ކުކުޅާއި ކަނޑުމަސް ނުވަތަ ފަރުމަސް ފިހުމަށް މީރުކޮށް ލޮނުމިރުސްގަނޑެއް ތައްޔާރުކޮށްލުމަކީ މުހިންމު ކަމެކެވެ. ބާޒާރުން ގަންނަން ލިބެން ހުންނަ ތައްޔާރީ ލޮނުމިރުސް ބޭނުންކުރުމުގެ ބަދަލުގައި މިފަހަރު އަމިއްލައަށް ލޮނުމިރުސްގަނޑެއް ތައްޔާރުކޮށްލަމާ ހިނގާށެވެ.

ރެސިޕީ ނުވަތަ ރަހަފަތަކީ ފޮތެއްގައި ނުވަތަ ތަނެއްގައި ލިޔެފައި އެ އޮންނަ ގޮތުގެ އިތުރުން އަމިއްލަ ގޮތްތަކެއް އެއަށް ގެނެސްގެން ނުވަތަ މޮޑިފައިކޮށްލައިގެން އަޖުމަ ބަލައިލަން ނަމަވެސް ތައްޔާރުކޮށްލެވިދާނެ އެއްޗެކެވެ. އެހެންކަމުން، މިފަހަރު މި ކިޔައިދެނީ އާއްމުކޮށް ލޮނުމިރުސް ތައްޔާރުކުރާ ގޮތް އަސްލަކަށް ބަލައިގެން، އެހެނަސް އަހަރެންގެ އަމިއްލަ ގޮޮތްތަކަކާ އެކު ލޮނުމިރުސް ތައްޔާރުކުރާނެ ގޮތެކެވެ.

“ހަނީ ބަޓަރ ލޮނުމިރުސް” މިއީ އެއްގަމު މަހާއި ކަނޑުމަހުގެ ބާވަތްތައް ފިހުމަށް ބޭނުންކޮށްލަން މީރު އެއްޗެކެވެ. އަހަރެން އާއްމުކޮށް ތައްޔާރުކުރާ އެއްޗެކެވެ. އަޅެ ޓްރައިކޮށްލަން ކިހިނެއްވާނެ ހެއްޔެވެ؟

މި ރަހަފަތުގައި މި ގެނެސްދެނީ އެއް ކިލޯގްރާމްގެ ކުކުޅެއް ފިހުމަށް ބޭނުންވާނެ ލޮނުމިރުސް ތައްޔާރުކުރާނެ ގޮތާއި ކުކުޅު ފިހާނެ ގޮތެވެ.

ބޭނުންވާނެ ތަކެތި:

🍳 3-2 ސައިސަމުސާ މާމުއި

🍳 3-2 ސައިސަމުސާ މުގުރި ހިކިމިރުސް

🍳 ½ ސައިސަމުސާ އިނގުރު (ގާނާފައި)

🍳 4 ފިތް ލޮނުމެދު

🍳 1 ސައިސަމުސާ އަސޭމިރުސް (މުގުރާފައި)

🍳 1 ސައިސަމުސާ ދިރި (މުގުރާފައި)

🍳 1 ފިޔާ (ބޮޑު)

🍳 1 އިންޗި ބަޓަރ ކިއުމެއް (އަންސޯލްޓެޑް)

🍳 ރަހަލާވަރަށް ލޮނު

ތައްޔާރުކުރާނެ ގޮތް:

1- ފިޔާ، ލޮނުމެދު ކޮށައިލުމަށްފަހު ގްރައިންޑަރަށް އަޅާލާ މުގުރާލާށެވެ.

2- ބާކީ ހުރި ބާވަތްތައް ގްރައިންޑަރަށް އަޅައިލާ، އަނެއްކާވެސް ގްރައިންޑަރ ޖައްސާށެވެ. ހުރިހައި ބާވަތްތައް ރަނގަޅަށް މުގުރި، ޕޭސްޓަކަށް ވުމުން، އެ ހުރީ “ހަނީ ބަޓަރ ލޮނުމިރުސް” ތައްޔާރުކުރެވިފައެވެ.

3- ކުކުޅު ނުވަތަ މަސްފިހުމަށްޓަކައި ލޮނުމިރުސްލާފައި މަސްތައް ކަމީރުކޮށްލަން 15 މިނެޓް ބަހައްޓާލާށެވެ. އެއަށްފަހު އަވަނުގައި ނުވަތަ ބާބަކިއު ހަރުގައި ބަހައްޓައިގެން ރޯފިލާވަރަށް ފިހެލާއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: