ޝިފާ ހުރީ ރުންކުރުވެ، ރުޅިގަދަ ވެފައެވެ. ޝަކުވާއަކީ ސިޔާސީ ދާއިރާގައި ބިޒީކަމުން ޝިފާ ބޭނުންވާ ވަރަށް އާނަންދުގެ ފަރާތުން ވަގުތު ނުލިބުމެވެ. މިއީ މިހާރު ބައިސްކޯފުން ދައްކަމުން އަންނަ ’ޔޫއްޕެ ޕްރޮޑަކްޝަންސް’ގެ ފުރަތަމަ ވެބް ސީރީޒް ”ހުވާކޮށްފާ ބުނަން“ގެ އެޕިސޯޑް 2 އަދި 3ގެ ކުރު އުސްއައްޔެކެވެ.

”ހުވާކޮށްފާ ބުނަން“ގައި އަޙްމަދު އީސަ (އާނަންދު) އަކީ ނައުޝާދުގެ ކެރެކްޓަރ އިން ފެންނަ ސިޔާސީ މީހެކެވެ. މަރްޔަމް ޝިފާ އަކީ ހައިފާ އެވެ. ނައުޝާދާ ރައްޓެހިވެގެން އުޅޭތާ ތިން އަހަރު ވެފައިވާ ލޯބިވެރިޔާއެވެ. ހައިފާ ހުރީ ނައުޝާދުގެ އިންތިޒާރުގައި ނައުޝާދު އާއި ޒާރާގެ ރޯލުން ފެނިގެންދާ ވާޝިޔާ މެންގެ ގޭގައެވެ. ޒާރާ އާއި ޝިފާއާ ދެ މީހުންނަކީ ދެ ބެސްޓް ފްރެންޑުންނެވެ.

ނައުޝާދު ގެއަށް އައުން ލަސްވެގެން އެކަމުގެ ޝަކުވާތައް އެންމެ ފުރަތަމަ ހައިފާ ކުރީ ޒާރާ ގާތުގައެވެ. ނައުޝާދު ގެއަށް އައުމާއެކު ރުޅި އައިސްފައިހުރި ކުކުޅެއް ފަދައިން ނައުޝާދުގެ ބޮލަށް ހައިފާ އަރައިގަނެއެވެ. ޝަކުވާތައް ބަންޑުންކޮށްލައެވެ. ދެބަސްވެ ޒުވާބުކުރެއެވެ. ދެމީހުން އެކަކު އަނެކަކަށް އެންމެ ތަންފުކެއްވެސް ދޫނުކުރެއެވެ. ދެމީހުންގެ ދެމެދު ފިނިކުރަނީ ވިސްނުންތެރި ޒާރާގެ މަސައްކަތުންނެވެ. މިއީ ”ހުވާކޮށްފާ ބުނަން“ގައި ގެނެސްދީފައިވާ ވަރަށް މުހިންމު މެސެޖްތަކެއް ދައްކުވައިދޭ ސީންތަކެއްގެ އިތުރުން، ޝިފާގެ ހުނަރުވެރި އެކްޓިން ފެނިގެންދާ ސީންތަކެއްކަން ފާހަގަކޮށްލެވެއެވެ.

ތިން ސީޒަން ހިމެނޭ މި ސީރީޒްގެ ކޮންމެ ސީޒަންއެއްގައި 26 އެޕިސޯޑް ހިމެނޭ އިރު، މިހައިތަނަށް ދެއްކި ތިން އެޕިސޯޑުން ސީރީޒްއާމެދު ބެލުންތެރިންގެ ޝައުޤުވެރިކަން ވަނީ އިތުރުކުރުވާފައެވެ.

”ހުވާކޮށްފާ ބުނަން“ގެ މައިގަނޑު ތަރިންނަކީ އަޙްމަދު ސަޢީދު، އަޙްމަދު އީސާ (އާނަންދު)، މުހައްމަދު މުސްޠަފާ (މުސްތޮ)، އަބްދުﷲ ޝާފިއު (ފުބޫ)، އަލީ އާޒިމް (ދޮން އައްޔަ)، ޝިފާ، ނަތާޝާ، ވާޝިޔާ މުޙައްމަދު (ޝިޔާ)ގެ އިތުރުން ނާޝިދާ މުޙައްމަދު (ނާއްކޮ) އެވެ.

މި ސީރީޒްގެ ސްކްރީންޕްލޭ ލިޔެ ޑައިރެކްޓްކޮށްފައިވަނީ ޔޫސުފް ޝަފީއު (ޔޫއްޕެ) އެވެ. ކެމެރާކޮށް ޕޯސްޓްޕްރޮޑަކްޝަން ހެދީ ޢަލީ ރަޝީދު (ގޮޅާ އައްޔަ)އެވެ.

https://www.youtube.com/watch?time_continue=1&v=eWATnB82PpU&feature=emb_title

ލިޔުންތެރިޔާގެ ފުރަމަލަ

މަރިޔަމް ދީމާ
ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.

ގުޅުންހުރި ލިޔުން: