ޝަމްވީލް މުހައްމަދު (ބަރޯ) އާއި އައިމިނަތު ރާޔާ ނިކަން ލޯބިކޮށް ކިޔާފައިވާ ހިތްގައިމު ލަވަ “ތި ލޯބި ހޫރު” މަތިން ހަނދާން އެބަހުރިދޯއެވެ. އެ ލަވައިގެ އިބާރާތްތަކުގައި އެކުލެވޭ ޖާދޫގެ ފުރިހަމަކަން އެންމެ ފުނަށް ގެނެސްދީފައިވަނީ ލަވައިގެ ހިތްގައިމު ޅެންވެރިކަމުން ކަމަށް ގިނަ ބަޔަކު ގަބޫލުކުރެއެވެ.

♩♪♫♬ އައްޗަ ތި ލޯބިލޯބި ހޫރު، ރާނީ ތީ ހިތްއެދޭ، ތިޔަ ހޫރު އެދޭ ދުނިޔޭން ހަމަ ލޯބި ހިތުން އެދެވޭނޭ ♩♪♫♬ މި އިބާރާތްކޮޅުން އެކަނިވެސް، ލަވައިން ދޭ މެސެޖް ހިތުގެ އެންމެ ފުނަށް އިހުސާސްކޮށްލަދޭ ނޫންހެއްޔެވެ؟ މިއީ މިހާރު އަހަރެމެންނަށް ހިތްގައިމު ލިރިކްސްތަކެއް ގެނެސްދެމުން އަންނަ ‘ރިޓްޒްލިރިކްސް’ގެ ހިތްގައިމު ޅެންވެރިކަން އެކުލެވޭ ލަވައެކެވެ. މި ލަވަ އެކަންޏެއް ނޫނެވެ. ޝަމްވީލް ގެނެސްްދެމުން އަންނަ ގިނަ ލަވަތަކެއްގެ ޝާއިރަކީ ރިޓްޒްލިރިކްސްގެ އާމިނަތު ރިޒްނީ (ރިޒް) އެވެ.

ހަންނާންގެ ދެކަނބަލުންނާއެކު ރިޒް – ފޮޓޯ: ރިޒްލިރިކްސް

އަވައްޓެރި ސްރީލަންކާގައި ދިރިއުޅެމުން އަންނަ ރިޒްނީ ލިރިކްސް ހަދަމުން އަންނަތާ އެއް އަހަރު ފުރުން ފާހަގަކުރުމަށް ދާދިފަހުން ވަނީ ވަރަށް ޚާއްޞަ ޝޯވއެއް ބާއްވާފައެވެ. މި ޝޯވ އެންމެ ބޮޑަށް ޚާއްޞަވެގެން ދިޔައީ ރިޒްގެ ލިރިކްސް އެއް އޭނާގެ އަޑުން މިފަދަ ޝޯއެއްގައި އިވިގެންދިއުމެވެ. އަދި އެއަށްވުރެންްވެސް ބޮޑަށް މިކަން ޚާއްޞަވީ، ރާއްޖޭގެ އެންމެ ހުނަރުވެރި ލަވަކިޔުންތެރިޔާ އަދި އަމިއްލަ ރާގު ހެދުމުގެ ރަސްގެފާނު، ޢަބްދުލް ހަންނާން މޫސާދީދީ އާއެކުގައި ރިޒްގެ ޚާއްޞަ ލަވަ ހުށައެޅުމުންނެވެ.

މުނިއަވަސް އިން ރިޒް އާ ބައްދަލުކޮށްލައި އިތުރު ވާހަކަތައް ދައްކައިލީމެވެ.

ލަވަ ލިޔުމުގެ ތެރެއަށް ނުވަތަ ޅެންހެދުމުގެ ތެރެއަށް ރިޒްއަށް ވަދެވުނީ ކިހިނެއްކަން ބުނެލަދެވިދާނެ؟

ލަވަ ލިޔަން ފެށުނީ ރިޒްގެ ކަރޯކޭ ވޯރލްޑްގެ ތެރެއިން، މާނައަކީ ރިޒްގެ ކަރޯކޭ ފްރެންޑްސް އާ އެއްކޮށް ކިޔާލަން ބޭނުންވާ ލަވައިގެ ލިރިކްްސް ނުލިބޭތީ ހަމަ ހިތަށް އެރީ ރިޒް އަށްވެސް މިކަން ކުރެވޭޭތޯ ބަލައިލަން ވެއްޖޭ.

ރިޒް އަށް ލަވަ ލިޔަން ވަކިން ފަސޭހަ ވަގުތެއް އޮވޭތަ؟ އޮންނަ ނަމަ ނުވަތަ ނޯންނަ ނަމަވެސް، އެއީ ކީއްވެގެން ކަން ކިޔާލަދީބަލަ؟

ރިޒް އަށް ލަވަ ލިޔަން ވަކި ވަގުތެއް ނޯވޭ، އެހެންނަމަވެސް ހެނދުނުގެ ވަގުތު އެއީ ރިޒް ވޯރކްކުރާ ގަޑި…… އަދި ހިމޭން މާހައުލެއްގަ އެކަން ކުރަން (ލަވަ ލިޔަން) ފަސޭހަައީ.

ރިޒް ލަވައެއްގެ ޅެން ލިޔާއިރު ވިސްނުން ގެންގުޅޭ ގޮތާ، ވިސްނުން ބަހައްޓާ ގޮތް ކިޔުންތެރިންނަށް ބުނެދީބަލަ؟

ރިޒް އާއްމުކޮށް ލަވަ ހަދަނީ ވިދާޅުވާ ބޭފުޅުންގެ ރިކްއެސްޓަށް ލަވައެއް ހަދަން ލިބުނީމަ. ރިޒް ބަލަނީ ފުރަތަމަ ޓޮޕިކް، ދެން ލަވައިގެ ފީލް… ދެން ލަވައިގަ ބުނާ އެއްޗެއް އަޑުއަހާމީހާ އަހަމުން ދާއިރު އަހާ މީހާއަށް ލަވައިގަ ބުނާ އެއްޗެއްގެ މާނަ މާ ބޮޑަށް ވިސްނަން ނުޖެހި އެ ބުނަނީ ކީކޭކަން އެނގޭ ވަރަށް ތިލަކޮށް، ހިތަށް އަސަރުކުރުވާ ކަހަލަ ގޮތަކަށް ޑެލިވަރކޮށްދެވޭތޯ.

ލިރިކްސް ހެދުމުގައި ކުރިއަރަމުން އަންނަ ރިޒް – ފޮޓޯ: ރިޓްޒްލިރިކްސް

މިހާތަނަށް ރިޒް އަށް ކިތަށް ލަވަ ހެދިއްޖެ؟ އެއީ ކޮން ކަހަލަ މަޢުޟޫތަކަކަށް؟

މިހާތަނަށް މިހާރު ރިޒް އަށް ހެދިއްޖެ 120 ލަވަ. އޭގެ ތެރޭގަ މަދަހަ، އިޖްތިމާއީ… ޤައުމީ ލަވަވެސް ހިމެނޭ. އަދި 50 ވަރަކަށް ލަވައިގެ ކަރޯކޭވެސް ހެދިފަ މިހާރު ވާނީ. މީގެ އިތުރުން މައިސަން ކަރޯކޭގަ ރިޒްގެ ލަވަތައް ލިބެން ހުންނާނެ.

މިހާތަނަށް ލިޔެވުނު އެންމެ ސަޅި ލަވަތަކަކީ ކޮބާ؟

އަޅުގަނޑުގެ އަމިއްލަ ލިރިކްސް ހިމެނޭ ފަސް ލަވައިގެ އޯޑިއޯވެސް ވާނީ ރިލީޒްކުރެވި، މައިސަން ކަރޯކޭ އަށް އަޕްލޯޑްވެސް ކުރެވިފަ ވާނީ…. ދެން ހަމަ ބުނެވޭނީ ކޮންމެ ލަވައަކީވެސް ހަމަ ރިޒް ވަރަށް ހިތްހަމެޖެހޭ ގޮތަށޭ ހެދިފަ ހުރީ. ނަމަވެސް ކިޔުންތެރިންނާ އެހުންތެެރިންނަށް ކަމުދާ ވަކި ލަވަތަކެއްވެސް އެބަހުރި. އޭގެ ތެރެއިން ކަރޯކޭ ވިދާޅުވާ ބޭފުޅުންނަށް ވަރަށް ކަމުދޭ ‘އަލި ވިލެން ފެށިފަވަނީ ތިޔަ ނަން މަތީ’، ‘ހިތުގާ ޖަހާ ވިންދުން’، ‘ކުރި އުއްމީދު ލޯބީގާ ރޯވީ’ ފަދަ ލަވަތައް….. އަދި އެހުންތެރިންނަށް ވަރަށް ކަމުދިޔަ ‘ތި ލޯބިލޯބި ހޫރު’، ‘ގިލަން’، ‘ހުއްޓޭ ހިތް’ ފަދަ ލަވަތައް.

ރިޒް ލަވަ ހަދަމުން އަންނަތާ އަހަރެއް ވުމުން އެކަން ވަނީ ވަރަށް ކުލަގަދަކޮށް ފާހަގަކޮށްފަ ދޯ. އެކަން ކުރުކޮށް ހިއްސާކޮށްލެވިދާނެތަ؟ ދެން ހަމަ އެހެންމެ ރިޒްގެ ފުރަތަމަ ލަވަ ތިޔަ ކިޔީ ހަންނާނުއާ އެކު ދޯ! ކިހިނެއް ހިނގި ކަމެއް އެއީ؟

ރިޓްޒްލިރިކްސްގެ ފުރަތަމަ އެނިވާސަރީއާ ގުޅިގެން ރިޒް ވަނީ ‘ފުރާނަ’ އޯޑިއޯ ޝަމްވީލް (ބަރޯ)ގެ އަޑުން ނެރެފަ. އަދި ރިޒް އެންމެ ފުރަތަމަ ހެދި ލިރިކްސް ‘ލޯބިން ގުޅުނީ’، ލަވައިގެ އޯޑިއޯ ނެރެފަ. އަސްލު އެ ރާގަށް އެންމެ ފުރަތަމަ ލަވަ ވިދާޅުވެފަ އޮންނާނީ ޢަބްދުލް ހަންނާން މޫސާދީދީ އަދި ފާތިމަތު ރައޫފު. އެއީ ‘ހިތްދޯ ގުޅުނީއޭ’. ދެން ރިޒް ހިތަށް އެރީ މި ލަވަވެސް އެ ދެބޭފުޅުން ލައްވައި ކިޔުއްވަން… އެކަމަކު މިހާރު ސިޗުއޭޝަންގެ ހުރިގޮތުން ދެ ބޭފުޅުން ލައްވައި ނުކިޔުއްވުނު. ދެން ހަންނާން ދިރިއުޅުއްވަނީ ލަންކާގަ ކަމަށް ވާތީ އަޅުގަނޑަށް ހަންނާނުއާ އެއްކޮށް މިމަސައްކަތް ކުރުމުގެ ފުރުޞަތު ލިބުނީ. އެކަމަށްޓަކައި ހަންނާން އަށް ވަރަށް ބޮޑަށް ޝުކުރުދަންނަވަން، މިކަހަލަ ފުރުޞަތެއް އަޅުގަނޑަށް ދެއްވީތީ…. އެއީ ޢަބްދުލްހަންނާން މޫސާދީދީ އަކީ ދިވެހިރާއްޖޭގެ ލިޖެންޑެކޭ އަޅުގަނޑު ދަންނަވާނީ.

ރިޒްގެ ތިޔަ މަސައްކަތުގެ ފަހަތުގަ ހަމަ ގައިމުވެސް އެތަކެއް ބައެއްގެ އެހީތެރިކަން ލިބިފަ ވާނެ އަދި މިހާރުވެސް ލިބެމުން ދާނެ. އެކަމަށް ބުނެލާނީ ކީކޭ؟

ދެން މި ފުރުޞަތުގަ ރިޒް ޝުކުރު ދަންނަވަން ބޭނުންވާ ވަރަށް ގިނަ ފަރާތްތަކެއް ވޭ… އެހާ ފަސޭހަ ކަމަކަށް ނުވާނެ ވަކިވަކިން ޝުކުރުދެންނެވުމަކީ. އެހެން ނަމަވެސް ރިޒް ހަމަ ބުނެލާނަން ފުރަތަމަ ވެސް ރިޒް އަށް މިކަމުގަ އެންމެ ބޮޑަށް އެހީވެދިން އެންމެ ޚާއްޞަ ފަރާތަކީ ރިޒްގެ ފިރިމީހާ ޖީކޭ ލަތީފް އޭ. ދެން ރިޒް މިހިސާބަށް އައުމުގެ އެންމެ ބޮޑު ހިތްވަރަކީ ރިޒްގެ ފެމެލީ އަދި ޚާޢްޞަކޮށް ރިޒްގެ ކަރޯކޭ ވޯރލްޑާ ރިޒްގެ ފްރެންޑްއޭ ބުނެލާނީ. ވަރަށްވަރަށް ހެލްޕްފުލް އެ އެންެމެންވެސް ހުރިހާ ގޮތަކުން.

ޝުކުރުގެ ލިސްޓުގަ ހަމަ ގައިމުވެސް ވަރަށް ޚާއްޞަ ފަރާތެއް ނުވަތަ ފަރާތްތަކެއްވެސް ވާނެ. ނޫންތަ؟

އާދެ! ދެން ވަރަށް ޚާއްޞަ ޝުކުރެއް މައިސަން ކަރޯކޭއަށް. އާއްމުންނާ ހިސާބަށް ރިޒްގެ ލަވަތައް ޑެލިވަރ ކުރުމުގަ މައިސަން ވަރަށް ބޮޑު ސަޕޯޓެއް ލިބެމުންދޭ.

ލަވަ ހެދުމުގަ އެންމެ ބޮޑަށް ފަންނީ އެހީތެރިކަން ލިބުނީ ކާކުގެ ފަރާތުން؟

ރިޒް ވަރަށް ވަރަށް ވަރަށް ޚާއްޞަ ޝުކުރެއް ދަންނަވަން ބޭޭނުން ޑރ. އަޙްމަދު ޝަކީބް އަށް. ޝަކީބަކީ ރިޒްގެ ފުރަތަމަ މަދަރުސާ. ވަރަށް ވަރަށް ބޮޑު ސަޕޯޓެއް ރިޒް އަށް ދިން ވަރަށް ބުރަކޮށް އުޅެމުންވެސް ރިޒްގެ ކޮންމެ ގޮވާލުމަކަށް އިޖާބަދެއްވި

ނިންމައިލަމުން ބުނެލާނީ ކީކޭ؟

ޝަމްވީލް (ބަރޯ) އަށް ވަރަށް ބޮޑަށް ޝުކުރިއްޔާއޭ ބުނެލަން ބޭނުން އޯޑިއޯގެ މަސައްކަތުގަ ޝަމްވީލްގެ ހެލްޕް ލިބުނު، އަދިވެސް ލިބެމުން ދަނީ. ރިޒްގެ މި ޖާރނީގަ ކިތަންމެ ކުޑަނަމަވެސް ހެލްޕެއް ވެދިން ފަރާތްތަކަށް ވަރަށް ބޮަޑަށް ތެންކިޔޫ.

♩♪♫♬♩♪♫♬♩♪♫♬

ރިޒްގެ ޅެންވެރިކަމުގެ ހުނަރު ކުރިއެރުވުމަށް ދާދި ފަހުން އީއޯޕީން ބޭއްވި ޅެން ހަދަން ދަސްކޮދިނުމުގެ ބޭސިކް ކޯހެއްގައި ބައިވެރިވެފައިވެއެވެ. މި ކޯހުގައި ކިޔަވައިދެއްވީ މަޝްހޫރު އަދި މަޤްބޫލު ޝާއިރު ޢީސާ ޝަރީފް އެވެ.

ޅެން ހެދުމުގެ އިތުރު ކޯސްތައް ހެދުށްވެސް ރިޒް ހުރީ ތައްޔާރަށެވެ. ލަވަ ހެދުމުގެ ބްރޭންޑެއްގެ ގޮތުގައި ވަކި ނަމެއްގައި މަސައްކަތްކުރަމުން އަންނަ ރިޒް އަށް ކާމިޔާބީއަށް މުނިއަވަސް ޓީމުން އެދެމެވެ.

 

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: