”ބިޔަ ބޮޑު ރާޅެއް. ވިލިމާލެއެއްވެސް ނުފެނޭ!!” އެ ވަގުތު ޓީޖެޓީ ސަރަހައްދު ހުރެ އަޅުގަނޑަށް ބުނެވުނެވެ. އެވަގުތު ހާބަރުގައި ހުރި ކަޑަތަކުގެ މޭޒުތަކާ ގޮނޑިތަކާ އެ ސަރަހައްދުގައި ޕާކުކޮށްފައި ހުރި ކާރުތައްވެސް މާލެއަށް ބިންދާލި ބޮޑު ރާޅަަކާއެކު އޮޔާދާތީ އަޅުގަނޑަށް ފެނުނެވެ. މިއީ ދުވަހަކުވެސް ނުދެކޭފަދަ އާދަޔާޚިލާފު ބިރުވެރި ކަމެއްކަމަށް އަޅުގަނޑުގެ ހިތަށް ވެރިވިއެވެ. އެކަމުގެ ބިރު ހީވާން ފެށިއެވެ.

އަޅުގަނޑަކީ އެ ވަގުތު ޑިއުޓީގައި އެ ސަރަހައްދުގައި ހަރަކާތްތެރިވި މީހެއްކަމުން ޓީޖެޓީ ސަރަހައްދަށް ނިކުމެ ވެގެން އުޅޭގޮތެއް ރަނގަޅަށް ބަލާލީމެވެ. ކަމަކު ދާކަށް ނެތެވެ. އަރައިގެން އައި ބިޔަ ރާޅާއެކީ މުޅި އެސަރަހައްދު ވަނީ ސުންނާފަތިކޮށް އެފުށް މިފުށަށް ޖަހާފައެވެ. ޓީޖެޓީ ސަރަހައްދުގައި އަޅާފައިހުރި ދޯނިތައްވެސް ވަނީ ޖެޓީ މަތިން އެއްގަމަށް އަރާފައެވެ. ހީވަނީ ބަޔަކު އެ ދޯނިތައް އެހެލާފައި ހުރި ހެންނެވެ. ހިތަށް ބިރުވެރިކަން ވަން ނަމަވެސް ކެތްތެރިކަމާއެކު އެ ސަރަހައްދުގައި ހަރަކާތްތެރިވަމުން ގެންދިޔައީމެވެ. ޖެޓީ ސަރަހައްދުގެ މޫދަށް ބަލައި ވަގުތު ކަމަކުދާކަށް ނެތެވެ. އެވަގުތު ލޮނުގަނޑު ހިނދި މޫދުގެ އަޑި ފެންނަން އޮތް ނަމަވެސް ކުއްލިއަކަށް ދެ ވަނަ ރާޅެއް ބޯމަތި ކޮށްލަން އުޅޭހެން ހީވިއެވެ. ހިކިފައިވާ ލޮނުގަނޑު ހަމަ ކުއްލިއަކަށް އުފުލިގެން ދިޔަތަން އަޅުގަނޑުގެ ލޮލުން ވެސް ދުށީމެވެ. އޭރު މާލެއާއި ކައިރީގައި އޮތް ވިލިމާލެވެސް ވަނީ ލޮނުގަނދުގެ އަޑީގައި ކަމަށް ހީކުރެވުނެވެ. ވިލިމާލެއެއް ވެސް ނުފެނުނެވެ.

ރަށުގައި ތިބި އަޅުގަނޑުގެ އާއިލާގެ ހާލަކީ ކޮބައިތޯ ބަލަން ވަގުތުން ފޯނުނެގީމެވެ. ނަަމަވެސް ދިރާގު ރޭންޖު ވަނީ ކެނޑިފައެވެ. މައިންބަފައިންގެ ހާލަކީ ކޮބައިތޯ ބަލައިލަން ގުޅޭނެ ގޮތެއްވެސް ނެތެވެ. މިއީ 2004 ޑިސެންބަރު މަހުގެ 26 ވަނަ ދުވަހުގެ ހެނދުނު ގަޑިން 9:20 ގައި މުޅި ރާއްޖެއަށް ކުރިމަތިވި ބިރުވެރި ސުނާމީ ހާދިސާގައި އަޅުގަނޑަށް ފެނުނު މަންޒަރެވެ. ނަމަވެސް ރަށްފުށުގެ ހާލަކީ ކޮބައިތޯއެވެ.

މީގެ 16 އަހަރު ކުރިން ރާއްޖެއަށް ކުރިމަތިވި ސުނާމީ ކާރިސާގައި ރާއްޖޭގެ ހުރިހާ ރަށަކަށްވެސް އަސަރުކުރިއެވެ. އެ ބިޔަ ރާޅުގެ ދަށުވެ ބައެއް ރަށްރަށް ސުންނާފަތިވެ މީހުން ނޫޅެވޭ ވަރު ވިއެވެ. ދިވެހިންގެ އެތައް ބައެއްގެ ފުރާނައަށް ނުރައްކާވެ ރާޅުގެ ދަށުލައި އެއްބަޔަކު ވަނީ މި ދުނިޔެއާއި އަލްވަދާއު ކިޔާފައެވެ. އާއިލާއާ ރައްޓެހީންގެ ކުރިމަތީގައެވެ. އެ މީހުން ލޯތައް ކަރުނުން ފޯކޮށްފައެވެ. މަންމަގެ އަތުން ދަރިފުޅު ބީވެ، ދަރިންގެ ކުރިމަތީ މަންމަ ނުވަތަ އާއިލާގެ ކޮންމެވެސް ކުއްޖަކު ނުވަތަ މީހަކު ދުނިޔެ ދޫކުރި ޚަބަރު ތަކަކީ ދުވަހަކުވެސް ހިތުން ފިލާނޭ ޚަބަރުތަކެއް ނޫނެވެ.

އެދުވަހު މައިންނާއި ދަރިން ރުއި ރުއިމަކީ ކެތްކުރަން ދަތި ހަނދާންތަކެވެ. މިއަދު އަޅުގަނޑުމެން ކިތަންމެ ވަރަކަށް އެހަނދާންތަކުން ދުރުވާން މަސައްކަތް ކުރި ނަމަވެސް އެ ދުވަސް ފެނުނު ކޮންމެ މީހެއްގެ ހިތުންވެސް އެ ދުވަހުގެ ހަނދާންތައް ފޮހެވިގެން ނުދާނެކަން ކަށަވަރެވެ. އެއީ ދުވަހަކުވެސް ހިތުން ފިލާނޭ ދުވަހެއް ނޫނެވެ. އެހެނީ އެ ދުވަހުގެ ހަނދާންތައް ވަނީ ރާއްޖޭގެ އެކި ކަންކޮޅުތަކުގައި ތިއްބަވާ އެތައް ހާސް ދިވެހިންނަކާއި ގުޅިފައެވެ.

ބައެއް ރަށްރަށް ސުނާމީ އަރައި ގެދޮރު ބިމާ ހަމަވެގެން ދިއުމުން އާއިލާތައް ހާލުގައި ޖެހި އެތައް ދުވަހަކަށް މަގުމަތި ވިއެެވެ. ބައެއް ރަށްރަށް ފަޅުކޮށް އެހެން ރަށްރަށަށް ހިޖުރަކުރި މީހުންވެސް ވަކި މަދެއް ނޫނެވެ. ވަކިން ހާއްޞަކޮށް ރ. ކަނދޮޅުދުއަކީ އެ ދުވަހަށް ފަހު ފަޅު ރަށެއްކަން ފާހަގަ ކުރެވޭ ރަށެކެވެ.

އެ ބިރުވެރި ދުވަހު ރާއްޖެއަށް ކުރިމަތިވި ސުނާމީގެ ސަބަބުން މިއަދު މި ވަނީ އިބުރަތްތެެރި އެތައް ފިލާވަޅެއް ލިބިފައެވެ. ކޮންމެ މީހަކީވެސް އަނެކާގެ އެހީތެރިކަން ބޭނުންވާނެ މީހެއްކަން ނުވަތަ ބައެއްކަން އެ ދުވަހަށްފަހު ހަނދާނަށް އާދެއެވެ. އެހެންކަމުން އެ ދުވަސް މިއަދު އަޅުގަނޑުމެން ފާހަގަ ކުރަމުން މިދަނީ ރާއްޖޭގެ އެއްބައިވަންތަ ކަމުގެ ދުވަހެއްގެ ގޮތުގައެވެ. އިންޝާﷲ އެފަދަ ބިރުވެރި ދުވަހެއް އަޅުގަނޑުމެންނަށް ނުދައްކަވާށިއެވެ. އާމީން.

ލިޔުންތެރިޔާގެ ފުރަމަލަ

އަޙްމަދު ނާފިޢު
ޢިބްރަތްތެެރި ވާހަކައާއި ބަހާއި އަދަބުގެ ޢިލްމީ ލިޔުންތައް ނާފިޢު ލިޔާނެއެވެ.

ގުޅުންހުރި ލިޔުން: