ބޮލީވުޑްގެ ސްޕަރސްޓަރ ސަންޖޭ ދަތު، އޭނާގެ އަމިއްލަ ޕްރޮޑަކްޝަން ހައުސްއެއް ލޯންޗްކޮށްފިއެވެ. ‘ތްރީ ޑައިމެންޝަން މޯޝަން ޕިކްޗަރޒް’ގެ ނަމުގައި ލޯންޗްކުރި މި ޕްރޮޑަކްޝަން ހައުސްގެ އުއްމީދަކީ ފިލްމީ ދާއިރާއަށް ރަންޒަމާނެއް ގެނެސްދީ 80ގެ އާއި 90ގެ އަހަރު ތަކުގައި ނެރުނު ފެންވަރުގެ ވަރުގަދަ ފިލްމުތަކެއް އުފެއްދުމެވެ.

އުމުރުން 62 އަހަރުގެ ސަންޖޭ ދަތު، އޭނާގެ ފިލްމީ ކެރިއަރު ފެށީ 1981 ވަނަ އަހަރު ނެރުނު ފިލްމު “ރޮކީ”ން ނެވެ. އެ ފިލްމު ޑައިރެކްޓްކުރީ އޭނާގެ ބައްޕަ، އަދި ކުރީގެ ލިޖެންޑަރީ އެކްޓަރު ސުނިލް ދަތު އެވެ.

އިންޑިއާއިން ބޭރުގެ، ބައިނަލްއަޤްވާމީ ނޫހަކަށް މަޢުލޫމާތު ދެމުން ސަންޖޭ ބުނެފައިވަނީ، “އަހަރުމެން ފިލްމީ ސިނާޢަތަށް ވަތްއިރު، އަހަރުމެން ފެށީ ބަޠަލުން ތަކެއްގެ ގޮތުގަ. ކުޅުނީ އަބްޠާލުންގެ ރޯލު، ލޯބީގެ ވަރުގަދަ ރޯލު، މިހެން ގޮސް އެފަދަ އެތަކެއް ވަރުގަދަ ރޯލުތައް. އެކަމަކު މިހާރު މިވަނީ އެކަންކަން ހުއްޓިފަ. އަހަރެން މި އުޅެނީ އެކަންކަން ދިރުވައި އާލާކުރަން.”

‘ތްރީ ޑައިމެންޝަން މޯޝަން ޕިކްޗަރޒް’ އިން އުފެއްދުމަށް ނިންމާފައިވާ ފިލްމެއްގެ މަޢުލޫމާތުވެސް އާއްމުކޮށްފައި ވެއެވެ. އެއީ ބިރުވެރި ކޮމެޑީ ފިލްމު “ދަ ވާރޖިން ޓްރީ” އެވެ. މި ފިލްމު ޑައިރެކްޓްކުރާނީ ސިދާންތު ސަޗްދޭވް އެވެ. ފިލްމުގައި ހަރަކާތްތެރިވާނީ ދާއިރާއަށް އަލަށް ތަޢާރަފުކުރާ ތިން ތަރިންނެވެ. އެ ޕްރޮޑަކްޝަނުން ނެރެން ހުރި އިތުރު އުފެއްދުންތަކުގެ ކަންކަން އެއްކޮށް ހަމަޖެހިފައި ނެތަސް، އެތަނުން ނެރޭނީ އާއިލާއިން އެކުގައި ބަލައިލާ މުނިއަވަސްފިލުވައިލެވޭނެ ފަދަ ފިލްމާއި އެކްޝަން ފިލްމުތަކެވެ. ހުރިހައި ފިލްމެއްވެސް އުފައްދަން ނިންމާފައި ވަނީ ސިނަމާތަކުގައި އެޅުވުމަށެވެ.

ސަންޖޭގެ ފިލްމީ މަސައްކަތްތަކަށް ބަލައިލާއިރު، މިވަގުތު ސަންޖޭ އިންތިޒާރުކުރަމުން ދަނީ އޭނާގެ ފިލްމު “ކޭޖީއެފް ޗެޕްޓަރ 2” ސިނަމާގައި އަޅުވާނެ ތާރީޚަކަށެވެ. މި އެކްޝަން ފިލްމުގައި ކަންނާޑާގެ ސްޕަރސްޓަރ ޔާޝް އަދި ބޮލީވުޑްގެ މަޝްހޫރު ފިލްމީތަރި ރަވީނާ ޓަންޑަން ހަރަކާތްތެރިވެއެވެ. ފިލްމު އަޅުވަން ނިންމާފައިވަނީ 14 އޭޕްރީލް 2022 ގައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: