ތަންކޮޅެއް ވަދިކޮށް އުޅޭ ދުވަސްދުވަހު ރޯދަވީއްލުމަށް ނުވަތަ ރޯދަމަސް ނޫން މަހެއްގައިވެސް ތަފާތު ގޮތަކަށް ނޫޑްލްސް ކައްކައިލުމަށް މިއީ ރަނގަޅު ރަހަފަތަކަށް ވާނެއެވެ. އަހަރެން މި ރަހަފަތުގެ އަޖުމަބަލައިލަން ތައްޔާރުކޮށްލީ ގޭގައި އެވަގުތު އޮތް އެންމެ ނޫޑްލްސް ޕެކެޓަކުން ހައިފިލާވަރު ނުވާނެތީ އެވެ. ފަހަރުގައި މިއީ ރަސްމީ ސިފައެއްގައި ކޮންމެވެސް ހިސާބެއްގައި ތައްޔާރުކުރާ ރަހަފަތަކަށް ވެސް ވެދާނެއެވެ.

ބޭނުންވާނެ ތަކެތި:

🍳 1 ޕެކެޓް މަމީ ނޫޑްލްސް
🍳 3 ފޮތި ޕާން (ކިއުބް ގޮތަށް ކޮށާފައި)
🍳 1 މަސްދަޅު
🍳 1 ފިޔާ
🍳 1 މިރުސް
🍳 4 ފިތް ލޮނުމެދު
🍳 1 ސައިސަމުސާ މުގުރި އަސޭމިރުސް
🍳 1 ސައިސަމުސާ މުގުރި ދިރި
🍳 1 ސައިސަމުސާ ފިރޮށި ލޮނުމިރުސް
🍳 1 ޖޯޑު ފެން
🍳 1 އިންޗި ހުންނަ ވަރުގެ އަންސޯލްޓެޑް ބަޓަރ
🍳 3 މޭޒުމަތީ ސަމުސާ ކުކިންގ އޮއިލް
🍳 ނޫޑްލްސް ސޫޕް ޕެކެޓެއްގެ ދެބައިކުޅަ އެއްބައި

ތައްޔާރުކުރާނެ ގޮތް:

1- ފިޔާ، ލޮނުމެދު ކޮށައިލުމަށްފަހު، ތެޔޮފޮދު އަޅައި ފިޔާ ރަތްކޮށްލާށެވެ.

2- ފިޔާކޮޅު ރަނގަޅަށް ރަތްވުމުން، އޭގެ ތެރެއަށް ބަޓަރކޮޅު އަޅައިލާ ކޮށާފައިހުރި ޕާން ކިއުބްތައް އަޅައި ތެލުލާށެވެ. ޕާން ކިއުބްތައް ރަތްކުލަ އަރަންދެން ތެލުލާށެވެ. ޕާން ކިއުބްތައް ތެއްލާ ނިމުމުން ވަކިން އެއްޗަކަށް އަޅާފައި ބަހައްޓާލާށެވެ.

3- ތެއްޔަކަށް ޖޯޑެއްގެ ފެން އަޅައި ފެންފޮދު ކެކެން ފެށުމުން ނޫޑްލްސް ޕެކެޓް ފުނޑުކޮށްލުމަށްފަހު ކައްކާށެވެ. ނޫޑްލްކޮޅު ކެކެން ފެށުމުން ނޫޑްލްސް ސޫޕްކޮޅު އަޅައިލާށެވެ. އޭގެ ތެރެއަށް ކޮށާފައި ހުރި މިރުސް، ލޮނުމިރުސް، އަސޭމިރުސް އަދި ދިރިކޮޅު އަޅައިގެން ކައްކާށެވެ. ނޫޑްލްސްކޮޅުގެ ފެން ހިނދެން ކައިރިވުމުން، ވަކިން ބަހައްޓާފައި ހުރި ޕާންކޮޅު އަޅައިލާ ކައްކާލާށެވެ.

4- މިހާރު އެހެރީ ‘ބަޓަރޑް ބްރެޑް ނޫޑްލްސް’ ކެއްކިފައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: