މުނިއަވަސް އިން ކޮންމެ ރެއަކު 10:00ން ފެށިގެން ތިން ގަޑިއެއްހައި އިރަށް ކްލަބްހައުސް މެދުވެރިކޮށް ކުރިއަށްގެންދާ ‘މުނިއަވަސް ޚަބަރު / ކޯދު: އިން-ޑެޕްތު ނިއުސް ޓޯކް ޝޯވ’ގައި ކޮންމެ ހަފުތާއަކު އާދީއްތަ ދުވަހުގެ ރޭ ޚާއްޞަކޮށްލަނީ ރާއްޖޭގައި އުފައްދާފައިވާ ފިލްމުތަކުގެ ތެރެއިން ފާހަގަކޮށްލެވޭ ވަރުގަދަ ކޮންމެވެސް ފިލްމެއްގެ މައްޗަށެވެ. އެގޮތުން މި ޝޯވގައި ފިލްމުގެ ތަރިންނާއި ކްރޫގެ އިތުރުންވެސް ޕްރޮޑިއުސަރުންނާއި ފިލްމުގެ މަސައްކަތްކުރުމުގައި ޢަމަލީގޮތުން އެހިތެރިވެދިން ފަރާތްތައްވެސް ބައިވެރިވާނެއެވެ.
އެހުންތެރިންނަށް ވެސް ސުވާލުކޮށް ބައިވެރިވުމުގެ ފުރުޞަތު ހުޅުވާލައިގެން ކުރިއަށްގެންދާ މި ޝޯވގެ ފުރަތަމަ އެޕިސޯޑް ޚާއްޞަކޮށްލީ މީގެ 24 ވަރަކަށް އަހަރު ކުރިން އުފައްދައި ރިލީޒްކުރި “ފަތިސްހަނދުވަރު” ފިލްމަށެވެ. މިމަހު 11ވަނަ ދުވަހުގެ ރޭ ގެނެސްދިން މި ޝޯވ ހަތަރު ގަޑިއިރަށް ދެމިގެން ދިޔައެވެ. ފިލްމުގެ ލީޑް ކާސްޓާއި ކްރޫއާއި ފިލްމުގެ ޕްރޮޑިއުސަރ އަދި ވާހަކަ ލިޔުންތެރިޔާވެސް ބައިވެރިވި މި ޝޯވގައި “ފަތިސްހަނދުވަރު” ފިލްމާއި ގުޅުން ހުރި އައު ވާހަކަތަކެއް ވެސް އެނގިގެން ދިޔައެވެ.
“އަޅުގަނޑުމެންގެ ފިލްމު ފަތިސްހަނދުވަރު ޖިންނި ޖިނާގަ ހުންނާނެ ބައެއް ކަހަލަ ޚާއްޞަ ހަރަކާތްތައް ދޮގެއްތޯ. އޭނަގެ އެ ހަށަންބަނުން، ޢާއްމު މީހުން ހަށަންބަނުމާ ތަފާތުވާނެ. މި މިކަހަލަ ކުދިކުދި ހަރަކާތްތަކަކީ މީ އަޅުގަނޑުގެ ވެސް ނިންމުމެއް ނޫން އިނގޭތޯ. މީ ހަމަ ސީދާ މޫސަ، އޭނަގެ ކެރެކްޓަރ އަށް އޭނަ ނިންމާފަ ހުރި ނިންމުތަކެއް. ދެން އަޅުގަނޑުމެން ޑިސްކަސްކޮށްފަ ފަހުން އެއާއިގެން ކުރިއަށް ދިޔައީ. މޫސަ އެބަ އޮތްތޯ އެއްޗެއް ބުނެލަން؟” މި ޝޯވ މުނިއަވަސްގެ ފަރާތުން ކުރިއަށް ގެންދިއުމުގައިވެސް އިސްދައުރެއް އަދާކުރި މި ފިލްމުގެ ޑައިރެކްޓަރ ޢީސާ ޝަރީފް މޫސައަށް ސުވާލު އަމާޒުކުރިއެވެ.
“ނެތް ދެން، ވަރަށް ގިނައިން ލޯގަނޑު ކުރިމަތީގަ އަމިއްލައަށް ހުރެގެން އެ މަސައްކަތް ކުރަން ޖެހުނު. ފުރަތަމަ ވާހަކަ އެއްކޮށް ކިޔާލީ. ކިޔާލާފަ ދެން އީސައާވެސް ވާހަކަދައްކާލާފަ ދެން އަޅުގަނޑު ހެދިގޮތަކީ އޭގަ އަމިއްލައަށް ލޯގަނޑުކުރިމަތީގަ ހަށަންބަނދެގެން ބަލާ ލައްކަ ގިނަ މަސައްކަތް ކުރިން. ދެން އައިސްތު (ފީރޯޒް އައިސްތު) އަށްވެސް އެނގިލައްވާނެ ފީރޯޒްގޭގަ ވެސް އެކަން ކުރިން. ދެން ހަމަ އެދުވަސްކޮޅު އާއްމުކޮށް ހަމަ ގޭގަވެސް ކުރާ ކަމަކީ އެ ބަލާފަ ހީފަ ޑައިލޮގު އެއްޗެހި ކިޔާފަ ދެން އެއަށް ވަރަށް ބޮޑަށް، އޭރުގަ ކުޅެމުން ގެންދިޔަ އެހެން ހުރިހާ ފިލްމުތަކަށްވުރެ ބޮޑަށް އެއަށް ތައްޔާރުވެވުނީ އަސްލު އެއީކަން ނޭނގެ ދެން، ދެން ޚާއްޞަކޮށް އެ ޖިންނިގެ ބައި ފެންނަ އިރު ގެންގުޅެން ޖެހެނީ އެއް އެކްޓްތަކެއް ވީމަ އެއީކަން ނޭގެ އެހާ ފަސޭހަވީ ގޮތަކީ. ދެން އަޅުގަނޑު އީސާ ހަމަ އެހެން ފިލްމުތަކަށް ޕްރެކްޓިސް ނުކުރާ ވަރަށް އެއަށް އަމިއްލައަށް ޕްރެކްޓިސްކުރިން އިނގޭތޯ، އެއީ ކުއްލިއަކަށް މޮޅުވެގެނެއް ނޫން. ހަމަ މަސައްކަތް ކޮށްގެން އެގޮތަށް އަބަދު ބެލުނީވެސް.” ފަތިސްހަނދުވަރުގައި މޫސަގެ ހަށަން ބަނުމާއި އެކްޓިންއަށް ކުރި މަސައްކަތްތައް ތަފުސީލުކޮށްދެމުން ފިލްމުގެ ލީޑް ކުޅުނު މަޝްހޫރު އެކްޓަރު މޫސަ ފާހަގަކުރިއެވެ.
މި ޝޯވގައި މި ނޫނަސް ގިނަ ކަންތައްތަކެއް ތިލަވެގެން ދިޔައެވެ. ބޮޑު އޯޑިއަންސަކާއެކު ކުރިއަށް ގެންދިޔަ މި ޝޯވގައި އެހުންތެރިންނަށް ދެވުނު ފުރުޞަތު ކުޑަވުމާއި ތަރިންނަށް ދެވުނު ފުރުޞަތު ކުޑަކަމުން، މި ހަފުތާގެ އާދިއްތަ ދުވަހުގެ ރޭ، ފަތިސްހަނދުވަރު ފިލްމަށް ޚާއްޞަކޮށްގެން ދެވަނަ ޝޯއެއް މުނިއަވަސްގެ ކްލަބްހައުސް ޕްލެޓްފޯމުގައި ގެނެސްދޭނެއެވެ. މި ޝޯވގައިވެސް ނިޢުމާ، މޫސަ، ޢާރިފާ، ފީރޯޒް އައިސްތު، ހަންނާނުގެ އިތުރުންވެސް ގިނަ ފަރާތްތަކެއް ބައިވެރިވާނެއެވެ.
މި ސިލްސިލާގެ ދަށުން ކުރިއަށް އޮތް ތަނުގައި ފިލްމު “ދެރިޔާ”، “އަމާނާތް”، “ނިޢުމާ”ގެ އިތުރުންވެސް ވަރުގަދަ ފިލްމުތަކަކަށް އަމާޒުކޮށް ޝޯވްތަކެއް ކުރިއަށްގެންދާނެއެވެ.
“ފަތިސްހަނދުވަރު” ފިލްމުގެ ސާފު ކޮޕީއެއް ބައިސްކޯފު މެދުވެރިކޮށް ބަލައިލެވެން ހުންނާނެއެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 29 ޑިސެމްބަރ 2024ޚަބަރު“ރޯމްދުނިޔެ” އިން އީސިމް ނެގުން ދިވެހީންނަށް މާ ސަޅިވާނެ!
- 27 ޑިސެމްބަރ 2024ޚަބަރުޑާކް ރެއިން އިން މިފަހަރު “ފެށުމާއި ނިމުން”
- 24 ޑިސެމްބަރ 2024ޚަބަރުނިޝާ އާރްޖޭއަކަށް!
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
