި އެވެ. މީގެ އިތުރަށް މިދިޔަ ރޯދަމަހު ޓީއެފްޖީ އިން ބޭއްވި ރޯދަ ޗެލެންޖުގައި އެކި ރޭރެޔަށް ބަހާލައިގެން 222 ކިލޯމީޓަރަށް ދުވުނު ކަމަށްވެސް މަރިޔަމް ވިދާޅުވިއެވެ. ވޭތިވެދިޔަ ދެ އަހަރު ތެރޭގައި ވަރަށް ގިނަ ފަހަރަށް ދުވުންތަކުގައި ބައިވެރިވެލެއްވި މަރިޔަމް އަކީ އަބަދުވެސް ދުޅަހެޔޮ ސިއްޙަތެއްގައި ހުންނެވުމަށް ބަރާބަރަށް ކަސްރަތު ކުރައްވަމުން ގެންދަވާ ބޭފުޅެކެވެ. މަރިޔަމް ވިދާޅުވީ ހަފުތާގެ ހަ ދުވަހު، ހައެއް ނުވަތަ ހަތް ކިލޯމީޓަރަށް ދުވެލައްވާ ކަމަށެވެ.