ދިވެހިންްގެ ތެރޭގައި އެންމެ މަޤުބޫލުވެގެން ދިޔަ ދިވެހި ސިލްސިލާ ފިލްމުތަކަކުގެ ލިސްޓެއް ތައްޔާރުކޮށްލާނަމަ، އެ ލިސްޓުގެ އެންމެ ކުރީ ސަފުން ޖާގަ ހޯދާނެ އެއް ސީރީޒަކީ “ހިތި ތަޖުރިބާ” އެވެ. މިއީ ރާއްޖޭގެ ފިލްމީ ދާއިރާގެ ރާނީ، ނިޢުމާ މުޙައްމަދު ފިލްމީ ދުނިޔެއަށް ނުކުތުމަށް ކުރި ފުރަތަމަ ތަޖުރިބާއެވެ. ނަމަކަށް ‘ހިތި ތަޖުރިބާ” ކިޔަސް، މިއީ ނިޢުމާގެ ފިލްމީ ހަޔާތުގެ އެންމެ ފޮނި ތަޖުރިބާއަށް ވާނެކަމަށް ދެންނެވިދާނެއެވެ.

ބޮލީވުޑްގެ ސީރީޒްތަކުގެ އިތުރުން، ޕާކިސްތާނުގެ އުރުދޫ ސީރީޒްތަކަކީ ދިވެހިންގެ ތެރެއިން ގިނަ ބަޔަކަށް ވަރަށް ކަމުދާ ސީރީޒްތަކެކެވެ. ބޮލީވުޑްގެ ސީރީޒްތަކަށް ވުރެން ޕާކިސްތާނު ސީރީޒްތަކުގެ މަޤުބޫލުކަން ގިނަ ބައެއްގެ މެދުގައި މާ ބޮޑަށް މަޤުބޫލުކަމަށްވެސް ބެލެވެއެވެ. ސީރީޒްތައް ދިގުލައިގެން ގޮސް، ބެލުންތެރިން ފޫހިވާން ނުޖެހޭ ވަރުގެ ހެޔޮވަރު ދިގު މިނަކަށް އުރުދޫ ސީރީޒްތައް ހުރުން މިއީ އެކަމުގެ މައިގަނޑު ސަބަބުތަކުގެ ތެރެއިން ސަބަބެކެވެ.

ޓެލެވިޛަން މޯލްޑިވްސް އިން 1994 ވަނަ އަހަރު ދެއްކި ދިވެހި ޑްރާމާ ސީރީޒް “ހިތި ތަޖުރިބާ” އަކީ ލޯބީގެ ޑްރާމާ ސީރީޒެކެވެ. މި ސީރީޒްގެ މައިގަނޑު ތަރިންނަކީ ޢަލީ ޝަމީލް، އާމިނަތު ރަޝީދާ (އައިންތު) އަދި ނިޢުމާ މުޙައްދު އެވެ. ސީރީޒްގައި މުހިންމު ރޯލަކުން ޢާރިފާ އިބްރާހީމް ވެސް ފެނިގެންދެއެވެ. މިއީ ޢާއިޝަތު ނީނާ ލިޔެފައިވާ ވާހަކަ “އަވާމެންދުރު” އަށް ބިނާކޮށް ހެދި ސީރީޒެކެވެ.

“ހިތި ތަޖުރިބާ”ގައި ދައްކައިދެނީ މާލޭގެ ގެއެއްގައި ވަރަށް ލޯބިން ދިރިއުޅެމުން އައި ދެމަފިރިންގެ ކައިރީގައި ހުންނަން ރަށަކުން އަންނަ އަންހެންް ކުއްޖެއްގެ ސަބަބުން ދެމަފިރިންގެ ގުޅުން ގޯސްވެ އެމީހުންގެ ހަޔާތް ހަލާކުވެގެންދާ ގޮތެވެ.

ދިވެހި ޑްރާމާ ސީރީޒް “ހިތި ތަޖުރިބާ” އާއި ދާދި އެއްގޮތަށް ހުރިހައި ކަމެއްވެސް ފެނިގެންދާ ޑްރާމާ ސީރީޒެއް ޕާކިސްތާނުގެ ‘އޭއާރްވައި ޑިޖިޓަލް’ އިން 2016 ވަނަ އަހަރުން ފެށިގެން 2017 ވަނަ އަހަރަށް ވަނީ ދައްކާފައެވެ. “ވާދާ”ގެ ނަމުގައި ދެއްކި މި ސީރީޒްގެ ޕްލޮޓާއި “ހިތި ތަޖުރިބާ”ގެ ޕްލޮޓާ އެއްވެސް ވަރަކަށް ތަފާތެއް ނެތޭ ދެންނެވިދާނެއެވެ. “ވާދާ” ގައި ހިމެނެނީ ޖުމްލަ 23 އެޕިސޯޑެވެ.

“ވާދާ” (ވަޢުދު)ގެ ޕްލޮޓަށް ބަލައިލާއިރު، ސުމައިރާ (ޝައިސްތާ ލޯދީ) އަކީ ލޯބި އަންބެކެވެ. މަންމައެކެވެ. ކިޔަމަންތެރި ދަނބިދަރިއެކެވެ. އާއިލާގެ އެންމެންނަށް އަޅައިލާ އޯގާތެރި ނިޔަނެތި އަންބެކެވެ. ފިރިމީހާއަށް ވަފާތެރި އަންބެކެވެ.

ސުމައިރާގެ ފިރިމީހާ ޝާހަބް (ފައިސަލް ޤުރައިޝީ) އަކީ ފޯރުންތެރި ވިޔަފާރިވެރިއެކެވެ. އަނބިދަރިންނަށް އަޅައިލާ އޯގާތެރި ރަނގަޅު ފިރިއެކެވެ. ދުނިޔެ އެފުށް މިފުށަށް ޖެހުނަސް އަނބިމިހާ ދޫކޮށްނުލާނެ ކަމަށް ބުނަމުން އައި ފިރިއެކެވެ.

ޖާނާ (ސަބޫރް ޢަލީ) އަކީ ޝާހަބްގެ ގޭގައި ނޯކަރަކަށް އުޅޭ އަންހެންމީހާގެ ދަރިއެކެވެ. ޖާނާ ވެސް ގޭގޭގައި ނޯކިރީ ކުރެއެވެ. އޭނާ ނޯކިރީ ކުރި ގެއެއްގެ ފިރިހެން ކުއްޖަކާ އަޅައިގަނެގެން ނެއްޓެން ނޭނގިގެން އުޅެންފެށިތަނުން އެކަން ފަޅާއަރާ އެ ގެއިން އޭނާ ނެރެލައެވެ. ޖާނާ ބޭނުންވަނީ މުއްސަންޖެއް އަތުއަޅުވައިލުމެވެ. އެގޮތުން ޝާހަބްގެ ގޭގައި ނޯކިރީކުރަން ޖާނާ އަށް ފުރުޞަތުލިބޭ ހިސާބުން ޝާހަބް ހޯދުމަށް މަސައްކަތް ފަށައެވެ. މަސައްކަތުގައި ކާމިޔާާބު ހޯދައި ޝާހަބް އާއި ދެ އަންބަށް ޖާނާ އިނދެއެވެ. ކުޅިވަރު ފެށެނީ މި ހިސާބުންްނެވެ.

އެޕިސޯޑް 01 ން 23 އަށް

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: