ސޮނީ ޓީވީގެ ކާމިޔާބު ކުޑަކުދިންގެ ޑާންސް ރިއަލިޓީ ޝޯވ “ސުޕަ ޑާންސާ ޗެޕްޓަރ 4” ފްލޮރީނާ ގޯގޯއީ ކާމިޔާބު ކޮށްފިއެވެ.

ރޭ ސޮނީ ޓީވީއިން ނިންމާލި މި ޝޯވ، ފްލޮރީނާ ކާމިޔާބުކުރީ ޕްރިތުވިރާޖް ކޮންގާރީއާއި ސަންޗިތު ޗަނާނާއާއި އީޝާ މިޝްރާ އަދި ނީރްޖާ ތިވާރީއާއި ވާދަކޮށް ބެލުންތެރިންގެ އެންމެ ގިނަ ވޯޓް ހޯދައިގެންނެވެ.

ކޮރެއޯގްރާފަރު ތުޝާރް ޝެޓީގެ އެހީތެރިކަމުގައި ފްލޮރީނާ ޝޯވ ކާމިޔާބު ކުރިއިރު ދެވަނަ ލިބުނީ ޕްރިތުވިރާޖާއި ކޮރެއޯގްރާފަރު ޝުބްރަނީލް ޕޯލްއަށެވެ. ތިންވަނަ ސަންޗިތުއާއި ވަރްތިކާ ޖާއަށް ލިބުނުއިރު ހަތަރު ވަނަ ލިބުނީ ނީރްޖާއާއި ބާވްނާ ކަންޑޫޖާއަށެވެ. ފަސްވަނަ ލިބުނީ ޝޯވގައި އެންމެ ބޮޑު ކުރިއެރުމެއް ހޯދި، “އެކްސްޕްރެޝަން ކުއީން”ގެ ގޮތުގައި ފާހަގަކުރެވުނު އީޝާއާއި ސޮނާލީ ކަރްއަށެވެ.

ކުލަގަދަކޮށް ރޭގައި ބޭއްވި “ސުޕަ ޑާންސާ” ގެ ފިނާލޭގައި 5 ފައިނަލިސްޓުންގެ އިތުރުން މި ސީޒަންގެ އިތުރު ބައިވެރިންނާއި ކުރީ ސީޒަންތަކުގެ ބައެއް ބައިވެރިންގެ ފޯރިގަދަ ހުށަހެޅުންތަކެއް ފެނިގެންދިޔައިރު އިންޑިއާސް ބެސްޓް ޑާންސާގެ ބައެއް ބައިވެރިންނާއި ހޯސްޓް ރިތުވިކް ދަންޖާނީއާއި ޝޯވގެ ޖަޖުން ކަމަށްވާ ޝިލްޕާ ޝެޓީއާއި ގީތާ ކަޕޫރްގެ ފަރި ހަރަކާތްތަކެއްވެސް ފެނިގެންދިޔައެވެ. ފިނާލޭގައި ޚާއްސަ މެހެމާނުންގެ ގޮތުގައި ކޮރެއޯގްރާފަރު ޓެރެންސް ލުވިސްއާއި ހޯސްޓް އަދި ނެށުންތެރިޔާ ރާގަވް ޖުޔަލްގެ އިތުރުން ލަވަކިޔުންތެރިޔާ ބާދްޝާހްވެސް ވަނީ ބައިވެރިވެފައެވެ.

“ސުޕަ ޑާންސާ ޗެޕްޓަރ 4” ގެ 5 ފައިނަލިސްޓުން

 

“ސުޕަ ޑާންސާ 4” ގެ ޓްރޮފީއާއެކު އިނާމަކަށް 15 ލައްކަ ރުޕީސް ފްލޮރީނާއަށް ލިބުނުއިރު ކޮރެއޯގްރާފަރު ތުޝާރްއަށް ވަނީ އިނާމެއްގެ ގޮތުގައި 5 ލައްކަ ރުޕީސް ދީފައެވެ. އޭގެ އިތުރުން ކޮންމެ ފައިނަލިސްޓަކަށް 1 ލައްކަ ރުޕީސްގެ ފައިސާގެ އިނާމެއް ވަނީ ހަވާލުކޮށްފައެވެ.

ޝޯވއިން ލިބުނު ކާމިޔާބީއާއެކު ފްލޮރީނާ ބުނެފައިވަނީ އޭނާއަށް ވޯޓް ދިން ހުރިހާ މީހުންނާއި ސަޕޯޓް ކުރި އެންމެނަށް ވަރަށް ބޮޑަށް ޝުކުރު އަދާކުރާ ކަމަށެވެ. އަދި އޭނާ ޓްރެއިންކޮށްދީ އޭނާއަށް އިތުބާރު ކުރީތީ ތުޝާރްއަށްވެސް ވަރަށް ބޮޑަށް ޝުކުރު އަދާކުރާކުރާ ކަމަށާއި ސުޕަ ޑާންސާއާއެކު ވަރަށް ގިނަ އާ އެކުވެރިންތަކެއް ލިބުނު ކަމަށާއި އެ ހުރިހާ އެންމެން މަތިންވެސް ވަރަށް ހަނދާންވާނެ ކަމަށެވެ. އަދި އޭނާ ނެށުން ކުރިއަށް ގެންދަން ބޭނުން ކަމަށާއި އާ ވައްތަރުތަކުގެ ނެށުން ދަސްކުރަން ބޭނުން ކަމަށްވެސް ފްލޮރީނާ ބުނެފައިވެއެވެ.

ލިބުނު ކާމިޔާބާއިއެކު އުފަލުން ފުރިފައި ހުރި ތުޝާރް ބުނެފައިވާ ގޮތުގައި ލިބުނު އުފާ ބަޔާންކުރާނެ ގޮތެއްވެސް އޭނާއަކަށް ނޭނގެއެވެ. އޭގެ އިތުރަށް އޭނާ ބުނެފައިވަނީ ފްލޮރީނާއަށް ލިބުނު ކާމިޔާބީއާއި ލޯތްބާއި ސަޕޯޓަކީ ފްލޮރީނާއަށް ޙައްޤު އެއްޗެއް ކަމަށާއި އެމީހުންނަށް ދިން ސަޕޯޓާއި ލޯތްބަށް ހުރިހާ މީހުންނަށް ވަރަށް ބޮޑަށް ޝުކުރު އަދާކުރާ ކަމަށެވެ. އަދި އުމުރު ދުވަހަށް ފްލޮރީނާއާ އެކީގައި ނެށޭނެނަމައޭ ހިތަށް އަރާކަމަށާއި އެމީހުންނަށް ދިން ލޯތްބާއި ސަޕޯޓަށް ތަކުރާރުކޮށް ޝުކުރު އަދާކުރާކަމަށް ތުޝާރް ބުނެފައިވެއެވެ. ތުޝާރްއަކީ މިދިޔަ ސީޒަންގައި ދެވަނަ ލިބުނު ތޭޖާސް ވަރްމާގެ ކޮރެއޯގްރާފަރެވެ.

ކުރީގެ 3 ސީޒަނެކޭވެސް އެއްގޮތަށް މި ސީޒަންވެސް ޖަޖުކުރީ ކޮރެއޯގްރާފަރު ގީތާ ކަޕޫރާއި ބަތަލާ ޝިލްޕާ ޝެޓީގެ އިތުރުން ޑައިރެކްޓަރު އަނޫރާގް ބާސޫއެވެ. ހޯސްޓްކުރީ ރިތުވިކް ދަންޖާނީއާއި ޕަރީތޯޝް ތުރިޕާތީއެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: