ބޮލީވުޑްގެ އެންމެ ނުފޫޒުގަދަ އެއް ޕްރޮޑިއުސަރު އަދި ޑައިރެކްޓަރު ކަރަން ޖޯހަރްގެ ޑްރީމް ޕްރޮޖެކްޓް “ތަޚްތު” ވަތްގަނޑަށް ލާފައި ބޭއްވުމަށްފަހު އަނެއްކާވެސް އޭގެ މަސައްކަތް ކުރަން ނިންމައިފިއެވެ.

މުގަލްގެ ރަސްކަން ކުރި ޝާހްޖަހާންގެ ދެ ދަރިންކަމަށްވާ އައުރަންގްޒޭބް އާއި ދާރާ ޝިކޯހް ރަސްކަމުގެ ތަޚުތު ހޯދުމަށް ކުރާ މަސައްކަތުގެ މައްޗަށް އުފައްދާ “ތަޚްތު” އަކީ ސުމިތު ރޯއީއާއި ހުސެން ހައިދަރީ ސްކްރީންޕްލޭ ލިޔެ، ކަރަންގެ ދަރްމާ ޕްރޮޑަކްޝަނުން ޕްރޮޑިއުސްކޮށް ކަރަން ޑައިރެކްޓްކުރާ ފިލްމެކެވެ.

ބޮލީވުޑްގެ މަޝްހޫރު ތަރިންގެ ތެރެއިން ބޮޑު ކާސްޓަކާއެކު ބޮޑު ބަޖެޓަކުން ތައްޔާރުކުރާ “ތަޚްތު” އަކީ ދެއަހަރާ ބައިން އޭނާ މަސައްކަތަށް ތައްޔާރުވި ބިޔަ ޕްރޮޖެކްޓެކެވެ. ކަރަންގެ “ޕެޝަން” ޕްރޮޖެކްޓެއްގެ ގޮތުގައި ސިފަކުރާ “ތަޚްތު” ގެ ކާސްޓުންގެ ތެރޭގައި ރަންވީރް ސިންގ، ކަރީނާ ކަޕޫރް ޚާން، އާލިއާ ބަޓް، ވިކީ ކޯޝާލް، ބޫމީ ޕެޑްނޭކަރް، ޖާންވީ ކަޕޫރް އަދި އަނިލް ކަޕޫރް ހިމެނެއެވެ.

“ރޮކީ އޯރް ރާނީ ކީ ޕްރޭމް ކަހާނީ” އަކީ އޭނާގެ އެކްސައިޓްމެންޓް ޕްރޮޖެކްޓެއް ކަމަށް ބުނަމުން ކަރަން ބުނެފައިވަނީ “ތަޚްތު” އަކީ އޭނާގެ ޕެޝަން ޕްރޮޖެކްޓެއް ކަމަށެވެ. އެއްވެސް މީހަކަށް އެމީހެއްގެ ޕެޝަންއާއި ދުރަށް ނުދެވޭނެތީ އޭނާގެ އެކްސައިޓްމަންޓް ނިންމާލުމަށްފަހު ޕެޝަންއާއި ދިމާއަށް ދާނެކަމަށްވެސް ކަރަން ބުނެފައިވެއެވެ.

މިއަހަރު ޑިސެމްބަރު މަހު 12 ގައި ރިލީޒްކުރަން ތާވަލުކުރި މި ޕީރިއަޑް ޑްރާމާއަކީ 2019 ގައި އިޢުލާންކޮށް 2020 ގައި ޝޫޓިންގ ފަށަން ނިންމި ފިލްމެކެވެ. ނަމަވެސް ކޮވިޑް-19 ގެ ސަބަބުން ޝޫޓިންގ ނުފެށި ލަސްވަމުން ގޮސް އެންމެ ފަހުން ފިލްމުގެ މަސައްކަތް މަޑުޖައްސާލީއެވެ.

ކަރަން މިހާރު ޑައިރެކްޓްކުރަމުން އަންނަ “ރޮކީ އޯރް ރާނީ ކީ ޕްރޭމް ކަހާނީ” އަކީ ރަންވީރް ސިންގއާއި އާލިއާ ބަޓް ލީޑް ކުޅެ، ދަރްމެންދުރާ އާއި ޖާޔާ ބައްޗަން އަދި ޝަބާނާ އަޒްމީ މައިގަނޑު ރޯލުތައް ކުޅޭ ލޯބީގެ ފިލްމެކެވެ. ފިލްމު ރިލީޒްކުރަން ނިންމާފައިވަނީ އަންނަ އަހަރުއެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: