ދިވެހި ފިލްމު އިންޑަސްޓްރީގައި މަޝްހޫރު ފިލްމީތަރިންގެ ތެރެއިން އެންމެ މަޤްބޫލް އެއް ތަރިއަކަށް މަރިޔަމް އައްޒަ ވާނެ ކަން ކަށަވަރެވެ. ދިވެހިރާއްޖޭގެ ގިނަ ބައެއްގެ ލޯބި ހޯދާފައިވާ އައްޒަ މިހާތަނަށް އައި އިރު އެތައް ފިލްމުތަކެއް ކުޅެފައިވެއެވެ. ނަމަވެސް މި ލިޔުމުގައި އަޅުގަނޑު ދައްކާލަން މިއުޅެނީ އައްޒަގެ ވާހަކައެއް ނޫނެވެ. އައްޒަގެ ވަރަށް ބޮޑު ފޭނެއްގެ ވާހަކައެވެ.

ޅ. ހިންނަވަރަށް އުފަން، އުމުރުން 17 އަހަރުގެ އަޙްމަދު އަމަން ޢަލީ އަކީ އެންމެ ކުޑައިރުން ފެށިގެން ވެސް ދިވެހި ފިލްމީ ދާއިރާއަށް ލޯބިކުރާ ކުއްޖެކެވެ.

ދިވެހި ފިލްމީތަރިންގެ ތެރެއިން އަމަން އަށް އެންމެ ކަމުދާ ތަރިއަކަށްވީ އައްޒައެވެ. އަމަން ބުނާ ގޮތުން ނަމަ އޭނާ ހަނދާން ހުންނަން ފެށީއްސުރެ ވެސް އަބަދުހެން އައްޒަގެ ލަވަތަކާއި ފިލްމުތަކަށް އޮންނަ ޝައުޤުވެރިކަން ބޮޑެވެ.

“އެއީ އުމުރުން 05 އަހަރު ވަރު، ހަނދާންވާ ގޮތުގައި 2007 އިން ފެށިގެން ހަމަ އަބަދުވެސް ބަލަން އައްޒަގެ ލަވަތަކާއި ފިލްމުތައް. ލަވަތައް ވެސް ޖަހާނީ ރޮއެގެން ހަމަ އޭރު، ހެހެ، ނިދޭނީވެސް ހަމަ ލަވަ ޖެހީމަ.” އަމަން ކިޔައިދިނެވެ.

އައްޒައަށް އަމަން ވަރަށް ބޮޑަށް ތާޢީދުކުރެއެވެ. އެހެންކަމުން އޭނާ ކިޔަވަން އުޅުނުއިރު ފޮތްތަކުގެ ނަން ކަރުދާސްކޮޅު ތަކުގައި ވެސް ވަނީ އައްޒަގެ ފޮޓޯތަކެވެ. އަދި އޭނާގެ ސޯޝަލް މީޑިއާ ޕްލެޓްފޯމްތައް ވެސް ފުރާލާފައިވަނީ އައްޒަގެ ފޮޓޯތަކުންނެވެ. އަމަންގެ ތާޢީދު އައްޒައަށް ވަރަށް ބޮޑަށް ލިބި އައްޒަގެ ގާތް އެކުވެރިއަކަށް މިވަނީ އަމަން ވެގެން ގޮސްފައެވެ. އަދި ޑާކް ރެއިން އެންޓަޓެއިންމެންޓުން ލަސް ނޫން މުސްތަޤުބަލެއްގައި ގެނެސްދިނުމަށް ހަމަޖެހިފައިވާ ފިލްމު “ބީވީމާ” އިން އަމަން އަށް ވަނީ ސައިޑް ރޯލަކުން ފެނިލުމުގެ ފުރުޞަތު ލިބިފައެވެ. އެހެންކަމުން މުނިއަވަސް ޓީމުގެ ފަރާތުން އަމަން އަށް، މިކަމާ ގުޅޭ ގޮތުން އިތުރަށް ސުވާލުތަކެއް ކޮށްލީމެވެ.

ދިވެހި ފިލްމު އިންޑަސްޓްރީގައި އައްޒައާ އެކަނިތަ ގުޅުން އޮންނަނީ، ނޫނީ އެހެން ތަރިންނާ ވެސް ގުޅުން އޮވޭތަ؟

ނޫން، އައްޒަ އެކަންޏެއް ނޫން! ފިލްމު އިންޑަސްޓްރީގައި އެންމެ ގާތް ގުޅުމެއް އޮންނާނީ މި ދަންނަވާ މީހުންގެ: އައްޒަ، ނިއުމާ، އާޝާ، ހުނޫ، އިޝްފާން، ނުޒޫ، ޖުމާ، އަޒޭ، ދެން މުއާ! އަދި ހަމަ މީގެ އިތުރުން އިރުފާނާ ވެސް! ދެން އެންމެން ވެސް ފްރެންޑް ވާނެ، އެކަމަކު އެހާ ގާތެއް ނުވާނެ! ދެން އުޅޭނެ ބައެއް ޑައިރެކްޓަރުން ވެސް ރައްޓެހި!

އުމުރުގައި މިހާ ހިސާބަށް އައި އިރު ފިލްމަކުން ފެނިލުމަށް އެއްވެސް ވަރަކަށް ޑްރީމް ކުރިންތަ؟

ހަހަ! އާނ! އަބަދުވެސް ޑްރީމެއް އެއީ ކޮންމެވެސް ތަންކޮޅަކުން ފެނިލުން، މިބުނީ ބޮޑު ސްކްރީނަކުން ފެނިލުން.

ދެން އަމަން އަށް ފުރަތަމަ ފަހަރަށް ފިލްމަކުން ފެނިލުމުގެ ފުރުޞަތު ފަހި ވެގެން ދިޔައީމަ ކުރެވުނު އިޙުސާސްތަކަކީ ކޮބާ؟”

ހަމަ ވަރަށް ވެސް އެކްސައިޓިންގ އޭ ބުނެވޭނީ! އަސްލު ޤަބޫލު ވެސް ނުކުރެވުނު މޮގަރ (ބީވީމާގެ ޕްރޮޑިއުސަރ މުޙައްމަދު ޢަލީ) ފުރަތަމަ ގުޅާފައި އެހެން ބުނީމަ! ޤަބޫލު ނުކުރެވިގެން އެހެން އެންމެން ކައިރީގައި އަސްލުވެސް ހެއްޔޭ އެހިން! ދެން އާޝާ އަކީ މިހާރު އައްޒަ ނުލައި ނަގަންޏާ ހަމަ ފޭވް، އެހެންވެ ފުރަތަމަ ފިލްމު އެހާ މޮޅު ކުއްޖާކާއެކީ ކުޅެލަން ލިބޭތީ ވަރަށް އުފާވޭ ހަމަ!

އެއްވެސް ވަރަކަށް އުންމީދުކުރި ކަމެއްތަ މިއީ، ފިލްމަކުން ފުރުޞަތެއް ލިބުން؟

ނޫން ނުކުރަން، ހަމަ އެއްގޮތަކަށް ވެސް ނުކުރަން! އަދި ޑާކް ރެއިން އެންޓަރޓެއިންމެންޓުން ވީމަ ވަކިން ނުކުރެވުނު! އެހާ މޮޅު ފިލްމު ހަދާ ބަޔަކު، ފުރުޞަތެއް ދޭނެ ކަމަކަށް ހިއެއް ވެސް ނުކުރަން!

ދެން އެއްވެސް މީހެއް ނުވަތަ ބައެއްގެ ފަރާތުން ނެގެޓިވް ކޮމެންޓެއް ލިބުނުތަ؟

އަސްލު ވަރަށް، ދިވެހި ފިލްމު އިންޑަސްޓްރީ ވީމަ ދިމާކުރާ މީހުން ވަރަށް ގިނަ! ބުނާނެ ތިއީ ދެން ސަޕޯޓު ކުރަން ކޮން ބައެއްހޭ!! އަސްލު ދިވެހީން، ދިވެހި އެކްޓާރސް ބަލައިނުގަންނަހާ ހިނދަކު އިންޑަސްޓްރީ ކުރިއަކަށް ނުދާނެދޯ! އެކަން ނުވިސްނޭ އަސްލު ގިނަ ދިވެހީންނަށް، ދެން އެފްބީ ޕީޕީ ނޫނީ އިންސްޓަގްރާމް ސްޓޯރީއަށް ވައްޓާލިޔަސް ހަމަ އުޅޭ ހިނިގަނޑު ޖަހާފައި ދިމާކުރާ މީހުން! އެކަމަކު ދެން އެކަހަލަ އެއްޗެހި އިގްނޯރ ކޮށްލަނީ! އޭރުން ދޯ ކުރިއަށް ދެވޭނީ! ދެން ފިލްމެއް ބަލައިލަން ދިޔަޔަސް ބުނާނެ އަހަރުން ނުދާނަމޭ ދިވެހި ފިލްމު ބަލާކަށް، އަހަރުން ބަލާނީ ލީކު ވީމައޭ! މިގޮތަށް ގިނަ ދިވެހީންގެ ވިސްނުން ހުންނަނީ! (އަމަން ހިތާމައާއެކު ކިޔައިދިނެވެ.)

ދިވެހި ފިލްމު “ބީވީމާ” ގެ ޝޫޓިންގ ގެ މަސައްކަތް މިހާރު ކުރިއަށް ދާއިރު އަދި ފިލްމު ރިލީޒް ކުރާނެ ތާރީޚެއް ފައިނަލެއް ނުކުރެއެވެ.

ލިޔުންތެރިޔާގެ ފުރަމަލަ

ނާޢިމް ޢަލީ
މުނިއަވަސްގެ އެންމެ ހަގު ލިޔުންތެރިޔާ ނާާޢިމް ޢަލީ އަކީ ލިޔުންތެރިކަމުގައި ތަޖުރިބާހުރި ޒުވާނެކެވެ.
ނާޢިމް ޚާއްޞަވަނީ ބޮލީވުޑް އަދި ހޮލީވުޑްގެ ޚަބަރުތަކަށެވެ.

ގުޅުންހުރި ލިޔުން: