ސިއްސައިގެންގޮސް ހޭލެވުމާއެކު ގަޑި ބަލައިލެވުނެވެ. އޭރު ގަޑިން ހެނދުނު 6 ޖަހަނީއެވެ. ކޮޑުގައި ދަބަސް އަޅުވައިގެން ދުވެފައި ކަހަލަ ގޮތަށް ދިޔައީ ފުރާގަޑި ޖެހޭތީއެވެ. ފުރުމަށް ހަމަޖެހިފައިވަނީ ހެނދުނު 6 ޖަހާއިރު އެވެ. ދެ ނަމްބަރު ފާލަން ކައިރިއަށް ދެވުނު އިރު ފުރާ ގަޑި ޖެހިއްޖެއެވެ. ނަމަވެސް ދަތުރުގެ އެއްވެސް ބައިވެރިއެއަކު ފެންނާކަށް ނެތެވެ. އެވަގުތު ވަރަށް ހާސްވިއެވެ. ހިތަށް އެރިއެވެ. ލޯންޗް ފުރައިގެން ދިޔައީ ބާވައެވެ. ނަމަވެސް ދުނިޔޭގެ ތަރިކައިގެ ދުވަސް ފާހަގަކުރުމަށް މާލެއިން ފެންފުއްޓަށް ދިއުމަށް ދަޢުވަތު އެރުވިފައިވާ މީހުންގެ ލިސްޓްގައި އަޅުގަނޑުގެ ނަން ހިމެނެއެވެ. އެއީ 2015 އެޕްރީލް 19ވީ ހޮނިހިރު ދުވަހެވެ.

ފާލަން ކައިރީގައި ހުންނަތާ 15 ވަރަކަށް މިނެޓް ވެއްޖެއެވެ. އިރުކޮޅެއް ނުވެ ދަތުރުގެ ބައިވެރިންގެ ތެރެއިން އިސް ބޭފުޅަކު އައިސް އަޅުގަނޑަށް ގޮވާލިއެވެ. އަދި މިހާރު ފުރުމަށް ހަމަޖެހިފައިވަނީ 4 ނަމްބަރު ޖެޓީން ކަމަށާއި، އަވަހަށް އެ ޖެޓީދޮށަށް ދިއުމަށް އެންގިއެވެ. މިހެން އެންގުމާއިއެކު ދުވެފައި 4 ނަމްބަރު ޖެޓީ ދޮށަށް ދިޔައީމެވެ. ދިޔައިރު ކަމަކުދާކަށް ނެތެވެ. ދަތުރުގެ އެންމެހާ ބައިވެރިން ލޯންޗަށް އަރައި ހަމަ ވެއްޖެއެވެ. ދަތުރު ދިއުމަށް ހަމަޖެހިފައިވާ މި ލޯންޗަކީ އެމްޓީސީސީ ލޯންޗެކެވެ. މި ލޯންޗަކީ ފަޅުވެރިންނާއެކު 25 މީހުންގެ ޖާގައިގެ ލޯންޗެކެވެ. އަޅުގަނޑު ލޯންޗަށް އެރުމާއެކު ލޯންޗުގެ ފަޅުވެރިން ވާ މޮހާލައި މާލޭ ފަޅުން ލޯންޗް ނައްޓާލިއެވެ. އަދި ފެންފުއްޓަށް ދިއުމަށް މިސްރާބު ޖެހިއެވެ.

ދުވަހަކީ ކަނޑުމަޑު ހިތްގައިމު ދުވަހެކެވެ. މިދަތުރުގައި އެންމެ އިސް ބޭފުޅަކީ އެޑިއުކޭޝަންގެ ޑެޕިއުޓީ މިނިސްޓަރ ޔުމްނާ މައުމޫނެވެ. ދެން ތިއްބެވީ ދަޢުވަތު އެރުވިގެން މި ދަތުރުގައި ބައިވެރިވެ ވަޑައިގަންނަވާ ބޭފުޅުންނެވެ. އަޅުގަނޑާއެކު ޖުމުލަ 23 ބޭފުޅުން މި ލޯންޗުން ފެންފުއްޓަށް ދިއުމަށް ދަތުރު ކުރިއެވެ.

ޖެހެމުންދިޔަ މަޑު ވައިރޯޅިއާއެކު ދަތުރުމަތީގައި އެކަކު އަނެކަކަށް ހީ ސަމާސާކޮށް އުޅެއެވެ. ނަމަވެސް ބަނޑުހައިވެފައި ހުރި ވަރުން މާބޮޑަށް ސަކަރާތް ޖަހާ ހިތެއް އަޅުގަނޑެއް ނުވިއެވެ. އަޅުގަނޑު އިނީ ލޯންޗްގެ ފަހަތު ސީޓްގައެވެ. ލޯންޗް ދުއްވަމުން ދާއިރު ފެންނަމުންދާ ހިތްގައިމު މަންޒަރުތައް ބަލާލުމަށެވެ. ގާތްގަޑަކަށް ގަޑިއެއްހާއިރު ތެރޭގައި އދ. އަތޮޅަށް ލޯންޗް ވަދެއްޖެއެވެ. ވަށައިގެން ފެންނަނީ އެއަތޮޅުގެ ހިތްގައިމު ރަށްތަކެވެ. އެންމެ ފުރަތަމަ ހަންޏާމީދޫ އެވެ. އެއަށްފަހު އެއަތޮޅުގައި މީހުން އުޅޭ އެހެން ރަށްރަށާއި ހިތްގައިމު ރިސޯޓްތަކުގެ މަލަމަތި ފެންނަމުން ދެއެވެ. ބާރު ސްޕީޑްގައި ލޯންޗު ދުއްވަމުން ދިޔަވަރަކަށް އިތުރު ރަށްރަށުގެ މަލަތައް ފެންނަމުންދެއެވެ. ދިއްދުއާއި ދިގުރަށެވެ. އެއަށްފަހު މާމިގިއްޔެވެ. މާމިގިއްޔާއި ޖެހިގެން ދެން އޮތް ރަށަކީ އަޅުގަނޑުމެން މިދަތުރުގެ ބައިވެރިން ދިއުމަށް ހަމަޖެހިފައިވާ މަންޒިލްކަމަށްވާ ފެންފުށްޓެވެ. ފެންފުއްޓާއި މާމިގިއްޔާއި ސަން އައިލެންޑް ރިސޯޓްވެސް އޮންނަނީ އެއް ފަޅެއްގައެވެ.

ކަނޑުމަތީގައި ދެ ގަޑިއިރެއްހާއިރު ހޭދަކުރުމަށްފަހު ފެންފުށި ނެރުން ލޯންޗް ވަދެއްޖެއެވެ. އޭރު މާލެއިން ފެންފުއްޓަށް ޒިޔާރަތްކުރާ މެހްމާނުންގެ ޝަރަފްގައި ރަށުގެ ކުދިބޮޑު އެންމެހާ ރައްޔިތުން ނިކުމެ ތިއްބެއެވެ. ސަޤާފީ ހެދުމުގައެވެ. ޤައުމީ ދިދައާއި މާފަތިތައް ހިފައިގެންނެވެ.

ރަށުގެ ޖެޓީކޮޅަށް ލޯންޗް ކައިރިކޮށް މިދަތުރުގެ ޝަރަފްވެރި މެޚްމާން ފައިބާ ވަޑައިގެންނެވުމާއެކު އިސްތިޤްބާލުގައި ތިއްބެވި އެރަށުގެ ކުދިބޮޑު އެންމެހާ ރައްޔިތުންގެ އަތްތިލަބަޑިން ގުގުމާލިއެވެ. އެއަށްފަހު ފަހަރަކު ބޭފުޅަކު ލޯންޗުން ފޭބުމަށްފަހު ރަށުގެ ކުދި ބޮޑު އެންމެނާ ސަލާން ކުރައްވަމުން ގެންދެވިއެވެ. ސަލާންކޮށް ނިމުމުން މެހްމާނުންނަށް ހާއްޞަ ކުރެވިފައިވާ ސަރަހައްދެއްގައި ދަތުރުގެ އެންމެހައި ބައިވެރިން މަޑުކޮށްލެއްވިއެވެ. އަޅުގަނޑުވެސް ދަތުރުގެ ބައިވެރިންނާއެކު އެ ސަރަހައްދުގައި ހުރި ގޮޑިއެއްގައި އިށީނީމެވެ. އެއަށްފަހު ކުރުނބާފޮދު ހިއްޕަވަން ފެށުމާއެކު ރަށުގެ ޒުވާން އަންހެން ކުދިންތަކެއް ފަރި ހިނގުމެއްގައި އައިސް ދަތުރުގެ ބައިވެރިންގެ ޝަރަފުގައި ސަޤާފީ ނެށުމެއް ހުށަހަޅައިދިނެވެ.

އަޅުގަނޑުމެން އެތަނުގައި އިރުކޮޅަކު ތިބުމަށްފަހު ދެންދިޔައީ މެހްމާނުންގެ ޝަރަފުގައި ހެނދުނުގެ ނާސްތާ ތައްޔާރުކޮށްފައިވާ ހަރުގެއަށެވެ. ހަރުގޭގައި ސައިފޮދު އެރުވުމުގައިވެސް ވަރަށް އަވަދި ނެތި ފެންފުށީގެ އަންހެން ކަނބަލުން ހަރަކާތްތެރިވަމުން ދެއެވެ. އަޅުގަނޑު ހުރީ ސައިފޮދު އިންސާފްކުރަން ވެސް ނޭގި ކުޅުދިޔާވެފައެވެ. ތަށިމަތީގައި ހުރި ސާމާނުތައް ގިނަ ކަމުން ފުރަތަމަ ކާންވީ ކޮންއެއްޗެއްކަންވެސް އަޅުގަނޑަކަށް ނޭގެއެވެ. އެހެންވެ ފަހަރަކު އެއްޗެއްގެ ރަހަ ބަލާލީމެވެ. ނަމަވެސް އަޅުގަނޑަކީ ހިކިތޮޅިކޮށް ހުންނަ މީހެއްކަމުން ގޮހޮރުގައި މާބޮޑު ޖާގައެއް ނެތުމާއެކު ވަގުތުން ފުލްވިއެވެ.

ހެނދުނުގެ ނާސްތާ ނިންމާލުމަށްފަހު މިދަތުރުގައި ފެންވަރާލައި ވަރުބަލި ފިލުވާލުމަށް ހަމަޖެހިފައިވާ ގެއަށް ދިއުމަށް އެރަށުގެ ޒުވާން ފުރައިގެ އަންހެން ކުއްޖެއްގެ ފަހަތުން ދިޔައީމެވެ. ގޮސް އެކޮޓަރިއަށް ވަނުމާއެކު އެ އަންހެން ކުއްޖާ މިދަތުރުގެ ޝެޑިއުލް އަޅުގަނޑަށް އެރުވިއެވެ. އަދި ޝެޑިއުލް އާއި އެއްގޮތަށް މިއަދުގެ ކަންކަން ކުރިއަށް ގެންދިއުމަށް ހަމަޖެހިފައިވާކަމަށް އެކުއްޖާ ބުންޏެވެ. ޝެޑިއުލްގައި ދެން އޮތީ އެދުވަހުގެ ހެނދުނު 10 ޖަހާއިރު ފެންފުށީ ހުކުރު މިސްކިތް ބަލައިލަން ޒިޔާރަތް ކުރުމުވެ. އެހެންކަމުން 10 ޖަހަން ގަޑީގެ ފައިކަށި ކުރުކޮށްފައިވުމުން އަވަސް އަވަހަށް ފާހާނާއަށް ވަދެ ފެންވަރާލައިގެން ނިކުމެ ފެންފުށީ މިސްކިތް ފެނޭތޯ ރަށުތެރެއަށް ނިކުތީމެވެ.

ފެންފުއްޓަކީ ކުޑަ ރަށެކެވެ. މީސްކޮޅު މަދު ރަށެކެވެ. މިރަށް މަޝްހޫރުވެފައިވަނީ ވެލިގަލުގެ މަސައްކަތްކުރާ ރަށެއްގެ ގޮތުގައެވެ. އެހެންކަމުން މިރަށުގެ ގިނަ އިމާރާތްތައްވެސް ޑިޒައިންކޮށްފައިވަނީ ވެލިގަލުންނެވެ. ދުވަސްވީ ޢިމަރާތްތަކުގައި ވެލިގަލުން ކަނޑާނަގާފައިވާ ފާރުތައްވެސް ފެނެއެެވެ. ރަށުގެ އެކިއެކި ތަންތަން ބަލަމުންގޮސް އަޅުގަނޑަށް ހުއްޓެވުނީ ފެންފުށީ ހުކުރު މިސްކިތް ދޮށަށެވެ. އޭރު ދަތުރުގެ އެންމެހާ ބައިވެރިން މިސްކިތް ބަލާލުމަށް އައިސްތިއްބެވެ. ރަށު ކައުންސިލާއި ރަށުގެ ކަމުވޮށިގެންވާ މީހުންނާއި އެކުގައެވެ. މާގިނައިރުތަކެއް ނުވެ މިސްކިތް ބަލާލުމަށް މިސްކިތުގެ އެކި ކޮޅުކޮޅު މަތީގައި ދަތުރުގެ ބައިވެރިން ހަރަކާތްތެރިވަމުންދެއެވެ. އަޅުގަނޑުވެސް ދަތުރުގެ ބައިވެރިންނާއެކު މިސްކިތުގެ ހަރިންމަ ތެރެއަށް ވަނީމެވެ. މި މިސްކިތް ހުންނަނީ އެރަށުގެ ކުރީގެ ގަބުރުސްތާނު ތެރޭގައެވެ. މިސްކިތުގެ އިންފާރުތެރޭގައި ކުޑަ މިސްކިތެއް ވެސް ހުއްޓެވެ. މި މިސްކިތަކީ ކުރެހުން ނެތި ހިރިގަލުން ހަދައިފައިވާ ހުރި މިސްކިތެކެވެ. މަޢުލޫމާތު ލިބިފައިވާގޮތުގައި މި މިސްކިތް ވަނީ ދުނިޔޭގެ ތަރިކައިގެ ލިސްޓުގައި ހިމަނާފައެވެ.

މިސްކިތް ބަލާލުމަށްފަހު މެންދުރު ނަމާދުކޮށްލައިގެން ދަތުރުގެ އެންމެހާ ބައިވެރިން ދެންދިޔައީ މެންދުރުގެ ކެއުމަށް އިންސާފްކުރާށެވެ. މެންދުރުގެ ކެއުން ހަމަޖެހިފައިވަނީ ފެންފުށީ ސްކޫލްގައެވެ. އަޅުގަނޑުމެން ފެންފުށީ ސްކޫލްގެ ހޯލްތެރެއަށް ވަނުމާއެކު ފެންފުށީ އަންހެން ކަނބަލުން އަޅުގަނޑުމެންގެ އިސްތިޤުބާލުގައި ތިއްބެއެވެ. ހޯލަށް ވަނުމާއެކު އެވަގުތު އަޅުގަނޑަށް ލިބުނީ އިތުރު ހައިރާންކަމެވެ. ކެއުން ތައްޔާރުކޮށްފައި ވަނީ އެއްވެސް މޭޒެއް ގޮޑިއެއް ބޭނުން ނުކޮށެވެ. ހޯލުތެރޭގައި ވަނީ ކަށިކެޔޮ ފަތުން ވިޔެފައިވާ ސަޓާތަކެއް އަޅާ އެ ސަޓާތަކުގެ މަތީގައި ތަށިތައް ބަރިބަރިއަށް އަތުރާލާފައެވެ. ހައިރާންކަމާއެކު ތަށިތަކަށް ބަލަހައްޓައިގެން އަޅުގަނޑަށް ހުރެވުނެވެ. އެވަގުތު ރަށުގެ ހަރުފުރައިގެ ބޭފުޅަކު އައިސް އަތުން އިޝާރާތްކޮށް ކޭމެއްގައި އިށީނުމަށް ބުންޏެވެ. އެހިސާބުން މީ އިހުގައި ދިވެހިން ކޭން ތައްޔާރުކޮށްފައި ހުންނަ ގޮތްކަން އަޅުގަނޑަށް އެނގުނެވެ. ކާން އިށީއިނދެ ތިބެން ޖެހެނީވެސް ވަކި ގޮތަކަށެވެ. އެހެންކަމުން އެހެން މީހުން ފަދައިން ކޭންދޮށަށް ލެފި ދެފައި ވައްކޮށްލައިގެން އިށީދެއްޖައީމެވެ. އަޅުގަނޑުމެންގެ ކޭމުގައި ތިއްބެވީ ދަތުރުގެ ބައިވެރިންނާއި ރަށުގެ އިއްޒަތްތެރިންނެވެ. އަޅުގަނޑާއި ޖެހިގެން އިންނެވީ ޔުމްނާ މައުމޫނެވެ. އަޅުގަނޑު ކޭމުގައި އިންގޮތުން ޔުމްނާ ހިނިފުޅު ވެޑުވިއެވެ. އަދި އަޅަގަނޑަށް އިޝާރާތްކޮށް ތަންކޮޅެއް ރީތިކޮށް އިހުގެ މީހުން އިށީއިނދެ ތިބޭގޮތަށް ދެފައި ވަށްކޮށްލައިގެން އިށީންނަވާށޭ އެކަމަނާ ވިދާޅުވިއެވެ. އެހެންކަމުން ޔުމްނާ ވިދާޅުވިގޮތަށް އަޅުގަނޑު އިށީންނަށް ފައިވަށްކޮށްލި ތަނާ އަޅުގަނޑު ލައިގެން ހުރި ޖިންސުން ބާރު އަޑުފައްގަނޑެއް އިވުނެވެ. އެންމެން އަޅުގަނޑާއި ދިމާލަށް ބަލައި ހޭންފެށިއެވެ. ހޭންފެށުމާއެކު އަޅުގަނޑު ގުދުވެފައި ރަނގަޅަށް ބަލާލިއިރު ކަމަކުދާކަށް ނެތެވެ. އަޅުގަނޑު ލައިގެންހުރި ޖިންސްގެ ކައްގަނޑުން ތަންކޮޅެއް ވަނީ އިރައިގެން ގޮސްފައެވެ. ނަމަވެސް ބަރަހަނާއެއް ނުވެއެވެ. އެހެންވެ ވަރަށް ލަދުން ހުރެ އެތަން ނުފެންނާނޭހެން ލައިގެން ހުރިގަމީސް ދަމާލުމަށްފަހު އެތަން ފޮރުވާލީމެވެ. އަދި ރަނގަޅަށް ހަމަޖެހިލައި ތަށިމައްޗަށް ބަލައިލީމެވެ.

މި ކޭމުގައި ވަރަށް ގިނަ އިހުގެ ދިވެހި ކެއުންތަކާއި ލުއި ކާނާތައް ހުއްޓެވެ. އެތަނުން ބޮޑު މަލާފަތުގައި ހުރީ ބަތެވެ. ދެންހުރީ ދިވެހި ކުކުޅެވެ. ތަފާތު ވައްތަރުގެ ދިވެހި ބޮޑިބަތާއި، އަސާރައެވެ. އިހުގެ ކަނަމަދު ރޮށިގަނޑާއި، ތަފާތު ވައްތަރު ވައްތަރުގެ ކުޅި ކާއެއްޗެއްސާއި ފޮނިކާއެއްޗެއްސެވެ. ގިނައީ ނަން ވެސް ނޭގޭ އިހުގެ ބާވަތްތަކެވެ. ބަލާކަށް ނުހުރެ އެއިން ކޮންމެ އެއްޗަކުން ރަހަ ބަލަން ފަށައިފީމެވެ. މީރުކަމުން ބުނާނެއް އެއްޗެއްްވެސް ނޭގެއެވެ.

ހުރިހާ އެއްޗެއްގެ ރަހަބަލައި ކޮންމެ ވައްތަރަކުން އެތިކޮޅެއް ކާލިއިރު ބަނޑު ފުރިއްޖެއެވެ. އިތުރަށް ކާން ބޭނުންވި ނަމަވެސް ބަނޑަކު ޖާގައެއް ނެތެވެ. އެހެންވެ ކެއުން ނިންމާލައިފީމެވެ. އެކަމަކުވެސް މީރުކަމުން އެ ކޭންދޮށުން ތެދުވެގެން ދާހިތެއް ނުވިއެވެ. ނަމަވެސް ދަތުރުގެ ބައިވެރިން ކެއުން ނިންމާލުމަށްފަހު އެނބުރި ކަނޑައެޅިފައިވާ ގެއަށް ދާން މިސްރާބުޖެހުމުން އަޅުގަނޑުވެސް ގެއަށްދާން ތެދުވެ ހިނގައިގެންފީމެވެ.

ވަރުބަލިވެފައި ހުރި ވަރުން ގެއަށް ދެވުނީވެސް ލަސް ހިނގުމެއްގައެވެ. ގެއަށްގޮސް ފެންވަރާލައިގެން މާލެއިން އަންނަމުން ގެނައި އިހުގެ ބޮޑުގިރުވާން ލީ ގަމީހެއްލައި ދަށުން ފޭލި އަދެލީމެވެ. އަދި ގަޑިއަށް ބަލާލީމެވެ. އޭރު ގަޑިން ދޭއް ޖަހަނީއެވެ. ދޭއް ޖަހާއިރު ފެށުމަށް ހަމަޖެހިފައި އޮތީ ދުނިޔޭގެ ތަރިކައިގެ ދުވަހުގެ ހާއްޞަ ޖަލްސާއެވެ. މިޖަލްސާގައި ބައިވެރިވެ ވަޑައިގަންނަވާ ހުރިހާ ބޭފުޅުންވެސް ތުރުކުރައްވަން ޖެހެނީ ސަޤާފީ ހެދުމެކެވެ. އަޅުގަނޑު ތައްޔާރުވެގެން ޖަލްސާ ބޭއްވުމަށް ހަމަޖެހިފައިވާ ފެންފުށީ ސްކޫލް ހޯލްގެ ޖަލްސާކުރާ މާލަށް ދިއުމަށް މިސްރާބް ޖަހައިފީމެވެ.

ޖަލްސާކުރާ މާލަމަށް ވަތްއިރު ދަތުރުގެ ހުރިހާ ބައިވެރިންނާއި ރަށުގެ ކުދިބޮޑު އެންމެހާ ރައްޔިތުން ސަޤާފީ ހެދުމުގައި ޖަލްސާކުރާ މާލަމަށް ވަދެ އެބަޔަކަށް ކަނޑައެޅިފައިވާ ގޮޑީގައި އިށީންނަމުން ގެންދެއެވެ. އަޅުގަނޑުވެސް އަޅުގަނޑަށް ކަނޑައެޅިފައިވާ ގޮޑީގައި އިށީނީމެވެ.

ދުނިޔޭގެ ތަރިކައިގެ ދުވަސް 2015 ފާހަގަކުރުން ފެންފުށީގައި – ފޮޓޯ: އެމްއޯއީ

މާގިނައިރުތަކެއް ނުވެ، ފެންފުށީ ޒުވާނުންގެ ސަޤާފީ އައިޓަމްތަކާއިއެކު ރަސްމިއްޔާތު ފެށިއްޖެއެވެ. ފުރަތަމަ އޮތީ ޖަލްސާ ތަޢާރަފްކުރުމެވެ. އެއަށްފަހު ފެންފުށީ ޒުވާނުންގެ ސަޤާފީ ހަރަކާތެކެވެ. އެއަށްފަހު ޝަރަފްވެރި މެހްމާން ދުނިޔޭގެ ތަރިކައިގެ ދުވަހާއި ގުޅިގެން ދައްކަވާ ވާހަކަފުޅެވެ. އެއަށްފަހު ފެންފުށީ ސްކޫލްގެ ދަރިވަރުންގެ އައިޓަމްތަކާއި ޖަލްސާ ނިންމާލިއެވެ. ގާތްގަނޑަކަށް ދެ ގަޑިއިރުގެ ޖަލްސާއަކަށްފަހު ނިމިގެން ގެއަށް ދެވުނުއިރު ގަޑިން 4:30 ހިނގަނީއެވެ. އެޖެންޑާގައިވާ ގޮތުން ދެންއޮތީ ހަވީރުގެ ސައިފޮދެވެ. އެއަށްފަހު ފެންފުށިން ފުރުން އޮތީ އިރުއޮއްސި 6 ޖަހާއިރުއެވެ.

އެހެންކަމުން އަޅުގަނޑުވެސް ގެއަށްވަދެ ދަބަސް ހިފައިގެން ދެން ދިޔައީ ހަވީރުގެ ސައިފޮދު ތައްޔާރުކޮށްފައިވާ ހަރުގެއާއި ދިމާލަށެވެ. އޭރު ދަތުރުގެ ބައިވެރިންވެސް ދަބަސްތައް ހިފައިގެން ހަރުގެ ދޮށަށް ޖަމާވަމުން ދެއެވެ. ސައިފޮދު ފެށިއްޖެއެވެ. މި ސައިފޮދުގައި ފެންފުށީ ކައުންސިލްގެ ބޭފުޅުންނާއި ރަށުގެ ކަމުވޮށިގެންވާ ބޭބޭފުޅުންވެސް ބައިވެރިވެ ވަޑައިގެންނެވިއެވެ. ސައިފޮދު ނިމުމުން ދަތުރުގެ މެހްމަންދާރީ އަދާކުރެއްވިލެއް ފުރިހަމަކަމުންނާއި، ރައްޔިތުންގެ ފަރާތުން ފެނުނު އެއްބައިވަންތަކާއި ހިތްހެޔޮ އެކުވެރިކަން ފާހަގަކުރައްވައި ދަތުރުގެ ބައިވެރިން ރަށު ކައުންސިލްއަށް ޝުކުރު އަދާކުރެއްވިއެވެ.

އިރުއޮއްސި 6 ޖެހުމާއެކު ދަތުރުގެ ބައިވެރިން މާލެ ދިއުމަށް ފުރަން ލޯންޗު ދޮށަށް ދިޔައެވެ. އޭރު ދަތުރުގެ ބައިވެރިންނަށް އަލްވަދާއު ކިޔަން ރަށުގެ ރައްޔިތުން އަތިރިމައްޗަށް ޖަމާވެފައި ތިއްބެވެ. އެންމެނާއި ކޮޑާއި ކޮނޑު ޖައްސައި ސަލާންކުރުމަށްފަހު އަޅުގަނޑުވެސް ލޯންޗަށް އަރައިފީމެވެ. ދަތުރުގެ ބައިވެރިން ލޯންޗަށް އެރުމާއެކު ލޯންޗްގެ މާލެއަށް ދިއުމަށް ފެންފުށިން ނައްޓާލިއެވެ. އޭރުވެސް ލޯންޗަށް ހަނާއަޅަން ރަށުގެ ގިނަ ބަޔަކު އެރަށު އަތިރިމަތީގައި ތިބިތަން ފެނެއެވެ. އަޅުގަނޑުވެސް ރަށާ ދިމާއަށް ބަލަހައްޓައިގެން ހުރެ ޓާޓާ ކިޔަމުން ގެންދިޔައީމެވެ. އެރަށް ލޮލުކޮޅުން ގެއްލެންދެނެވެ.

ދެގަޑިއިރުގެ ނިޔާމަ ދަތުރަކަށްފަހު ދަތުރުގެ އެންމެހާ ބައިވެރިން އެނބުރި މާލެ އައިީ އުފަލާއި ހިތްހަމަ ޖެހުމާއިއެކުގައެވެ. ކައިރި މުސްތަޤްބަލެއްގައި އަދި އެއްފަހަރު ނަމަވެސް ފެންފުށްޓަށް ދެވޭނެކަމުގެ ފޮނިފޮނި އުންމީދުގައެވެ. އެއީ އަޅުގަނޑުވެސް ހަނދާނުން ފޮހެ ނުލެވުނު ތާރީޚީ ދަތުރެވެ. އެކުވެރިކަމާއި ހިތްހެޔޮކަމުގެ މިސާލެއްނެތްފަދަ ދިވެހި ރައްޔިތުންތަކެއް ދިރިއުޅޭ ރަށެކެވެ. އެއީ އުފާވެރި މާހައުލެކެވެ. އުފާވެރި ދަތުރެކެވެ. އާދެ! ފެންފުށި ދަތުރެވެ.
……………….

ލިޔުންތެރިޔާގެ ފުރަމަލަ

އަޙްމަދު ނާފިޢު
ޢިބްރަތްތެެރި ވާހަކައާއި ބަހާއި އަދަބުގެ ޢިލްމީ ލިޔުންތައް ނާފިޢު ލިޔާނެއެވެ.

ގުޅުންހުރި ލިޔުން: