ރަމަޟާން މަހުގެ އެއްމެ ފަހު ދެތިން ދުވަހަށް އެޅުމުން ލ. ފޮނަދޫގެ ގިނަ ގޭގޭގައި އަންހެންވެރިންނާއި ފިރިހެންވެރިން އަވަދިނެތި، މާ ފޯރިއެއް ދައްކާފައި ޢީދަށް ވަރަށް ޚާއްޞަ ކާއެއްޗެއް ތައްޔާރުކުރަން އުޅޭތަން ފެންނާނެއެވެ. މި ދައްކަނީ ޢީދު ދުވަހު ހެނދުނު ސައިބުއިމަށް ޢީދު ކުޅިބޮނޑި ތައްޔާރުކުރުމަށް ހޭލަމޭލަވެ އުޅޭ ވާހަކައެވެ. ޢީދު ކުޅިބޮނޑިއަކީ ނިކަން ރަހަމީރު ބޮނޑިއެކެވެ. ތައްޔާރުކޮށްލަން ކިތައްމެހާވެސް އުނދަގޫ، އެހެނަސް ކައިލަން ނިކަން ފަސޭހަ އެއްޗެކެވެ.
ޢީދު ކުޅިބޮނޑި ތައްޔަރުކުރުމުގައި އަންހެންވެރިންނެކޭ އެއްފަދައިން ފިރިހެންވެރިންގެ ހިއްސާވެސް މިކަމުގައި ވަކިން ކުޑައެއް ނޫނެވެ. ކެޔޮފަތް ކަނޑައި، ފަތް މިލުވައި ނުވަތަ ހޫނުފެނުން ފަތް ކައްކައިގެން ފަތްތައް މިލުވައި ޖަރާސީމު ނައްތައިލުމުގެ މަސައްކަތްކުރަން ފެށުމުގެ މާކުރިންވެސް ކުޅިބޮނޑި ހެދުމުގެ މަސައްކަތް ފެށެއެވެ. ބޮނޑި ހެދުމަށް ބޭނުންވާނެ ކާށި ހޯދައިދީ އަންހެންވެރިންނަށް އަތްގާތްކޮށްދިނުމުގައި ހަރަކާތްތެރިވެއެވެ.
ނަމަވެސް މިކަމުގައިވެސް އެއްމެ މުހިންމު އަދި ބުރަ ދައުރެއް ގިނަ ފަހަރަށް އަދާކުރަނީ އަންހެންވެރިންނެވެ. ޢީދު ބޮނޑި ތައްޔާރުކުރާ ރަހަފަތަށް ބޭނުންވާނެ ތަކެތި އެއްތަންކޮށް، ރަހަފަތުގެ ރަހަގަނޑު އެއްމެ ރަނގަޅުވާނެ ގޮތަށް ހަނޑުލު ފުށްގަނޑު މޮޑެ، ކެޔޮފަތަށް ފުށްގަނޑު އަޅައި ބޮނޑި ބަނދެ، ކައްކަައި މިލުވުމުގައިވެސް އެއްމެ ބޮޑު ހިއްސާއެއް އޮތީ އަންހެންވެރިންގެ އެވެ.
ކޮންމެ ގެއެއްގައި ވެސް އީދު ދުވަހު ހެނދުގެ ސަޔަށް ދެ ވައްތަރުގެ ބޯކިބާ ހުއްޓަސް، ލ. ފޮނަދޫގައި ޒަމާނުއްސުރެ އީދަ ބޮނޑިއަކީ އީދުގެ ޚާއްޞަ ނާސްތާއެކެވެ. ތައްޔާރުކުރަން އުނދަގޫ ވިޔަސް، ރަހަ ނުލާހިކު މީރެވެ. ފޮނަދޫގެ އިތުރުން ލ. އަތޮޅުގެ ބައެއް ރަށްރަށުގައި އަދި ހުވަދު އަތޮޅުގެ ބައެއް ރަށްރަށުގައި ވެސް މި ގޮތަށް ބޮނޑި ތައްޔާރުކުރެ އެވެ.
ޢީދު ކުޅިބޮނޑީގެ ވާހަކަތައް މިވަރަށް ދައްކައިލާ ދަހިކޮށްލެވުމުން، މީގެ ރަހަފަތެއް ގެނެސްނުދީ ތިބުން ހަމަ ގައިމުވެސް އެއީ އެހާ ސަޅިކަމަކަށް ނުވާނެއެވެ. އެހެންކަމުން ޢީދު ކުޅިބޮނޑި ރަހަފަތަށް ޖެހިލަމާ ހިނގާށެވެ.
ބޭނުންވާނެ ތަކެތި
– ފިޔާ
– މިރުސް
– ލޮނުމެދު
– އިނގުރު
– ހިކަނދިފަތް
– ވަޅޯމަސް
– މަސްދަޅު
– ދެވިހަވާދު (ފުނޑާފައި)
– ހުނި
– ހަނޑޫ (މުގާރަފައި ނުވަތަ ފެނުލައި ފުނޑާފައި)
– ލޮނު
ތައްޔާރުކުރާނެ ގޮތް
ފިޔާ، މިރުސް، ލޮނުމެދު، އިނގުރު އަދި ހިކަނދިފަތް މިކްސްޗަރުން މުގުރާލާށެވެ. އެއަށް ފަހު އެހެން ތަކެއްޗާއެކު އެއްކޮށްލާށެވެ. ރަނގަޅަށް ފުއްގަނޑު ތައްޔާރުކުރުމަށް ފަހު، މިލުވާފައި ހުރި ކެޔޮފަތަށް އަޅާފައި ބޮނޑިއެއް ބަންނާނީ އެވެ. ފެން ތާހެއްގައި، ބޮނޑިތައް 45 މިނެޓާއި 60 މިނެޓާ ދެމެދު ގަދަ ގިނީގައި ކައްކާށެވެ. ފެނުގައި ކެއްކުމަށް ފަހު، ބޮނޑިތައް ނަގައި ދުމަށީގައި އަތުރައި، ދުންދިލަ ޖައްސައިގެން ހިއްކާށެވެ. އަވަނުން ވެސް ހިއްކޭނެ އެވެ. ނަމަވެސް ދުމަށިން، ދިލަ ޖައްސައިގެން ފިހާ ބޮނޑި އާއި އަވަނުން ތައްޔާރުކުރާ ބޮނޑި ތަފާތެވެ.
މިހާރު އެ ހުރީ ކުޅި ބޮނޑި ތައްޔާރުކޮށް ނިމިފަ އެވެ. ދުރާލައި ތައްޔާރުކޮށް ބެހެއްޓުމަށް ފަހު، ކާން ބޭނުންވުމުން، އަލުން ހޫނުކޮށްލައިގެން ކެވޭނެ އެވެ. މިއީ ރަހަ މީރު ބޮނޑިއެކެވެ. އަޖުމަ ބަލާލާށެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
- 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
- 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
- 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!
