އިންޑިޔާގެ ސިނަމާއަށް 100 އަހަރު ފުރުން ފާހަކުރުމަށާއި ކަންނާޑާ ސިނަމާއަށް 87 އަހަރު ފުރުން ފާހަގަކުރުމުގެ ގޮތުން ބާއްވާ ’ކަރްނާޓަކާ އިންޓަނޭޝަނަލް ފިލްމު ފެސްޓިވަލް 2021’ގައި ބައިވެރިވާ ރާއްޖޭގެ ޓީމު އިންޑިއާއަށް ދިއުމަށް މިއަދު ފުރައިފިއެވެ.

ކަރްނާޓަކާ އިންޓަނޭޝަނަލް ފިލްމު ފެސްޓިވަލް ބޭއްވުމަށް މިހާރު ހަމަޖެހިފައިވަނީ ނޮވެމްބަރު 19 އަދި 20ވަނަ ދުވަހު ކަމަށް މަޢުލޫމާތު ލިބެއެވެ.

އިންޑިއާގެ ކަރްނާޓަކާގައި ބާއްވާ “ކަރްނާޓަކާ އިންޓަރނޭޝަނަލް ފިލްމް ފެސްޓިވަލްގައި ދިވެހިރާއްޖެ ތަމްޞީލުކުރުމުގެ ގޮތުން މޯލްޑިވްސް ސޮސައިޓީ ފޯރ ޕާފޯމިން އާޓްސް (އެމްއެސްޕީއޭ)، އެމް.އެސް.ޕީ.އޭއިން ބައިވެރިވެފައިވާއިރު، އެމް.އެސް.ޕީ.އޭގެ ޓީމާއެކު މިފަހަރުގެ ފެސްޓިވަލުގައި ރާއްޖޭގެ ފަރާތުން އެޅުވުމަށް ހަމަޖެހިފައިވާ ދެ ފިލްމުގެ ޕްރޮޑަކްޝަން ޓީމުގެ ފަރާތުންވެސް ވަނީ ބައިވެރިވެފައެވެ. މިފަހަރުގެ ފެސްޓިވަލްގެ ކަންޓްރީ އޮފް ފޯކަސް އެއްގެގޮތުގައި ކަނޑައަޅާފައިވަނީ ދިވެހިރާއްޖެއެވެ.

މި ފެސްޓިވަލާ ގުޅޭގޮތުން އިންޑިއާގެ ބައެއް ލޯކަލް މީޑިއާތަކަށް މަޢުލޫމާތުދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމް.އެސް.ޕީ.އޭގެ ޗެއަރމަން އަދި މަޝްޙޫރު ޕްރޮޑިއުސަރ ޑައިރެކްޓަރ މުޙައްމަދު ރަޝީދު (ދަރާ ރަޝީދު) ވިދާޅުވީ، މިފަދަ ފެސްޓިވަލެއްގައި ރާއްޖެ ތަމްޞީލުކުރުމުގެ ފުރުޞަތު ލިބޭތީ ވަރަށް އުފާކުރާ ކަމަށެވެ. އަދި މިއީ އެމް.އެސް.ޕީ.އޭއިން މިގޮތަށް ބައިނަލްއަޤްވާމީ ފިލްމް ފެސްޓިވަލެއްގައި ބައިވެރިވާ ފުރަތަމަ ފަހަރުކަމުން، ފެސްޓިވަލާމެދު ފޮނި އުއްމީދުތަކެއް ކުރެވޭކަމަށް އޭނާ ވިދާޅުވިއެވެ.

ރަޝީދު ވިދާޅުވީ، މިފަހަރުގެ ފެސްޓިވަލުގައި ދިވެހި 2 ފިލްމް އެޅުވުމުގެ އިތުރުންވެސް، މިއީ ރާއްޖެ ތަމްޞީލުކުރުމަށް ލިބޭ ފުރުޞަތެއްކަމުން، ރާއްޖޭގެ ސަޤާފަތާއި، ފަންނުވެރިކަންވެސް ފެސްޓިވަލުގެ ބައިވެރިންނަށް ދައްކާލުމަށް ހަމަޖެހިފައިވާކަމަށެވެ. އަދި މިއީ ދިވެހި ފިލްމް އިންޑަސްޓްރީގައި މަސައްކަތްކުރާ ފަރާތްތަކަށްވެސް އިންޑިއާގެ ފިލްމީ ދާއިރާގައި ހަރަކާތްތެރިވާ ފަރާތްތަކާ ބައްދަލުވެ، ތަޖުރިބާ ބަދަލުކުރުމަށް ލިބިގެންދާ ފުރުޞަތެއްކަމަށްވެސް ރަޝީދު ވިދާޅުވިއެވެ.

“އެމް.އެސް.ޕީ.އޭއަކީ ހަމައެކަނި ފިލްމްތަކަށް ޚާއްސަ އެސޯސިއޭޝަނެއްނޫން. އަޅުގަނޑުމެން ބޭނުންވޭ މުޅި މުނިފޫހިފިލުވުމުގެ އިންޑަސްޓްރީ ކުރިއަރުވަން. އެހެންވީމަ ރާއްޖޭގެ އެންޓަޓައިންމަންޓް އިންޑަސްޓްރީއަށްވެސް މިއީ ލިބޭނެ އިތުރު އެކްސްޕޯޝަރއެއް” ރަޝީދު ވިދާޅުވިއެވެ.

’ކަރްނާޓަކާ އިންޓަނޭޝަނަލް ފިލްމު ފެސްޓިވަލް 2021’ގައި ދެއްކުމަށް ހަމަޖެހިފައިވަނީ ފިލްމު ”ހައްދު“ އަދި ”ބަވަތި“ އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: