މި ހިއްސާކޮށްލަނީ ވީޑިއޯ ލަވައެކެވެ. ރަނގަޅަށް ވޮލިއުމް ބާރުކޮށްލުމަށްފަހު ހެޑްސެޓެއް އަޅައިގެން މި ލަވަ ޕްލޭކޮށްލައި ލަވަ އަޑުއަހައިލާށެވެ. ގައިގެ އެންމެ ހިމަ ލޯލިތައްވެސް ކޮޅަށް ޖެހިގެންދާނެކަމުގެ ޔަޤީންކަން ދެމެވެ.

މިއީ ބިދޭސީ ޓީޗަރެއް ކިޔާފައިވާ ދިވެހި ލަވައެކެވެ. ކުރީގެ މަޝްހޫރު ޑައިރެކްޓަރު އަދި ޅެންވެރިޔާ ޢީޝާ ޝަރީފުގެ ‘ޢީސާ އޮންލައިން ޕޮއެޓްރީ’ގެ އުފެއްދުމެކެވެ. ޢީސާ ޝަރީފު ޝާއިރީ ބަގީޗާގެ އުލްފަތުގެ ގުލްޝަނުން އުފަންކޮށްފައިވާ ހިތްގައިމު ލޯބީގެ ޅެމެކެވެ. ޅެމަށް ފުރިހަމަ ދިރުމެއް ގެނެސްދީފައިވަނީ ބިދޭސީއެއްގެ ހިތްގައިމު އަޑުންނެވެ. ތ. ހިރިލަންދޫ ސްކޫލުގައި އިނގިރޭސި ބަސް ކިޔަވައިދިނުމުގައި 2019އިން ފެށިގެން ހަރަކާތްތެރިވަމުން އަންނަ އިންޑިޔާގެ ކެރެލާ ސްޓޭޓަށް ނިސްބަތްވާ އުމުރުން 25 އަހަރުގެ ޢަބްދުލް ރައްޒާޤް އެވެ.

‘ލަވަފޮށި’ އެޕްލިކޭޝަންގައި ރިލީޒްކޮށްފައިވާ ‘ބަލަބަލާ ހުއްޓާއޭ’ އަލްބަމްގައި ހިމެނޭ ‘މާޒީގެ ބިތްދޮށް’ ލަވައިގެ ލިރިކްސް ލިޔެފައި ރައްޒާޤް އަށް ހަވާާލުކުރިތާ އެންމެ ދެ ދުވަސް ތެރޭގައި ލަވައިގެ ރެކޯޑިން ހަދައިލެވުނު ކަމީ ހަމަ ގައިމުވެސް ރައްޒާޤްގެ ލަވަކިޔުމުގެ ހުނަރުވެރިކަން ހުރި މިންވަރު ސާބިތުކޮށްދޭން އިތުރު އެއްވެސް ކަމެއް ބޭނުންނުވާ ވަރުގެ ކަމެކެވެ. މި ފުރުޞަތަކީ ޚުދު ރައްޒާޤްގެ އިސްނެގުމުގެ ސަބަބުން ލިބިގެންދިޔަ ފުރުޞަތެއް ކަމަށް ލަވައިގެ ރެކޯޑިން އަދި މިކްސިން ހެދުމުގައި އިސްވެ ހަރަކާތްތެރިވި ޢީސާ ޝަރީފު ބުންޏެވެ.

“އީއޯޕީގައި މަސައްކަތްކުރަމުން އަންނަ ހާމިދު ގެ އަންހެނުން މަސައްކަތްކުރަނީ ހިރިލަންދޫ ސްކޫލުގަ. ހާމިދު ލަވަކިޔައި އުޅޭކަން ރައްޒާގަށް އެނގޭތީ ހާމިދުގެ އަންހެނުން ގާތުގައި ބުނެގެން އެދުނީ ޗާންސެއް ލިބިދާނެހޭ. ދެން ހާމިދު އަޅުގަނޑު ގާާތުގައި ބުނީމަ ރައްޒާޤް އަށް ގުޅައިގެން ސްޓޫޑިއޯއަށް ގެނައީ. ގެނެސް ޓެސްޓްކޮށްލި އިރު ވަރަށް ޕްރޯ އޭނާގެ ކިޔުން. އެކަމަަކު އޭނާއަށް އެއްގޮތަކަށް ވެސް ދިވެހި ބަހެއް ނޭނގޭ. އެހެންވެ އޭނާއަށް ލަވައިގެ ބަސްތައް ޕްރޮނައުންސްކުރާނެ ގޮތް ވަރަށް ވަރުގަދައަށް ދަސްކޮށްދިނިން.”

ރައްޒާޤް އަށް ފުރުޞަތު ލިބުނުގޮތާ އޭނާ އަށް ތަމްރީނު ދިން ގޮތް ހިއްސާކުރަމުން މުނިއަވަސް އަށް އީސާ ބުންޏެވެ.

ތ. ހިރިލަންދޫ ސްކޫލްގެ އިނގިރޭސި ޓީޗަރު ޢަބްދުލް ރައްޒާޤް

މިހާ ސަޅި ލަވައެއް ދިވެހިންނަށް ހަދިޔާކޮށްފައިވާ ޢަބްދުލް ރައްޒާޤްގެ ބަހެއް ވެސް މި ފުރުޞަތުގައި ހޯދައިލުން މުހިންމުކަމަށް ދެކެމެވެ.

“އީސަގެ ފަރާތުން އަހަންނަށް ވަރަށް ގާތްކަމާ އޯގާތެރިކަން ލިބިގެންދިޔަ. ބޭޭބެއެއް ގޮތަށް އަހަންނަށް އޭނާ އެހީވެދިން ގޮތާމެދު އަހަަރެން ވަރަށް ހިތްހަމަޖެހި އުފާވި. އީސަ އާއި ވަރަށް ގާތް ގުޅުމެއް އުފެދިގެންދިޔަ ކަަމުގެ އިހްސާސް ކުރެވުނު.

މިއީ އަހަރެން މިފަދަ ރެކޯޑިންއެއް ހެދި ފުރަތަމަ ތަޖުރިބާ ނަމަވެސް، ލަވަ ކިޔުމުގަ އަހަންނަށް އެއްވެސް ބީރައްޓެހިކަމެއް އިހުސާސެއް ނުކުރެވޭ. އޭގެ ސަބަބަކީ އީސަގެ ފަރާތުން އަހަންނަށް ލިބިގެންދިޔަ ގާތްކަމާ އޯގާތެރިކަން.

ދިވެހި ބަހަކީ އަހަންނަށް އެނގޭ ބަހަކަށް ނުވާތީ، ބަަސްތައް ޕްރޮނައުންސްކުރަންވީ ގޮތްތައްް އޭނާ (އީސާ) އަހަންނަށް ކިޔައިދީ އޮޅުންފިލުވައިދީ ވަރަށް ގާތްކޮށް، ރަހުމަތްތެރިކޮށް، ވަރަށް ފަސޭހައިން އެނގޭ ގޮތަށް.

މި ފުރުސަތު ދެއްވީތީ އަހަރެން ވަރަށް އުފަލާއެކު ޝުކުރުވެރިވަން، މިއީ އަހަންނަށް ލިބުނު ވަރަށް ބަޮޑު ނަސީބެއް ކަމަށް ދެކެން. ޝުކުރިއްޔާ.”

ޢަބްދުލް ރައްޒާޤްގެ އިހްސާސްތައް މުނިއަވަސް އާ ހިއްސާކުރަމުން ބުންޏެވެ.

ޢަބްދުލް ރައްޒާޤްގެ ‘މާޒީގެ ބިތްދޮށް’ ކަމުދިޔަ އެހުންތެރިންނަށް އޭނާގެ އެހެން ލަވައެއް ‘އީއޯޕީ’ގެ ފަރާތުން ވަރަށް އަވަހަށް، ގެނެސްދޭނެ އެވެ. ގައިން ހީބިހި ނަގަން ތައްޔާރަށް ތިބެމާ ހިނގާށެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު

ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

މި ލިޔުންތެރިޔާގެ ބައެއް އެހެން ލިޔުންތައް

• 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
• 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
• 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
• 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!