| MUNIAVAS

“އަސްލުވެސް ޔުނާން ތި އިންތިޒާރު ކުރަނީ މަށަށްތަ؟” ކުރިމަތީގައި ހުރި އިޝާ ހުރީ އޭނާގެ ފެންކަޅިވެފައިވާ ދެލޮލުން ޔުނާންއަށް ބަލަހައްޓައިގެންނެވެ. ކުއްލިއަކަށް އިޝާ އައިސް ކުރިމައްޗަށް އަރާނޭ ހީކުރެވިފައި ނެތުމުން ޔުނާން ހުރީ ބުނާނެ އެއްޗެއްވެސް ނޭނގިފައެވެ. ހަރަކާތެއްވެސް ކުރަން ނޭނގިފައެވެ.
“ޔުނާން. ނާހާނަންތަ އަހަރެން މިއައީ ކީއްކުރަންތޯ؟” ތަނަށް ވެރިވެފައިވާ ހިމޭންކަން ފޫދުއްވާލީ އަނެއްކާވެސް އިޝާގެ އަޑެވެ. ދެން ވެސް ޔުނާންގެ ފަރާތުން ޖަވާބެއް ނުލިބުނެވެ.
ހުރި ފިޔަވަޅު މަތީގައި ގުޑިވެސް ނުލާ ހުރީއެވެ. އިޝާ އާއި ދިމާއަށް ކަޅިވެސް ޖަހާނުލާ ބަލާށެވެ. އެވީ ކުޑަ ދުވަސްކޮޅުގެ ތެރޭގައި އިޝާގެ ހަށިގަނޑަށާއި މީހާގެ ސިފައަށް އައިސްފައިވާ ބަދަލުތަކާމެދު ޔުނާން ވިސްނަމުންދާ ކަހަލައެވެ. އިޝާގެ ހިމަ އުނަގަނޑު މިހާރު މާބޮޑަށްވެސް ހިމަހެން ހީވެއެވެ. ދެލޯ ވަޅު ވަދެފައިވާއިރު އިޝާގެ ދޮން މޫނު ވަނީ މުޅިން މިލާފައެވެ.

ޔުނާން ހުއްޓުން އަރާފައި ހުރުމުން އިޝާއަށް ނެގުނީ މުޅިން އެހެން މާނައެކެވެ. ދުވެ ގޮސް އިޝާ އަށް ޔުނާން ގެ ގައިގައި އޮޅުލައި ގަނެވުނެވެ. އޭރު އިޝާ އަށް ހަމަ ރަނގަޅަށްވެސް ރޮވިއްޖެއެވެ.
“އަޅެ އަހަންނަށް މާފްކުރޭ ޔުނާން. ހެޔޮނުވާނެ.” އިޝާ ގެ ގިސްލުމުގެ އަޑުން މުޅި އެހިސާބުގަނޑު ދިޔައީ ގުގުމައިގެންނެވެ. ނަމަވެސް އިތުރަށް ޔުނާން އެއްޗެއް ބުނުމުގެ ކުރިން ފެނުނީ އިޝާ ޔުނާން އާއި ދުރަށް ޖެހިލިތަނެވެ. ދުރަށް ޖެހުނީކީ ނޫނެވެ. ބާރުގަދަ ދެއަތަކުން އިޝާ ގެ ކަދުރާގައި ހިފާ ދުރަށް ގެންދިޔައީއެވެ.
“މަގޭ ފިރިމީހާގެ ގައިގައި އަހަރެން ނޫން މީހަކަށް އަތެއް ނުލެވޭނެ.” ކަމީލާ ގެ އަޑުން އިޝާއަށް ވުރެ ބޮޑަށް ސިހުނީ ޔުނާނެވެ. ކަމީލާ އައި ކަމެއްވެސް ޔުނާން އަކަށް ނޭނގެއެވެ. ގައިމު ދޮރު ހުޅުވި އަޑެއްވެސް ޔުނާނެއް ނާހައެވެ.

ރުޅި އައިސްގެން ރަތް ވެފައިވާ ދެލޮލުން ކަމީލާ އިޝާ އަށް ބަލަން ހުރިއިރު ޢިޝާއަށް ހުރެވުނީ ކަމީލާ ނޭނގިފައެވެ.
ކަމީލާ އަވަސް އަވަހަށް ގޮސް ޔުނާންގެ އަތުގައި ބާރަށް ހިފެހެއްޓިއެވެ. ހީވަނީ އިޝާ ޔުނާން ގެން ގޮސް ދާނެތީ އުޅޭހެންނެވެ.
“ޔުނާން މެރީ ކުރީތަ؟” އިޝާ އޭނާގެ އުދާސްވެފައިވާ ދެލޮލުން ޔުނާންއަށް ބަލާލިއެވެ.
“އަޅެ ފަހެ ތީ ގަމާރެއްތަ؟ ނޫނީ ގަމާރު ހެދެނީތަ؟” އިޝާ އާއި ކުރިމަތިލީ ކަމީލާއެވެ. ކަމީލާ އެހާ ރުޅި ގަދަވެފައި ހުއްޓާ ދުވަހަކުވެސް ފެނިފައި ނުވާތީ ޔުނާން ވެސް ހުރީ ބުނާނެ އެއްޗެއް ނޭނގިފައެވެ.
“މި ބުނީނު މީ މަގޭ ފިރިމީހާ އޭ. މާފަށް އެދެވިއްޖެއެއްނު. ނައު ލީވް.” ކަމީލާ ޔުނާންގެ އަތު ތެރެއަށް ބޮޑިވެ ގަތީ ނުރުހުންތެރި ކަމާއެކު އިޝާ އަށް ބަލަމުންނެވެ. އިޝާ މިއަދު ދެރަވެއެވެ. ރުއިން ނޫން އެހެން ކަމެއް ކުރެވޭކަށް ނެތެވެ. އަމިއްލަ ކުށްކަން ވެސް ޤަބޫލު ކުރެއެވެ. އެނބުރި އައި ކޮޅަށް އިޝާ ހިނގައިގަތެވެ.

“އިޝާ.” ޔުނާން ކަމީލާ ދުރު ކޮށްލަމުން އިޝާ އާއި ދިމާއަށް ހިނގައިގަތެވެ. ފަސްއެނބުރި ބެލުމެއްނެތި އިޝާ ހުއްޓުނެވެ.
“ވެދިޔަ ތަނުގެ ވާހަކަ ނުދައްކާ ދެން. އަހަރެން މާފްކޮށްފިން އިޝާ އަށް. ހަމަ ހެޔޮހިތުން.” ޔުނާން އިޝާގެ ކުރިމައްޗަށް ހުއްޓި ހިނިތުންވެލިއެވެ.
“ފްރެންޑްސް.” އިޝާ ޔުނާންއާއި ދިމާއަށް އަތް ދިއްކޮށްލިއެވެ. ގަދަކަމުން ހިނިތުންވެލަމުންނެވެ.
ޔުނާން އިޝާގެ އަތުގައި ހިފީ ބޯޖަހާލަމުންނެވެ. އިޝާގެ އެކުވެރިކަން ޤަބޫލުކުރުމުގެ ގޮތުންނެވެ. ނަމަވެސް މަންޒަރު ބަލަން ހުރި ކަމީލާ އެކަމާއި މެދު އެހާ ހިތްހަމައެއް ނުޖެހުނެވެ. ދެބުމަ ގޮށް ޖަހައިގެން ކަމީލާ ހުރިއިރު ވަރަށް ސާފުކޮށް ކަމީލާގެ ހިތްހަމަނުޖެހުން މޫނުމަތިން ފާޅުވޭވޭ ހުއްޓެވެ.

“ވާ ވަރު ވީތަ؟” އިޝާ ނިކުމެގެން ދިއުމާއެކު ކަމީލާ ތުން ދަމައިގެން ހުރެ ޔުނާން އަށް ދެލޯ އަޅާލިއެވެ.
“ވަޓް!!؟ އާ ޔޫ ޖެލަސް؟” ޔުނާން ލާނެތް ފާޑަކަށް ހީލުމުން ކަމީލާގެ ގާތަށް އައީ އަމަށަކު ރުޅިއެއް ނޫނެވެ.
“މިސް ކަމީލާ ޖޭސްމީން ޕުލިން އިޒް ޖެލަސް.” ޔުނާން ބޭނުންވީ ކަމީލާ އިތުރަށް ރުޅި އަރުވާލާށެވެ.
“އައި އޭމް ލީވިން.” ކައިރީގައި ބަހައްޓާފައި ހުރި ލަގެޖް ހިފައިގެން ކަމީލާ ހިނގައިގަތީ ނިކުންނާށެވެ. ނަމަވެސް ޔުނާން ހުޝިޔާރު ކަމާއެކު އެއްލި އަތުން ކަމީލާގެ އަތުގައި ހިފެހެއްޓިއެވެ.

“ދޫކޮށްލާ. މި ބުނީނު ދޫކޮށްލާށޭ.” ދީމާ ސާހިލްގެ އަތް ފޮޅުވާލިއެވެ.
“މިސާލަކަށް ދޫކޮށްނުލައިފިއްޔާ؟” ސާހިލް ހިނިގަނޑެއް ޖަހާލީ މަލާމާތުގެ ފާޑަކަށެވެ.
“އަހަރެން މިދޭ ލޯތްބަށްޓަކާ ކިހާ ކުޑަކުޑަ ކަމަކު އަހަރެން މިއެދުނީ.؟” ސާހިލް އޭނާ ލައިގެން ހުރި ޖިންސްގެ ޖީބަށް އަތް ޖަހާލަމުން ދީމާގެ މޫނާއި ކައިރިވެލިއެވެ. ދީމާއަށް ޖެހިލެވުނީ ދުރަށެވެ.
ސާހިލް އެދޭ ކަންތައް ދީމާ ކުރާނީ ކިހިނެއް ހެއްޔެވެ؟ ފައިސާ ނަމަ ކިތަންމެ ބައިވަރެއްވެސް ދެވިދާނެއެވެ. ނަމަވެސް ސާހިލް އެ އެދެނީ ދީމާގެ ފުރާނަ ދިނުން ފަދަ ކަމަކަށެވެ.
“ވިސްނާނަން.” ދީމާ ހިނގައިގަތީ ސާހިލްގެ ޖަވާބަކަށް އިންތިޒާރުވެސް ކުރުމެއްނެތިއެވެ. ދީމާ ކުރާނެކަން ޔަޤީންވާތީ ކަންނޭނގެއެވެ. ސާހިލްވެސް ދީމާ ހުއްޓުވާކަށް އިތުރަކަށް މަސައްކަތެއް ނުކުރެއެވެ.

“ކޮންތާކުންތަ ދީމާ ތި އައީ؟” ދީމާ ގެޔަށް އައިސް ވަން އިރު ޔާސިރު ހުރީ ސިޓިންރޫމް ތެރޭގައި ދެކޮޅު ދެކޮޅަށް ހިނގާލަ ހިނގާލައެވެ.
ދީމާ އަށް ލިބުނީ ކުއްލި ސިހުމެކެވެ. އަދި ކިރިޔާ ފިހާރަތައް ހުޅުވާނީއެވެ. އެހެންވީމާ ޝޮޕިންއަކަށޭ ވެސް ނުބުނެވޭނެއެވެ.
“ނުދަންތާކަށް. ޒުބޭދާމެންގެ ހާލު ބަލާލާފަ މިއައީ.” އިތުރަށް ދައްކާނެ ބަހަނާއެއް ނެތުމުން އެންމެ ފަހުން ދީމާއަށް ބުނެވުނެވެ.
“ކަމީލާ އައިއްސަ އެބައުޅޭ. ދޭބަލަ އެމަންޖެ ކައިރިއަށް.” ޔާސިރު ސޯފާގައި އިށީނދެ ޓީވީ ހުޅުވާލިއެވެ.
ނަމަވެސް ދީމާ ގޮސް ވަނީ އޭނާގެ އަމިއްލަ ކޮޓަރިއަށެވެ.
ކަމީލާގެ ނަން އިވުނު އިރަށް ވަގުތުން ދީމާގެ މޫޑް އޯފްވެއްޖެ އެވެ.

ސާދަ ފަނަރައިގެ ފުރިހަމަ ހަނދަށް ނަޒަރު ހުއްޓާލައިގެން ޔުނާންއާއި ކަމީލާ އޮށޯވެލައިގެން ތިބީ ގޭގެ ޓެރަސްގައެވެ.
“އެ ކީއްވެތަ ކަމީލާ ގައިން އަބަދު އޯކިޑް މަލުން ދުވާ ކަހަލަ ވަހެއް ދުވަނީ.” ކަމީލާގެ ރަން އިސްތަށިގަނޑާއި ކުޅެލަމުން ޔުނާން އަހާލިއެވެ.
“ނޭނގެ ދުވާތަ؟” ކަމީލާ ލާނެތް ފާޑަކަށް ހީލިއެވެ.
“އާން. އެކަމަކު މިވީހާ ދުވަހު ނުދުވާ. މާލެ އައީމަ އެކަނި. ކޮން ކަހަލަ ސެންޓެއްތަ ޖަހަނީތި އަނެއްކާ؟” ޔުނާންގެ ރާގުގައި ވަނީ ސަމާސާއެވެ.
ކަމީލާ ހޭންފެށިއެވެ. ކަމީލާ އުފާވެފައި ހުރިތަން ފެނިފައި ޔުނާންގެ ހިތްވެސް އުފަލުން ފުރުނު ކަހަލައެވެ. ކަމީލާގެ ތުނިތުނި ހަށިގަނޑު އަތު ތެރޭގައި ފިއްތާލަމުން ޔުނާން ކަމީލާގެ ފިނިފިނި ތުންފަތުގައި އޭނާގެ ހޫނު ތުންފަތް ޖައްސާލިއެވެ. އެކަކު އަނެކަކަށް ޝަކުވާ ކޮށްލަ ކޮށްލާ އެގޮތައް ތިބެވުނީ ކިހާއިރެއް ވަންދެން ނޫންކަމެއްވެސް ނޭނގެއެވެ. ކުއްލިއަކަށް ޔުނާން ކަމީލާގެ މޫނުގައި ހިފާ ދުރުކޮށްލިއެވެ.
ވީގޮތެއް ކަމީލާ އަހާވެސް ނުލިއެވެ. ވީ ކީއްކަން ކަމީލާއަށް އެނގޭ ކަހަލައެވެ.
ޔުނާން އޭނާގެ ތުންފަތުގައި އަތް ޖައްސާލިއެވެ. ހޫނު ދިލައެއްގެ އިޙްސާސް ކުރެވޭތީއެވެ.
“ހާދަ ހޮޓޭ!” ނަގަމުންދާ ދިލައާއެކުވެސް ޔުނާން ހިނިތުންވެލިއެވެ.
ނަމަވެސް ކަމީލާ އިސްޖަހާލައިގެން އޮތީ އެވެ.
“ޔުނާން ލޯބިވޭތަ؟” ކުއްލިއަކަށް ކަމީލާގެ އަޑު ކުރަކިވުމުން ޔުނާން ކަމީލާގެ މޫނަށް ނަޒަރު ހުއްޓާލިއެވެ.
ކުރިން ހުރި އުޖާލާ ކަމެއް އެމޫނުގައި ފެންނަން ނެތުމުން ޔުނާން ވީ ހައިރާނެވެ.
“އަހަރެން މީ ކޮންމެ މީހަކަށް ވިޔަސް ޔުނާން އަހަރެން ދެކެ ލޯބިވާނަންތަ؟” ކަމީލާގެ ލޮލުން ވެއްޓުނު ކަރުނަތިކި ޔުނާން އަށް ހަމަ ރީއްޗަށްވެސް ފެނުނެވެ.
ބަލާކަށް ނުހުރެ ޔުނާން ކަމީލާގެ އަތުގައި ހިފައި ގަޔާއި ކައިރިކޮށްލިއެވެ.
“މަގޭ ބުލްބުލް. ކޮންކަހަލަ ވާހަކައެއްތަ ތި ދައްކަނީ؟ ކަމީލާ ދެކެ އަހަރެން ވަރަށް ލޯބިވޭ. އަބަދުވެސް ލޯބިވާނަން.” ޔުނާންގެ ޖަވާބުން ކަމީލާއަށް އަނެއްކާވެސް ދެލޯ މަރާލެވުނެވެ. ހިތުގައި އެތަކެއް ވޭންތަކެއް އަޅަމުންދާ ހާލުގައެވެ.

އިރުގެ ރަން އަލިން ދުނިޔެ ފަވާލުމާއެކު މުޅި ފަޒާ އަލިކޮށްލިއެވެ. ލޯގަނޑު ކުރިމަތީގައި ކަތުރެއް ހިފައިގެން އިން އިޝާ ޖެހި ބުދެއްހެން ހުއްޓެވެ. ލޯގަނޑުން ފެންނަމުންދާ އަމިއްލަ ސޫރައަށް ބަލާށެވެ. މަޑުމަޑުން އިޝާގެ އަތް ހަރަކާތްކުރަން ފެށިއެވެ. އެއް އަތުން އިޝާގެ ދިގު އިސްތަށިގަނޑުގައި ހިފަހައްޓާލިއެވެ. އަދި އަނެއް އަތުގައި އޮތް ކަތުރު އިސްތަށިގަނޑާއި ކައިރިކޮށްލުމަށްފަހު އަނެއްކާވެސް އިޝާގެ ހަރަކާތް ހުއްޓުނެވެ.
ދެލޮލުން އޮހެން ފެށި ކަރުނަތަކާއެކު އިޝާ އަތުކޮޅަށް ކަތުރު ނަގާ ހޫރާލިއެވެ. އަމިއްލަ ނަފްސް ދެކެވެސް އިޝާ މިހާރު ރުޅި އާދެއެވެ. މި ހަލަބޮލި ދުނިޔޭގައި އިޝާ މުޅިން ބާކީ ވެއްޖެއެވެ. ކުށްވެރިޔަކީ ޚުދު އިޝާ ކަން އިޝާ ޤަބޫލުވެސް ކުރެއެވެ.

ދޮރުގައި ދެތިން ފަހަރަކު މީހަކު ޖަހާލިތަނާ އިޝާ ގޮސް ދޮރު ހުޅުވާލިއެވެ.
ކުރިމަތީގައި ހުރި ޕޯސްޓްބަހާ މީހާ އިޝާ އަށް ބަލަހައްޓައިގެން ހުރީ ހައިރާންވެފައެވެ. ހޭވިފައިވާ އިޝާގެ އިސްތަށިގަނޑާއި ރަތް ވެފައިވާ ދެލޯ ފެނިފައި ކޮންމެ މީހެއްގެ ހިތުގައި ވެސް ސުވާލު އުފެދޭނެކަން ޔަޤީނެވެ.

ދޮރު ލައްޕާލުމަށްފަހު އިޝާ ސިޓީ އުރަ ކަނޑާލިއެވެ. މާޔޫސްކަމުން ފުރިގެންވާ އިޝާގެ ތުންފަތުގައި ލުއިލުއި ހިނިތުންވުމެއް ކުޅެލީ އެވަގުތުއެވެ.
ބޭރު ކުންފުންޏެއްގެ އޮފީހަކުން އިޝާއަށް ވަޒީފާ ހަމަ ޖެހުނީއެވެ. މީގެ ދެތިން މަސް ކުރިން އިޝާ ކުރި މެއިލަށް ޖަވާބު އެ އައީ އަދި ކިރިޔާއެވެ. އަވަސް އަވަހަށް ދެއަތުން މޫނު ފޮހެލަމުން އިޝާ އެ ސިޓީ މޭގައި ޖައްސާލިއެވެ. އިޝާގެ ޙަޔާތުގެ އާ ސޮފްޙާ ތަކެއް ފެށުނީއެވެ. ނަމަވެސް އެކަންޏެވެ. އިތުރު މީހެއްގެ ސަޕޯޓެއް އިޝާ ބޭނުމެއްނޫނެވެ. ކުށެއް ކުރެވުނަސް މުޅި އުމުރަށް އެކުށުގެ ޝަޒާ އިޝާއަށް ލިބެން ޖެހޭނެ ކަމަށް އިޝާއެއް ޤަބޫލެއް ނުކުރެއެވެ.

ބަދިގެއަށް ވަން ގޮތަށް ދީމާ ހުރީ ބުނާނެ އެއްޗެއްވެސް ނޭނގި ހައިރާންވެފައެވެ. މިއިން ދުވަހަކު ކާމޭޒުމަތި ތަނަވަސް ނުވާ ވަރަށް މިއަދު ތަފާތު ވައްތަރުތަކުން ކާމޭޒުމަތި ފުރިފައިވާތީއެވެ.
“ތަފާތު ފެނޭތަ؟ ހާދަ ވަސްގަނޑުވެސް ރަނގަޅޭ.” ޔާސިރު ދީމާގެ ފަހަތުން އައިސް ކާމޭޒު ކައިރިއަށް ހުއްޓުނެވެ.
“ރަނގަޅުތަ މަންމާ؟ ސައިބޯން ފަށާ އަވަހަށް.” ހެވިދިލިފައި ހުރެ ކަމީލާ ބަދިގެ ތެރެއިން ނިކުތެވެ.
ޔާސިރު ހުރީ ހިތްހަމަ ޖެހިފައެވެ. ޔުނާން ގެ ހަޔާތަށް ރަނގަޅު ކުއްޖަކު އައީތީއެވެ. ފުރަތަމަ ދުވަހުން ވެސް ކަމީލާ އެމީހުންގެ ހިތް އަތުލައިފިއެވެ.
ޔުނާންވެސް މިއަދު އެހެން ދުވަސް ދުވަހަށްވުރެ ރަނގަޅަށް ސައިބުޔެވެ. އެންމެން އޮފީހަށް ދިއުމާއެކުހެން ދީމާ އާއި ކަމީލާ ގޭތެރޭގައި އެކަނިވިއެވެ.
“މަށާ ދޭތެރޭ ތި ހާ ހާސްނުވެބަލަ؟ އެކަމެއް ނުވާނެޔޭ.” ކަމީލާގެ އަޑުން ކާމޭޒު ކައިރީގައި ތަށިތައް ނަގަން ހުރި ދީމާ ދިޔައީ ސިއްސައިގެންނެވެ. އަތުގައި ހުރި ތަށިތައްވެސް ބިންމައްޗަށް ވެއްޓި ފުޑުފުޑުވެގެން ދިޔައެވެ.

ނުނިމޭ