| MUNIAVAS

ކަޒްމިކް އިންޓަނޭޝަނަލް އަކީ ވީޑިއޯ އަދި ފޮޓޯގްރަފީގެ ހުރިހައި މަސައްކަތަކަށް ޚާއްޞަވެގެން 2021 ވަނަ އަހަރު މަސައްކަތްފެށި ޕްރޮޑަކްޝަން ހައުސްއެކެވެ. މިގޮތުން ދިވެހި ފިލްމީ މަސައްކަތް ވެސް މިދިޔަ އަހަރު ކަޒްމިކް އިންޓަނޭޝަނަލް އިން ފެށިއެވެ.

ކަޒްމިކް އިންޓަނޭޝަނަލް އިން އެންމެ ފުރަތަމަ އުފައްދައި އާއްމުކުރި އެންތޮލޮޖީ ސީރީޒް “މަޒްލޫމް”ގެ އެންމެ ފަހު ޗެޕްޓަރު “ހިންތަ” ބައިސްކޯފަށް މިމަހު 12ވަނަ ދުވަހުގެ ރޭ ރިލީޒްކޮށްފައިވެއެވެ. މަޒްލޫމްގެ މި ޗެޕްޓަރުން ބެލުންތެރިންނަށް ފުރިހަމަ ހިތްހަމެޖުމެއް ލިބޭ ފަދަ މޮޅު، ކޮލިޓީ މަސައްކަތެއް ދައްކައިދީ، ރަނގަޅު ހުށައެޅުމެއް ގެނެސްދީފައިވެއެވެ.

ކަޒްމިކް އިންޓަނޭޝަނަލްގެ ކާމިޔާބީގެ ވާހަކަ ދައްކާއިރު، އޭގެ ތެރެއަށް އައިފިލްމްސްްގެ ނަމާއި ހުނަރުވެރި ސްކްރީން ރައިޓަރ އަދި ޑައިރެކްޓަރ އިލްޔާސް ވަހީދު (އިއްލެ)ގެ ވާހަކަ ހަމަ ކޮންމެހެންވެސް ގެންނަން ޖެހެއެވެ. ކަޒްމިކް އިންޓަނޭޝަނަލްގެ އެންތޮލޮޖީ ސީރީޒް “މަޒްލޫމް”ގެ ކާމިޔާބުގެ ފަހަތުގައި ހުރީ އިއްލެ އެވެ. ހަތަރު ޗެޕްޓަރަކަށް ނެރުނު “މަޒްލޫމް”ގެ ހުރިހައި ޗެޕްޓަރެއް ލިޔެ، ޑައިރެކްޓްކުރީ އިއްލެ އެވެ. މީގެ އިތުރުން، 2019 ވަނަ އަހަރު އުފައްދައި ރިލީޒްކުރި ފެންވަރު ރަނގަޅު ފިލްމު “ބަވަތި” އުފެއްދުމުގައި ހަރަކާތްތެރިވި ޓީމުވެސް އިއްލެއާއި އެކު، މި ޕްރޮޖެކްޓްގައި މަސައްކަތްކުރިއެވެ.

“ހިންތަ”ގެ ޓްރެއިލާއިން ހާމަކޮށްފައިވާ ގޮތުން، މަރްޔަމް އައްޒަ ކުޅެފައިވާ ހަމްޝާގެ ކެރެކްޓަރ މި ޗެޕްޓަރުގައި މަރުވެއެވެ. އޭނާ އިމާރާތެއްގެ މަތިން ވެއްޓި މަރުވަނީ ކީއްވެގެން އަދި ކިހިނެއްކަން މި އެޕިސޯޑުން އެނގިގެންދާއިރު، ރަވީ ކުޅެފައިވާ ޕޮލިސް އިންވެސްޓިގޭޝަންގެ ރޯލުން، ސަޕްރައިޒިން ކަމެއް ފެނިގެންދެއެވެ.

“މަޒްލޫމް”ގެ ހަތަރު އެޕިސޯޑަކީވެސް ނޭވާ ހިފަހައްޓާލައިގެން ތިބެ ބަލައިލަން ޖެހޭ ފަދަ ސަސްޕެންސެއް އެކުލެވިފައިވާ މޮޅު އުފެއްދުމެއްކަން ފާހަގަކޮށްލެވެއެވެ. ފިލްމު ހުށައަޅައިދީފައިވާ ގޮތާއި ޑައިރެކްޝަންގެ ތަފާތުކަން ފެންނައިރު، ޙަޤީޤީ ދިރިއުޅުމުގެ ވައްޓަފާޅިއާ ގުޅުވާލާފައިވަނީ ހަމަ އެއްމެ އެކަށީގެންވާ މިންވަރަށް ކަން ވެސް ފާހަގަކޮށްލެވެއެވެ.

ކޮންމެ އެޕިސޯޑެއްގައި ތަރިންގެ ފަރާތުން ފެނިފައިވަނީ އަސްލާއި އެއްގޮތް އެކްޓިންއެކެވެ. އެކްޓިން ދަށޭ، ނުވަތަ އޯވަރ އެކްޓިންއޭ ބުނާނެ އެއްވެސް ތަންކޮޅެއް ދޫކޮށްލާފަ ނުވެއޭ ދަންނަވަން ކެރެއެވެ.

މަޒްލޫމްގެ ފުރަތަމަ ބައި ”މަޒްލޫމު“ން ދައްކުވައިދިން ރޭޕް ކޭސްގެ ވާހަކައާއި ރޭ ލިރީޒްކުރި “ހިންތަ” އާއި ގުޅުވައިލާ، ފުރަތަމަ ބައި ނިމުނުއިރު އެއްކޮށް ސާފުވުނެ ހުރި ކަންކަން މި ބައިން ސާފުވެގެން ދިޔައެވެ. ހަމަ އެހެންމެ، ދެވަނަ ބައި ކަމުގައިވާ ”ޒައްރޫކު“ން ދައްކުވައިދީފައި ވަނީ މައިންބަފައިންގެ ފަރާތުން އަޅައިލުން ލިބެންވާ ވަރަށް ނުލިބުނު ކުޑަ ކުއްޖަކަށް ދިމާވާ ނަފްސާނީ މައްސަލަތަކުގެ އަސްލަށް އަލިއަޅުވައިދޭ މަންޒަރެއްވެސް މި އެޕިސޯޑުން ފެނިގެންދިޔައެވެ. ތިންވަނަ ބައި “މިންޖު”ން ފެނިގެންދިޔަ ކަންތައްތަކުގެ އިތުރުން، އެ ބައިގެ މައިގަނޑު ފޯކަސް ދެ ކެރެކްޓަރގެ ތެރެއިން ރަވީ ފާރޫޤްގެ ކެރެކްޓަރ އާއި މަޒްލޫމްގެ ހުރިހައި ބަޔަކާއި ހުރި ގުޅުންތައްވެސް ވަރަށް ރަނގަޅަށް ސާފުވެގެން ދިޔައެވެ.

ރޭ ރިލީޒްކުރި “ހިންްތަ”ގެ މުހިންމު ތަރިންގެ ތެރޭގައި މަރްޔަމް އައްޒަ، ޢާއިޝަތު ޢަލީ، ސިމްބާ، ރަވީ ފާރޫޤް، އަލީ އުސާމް (ދޮނާ)ގެ އިތުރުން ޢާއިޝަތު ލަހުފާ (ލަހޫ) ހިމެނެއެވެ.

ޖުމްލަކޮށް ބުނާނަމަ، މަޒްލޫމްގެ “ހިންތަ” އާއެކު ކަޒްމިކް އިންޓަނޭޝަނަލްގެ ކޮލިޓީ މި ވަނީ ދައްކާލާފައެވެ. މި ހުރިހައި މަސައްކަތެއް ލިޔެ، އިރުޝާދު ދިނުމުގެ ފަހަތުގައި ހުރި ހުނަރުވެރި ޑައިރެކްޓަރ އިލްޔާސް ވަހީދު އަނެއްކާވެސް މިވަނީ އޭނާގެ އަލަތު ފިލްމު “ބަވަތި” އާ އަޅައިކިޔާލެވޭ ވަރުގެ މޮޅު މަސައްކަތެއް ކޮށްފައެވެ.