އަލިގަދަ މުތީތަކެއް ފަދައިން ގަތާލެވިފައިވާ މި ކުޑަކުޑަ ރާއްޖޭގެ ރަށްރަށުގައި އެތައް ހުނަރެއް ލިބިފައިވާ ޒުވާނުން މަދެކޭ މިއަދު ދެންނެވޭކަށް ނެތެވެ. އެހެނީ ފަންނުވެރިންނަކީ އެ މީހުންނަށް ލިބިފައިވާ ފަންނު ނުވަތަ ހުނަރުގެ ބޭނުން އޭގެ އެންމެ ފުރިހަމަ ގޮތުގައި ހިފައިފިނަމަ އެމީހަކު ދާން ބޭނުންވާ މަންޒިލަކަށް ވާޞިލް ވެވޭނޭ ބައެއްކަން ޔަޤީނެވެ.

ކުޑައިރު ކުރަހަން ޝައުޤުވެރިވާ ކުއްޖަކު ނަމަ، ބައެއް ފަހަރު ކޮންމެވެސް ގޮތަކުން ފޮރުވިގެން ނަމަވެސް އެކަން ދަސްކުރަން މަސައްކަތް ކުރާނެއެވެ. ނަތީޖާއަކީ ފަހުން އެ ކުއްޖާ ބޮޑުވެ ނޫކަށި ޒުވާނަކަށް ވުމުން މުޖުތަމަޢުއަށް ނިކުމެ ލިބިފައިވާ ހުނަރު ދައްކާލުމަށް މަސައްކަތް ކުރަމުން ދާކަމެވެ. ނަމަވެސް ދިމާވާ ސަބަބުތަކަކާއިހުރެ ހުނަރު ދައްކާނުލެވި ވައިރޯޅިއަށްވެސް ސިއްރުން ގޭގައި އިނދެ އަމިއްލަ އުފަލަށް އެ ހުނަރު ދިރުވާ އާލާ ކުރަމުންދާ ޒުވާނުންވެސް މަދެއް ނޫނެވެ. މިގޮތުން ބ. ދަރަވަންދޫ ހުވަނދުމާގެއަށް އުފަން މުހައްމަދު ފަޔާޒަކީވެސް މި ފަދަ ހުނަރުވެރި ކުރެހުންތެރިއެކެވެ. އެހެނީ ކުރެހުމުގެ ފަންނަކީ މިއަދު ޖަޒީރާ ވަންތަ މި ކުޑަ ރާއްޖެއަށް ވަރަށް ބޭނުންތެރި ހުނަރެއްވެސް މެއެވެ. އެހެނީ، މިއަދު މި ރާއްޖެއަކީ ފަތުރުވެރިކަމުގެ ދާއިރާގައި ދުނިޔެއަށް ނަން މަޝްހޫރު ތަނަކަށް ވުމެވެ.

ކޮންމެއަކަސް މުހައްމަދު ފަޔާޒު ނުވަތަ މަޝްހޫރު ވަމުން އަންނަ ނަމުން ނަމަ ކުރަހާ ފަޔާޒުގެ ވާހަކައަށް ޖެހިލަމާ ހިނގާށެވެ. ފަޔާޒަކީ ހުނަރުވެރި އާއިލާއަކަށް އުފަން ނޫކަށި ފުރައިގެ ޒުވާނެކެވެ. ލިބިފައިވާ ހުނަރުގެ ބޭނުން ތަރައްޤީކޮށް ކުރިއަރުވަން މަސައްކަތްކުރާ މީހެކެވެ. އެހެންކަމުން ފަޔާޒުގެ ފަރާތުން ހިތްގައިމު ކުރެހުންތަކެއް އާންމުވަމުން ދާތަން ފެނުމުން މުނިއަވަސްގެ ފަރާތުން ފަޔާޒުއާއި ކުރު އިންޓަވިއުއެއް ކޮށްލީމެވެ.

ފަޔާޒު ކުރަހަން ޝައުޤުވެރިވީ ކިހިނެތް؟
ކުޑައިރު ގޭތެރެއިން… ބޭބެމެން ކުރަހާތަން ފެނިގެން ދަސްކުރީ..
ކުރަހަން ފެށުނުގޮތް ކުރު ގޮތަކަށް ކިޔާލަ ދެވިދާނެތޯ؟
ކުޑައިރުއްސުރެ އަބަދުވެސް ބޭނުންވޭ އާޓްގެ ދާއިރާއިން ކުރިޔަށްދާން. އެކަމަށް ވަރަށް ބޮޑު ޝައުގުވެރިކަމެއް ހުރޭ އަބަދުވެސް..
މިހާތަނަށް ކުރަހާފައިވާ ކުރެހުންތަކުން ފާހަގަކުރެވޭ ކުރެހުން ތަކަކީ ކޮބައިތޯ؟
ކޮންމެ ކުރެހުމަކީވެސް އޭގެ ޒާތުގައި ފާހަގަ ކޮސްލެވޭ ކުރެހުމެއް. ނަމަވެސް ބ. އަތޮޅު މަދަރުސާގެ ވޯލްގައި ކުރެހި ކުރެހުންތައް ވަކިން ފާހަގަ ކޮށްލެވޭ..
ކުރިން ފަޔާޒަކީ ކުރަހާ މީހެއްކަމެއް ނުވެސް އެނގޭ.. ވައިރޯޅިއަށްވެސް ސިއްރުން ކުރާ މަސައްކަތެއްތޯތީ.
( ހިނިގަނޑެއް ޖަހާލަމުން…) އަސްލު ހޮބީއަކަށް ގޭތެރޭގައި ކުރަން ފެށި ކަމެއް މީ. ކުރިން އެއްވެސް މީހަކަށް މީ ކުރަހާ މީހެއްކަންވެސް ނޭގޭހާ ސިއްރުން ކުރަހަމުން ދިޔައީ.. ނަމަވެސް ކޮންމެވެސް ދުވަހަކުން ފަޅާވެސް އަރާނެތާ..
ދެން ކިހިނެއް ފަޔާޒަކީ ކުރަހާ މީހެއްކަން އެނގުނީ؟
އަސްލު ވީ ގޮތަކީ ބޮޑަށް މީހުންނަށް އެނގެންފެށީ ބ. އަތޮޅު މަދަރުސާގެ ކުލާސް ރޫމްތަކުގެ ފާރުގައި ކުރަހަން ރައްޓެއްސެއްގެ ފަރާތުން ފުރުޞަތު ލިބުނު ހިސާބުން. އޭނަޔަށް އެނގޭ އަހަރެން ކުރަހާކަން.. އެ ލިބުނު ފުރުޞަތުގައި ކުރެހި ކުރެހުންތައް މީހުންނަށް ކަމުދިޔައީ.. ދެން އޭގެ ފަހުން ރަށުގައި ޚިތާނުކުރަން ތައްޔާރު ކުރާ ގޭގޭގެ ފާރުގައިވެސް ކުރަހަން ފުރުޞަތު ލިބޭ. އަސްލު އެއީ ވީގޮތަކީ.
ތި ރަށަކީ ގެސްޓް ވިޔަފާރީގައި މަޝްހޫރުވަމުން އަންނަ ރަށެއް.. ރަށަށް އަރާ ފަތުރުވެރިންގެ ފަރާތުން މިކަމަށް ތަރުހީބު ލިބޭތޯ؟
ފަތުރުވެރިންނަކީ ރާއްޖޭގެ މަންޒަރުތައް ކުރަހާފައި ހުންނަ ކުރެހުންތައް ވަރަށް ބޭނުންވާ ބައެއް. މިސާލަކަށް، ކާއްޓެއްގައި ކުރަހާލިޔަސް، އެ ކުރެހުމާއި މެދު އެ މީހުން ވަރަށް ޝައުޤުވެރިވޭ.. ބައެއް ފަހަރު ފަތުރުވެރިންނަށްވެސް ކުރެހުންތައް ރީތިވެގެން ގަނެގެންވެސް ގެންދޭ.. އަސްލު ފަތުރުވެރިންނަށްވެސް ވަރަށް ކަމުދޭ ދިވެހިންގެ އަތުން ކުރަހާފަ ހުންނަ ކުރެހުންތައް. އެހެންވެކަން ނޭގެ އެއީ..
ކާށީގަ ކުރަހާކަން އެނގިއްޖެ. ފަޔާޒު އާންމުކޮށް ކުރަހައި އުޅެނީ ކޮންކަހަލަ އެއްޗެއްސެއްގަތަ؟
އުނިގަހުގެ ލަކުޑި، ޓީޝާޓް، ފިލާ، ފާރު، ކާށި އުނބު މިހެން ގޮސް ބައިވަރު އެއްޗެހީގަ ކުރަހާ އުޅެން.. ކޮންމެ އެއްޗެއްގަ ކުރެހިޔަސް އެ އެއްޗަކާއި ގުޅޭ ގޮތަށް ނުވަތަ ބަޔަކަށް ކުރަހާ ދޭނަމަ އެ ބަޔަކު ހިތް އެދޭގޮތަކަށް ކުރަހައި ދެވޭތޯބަލަނީ…
މި މަސައްކަތް ކުރުމުގައި ދިމާވާ ގޮންޖެހުންތަކަކީ ކޮބައިތޯ؟
ދިވެހިންގެ ކުރެހުންތަަކަށް ރަނގަޅު މާކެޓެއް ނުލިބުން އެއީ ވަރަށް ބޮޑު ގޮންޖެހުމެއް.
ކުރެހުމުގެ ފަންނުން އެންމެ ދެކެން ބޭނުންވާ ދުވަހަކީ ކޮބަ؟

ދިވެހިންގެ ކުރެހުންތައް ރާއްޖެއިން ބޭރުގައި މާކެޓް ކުރެވި ދިވެހިންގެ ކުރެހުންތަކަށް ދުނިޔޭގެ ސަމާލުކަން އަންނާނެ ދުވަހެއް.
ފަހު ސުވާލެއްގެ ގޮތުން ކުރެހުމުގެ ފަންނުން ޒުވާނުންނަށް ދޭން ބޭނުންވާ މެސެޖަކީ ކޮބައިތޯ؟
ކޮންމެ މަސައްކަތަކީވެސް ދަސްކޮށްފިނަމަ ކުރެވޭނެ މަސައްކަތެކޭ.. ވަކިން ހާޢްޞަކޮށް އާމްދަނީ ހޯދުމަށް ކުރާނަމަ މީ ކުރަން ސަޅި މަސައްކަތެކޭ…

 

View this post on Instagram

 

A post shared by MOHAMED FAYAZ (@fayaa__arts_mv)

މިއީ ފަޔާޒުގެ ވާހަކައެވެ. ފަޔާޒު ފަދައިން ކުރަހަން ޝައުޤުވެރިވާ ފަރާތްތަކަށް ތަކަށް ފަޔާޒު ބުނެފައިވަނީ މިއީ ސަޅި މަސައްކަތެއްކަމެވެ. ދޫކޮށްލާ ވަރުގެ މަސައްކަތެއް ނޫންކަމެވެ. ނަމަވެސް ހިތާމަޔަކީ މި ކަމަށް ޝައުޤުވެރިވާ ޒުވާނުންނަށްވެސް ފުރުޞަތުތަކެއް ބޭނުންވާނެކަމެވެ. ކުރަހާ ކުރެހުންތަކަކީ މީހުންނަށް ކަމުނުދާނެ ކުރެހުންތަކެއް ކަމަށް ހީކޮށް ވައިރޯޅިއަށްވެސް ސިއްރުން ގޭގެ ކޮޓަރިތެރޭގައި އަމިއްލަ އުފަލަށް ކުރެހި ނަމަވެސް އެހެން މީހުންނަށް ހުނަރު ދައްކާލަން ޖެހިލުން ވުމެވެ. ފަޔާޒަކީވެސް އެފަދަ ޒުވާނެއްކަން އެނގުނު ނަމަވެސް ފަހުން ފަޔާޒު މިވަނީ އެ އޮޅިގަނޑު ގިރާކޮށް އޭނާގެ ކުރެހުންތައް އޮޅިން ބޭރަށް ނެރެފައެވެ. އެހެންކަމުން ކުރެހުމުގެ ދާއިރާއިން ކުރިއަށްދާން ބޭނުންވާ ހުރިހާ ޒުވާނުންނަށްވެސް ބުނެލަން ބޭނުންވަނީ ލިބިފައިވާ ހުނަރުގެ ބޭނުން އޭގެ އެންމެ ފުރިހަމަ ގޮތުގައި ހިފައިފިނަމަ ކާމިޔާބު ވާނެކަމެވެ. ހުނަރު ހުރި ނަމަވެސް ލަދުން ނުތިބެ ކެރިގެން ކުރިމަތިލާށެވެ. ކޮންމެވެސް ދުވަހަކުން ކާމިޔާބު ލިބޭނެކަން ޔަޤީނެވެ.
……………………

ލިޔުންތެރިޔާގެ ފުރަމަލަ

އަޙްމަދު ނާފިޢު
ޢިބްރަތްތެެރި ވާހަކައާއި ބަހާއި އަދަބުގެ ޢިލްމީ ލިޔުންތައް ނާފިޢު ލިޔާނެއެވެ.

ގުޅުންހުރި ލިޔުން: