ހިތްގައިމު ރީތި ދިވެހިލަވަތަކެއް ކިޔާފައިވާ ހުނަރުވެރި ލަވަކިޔުންތެރިޔާ އާމިނަތު ޝާނީގެ ފަރާތުން، ބޮލީވުޑްގެ ލިޖެންޑަރީ ލަވަކިޔުންތެރިޔާ ލަތާ މަންގޭޝްކަރަށް ޓްރިބިއުޓެއް ދީފިއެވެ. ޓްވިޓަރ މެދުވެރިކޮށް، މިމަހު 07 ވަނަ ދުވަހު ހެނދުނު ޝާނީ ދޫކޮށްލާފައިވާ ޓްރިބިއުޓަކީ ލަތާގެ ‘އަޖީބް ދާސްތާ ހެ ޔޭ’ ލަވައެވެ.

ޝާނީ ހިއްސާކުރި މިނެޓެއްހާއިރުގެ ވީޑިއޯގައި ޕިޔާނޯ ކުޅެމުން ‘އަޖީބް ދާސްތާ ހެ ޔޭ’ ލަވަ ކިޔާފައިވަނީ ޝާނީ ލަވަކިޔުމުގައި ގެންގުޅޭ އޭނާގެ ހިތްގައިމު ސްޓައިލުގައެވެ. “އަޖީބް ދާސްތާ ހެ ޔޭ” އަކީ 1960 ވަނަ އަހަރު ނެރުނު ފިލްމު، “ދިލް އަޕްނާ އޯރް ޕްރީތު ޕަރާއީ” އަށް ލަތާ ކިޔާފައިވާ ލަވައެކެވެ.

މީގެ ދިހަވަރަކަށް އަހަރު ކުރިން ލަވަކިޔުން ހުއްޓާލާފައިވާ ޝާނީ އަކީ ރާއްޖޭގައި އުފެދުނު ހުނަރުވެރި މޮޅު ލަވަކިޔުންތެރިއެކެވެ. 1990ގެ އަހަރުތަކުގައި މާލޭގައި ބޭއްވި ހަފުތާ ނިންމުން ޝޯވތަކުން ޝާނީ ވިދައިލީ ރާއްޖޭގެ ލިޖެންޑަރީ ލަވަކިޔުންތެރިޔާ، މަރްހޫމާ ޖޭމު ދޮންކަމަނަގެ ލަވަތަކުން ބައެއް ލަވަތައް ކިޔައިގެންނެވެ. ޝާނީގެ މިއުޒިކީ ކެރިއަރުގެ އެއްމެ ފަހު އަހަރުތަކުގައި ލަންކާގެ މަޝްހޫރު ލަވަކިޔުންތެރިޔާ އިރާޖް އާއެކު ހިތްގައިމު ލަވަތަކެއް ނެރެފައިވެއެވެ. އޭގެ ތެރޭގައި ‘އޭ ހިތާ’ އަކީ ބޮޑު މަޤްބޫލުކަމެއް ލިބިގެންދިޔަ ލަވައެކެވެ.

މީގެ އިތުރުން ޓީވީ މޯލްޑިވްސް އިން ބޭއްވި ‘އެ ހަނދާނުގައި” ޝޯވ ގައި ޝާނީ ކިޔި ‘ކިޔައިދޭ މި ރާގުންނޭ’ ލަވައިގެ އިތުރުން ޝާނީ ކިޔާފައިވާ ‘އެކުވެރި ވަފާތެރި ޕިޔާރުވިއްޔާ…’ އަކީވެސް އޭނާގެ ފާހަގަކޮށްލެވޭ ލަވަތަކުން ލަވައެކެވެ.

https://www.youtube.com/watch?v=MBMBc7wf8yA

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: