ކިޔައިދޭން މިއުޅޭ ޙާދިސާގައި، ވީނުވީ ތަނެއް ނޭނގި ގެއްލިގެން ހޯދަމުން ދިޔަ އުމުރުން 29 އަހަރުގެ އަންހެނެއް 11 އަހަރު ފަހުން ފެނުނުތަން އެނގިއްޖެ ނަމަ އަންތަރީސްވެ ހައިރާންކަން ނުލިބޭނެ މީހެއް މަދުވާނެއެވެ. އަންހެންމީހާގެ އާއިލާއިން އެ ކުއްޖާ ގެއްލިގެން ފުލުހުންނަށް މައްސަލަ ހުށައަޅައިގެން އުޅޭތާ 11 އަހަރު ފަހުން އެ އަންހެން މީހާ ފެނުނީ އޭނާގެ ލޯބިވެރިޔާގެ ގެއިންނެވެ. ލޯބިވެރިޔާގެ ގެ ހުންނަނީ އަންހެން މީހާގެ ގެއާއި 500 މީޓަރު (1640 ފޫޓް) ހާ ހިސާބު ކައިރީގައެވެ. މި ހާދިސާ ހިނގާފައިވަނީ އިންޑިއާގެ ކެރެލާ ސްޓޭޓްގެ ޕަލައްކަޅުގެ އަވަށެއް ކަމަށްވާ އަޔާލުރް ގައެވެ.

ވީނުވީ ތަނެއް ނޭނގި ސަޖީތާ ގެއްލުނީ 2010 ވަނަ އަހަރުއެވެ. އޭނާގެ އާއިލާއިން އެކަން ފުލުހުންނަށް ރިޕޯޓްކޮށް މައްސަލަ ހުށައެޅިއެވެ. ނަމަވެސް ފުލުހުން ކުރި މަސައްކަތުން އެއްވެސް ކުރިއެރުމެއް ނުލިބުނެވެ.

ފުލުހުން ބުނާގޮތުން، ސަޖީތާ ގެއިން ނުކުމެގެން ދިޔައީ އޭނާގެ ލޯބިވެރިޔާ ރެހްމާން އާއި އެކީގައި ދިރިއުޅުމަށެވެ. ރެހްމާނުގެ މާލީ ހާލަތު ހުރި ގޮތުން ތަނެއް ކުއްޔަށް ހިފައިގެން އުޅެވެން ނެތުމުން އެމީހުން ނިންމީ ރެހްމާންގެ ގޭގައި ދިރިއުޅުމަށެވެ. އެހެން އެއްވެސް މީހަކަށް އެކަން ނާންގައި ސިއްރުން ދިރިއުޅުމަށެވެ.

ކުޑަކުޑަ ކޮޓަރިއެއްގައި އެމީހުން ދިރިއުޅެން ފެށިއެވެ. ރެހްމާންގެ ގޭގައި އިތުރަށް ހަތަރު މީހުން ދިރިއުޅެއެވެ. އެއީ ރެހްމާންގެ މަންމަ އާއި ބައްޕަގެ އިތުރުން އަންހެން ކޮއްކޮއަކާއި ބޭބެއިންގެ ދަރި ފިރިހެން ކުއްޖެކެވެ. ރެހްމާންގެ ކޮޓަރީގައި ސަޖީތާ ގެންގުޅެމުން ގެންދިޔައީ އެގޭގައި ދިރިއުޅޭ އެހެން އެއްވެސް މީހަކަށް ނާންގައެވެ. ރެހްމާންގެ ކޮޓަރި ކައިރިއަށް އެހެން މީހަކު ދިޔަޔަސް ނުވަތަ ކޮޓަރިއަށް ވަންނަން އުޅުނަސް އެކަމާ ރެހްމާން ރުޅިއާދެއެވެ. އެހެންވެ، އެ އާއިލާގެ މީހުން ރެހްމާން އާއި ރެހްމާންގެ ކޮޓަރިއާމެދު މާބޮޑު ސަމާލުކަމެއް ނުދީ ދިރިއުޅެމުން ގެންދިޔައެވެ. ރެހްމާން އަކީ އާއްމުކޮށް މަސައްކަތުދާ މީހެއްވެސް ނޫނެވެ. އޭނާ ކާން ބޭނުންވާ ކާބޯތަކެތި ހިފައިގެން ކޮޓަރިއަށް ވަދެ ގިނަ ވަގުތު ހޭދަކުރަނީ ކޮޓަރީގައެވެ.

ރެހްމާންގެ ކޮޓަރިން ބޭރަށް ނުކުންނަން ސިއްރު ދޮރެއް ކަނޑާފައި ހުރެއެވެ. ރޭގަނޑުގެ ވަގުތުގައި އެ ދޮރުން ބޭރަށް ނުކުމެ ދުނިޔޭގެ ހަމަ ވައި ހޯދައިލުމަށް ސަޖީތާ ބޭރަށް ނުކުމެއެވެ. ކޮންމެ ރެއަކުވެސް ސަޖީތާ ފެންވަރާލައިގެން ނުކުމެ ބޭރުގައި ވަގުތުކޮޅެއް ހޭދަކުރެއެވެ. މިގޮތަށް ފީކޯތް ކުޅޭގޮތަށް އެމީހުންގެ ދިރިއުޅުން ދަހަރަކަށް ދެމިގެން ދިޔައެވެ.

ރެހްމާން މަސައްކަތުދާން ވެގެން ތަށިބަރިއަކަށް ކާއެއްޗެހި އަޅައި ތައްޔާރުކުރެއެވެ. ގޭ މީހުންގެ ކުރިމަތީގައި ދައްކަނީ އެއީ އޭނާ މަސައްކަތު ގޮސް އުޅޭއިރު ކެއުމަށް ތައްޔާރުކުރާ ތަށިބަރިއެއް ކަމަށެވެ. ނަމަވެސް ރެހްމާން މަސައްކަތު ދިއުމުގެ ކުރިން ސިއްރުސިއްރުން އެ ތަށިބަރި އޭނާގެ ކޮޓަރިއަށް ވައްދައެވެ. ސަޖީތާ އަށްޓަކައެވެ. އެ އާއިލާގެ ދެން ތިބި މީހުންނަކީވެސް ދުވާލުގެ ގިނަ ވަގުތު ގެއިން ބޭރުގައި އުޅޭ މީހުންނެވެ. އެހެންވެ ސަޖީތާއަށް އެހެން މީހަކަށް ނުފެނި އެ ގޭގައި މާ އުނދަގޫ ކަމެއް ނެތި ދިރިއުޅުން ވޭތިކުރަމުން ދިޔައެވެ.

މި އަހަރު މާރިޗް މަހު، ރެހްމާން ވެސް ވީނުވީ ތަނެއް ނޭނގި ގެއްލިގެން އޭނާގެ އާއިލާއިން ފުލުހުންނަށް މައްސަލަ ހުށައެޅިއެވެ. ރެހްމާން ހޯދުމުގެ މަސައްކަތް ފުލުހުން ކުރަމުން ދަނިކޮށް ޖޫން މަހުގެ 7ވަނަ ދުވަހު، ރެހްމާން ފެނުނުނެވެ. ރެހްމާން ފެނުނީ ކޮވިޑް-19 އާއި ގުޅިގެން ޖަހާފައިހުރި ޗެކްޕޮއިންޓަކުން ރެހްމާންގެ ބޭބެ އަކަށެވެ. މިކަން ރެހްމާންގެ ބޭބެ ފުލުހުންނަށް އެނގިއެވެ.

ތަހުގީގުކުރުމަށްޓަކައި ރެހްމާން ފުލުސް އޮފީހަށް ގެންދިޔައެވެ. ފުލުހުންގެ ތަހުގީގަށް ރެހްމާން ކިޔައިދިން ގޮތުން ރެހްމާން އާއި ސަޖީތާ ދިރިއުޅެމުން ގެންދަނީ ކައިރީގައި ހުރި ކުޑަކުޑަ ގެއެއް ކުއްޔަށް ހިފައިގެން އެ ގޭގައެވެ. އިތުރަށް ސުވާލުތައް ކުރުމުން ފުލުހުންނަށް އެނގުނީ މީގެ 11 އަހަރު ކުރިން ސަޖީތާ ގެއްލިފައިވާ ކަމެކެވެ. އެންމެ ފަހުން، ހުރިހައި ވާހަކަތަކެއް މި ޖޯޑުގެ އާދަޔާޚިލާފު ދިރިއުޅުމުގެ ވާހަކަތައް ކިޔައިދިނެވެ.

ރެހްމާންގެ ގޭގައި އުޅުނު އިރު، އެގޭ ކުޑަދޮރުން ބޭރަށް ނުކުންނަ ގޮތުގެ ވާހަކަތަކާއި އެ ގޭގައި ބޭއްވި ހުރިހައި ހަފުލާތަކެއް ދުރުގައި ހުރެގެން ބެލި ގޮތުގެ ވާހަކަތައްވެސް ފުލުހުންނަށް ސަޖީތާ ކިޔައިދިނެވެ.

ލޯބީގެ ހޮހޮޅައެއްގައި 11 އަހަރު ލޯބީގެ ކޯރުން ފެންބޮމުން ދިޔަ މި ޖޯޑު، ކޯޓަށް ހާޒިރުކުރެވުނެވެ. ރެހްމާން އާއި އެކުގައި ސަޖީތާ އުޅުމަށް ހުއްދަދެމުން ކޯޓުން މައްސަލަ ނިންމިއެވެ. މިއީ ލޯބީގެ ތަފާތު ވާހަކައެއްދޯއެވެ. ނޫސްތަކުގައި ރިޕޯޓްކޮށްފައި ވާގޮތުން މިއީ ޙަޤީޤީ ވާހަކައެކެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: