ރާއްޖޭގެ ބައެއް ސަރަޙައްދުތަކަށް ފެތުރިފައިވާ ދުންފިނި (ހޭޒް)ގެ އަސަރު ފިލައިދާނީ ވިއްސާރަ ވެގެން ކަމަށް މޫސުމާބެހޭ އޮފީހުގެ ޑެޕިއުޓީ ޑިރެކްޓަ ޖެނެރަލް ޢަލީ ޝަރީފު، މިއަދު ވިދާޅުވެއްޖެއެއެވެ.

އަލީ ޝަރީފު ވިދާޅުވީ ރާއްޖެއަށް ދުންފިނީގެ އަސަރު ކުރަންފެށީ މީގެ 15 ވަރަކަށް އަހަރު ކުރިންނެވެ. އެއީ އިންޑޮނީޝިއާގެ ޖަންގަލި ތަކުގައި ރޯވި ޙާދިސާގައި ރާއްޖޭގެ އިރުމަތިންނާއި އިރުން ވައިޖެހެމުންދިއަ ދަނޑިވަޅާއި، އެ ޙާދިސާ ހިނގި ދުވަސްވަރާ ގުޅިގެންނެވެ. އޭގެ ފަހުން ދޭތެރެ ދޭތެރެއިން މި ދުވަސްވަރާ ދިމާކޮށް ދުންފިނީގެ އަސަރު އަންނަނީ ކުރަމުންނެވެ.

މިވަގުތު ދުންފިނީގެ އަސަރު ފެތުރިފައި އޮތީ ރާއްޖޭގެ މެދުތެރޭންނާއި އުތުރަށެވެ. ދެކުނަށް ފެތުރިފައި ނުވަނީ އެ ސަރަޙައްދަށް ވާރޭ ވެހެމުންދާތީއެވެ. ނަމަވެސް އަންނަ ހަފުތާގައި މި އަސަރު ދެކުނަށް ކުރުން އެކަށީގެންވާ ކަމަށް އޭނާ ވިދާޅުވިއެވެ.

މޫސުމާބެހޭ އިދާރާއިން ބުނެފައިވަނީ ދުންފިނީގެ ދުވަސްވަރު ފުރާޅުން ފެން ނަގާނަމަ ރަނގަޅަށް ފުރާޅު ދޮންނަންވާނެއެވެ. ނަގާ ވާރޭ ފެނުގެ ކުލައަށް ވެސް ދުންފިނީގެ ސަބަބުން ބަދަލު އަންނަ ކަމަށް އަލީ ޝަރީފު ވިދާޅުވިއެވެ.

މޫސުމާބެހޭ ޤައުމީ އިދާރާއިން ބުނެފައިވަނީ މި ޑިސެންބަރު 2021، ޖަނަވަރީ އަދި ފެބުރުވަރީ 2022 ގައި ވާރޭ ވެހޭ މިންވަރު މިދުވަސްވަރު އުތުރުގެ ބައެއް އަތޮޅުތަކަށް އާންމުކޮށް ވެހޭ ވަރަށްވުރެ ތަންކޮޅެއް ގިނަވާނެކަމަށް ބެލެވޭ ކަމަށެވެ. ނަމަވެސް އެހެން ހިސާބުތަކަށް ވާރޭ ވެހޭ މިންވަރު ކުޑަތަންކޮޅެއް މަދުވާނެކަމަށް ލަފާކުރެވޭ ކަމަށާ މިދުވަސްވަރު ފިނިހޫނުމިން އުތުރު އަތޮޅުތަކުގައި އާންމު މިންގަނޑުގައި ހުރިނަމަވެސް މެދުރާއްޖެތެރެއާއި ދެކުނުގެ ބައެއް އަތޮޅުތަކުގައި، އާންމު މިންގަނޑަށްވުރެ ތަންކޮޅެއް މަތި ވާނެކަމަށް ލަފާކުރެވޭ ކަމަށް ވެސް ބުނެފައިވެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: