ޑާކް ރެއިން އެންޓަޓެއިންމެންޓްގެ ވެރިޔާ އަދި ކާމިޔާބު ޕްރޮޑިއުސަރު މުޙައްމަދު ޢަލީ (މޮގާ)، ރާއްޖޭގެ ފަންނުވެރިކަމުގެ ބަލަދުވެރި މިނިސްޓްރީގެ މިނިސްޓަރ ޔުމްނާ މަޢުމޫނަށް ޓެގްކޮށް ފިލްމީ އަދި އާޓް ދާއިރާގައި ހުރި ބޮޑެތި ކަންބޮޑުވުން ތަކެއްގެ އުދާސްތަކެއް ބަންޑުންކޮށްލައިފިއެވެ.

މޮގާގެ އަމިއްލަ ފޭސްބްކް އެކައުންޓްގައި މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް ޔުމްނާ މަޢުުމޫނަށް ޓެގްކޮށް އިނގިރޭސިބަހުން ލިޔެ ހިއްސާކޮށްފައިވާ ދިގު ބަޔާނުގައި ބުނީ ވޭތުވެދިޔަ ދޮޅު އަހަރެއްހައި ދުވަހުގެ ތެރޭގައި އާޓިސްޓުންނަށާއި އާޓް އިންޑަސްޓްރީ އެއްކޮށް އިނދަޖެހިފައިވާކަން މިނިސްޓަރުގެ ސަމާލުކަމަށް ގެނައުމަށް ބޭނުންވާ ކަމަށެވެ. އަދި މިނިސްޓަރުގެ މަޤާމުގެ މަސްޢޫލިއްޔަތު އަދާނުކުރެއްވޭނަމަ ނުވަތަ ފަންނުވެރިންގެ ހާލަތު އެއްވެސް ވަރަކަށް އެނގިވަޑައިގެންފައި ނުވާނަމަ، މިނިސްޓަރުގެ ސަމާލުކަމަށް ގެނައުމަށްޓަކައި އެކަންކަމަށް އަލިއަޅުވައިލަދޭނެ ކަމަށް ބުނެފައިވެއެވެ.

“ފިލްމީ، މިއުޒިކީ ދާއިރާއާއި އާޓްގެ ދާއިރާއާއި ގުޅުން ހުރި އާޓިސްޓުންގެ އަތްމަތި ހުސްވެ އިނދަޖެހިއްޖެއެވެ. މިއީ ހަމައެކަނި ކޮވިޑްގެ ހާލަތާއި ގުޅިގެން ކުރިމަތިވި ކަމެއް ނޫނެވެ. ކޮވިޑްގެ ބަލިމަޑުކަމާއި ގުޅިގެން ވޭތުވެދިޔަ އަހަރެއްހައި ދުވަހު ރާއްޖޭގައި ފިލްމު ދައްކަން ހުރި ހަމައެކަނި ރަސްމީ ސިނަމާ (އޮލިމްޕަސް) ބަންދުކޮށްފައި ހުރި ހުރުން އަޅުގަނޑަށްވެސް ރަނގަޅަށް ފަހުމުވެއެވެ. އެހެން ނަމަވެސް، މުޅި ދުނިޔޭގައި ސްޓްރީމިންގ ގެ ޚިދުމަތްދޭ ތަންތަނަށް މިވަނީ، މީހުން ގޭގައި ތިބެން ޖެހުމުގެ ސަބަބުން މާލީގޮތުން މަންފާވެފައެވެ. އެހެނަސް މިކަން ރާއްޖޭގައި އޮތީ ވަރަށް ތަފާތުކޮށެވެ. ސަރުކާރަށް ނިސްބަތްވާ ބޮޑެތި މީޑިއާ ކުންފުނިތަައް ކަމަށްވާ ދިރާގާއި ޕީއެސްއެމް އިން ރާއްޖޭގެ އާޓިސްޓުންނަށް އެހީތެރިވެދިނުން ހުއްޓައިލުމާއި ގުޅިގެން އެކްޓަރުންނާއި އެހެނިހެން ޓެކްނިކަލް ފަރާތްތަކަށް ދާއިރާގެ މަސައްކަތް ދިނުމަށް ޕްރޮޑިއުސަރުން ވަނީ ނުކުޅެދިފައެވެ. ވަކިން ޚާއްޞަކޮށް ފިލްމު އުފައްދާ ފަރާތްތަކެވެ.

ކޮވިޑްގެ ބަލިމަޑުކަން ފެށުނު ފަހުން އެއްވެސް ވިޒުއަލް އާޓެއް ދިރާގުން ގަނެފައެއް ނުވެއެވެ. މިއީ އެއްވެސް ހާލެއްގައި އަޅުގަނޑުމެންގެ އުފެއްދުންތައް ގަތުމަށް ޕްރައިވެޓް ކުންފުނިތަކަށް ނުފޫޒުފޯރުއްވުމަށް ދަންނަވާ ދެންނެވުމެއް ނޫންކަން ހަނދުމަފުޅުގައި ބެހެއްޓެވުން އެދެމެވެ. އެހެން ނަމަވެސް ދައުލަތުގެ ކުންފުނިތަކުންނާއި އާޓްގެ ދާއިރާއާއި ސީދާ ގުޅުންހުރި މިނިސްޓްރީއަކީ ކަމަނާގެ މިނިސްޓްރީއަށް ވީހިނދު، މި ދާއިރާތަކުގައި މަސައްކަތްކުރާ ފަރާތްތަކަށް ފަހި މާހައުލެއް ހޯދައިދިނުމަށް މަސައްކަތްކުރެއްވުމަކީ ތިޔަ ފަރާތްތަކުގެ ޒިންމާއެކެވެ.

ފިލްމީ ސިނާޢަތާއި އެ ސިނާޢާތުގައި މަސައްކަތްކުރާ ފަރާތްތައް ނެގެހެއްޓުމަށްޓަކައި އަޅުގަނޑުމެން ކިތަންމެ މަސައްކަތެއް ކުރި ނަމަވެސް، ސަރުކާރުގެ ކުންފުނިތަކުން އަޅުގަނޑުމެންގެ އުފެއްދުންތައް ގަތުމަށް ދެކޮޅުހަދަމުން އަންނާތީ އަޅުގަނޑުމެންގެ އުފެއްދުންތަކަށް އެއްވެސް މާރކެޓެއް މިއަދަކު ނެތެވެ. ނަތީޖާއެއްގެ ގޮތުން އަޅުގަނޑުމެންގެ މަސައްކަތާއި އެކްޓަރުންނާއި ޓެކްނީޝަނުންގެ މަސައްކަަތުގެ އަގުވެސް އަންނަަނީ ވަޒަން ނުކުރެވެމުންނެވެ. ރާއްޖޭގެ ފިލްމީ އުފެއްދުންތައް ގަތުމަށް ތިބި އަމިއްލަ ކުންފުނިތަކުން ޤަސްދުގައި އަޅުގަނޑުމެންގެ އުފެއްދުންތަކުގެ އަގު ދަށްކޮށްފައިވިޔަސް މިިއަދު އަޅުގަނޑުމެންނަށް އެހެން ގޮތެއް ނެތެވެ.

ދިރާގު ފަދަ ކުންފުނިތަކުން ގެންދަނީ މިލިޔަނުން ފައިދާ ހޯދަމުންނެވެ. ނަމަވެސް އެ ފަރާތުގެ ސްޓްރީމިން އެޕްތަކާާއި ޗެނަލްތައް މެދުވެރިކޮށް ރާއްޖޭގެ އާޓިސްޓުންނާއި ފަންނީ އުފެއްދުންތައް ދެއްކުމަށް ކުުޑަނަމަވެސް އަހައްމިއްތުކަމެއް ނުދޭކަން ކަމަނާއަށް ހަނދުމަފުޅުކޮޮށް އަރުވަމެވެ. މި ހުރިހައި ކަމެއް ހިނގަމުން އަންނައިރު، ނޭޝަނަލް ސެންޓަރ ފޮރ ދި އާޓްސް އަށް މިއިން އެއްވެސް ކަމެއްގެ ހިލަމެއްވެސް ނުވާ ކަހަލައެވެ. އަޅުގަނޑުމެން މި އެދެނީކީ އޮލިމްޕަސް ހުޅުވުމަށް ނުވަތަ ރާއްޖޭގެ ޕްރޮޑަކްޝަން ހައުސްތަކަށް މިނިސްޓްރީން ފަންޑުކުރުމަކަށް ނޫނެވެ. ނޫނެކެވެ. ސަރުކާރުން އާޓްގެ ދާއިރާއަށް ކަނޑައަޅުއްވާފައިވާ ބެލެނިވެރި މިނިސްޓްރީއަކީ ތިޔަ ފަަރާތަށް ވީތީ އަޅުގަނޑުމެން މި އެދޭހާވެސް ކަމަކީ މި ޕެންޑަމިކްގެ ތެރޭގައާއި އަދި އޭޭގެ ފަހުންވެސް އާޓިސްޓުންނަށް ބަނޑުފުރާނަ މުއްތިކޮށްގެން އުޅުމަށް ފަހިވާނެ މާހައުލެއް ޤާއިމުކުރުމަށް މަސައްކަތްކޮށްދެއްވުމަށެވެ. އިންޑަސްޓްރީ އެއްކޮށް އިނދަޖެހި ހަފުސްވެގެންދާއިރު، ކަމަނާ ހަމަޖެހިލައިގެން ނުއިންނަވާ އަޅުގަނޑުމެންނަށް ފުރުޞަތުތައް ފަހިކޮށްދިނުމަށް ހުރަސްއަޅާ ކުންފުނިތައް ޖަވާބުދާރީ ކުރުވުމަށް މަަސައްކަތްކޮށްދެއްވުމަށް ދަންނަވަމެވެ.

އަޅުގަނޑުމެން މަސައްކަތް ކޮށްފީމުއެވެ. އަޅުގަނޑު އަމިއްލަގޮތުންވެސް އެކްޓަރުނާއި ޓެކްނިކަލް ސްޓާފުންނަށް މި ދަތި ދުވަސްވަރު އެހީތެރިކަން ފޯރުކޮށްދީފުމުއެވެ. ވިޔަފާާރީގެ ގޮތުން ބޮޑު ލޮޚްސާނެއްގައި އަޅުގަނޑުމެން ތިބެ ނަމަވެސް މެއެވެ. ނަމަވެސް އަޅުގަނޑުމެންްގެ އުފެއްދުންތައް އޯޑިއަންސާއި ހަމައަށް ފޯރުކޮށްދިނުމުގައި އެހީތެރިކަމެއް ނުދެވި، އާޓިސްޓުންނަށް އަޅައިނުލެވޭނަމަ، އާޓްސް މިނިސްޓަރެއް އިންނެވުމުގެ ބޭނުމަކީ ކޮބައިތޯއެވެ.

މި ޕޯސްޓަކީ އެއްވެސް މީހެއްގެ އަގުވައްޓައިލުމަށް ޖެހި ޕޯސްޓެއް ނޫނެވެ. މިއީ ސަރުކާރުގެ ކުންފުނިތަކުން ފިލްމާއި އާޓްގެ ދާއިރާ ފުނޑިގެން ދިއުމަށް ދޫކޮށްލާފައިވާ މިންވަރު ކަމަނާގެ ސަމާލުކަމަށް ގެނައުމަށް ޖެހި ޕޯސްޓެކެވެ. މިކަން ހައްލުކޮށްދެއްވުމަށް މިހާރުން މިހާރަށް ކޮންމެވެސް މަސައްކަތެެއް ކޮށްދެއްވުމަށް އެދި ދަންނަވަމެވެ.”

ޔާދާ، މޮގާ، ޢާއިޝަތު ފުއާދު އަދި ޗިއްޕެ

ފިލްމީ ދާއިރާގެ ފަންނާނުންގެ ހާލަތު މުނިއަވަސް އާއި ހިއްސާކުރަމުން މޮގާ ބުނީ، ޑާކް ރެއިން އެންޓަޓެއިންމެންޓްގެ އުފެއްދުންތަކަށް ސޮއެކޮށްފައިވާ ފަންނާނުންގެ ތެރެއިން ބައެއް އެކްޓަރުން ވެސް، އެހެން ގޮތެއް ނެތިގެން ރިޒޯޓް ވަޒީފާ އަށާއި އެހެނިހެން ދާއިރާތަކުގެ ވަަޒީފާތަކަށް ދާން ފަށައިފި ކަމަށެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: