ޑާކް ރެއިން އެންޓަޓެއިންމެންޓުން އުފައްދައި ހުރިހައި މަސައްކަތެއް ނިންމާލާފައިވާ އަސަރުގަދަ ލޯބީގެ ފިލްމު ”ނޮވެމްބަރ“ގެ ޓީޒަރ ޓްރެއިލަރ މި މަހު21 ވަނަ ދުވަހު އެ ޕްރޮޑަކްޝަން ހައުސްގެ ޔޫޓިއުބް ޗެނަލްގައި ރިލީޒްކޮށްފިއެވެ.
ފިލްމު ”ނޮވެމްބަރ“ގެ ޓީޒަރ ޓްރެއިލަރ ފެށިގެންދަނީ މަޝްހޫރު ޓީވީ ޕްރެޒެންޓަރ މޫސާ ވަސީމްގެ ފުން މެސެޖެއްދޭ ވާހަކަކޮޅަކުންނެވެ.
“ސޯލް މޭޓްސް. ސޯލް މޭޓްސް އަކީ ޙަޤީޤަތެއްތޯ؟ ނުވަތަ އެއީ ހަމަ އެކަނި ވާހަކަތަކާ ފިލްމުތަކާ ފަލްސަފާތަކުގަ ހިމެނޭ ޖާޒުބީ ޚިޔާލެއްތޯ؟” އޮފް ސްކްރީނުގައި މޫސާ ވަސީމްގެ ސުވާލުތަކެއް އަމާޒުވެގެން ދެއެވެ. އޭގެ ފަހުން ފެނިގެންދަނީ ފިލްމުގެ ލީޑް މަރްޔަމް މަޖުދާ (މަޖޫ) އާއި ޖުމައްޔިލް ނިމާލް (ޖުމަލް)އެވެ. ސިންގަޕޫރުގެ ހިތްގައިމު ލޮކޭޝަނެއްގައި ތިބެ ދައްކާ ވާހަކަތަކެވެ. އެ ވާހަކަތަކުގެ ތެރެއިން މަޖޫ އަށް ޖުމަލް ލޯބި ހުށައަޅައެވެ.
އެއަށްފަހު، ޖުމަލް އާއި މަޖޫގެ ހިތްގައިމު، ލޯބި މަންޒަރުތަކެއް ސިންގަޕޫރުގެ އެތަކެއް ބައިވަރު، ހިތްގައިމު ލޮކޭޝަން ތަކަކުން ފެނިގެންދެއެވެ.
މަޝްހޫރު ޕްރެޒެންޓަރ މޫސާ ވަސީމް، ފިލްމު “ނޮވެމްބަރ” ގައި
“ލޯތްބަކީ އިމްތިހާނެއް ކަމަށް ޤަބޫލުކުރަންތޯ؟” މިފަހަރު ވެސް މޫސާ ވަސީމްގެ ސުވާލެކެވެ. ނަމަވެސް ޓީވީ ޕްރޮގްރާމެއްގެ ތެރެއިންނެވެ. ދެން އިވިގެންދަނީ އެ ސުވާލުގެ ޖަވާބުކަމަށް ބެލެވެއެވެ. ޖަވާބު ދެއްވަނީ ދިވެހި ބަހުގެ އުސްތާޒު، ޢަބްދުﷲ ޞާދިޤް (ސޯދުބޭ)ގެ އަޑުންނެވެ.
“އެއީ ދިރިއުޅުމުގާ ކުރިމަތިވާ އެންމެ ބޮޑު އިމްތިހާނު. މީގެ އެންމެ ބޮޑު ދެ ވަސީލަތަކީ ތެދުވެރިކަމާ އެކަކު އަނެކަކަށް ކުރާ އިތުބާރާ، އެ ދެ ވަސީލަތް. އެ ދެވަސީލަތް މީގަ ހިމެނިއްޖެ ކަމަށް ވަނީވިއްޔާ އެ ލޯތްބެއް ކާމިޔާބު ކަމަށް، އެ އިމްތިހާނު ކާމިޔާބުވާނެ.” އޯފް ސްކްރީނުގައި ސޯދުބޭ ވިދާޅުވެއެވެ.
ދެން ފެނިގެންދަނީ ލޯބީގައި ނުވަތަ ހަޔާތުގައި ކުރިމަތިވާ ހިތްދަތިކަމާއި ހިތާމައިގައި މަޖޫ އާއި ޖުމަލް ކުރިމަތިލާ ބައެއް މަންޒަރުތަކެވެ. އެ މަންޒަރުތަކުގެ ތެރެއިން، ލ. މާންދޫ ހޮރައިޒަން ފިޝަރީޒްގެ މަސްބަންދުކުރާ ކާރުޚާނާ ތެރެއިންނާ ރަށެއްގެ މަގެއްމަތިން މަޖޫ ފެނެއެވެ. މާޔޫސްވެފައި ހުންނަ މުޅިން ތަފާތު މަޖޫ އެކެވެ.
ފިލްމު ”ނޮވެމްބަރ“ ގެ ސްކްރީންޕްލޭ ލިޔުނީ ޢާއިޝަތު ފުއާދު އާއި ޢަހްމަދު ޠަލާލް އެވެ. ޑައިރެކްޓްކޮށް ކެމެރާކުރީ ޝިފާއު (ޗިއްޕެ) އެވެ. ކޯ-ޑައިރެކްޓަރެއްގެ ގޮތުގައި ހަރަކާތެރިވެފައިވަނީ އާއިޝަތު ފުއާދެވެ. ޗިއްޕެއާއެކު ކެމެރާކުރުމުގައި އަޙްމަދު ޝިނާން ވެސް ހަރަކާތެރިވިއެވެ.
މި ފިލްމުގެ މުހިންމު މަންޒަރުތައް، ލ. އަތޮޅުގެ ގުޅާލާފައިވާ ތިންރަށުގައާއި އައްޑޫ ސިޓީ، ކ. ތުލުސްދޫ، ވެލާނާ އެއަރޕޯޓް، ސިންގަޕޫރު އަދި މަންޓާ އެއަރގައި ނަގާފައިވާކަން ފާހަގަކޮށްލެވެއެވެ.
ފިލްމު ”ނޮވެމްބަރ”ގެ ރަސްމީ އޮންލައިން މީޑިއާ ޕާޓްނަރަކީ މުނިއަވަސް އެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 29 ޑިސެމްބަރ 2024ޚަބަރު“ރޯމްދުނިޔެ” އިން އީސިމް ނެގުން ދިވެހީންނަށް މާ ސަޅިވާނެ!
- 27 ޑިސެމްބަރ 2024ޚަބަރުޑާކް ރެއިން އިން މިފަހަރު “ފެށުމާއި ނިމުން”
- 24 ޑިސެމްބަރ 2024ޚަބަރުނިޝާ އާރްޖޭއަކަށް!
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
