“ބިގް ބޮސް”، “ޚަތުރޯން ކޭ ކިލާޅީ” އަދި “ނާގިން” ފަދަ ދިވެހިންގެ ތެރޭގައިވެސް މަޤުބޫލު ޝޯވތަކެއް ގެނެސްދީފައިވާ ކަލާސް ޓީވީއިން މިރޭ އަނެއްކާވެސް މުޅިން އާ ޝޯވއެއް ފަށާނެއެވެ. މި ގެނެސްދެނީ ކަލާސް ޓީވީއިން މިރޭ އަލަށް ފަށާ ޑްރާމާ ސިލްސިލާ “އުދާރިޔާން” ބެލުމުގެ ކުރިން ކޮންމެހެންވެސް އެނގެން ޖެހޭ5 ކަންތަކެވެ.

 

1. މުޅިން އާ ޕްރޮޑަކްޝަން ހައުސްއެއްގެ އުފެއްދުމެއް

“އުދާރިޔާން” އަކީ މަޝްހޫރު ދެ އެކްޓަރުން ކަމަށްވާ ރަވީ ޑޫބޭއާއި އޭނާގެ އަންހެނުން ސަރްގުން މެހެތާގެ ޑްރީމިޔާތާ އެންޓަޓެއިންމެންޓުން އުފައްދާ ފުރަތަމަ ޝޯވއެވެ. ރަވީގެ ޓުވިޓާގައި އެކަން ހިއްސާކުރަމުން އޭނާ ބުނެފައިވަނީ15 އަހަރުގެ އެކްޓިންގއަށްފަހު އެމީހުން އުފައްދާ ފުރަތަމަ ޝޯވ ދައްކަން ފެށޭތީ އެކަމާ ވަރަށް އުފާވެފައި ހުރިކަމަށެވެ.

 

2. މުޅިން އާ ފަންނާނެއް ތަޢާރަފުވާނެ

“އުދާރިޔާން”ގެ މައިގަނޑު ރޯލުތައް ކުޅެނީ އަންކިތު ގުޕްތާއާއި ޕްރިޔަންކާ ޗައުދަރީގެ އިތުރުން އަލަށް ތަޢާރަފުވާ އިޝާ މަލްވިޔާއެވެ. އިޝާ ކުޅެނީ ޖޭސްމިން ކައުރް ސަންދޫ ނަމަކަށް ކިޔާ ޕަންޖާބް އަންހެން ކުއްޖެއްގެ ބައެވެ.

 

3. އަންކިތުގެ ފުރަތަމަ ލީޑް ރޯލް: ވަރަށް ތަފާތު

“އުދާރިޔާން”ގެ ބަތަލަކީ އަންކިތު ގުޕްތާއެވެ. އަންކިތަކީ އިންޑިޔާގެ ޓީވީ ބެލުންތެރިންގެ މެދުގައި މަޤުބޫލު މޫނެކެވެ. އަންކިތުގެ ފާހަގަކޮށްލެވޭ ފަހުގެ މަސައްކަތްތަކަށް ބަލާލާއިރު ވެބް ސީރީޒް “އިލީގަލް- ޖަސްޓިސް އައުޓް އޮފް އޯޑަރ” ގައި ކުޅެފައިވާ ނީރަޖް ޝެކާވަތުގެ ރޯލާއި ކުންޑަލީ ބާގްޔާގައި ކުޅުނު ޕަވަން މަލޯޓްރާގެ ރޯލު ހިމެނެއެވެ. މި ޝޯވގައި އަންކިތު ކުޅެނީ ފަތޭހް ސިންގ ވިރްކް ނަމަކަށް ކިޔާ ބޮކްސިންގ ތަޅާ މީހެއްގެ ރޯލެވެ.

 

4. ޕަންޖާބީ ފިލްމެއްގެ މައްޗަށް ބިނާކޮށް ހަދާފައިވާ ސީރީޒެއް

މި ސީރީޒް އުފައްދާފައިވަނީ ސަރްގުން މެހެތާ ލީޑް ރޯލު ކުޅުނު ޕަންޖާބީ ފިލްމު “ސުރްކީ ބިންދޫ” އަސްލަކަށް ބަލައިގެންނެވެ. އެ ފިލްމުގެ މައިގަނޑު ރޯލުތަކުން ފެނިގެން ދިޔަ އިތުރު ތަރިންނަކީ ގުރްނާމް ބުއްލާއާއި ރުޕިންދަރް ރުޕީއާއި ނިޝާ ބާނޯއެވެ. ފިލްމު ޑައިރެކްޓްކުރީ ޖަގްދީޕް ސިދޫއެވެ.

 

5. ތިނެސްކަން ލޯބީގެ ތަފާތު ސީރީޒެއް

މި ސީރީޒްގައި ދައްކައިދޭނީ ޕަންޖާބްގެ އަވަށެއްގައި ދިރިއުޅެމުންދާ ތަފާތު މިޒާޖުގެ ޒުވާން ތިން މީހެއްގެ ދިރިއުޅުމެވެ. ޖޭސްމިންއާއި ފަތޭހް އަދި ތޭޖޯގެ ދިރިއުޅުމުގެ ތަފާތުތައް މި ސީރީޒުން ފެނިގެން ދާނެއެވެ. ޖޭސްމިންއަކީ ކޮންމެ ގޮތަކުން ވިޔަސް ކެނެޑާއަށް ދިޔުމުގެ ހުވަފެން ދެކޭ ޒުވާން އަންހެންކުއްޖެކެވެ. އަދި އިންޑިޔާއިން ބޭރުގައި ދިރިއުޅޭ އިންޑިޔާ މީހަކާއި ކައިވެނިކުރަންވެސް އޭނާ ތައްޔާރެވެ. ފަތޭހްއަކީ ޕްރޮފެޝަނަލް ބޮކްސިންގ ތަޅާ، އަދި ޖޭސްމިންގެ ލޯތްބާއިމެދު އުއްމީދު ގެއްލުވާނުލާ ޒުވާނެކެވެ. ތޭޖޯއަކީ ކިޔެވުމަށް މޮޅު އަޒުމް ވަރުގަދަ އަންހެންކުއްޖެކެވެ. ކާމިޔާބު މީހަކަށްވެ އަމިއްލަ ފައިމައްޗަށް ތެދުވުމަކީ އޭނާގެ އުންމީދެވެ.

 

މި ކިޔައިދިނީ މި ސީރީޒް ބެލުމުގެ ކުރިން އެނގެން ޖެހޭ، އަދި މި ސީރީޒް ބަލަންޖެހޭ ސަބަބުތަކެވެ. މި ސީރީޒް ކޮންމެ ހަފުތާއެއްގެ ހޯމައިން ފެށިގެން ހުކުރު ދުވަހުގެ ރެޔަށް ކޮންމެ ރެޔަކު 19:30 އިން 20:00 އަށް ދައްކާނެއެވެ. ސީރީޒް ކަމުދާނެކަމުގެ ޔަޤީންކަން އަޅުގަނޑު ދެމެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: