21 އަހަރު ފަހުން އިންޑިއާގެ ރައްޔިތަކަށް މިސް ޔުނިވާސްގެ ތާޖު ލިބިއްޖެއެވެ. އުމުރުން 21 އަހަރުގެ ހަރްނާޒް ސަންދޫ އަށް މިސް ޔުނިވާސްގެ ތާޖު ހަވާލުކޮށްފައިވަނީ ރޭ އިސްރާއީލުގެ އީލާޓްގައި ބޭއްވި ރީތީގެ ރާނީން ހޮވުމުގެ ރަސްމިއްޔާތުގައެވެ.

ހަރްނާޒް މިސް ދީވާގެ ތާޖު ހާސިލުކުރުމަށްފަހު

ރޭ ހަރްނާޒްއަށް މިސް ޔުނިވާސްގެ ތާޖު ލިބިފައިވާއިރު މީގެ ކުރިންވެސް ދެފަހަރެއްގެ މަތިން އިންޑިއާއަށް ވަނީ މި ތާޖު ލިބިފައެވެ. އެއީ ފަހުން ބޮލީވުޑަށް ނުކުމެވެސް ކާމިޔާބު ހޯދި ސުޝްމީތާ ސެން އާއި ލާރާ ދައްތާއެވެ. ސުޝްމީތާއަށް 1994 ވަނަ އަހަރު މިސް ޔުނިވާސް ތާޖު ލިބުނުއިރު ލާރާ މިސް ޔުނިވާސްއަކަށް ހޮވުނީ 2000 ވަނަ އަހަރުއެވެ.

ހަރްނާޒް މިސް ޔުނިވާސްގެ ތާޖު ހޯދިއިރު މިދިޔަ ސެޕްޓެމްބަރު މަހު އޭނާ ވަނީ މިސް ދީވާގެ ތާޖުވެސް ހާސިލްކޮށްފައެވެ. ހަރްނާޒަށް މި ލިބުނު ކާމިޔާބީއާއެކު މުޅި އިންޑިއާ އޭނާއަށް މަރުޙަބާ ކިޔަމުންދާއިރު ލާރާ ވަނީ އިންޑިއާއަށް އެ ތާޖު ލިބޭނެ ދުވަހަކަށް އޭނާ ވަރަށް ދިގު އިންތިޒާރެއް ކޮށްފިން ކަމަށާއި އަލުން އިންޑިއާއަށް އެ ތާޖު ހޯދައިދިނުމުން ވަރަށް ފަޚުރުވެރިވާކަމަށް ބުނެ ހަރްނާޒަށް ވަރަށް ބޮޑަށް މަރުޙަބާ ކިޔާފައެވެ.

ހަރްނާޒަށް މަރުޙަބާ ކިޔަން ލާރާ ދައްތާ ކުރި ޓްވީޓް

މިސް ޔުނިވާސްއަށް ހޮވުނު ފަހުން ބޮލީވުޑަށް ނުކުމެ ކާމިޔާބު ކެރިއަރެއް ބިނާކުރުމަށްފަހު އޯޓީޓީ ޕްލެޓްފޯމުތަކުންވެސް ބެލުންތެރިންގެ ހިތްތައް ފަތަޙަކުރަމުންދާ ސުޝްމީތާއާއި ލާރާ ފަދައިން ހަރްނާޒްވެސް ބޮލީވުޑަށް ނުކުމެދާނެތޯ މިއީ އުފެދޭ ސުވާލެކެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: