މީގެ 23 އަހަރު ކުރިން، ރާއްޖޭގެ ފިލްމީ މަސައްކަތަށް ބޮޑު އިންޤިލާބީ ބަދަލެއް ގެނެސްދިން “ފަތިސްހަނދުވަރު” ފިލްމަަށް ޚާއްޞަކޮށްގެން ކްލަބްހައުސްގައި ބާއްވާ ޝޯ މިމަހުގެ 11 ވަނަ ދުވަހުގެ ރޭ 22:00ގައި ގެނެސްދިނުމަށް ހަމަޖެހިއްޖެއެވެ.

މިއީ “ފަތިސްހަނދުވަރު” ފިލްމު އުފެއްދުމުގެ މަސައްކަތްތަކާއި މި ފިލްމާ ބެހޭ އެންމެ ތަފުސީލް މަޢުލޫމާތު ގެނެސްދިނުމަށް “މުނިއަވަސް ނިއުޒް އަވަރ – ފަތިސްހަނދުވަރު ސްޕެޝަލް”ގެ ނަމުގައި ގެނެސްދޭނެ ޝޯވއެކެވެ. މިހައިތަނަށް، “ފަތިސްހަނދުވަރު” ފިލްމާ ބެހޭގޮތުން ގެނެސްދީފައިވާ ނުވާ އެތަކެއް ވާހަކަތަކެއް ހިމެނޭ މި ޝޯވގައި ފިލްމުގެ ލީޑް ކުޅެފައިވާ މޫސާ މަނިކް (ރީކޯ މޫސަ)، ނިޢުމާ މުޙައްމަދު، ފިލްމުގެ ވާހަކަ ލިޔުންތެރިޔާ އިބްރާހީމް ވަހީދު (ބިންމާ)، ފިލްމުގެ ޕްރޮޑިއުސަރ އަސްލަމް ރަޝީދުގެ އިތުރުން ފިލްމުގެ ޑައިރެކްޓަރ ޢީޝާ ޝަރީފް މި ޝޯވގައި ބައިވެރިވާނެއެވެ.

’މުނިއަވަސް ނިއުޒް އަވަރ‘ އަކީ ޖޫން މަހުގެ 22 ވަނަ ދުވަހުން ފެށިގެން މުނިއަވަސް އިން ކްލަބްހައުސް މެދުވެރިކޮށް ވަގުތުން ގެނެސްދެމުން އަންނަ ޝޯވ އެކެވެ. އެގޮތުން “ފަތިސްހަނދުވަރު” ފިލްމަށް ޚާއްޞަކޮށްގެން ގެނެސްދޭ ޝޯވގައި ބައިވެރިވާ އެހުންތެރިންނަށް ވެސް، ފިލްމުގެ ކާސްޓާއި ކްރޫ އާއި ވަގުތުން ސުވާލުކުރުމުގެ ފުރުޞަތު ހުޅުވާލާނެއެވެ.

މުނިއަވަސްގެ އުއްމީދަކީ މި ޝޯވގައި ރާއްޖޭގެ އެންމެހައި ފިލްމީ ފަންނާނުން ބައިވެރިވެ، ރާއްޖޭގެ ފިލްމީ ހަޔާތުގެ މި އައިކޮނިކް ފިލްމު އުފެއްދުމުގެ މަސައްކަތްތައް ކުރިއަށްދިޔަ ގޮތާމެދު ލިބޭ މަޢުލޫމާތުން ދަރުސްތަކެއް ހާސިލްކުރުމެވެ. ހަމަ އެހެންމެ ފިލްމު އުފެއްދުމަށް ޝައުޤުވެރިވާ ފަރާތްތަކާއި ފިލްމީ ދާއިރާއަށް ލޯބިކުރާ ބޭފުޅުންނަށްވެސް މޭވަވެތި މަޢުލޫމާތުތަކެއް ލިބިގެން ދިއުމެވެ.

މި ފުރުޞަތުގައި ފިލްމު “ފަތިސްހަނދުވަރު”ގައި ޝާމިލްވާ ބޭފުޅުންގެ ތެރެއިން މުހިންމު ބޭފުޅުންކޮޅެއް މި ޝޯވގެ ދަޢުވަތު ޤަބޫލުކުރެއްވިކަމަށްޓަކައި މުނިއަވަސް ޓީމުގެ ފަރާތުން ވަރަށް އިޚްލާޞްތެރިކަމާއެކު ޝުކުރުދަންނަވަމެވެ. މީގެ އިތުރުން، އީސަ އޮންލައިން ޕޮއެޓްރީގެ ފަރާތުން މެދުކެނޑުމެއް ނެތި މުނިއަވަސް އަށް ވެދެއްވާ އެހީތެރިކަމަށްޓަކައި ޢީސާ ޝަރީފަށް ވެސް ވަރަށް ޚާއްޞަ ޝުކުރެއް ރައްދުކުރަމެނެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: