ރައީސުލްޖުމްހޫރިއްޔާގެ ޤަރާރު ނަންބަރު : 2020/3 ގެ ދަށުން ދިވެހިރާއްޖެއަށް އެތެރެކުރުން މަނާ ސިންގަލްޔޫސް ޕްލާސްޓިކުގެ ތެރެއިން 31 ޑިސެމްބަރު 2021ން ފެށިގެން ކާބޯތަކެތި ބަންދުކުރާ ސްޓައިރަފޯމް ފޮށި ދިވެހިރާއްޖެއަށް އެތެރެކުރުން މަނާކޮށްފިއެވެ.

މިއީ، އެއްފަހަރު ބޭނުންކޮށްފައި އުކާލާ ޕްލާސްޓިކުގެ ބާވަތްތައް ދިވެހިރާއްޖޭއަށް އެތެރެކުރުން މަނާކުރުމުގެ ދެވަނަ މަރުހަލާ އެވެ. ފުރަތަމަ މަރުހަލާގައި ޖުމްލަ 08 ބާވަތެއް ދިވެހިރާއްޖެއަށް އެތެރެކުރުން ވަނީ މަނާކޮށްފައެވެ.

ރައީސުލްޖުމްހޫރިއްޔާގެ ޤަރާރު ނަންބަރު :2020/3 ގެ ދަށުން ދިވެހިރާއްޖެއަށް އެތެރެކުރުން މަނާކުރެވިގެންދާ 13 ބާވަތްތައް މަނާވެގެންދާނީ ޖުމްލަ 05 މަރުހަލާގެ ދަށުންނެވެ. އެގޮތުން،
• 01 ޖޫން 2021 – 08 ބާވަތް ( ފުރަތަމަ މަރުހަލާ)
1. ދިޔާތަކެތި ބުއިމަށް ބޭނުންކުރާ އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކުން ހަދައިފައި ހުންނަ ޕްލާސްޓިކް ހޮޅި
2. ޕްލާސްޓިކުން ހަދައިފައި ހުންނަ ކާ ތަށި، ސަމުސާ، ވަޅި، އޫ، ދިޔާތަކެތި ގިރުމަށް ބޭނުންކުރާ ޕްލާސްޓިކް ދަނޑިކޮޅު.
3. ބާޒާރުކުރަން ބޭނުންކުރާ 30 ސެންޓިމީޓަރަށް ވުރެ ކުދި ޕްލާސްޓިކް ކޮތަޅު (އޮކްސޯޑިގްރޭޑަބަލް އަދި ސިންތެޓިކް ޕޮލިމަރއިން އުފައްދައިފައިވާ، އަމިއްލަ ޒާތުގައި ނެތިފަނާވާ (ޑިގްރޭޑަބަލް) ޕްލާސްޓިކް ވެސް ހިމެނޭގޮތަށް(.
4. ޕްލާސްޓިކުގައި ބަންދުކޮށްފައި ހުންނަ، އިމްޕޯޓުކުރާ ސުޕާރީ.
5. 250 މިލިލީޓަރަށް ވުރެ ކުޑަ، އެއްފަހަރު ބޭނުންކުރެވޭ ދިޔާތަކެތި ބުއިމަށް ބޭނުންކުރާ ޕްލާސްޓިކް ތަށި.
6. ޕްލާސްޓިކް ދަނޑިކޮޅު ލައިފައިވާ ކަފަބުރު.
7. 50 މިލިލީޓަރާއި 50 މިލިލީޓަރަށް ވުރެ ކުދި ޕްލާސްޓިކް ފުޅީގައި ބަންދުކޮށްފައި ހުންނަ، ޝޭމްޕޫ، ސައިބޯނި، ކޮންޑިޝަނަރ އަދި ލޯޝަން ފުޅި.
8. ރާއްޖެއަށް އިމްޕޯޓު ކުރާ 500 މިލިލީޓަރަށް ވުރެ ކުދި، ޕްލާސްޓިކް ފުޅީގައި ބަންދުކޮށްފައި ހުންނަ ފެން.

• 31 ޑިސެމްބަރ 2021- 01 ބާވަތް ( ދެވަނަ މަރުހަލާ)
1. ކާބޯތަކެތި ބަންދުކުރާ ސްޓައިރަފޯމް ފޮށި
• 01 ޖޫން 2022 – 01 ބާވަތް ( ތިންވަނަ މަރުހަލާ)
1. ރާއްޖެއަށް އިމްޕޯޓުކުރާ 500 މިލިލީޓަރަށްވުރެ ކުދި، ޕްލާސްޓިކު ފުޅީގައި ބަންދުކޮށްފައި ހުންނަ، ތައްޔާރީ ބުއިންތައް (ފެން ފިޔަވައި)

• 1 ޑިސެމްބަރ 2022- 02 ބާވަތް ( ހަތަރުވަނަ މަރުހަލާ)
1. ބާޒާރުކުރަން ބޭނުންކުރާ 50 މައިކްރޯންއަށްވުރެ ތުނި ޕްލާސްޓިކު ކޮތަޅު (އޮކްސޯޑިގްރޭޑަބަލް އަދި ސިންތެޓިކް ޕޮލިމަރއިން އުފައްދާފައިވާ، އަމިއްލަ ޒާތުގައި ނެތިފަނާވާ (ޑިގްރޭޑަބަލް) ޕްލާސްޓިކް ވެސް ހިމެނޭގޮތަށް)
2. 50 މިލިލީޓަރުން ފެށިގެން 200 މިލިލީޓަރާ ހަމަޔަށް ހިމެނޭ ޕްލާސްޓިކުގައި ބަންދުކޮށްފައި ހުންނަ ކުދި ޝޭމްޕޫ، ސައިބޯނި، ކޮންޑިޝަނަރ އަދި ލޯޝަން
• 01 ޑިސެމްބަރ 2023- 01 ބާވަތް ( ފަސްވަނަ މަރުހަލާ)
1. ރާއްޖެއަށް އިމްޕޯޓުކުރާ 1 ލީޓަރާއި 1 ލީޓަރަށްވުރެ ކުދި، ޕްލާސްޓިކު ފުޅީގައި ބަންދުކޮށްފައި ހުންނަ ފެން

މިއާއެކު 2024 ވަނަ އަހަރަކީ އަޅުގަނޑުމެންގެ ދިރިއުޅުން، އެއްފަހަރު ބޭނުންކޮށްފައި އުކާލާ ޕްލާސްޓިކްގެ ބާވަތްތަކަށް ބަރޯސާވާ މިންވަރު ދަށްކުރެވި އަދި މިބާވަތުގެ ޕްލާސްޓިކްގެ ސަބަބުން ރާއްޖޭގެ ވެށްޓަށް ކުރަމުންދާ ނޭދެވޭ އަސަރު ކުޑަކުރެވިގެންދާނެ މުހިއްމު ލަނޑުދަނޑިއެއް ޙާޞިލްކުރެވޭނެ އަހަރެއް ކަމުގައި މިނިސްޓްރީން ޤަބޫލުކުރެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: