ދިވެހި ފިލްމު އެސޯސިއޭޝަން ނަގައި ކޮޅަށް ޖަހައި، ވަރުގަދައަށް ހިންގައިލުމަށް އިބްރާހީމް ރަޝީދު މޫސާ (ބުރޯ) ނުކުމެއްޖެ އެވެ. ބުރޯ ނުކުތީ ވަރުގަދަ މެނިފެސްޓޯއެއް ހިފައިގެން “ހިންގާލަން” ސްލޯގަންއާއެކު ވަރުގަދަ ޓީމެއްވެސް ގޮވައިގެންނެވެ.

މޯލްޑިވްސް ފިލްމު އެސޯސިއޭޝަންގެ ރައީސްކަމަށް ބުރޯ ވާދަކުރަން ނިންމައި އެކަމުގެ ކެމްޕޭނު ފަށައިގެން ކުރިއަށްގެންދާތާ ދުވަސްތަކެއް ވެއްޖެ އެވެ. ފިލްމު އެސޯސިއޭޝަންގެ ވައިބަރ ގްރޫޕް ތެރޭގައި މިހާރު އެއްމެ ގަދަ ވެފައިވާ އެއް އަޑަކީ ބުރޯގެ އަޑުކަން ފާހަގަކޮށްލެވެ އެވެ.

ދިވެހި ފިލްމީ ދާއިރާ ހިންގާލަން ބުރޯ ނުކުމެ ހުރީ ވަރުގަދަ ވަޢުދުތަކެއް ހިފައިގެންނެވެ. އިންތިޚާބުގައި ވާދަކުރާކަން ހާމަކުރުމަށް ބުރޯ އާއްމުކޮށްފައިވާ ސިޓީގައި އޭނާގެ ވަޢުދުތައް ހިމަނާފައިވެ އެވެ. މިގޮތުން ވަރަށް ވަރުގަދަ 08 ވަޢުދެއް ހިމާނާފައިވެ އެވެ.

ބުރޯގެ 08 ވަޢުދު

1- ފިލްމު އެސޯސިއޭޝަންގެ ފަންނާނުންނަށް ތައްޔާރުކުރާ ފިލްމީ ކޮމްޕްލެކްސް ތައްޔާރުކުރުން. މި ކޮމްޕްލެކްސްގައި އެމްއެފްއޭގެ އޮފީހަކާއެކު ޒަމާނީ 03 ސިނަމާ އެކުލެވިގެންވާނެ އެވެ.

2- ބޯޑު ހޮވޭތާ ދެވަނަ ދުވަހު ފިލްމީ ފަންނާނުންގެ އާކައިވްގެ މަސައްކަތް ފެށި 60 ދުވަހުގެ ތެރޭގައި ނިންމޭނެ އެވެ.

3- އެމްއެފްގޭ ވެބްސައިޓް ހަދާ 60ވަނަ ދުވަހުގެ ތެރޭގައި އަޕްލޯޑްކުރެވޭނެ އެވެ. މިއާއެކު އެންމެހާ ފަންނާނުންގެ އާކައިވް ވެބްސައިޓަށް އަޕްލޯޑްކުރެވެން ފެށޭނެ އެވެ.

4- ފަންނާނުން އުފައްދާ ފިލްމުތައް މާލޭގައި ޕްރިމިއާކުރާއިރު، މާލެއާ އެއްކޮށް ރަށްތަކުގައި ރިލީޒްކުރެވޭނެ މަގު ފަހިކޮށްދެވޭނެ.

5- ފަންނާނުންގެ މަސައްކަތް އަގުވަޒަންކޮށް، ފަންނުވެރިންގެ އަގުއެރުވުމަށް އަހަރަކު 03 އެވޯޑް ބޭއްވޭނެ އެވެ. މިގޮތުން އެމްއެފްއޭ ފިލްމު އެވޯޑް، ކުރު ފިލްމު އެވޯޑް އަދި މުޅިން އަލަށް ރާއްޖޭގައި ބޭއްވޭ ފުރަތަމަ މިއުޒިކް ވީޑިއޯ އެވޯޑް ބޭއްވޭނެ އެވެ.

6- ކޮންމެ އަހަރަކު މަދުވެގެން ފަސް ޕްރޮޑިއުސަރަކަށް ފިލްމު އުފެއްދުމަށް ކޮންމެ ޕްރޮޑިއުސަރަކަށް 03 ލައްކަ ރުފިޔާގެ ލޯނު، 12 މަސް ދުވަހުން އަނބުރާ ދައްކާގޮތަށް ދޫކުރެވޭނެ އެވެ.

7- ކޮންމެ 90 ދުވަހަކުން އާއްމު ބައްދަލުވުމެއް ބާއްވާ ޖަމިއްޔާއިން ކުރެވެމުންދާ މަސައްކަތްތަކުގެ ތަފުސީލު މެންބަރުންނާ ހިއްސާކުރެވޭނެ އެވެ.

8- މުޅިން އަލަށް އުފެއްދޭ ބޯޑަށް ލަފާދޭ ކޮމެޓީއެއް އުފެއްދޭނެ އެވެ.

ބުރޯގެ ޓީމުގައި އާމިރާ ވެސް

ފިލްމީ ދާއިރާގެ ހުނަރުވެރި އެކްޓްރެސް އާމިރާ އިސްމާޢީލް ވެސް މިފަހަރު ނުކުމެ ހުރީ ބުރޯގެ ޓީމާއެކު “ހިންގާލަން” ސްލޯގަން ހިފައިގެންނެވެ. އާމިރާ ކުރިމަތިލާފައިވަނީ މޯލްޑިވްސް ފިލްމު އެސޯސިއޭޝަންގެ ޑެޕިއުޓީ ޗެއާޕާސަންގެ މަގާމަށެވެ. ހުނަރުވެރި އެކްޓިންއެއް ދައްކައި ފިލްމީ ދާއިރާގެ އެވޯޑްތަކެއްވެސް ހޯދާފައިވާ އާމިރާ، ބުރޯގެ ޓީމުގައި ހިމެނުމުން، އާމިރާގެ ފަހަތުގައި ފިލްމީ ދާއިރާގެ ވަރުގަދަ ފައުޖެއްގެ ‘ބެކިންގ’ އޮތްކަން މިއީ ހަމަ ގައިމުވެސް އެނގޭ ކަމެކެވެ.

ބުރޯއަށް މިކަންކަން ވާނެތަ؟

އެއްވެސް ޝައްކެއްވެސް ނެތެވެ. އިޚްލާޞްތެރި ނިޔަތަކާއެކު ކަމެއް ކުރުމަށް ނުކުމެއްޖެ މީހެއްގެ ފަހަތުގައި ވަރުގަދަ ޓީމެއް ރުކުރުވާލާނއެވެ. އެފަދަ ޓީމެއްގެ ހުންގާނުގައި ރަނގަޅު މާލިމީއެއް ހުރެއްޖެ ނަމަ، ދަތުރުކުރަން ބޭނުންވާ މަންޒިލަށް ފަސޭހަކަމާއެކު ވާޞިލްވުމަކީ ދުނިޔެ ދައްކަމުން އަންނަ ހަޤީޤަތެކެވެ. މި ޙަޤީޤަތް މިހެން އޮތްއިރު، އުފެދޭ ބޮޑު ސުވާލަކީ ބުރޯއަށް މިކަންކަން ވާނެބާވައެވެ.

އެއްވެސް ކަމަކީ ނުކުރެވޭނެ ކަމެއް ނޫނެވެ. ކޮންމެ ކަމެއްވެސް ކުރެވިދާނޭ، މަސައްކަތްކުރީމާ ކާމިޔާބު ލިބޭނޭ ބުނާ ބީދައިން ބުރޯގެ ޓީމުން ހަމަ ގައިމުވެސް ނުކުމެ ތިބީ “ހިންގާލަން” ށެވެ. ބުރޯގެ ފަހަތުގައި ފިލްމީ ދާއިރާގެ ވަރުގަދަ ތަނބުތަކުން ހައެއްކަ ތަނބު، ސާބިތުވެ ތިބެއްޖެނަމަ، ދިވެހި ފިލްމީ ދާއިރާ ނަގައި ކޮޅަށް ޖަހައިލެވޭނެ ކަމީ އެއްވެސް ޝައްކެއް އޮތް ކަމެއް ނޫނެވެ.

ބުރޯ އަކީ ލަންކާގެ އެޗް.އާރ.ްއެމް.އައި އިން އެމްބީއޭ އިން ސްޓްރެޓެޖިކް މެނޭޖްމެންޓް އެންޑް ލީޑަރޝިޕްގެ ޕޯސްޓް ގެރެޖުއޭޓެކެވެ. ދިވެހި ފިލްމީ ދާއިރާގައި އެކްޓިން އަދި ޕްރޮޑިއުސްކުރުން ފަދަ ކަންކަމުގައި ހަރަކާތްތެރިވެފައިވެ އެވެ. ފިލްމު “ހަތަރު އުދަރެސް”ގެ ތިން ޕްރޮޑިއުސަރުންގެ ލިސްޓްގައި ބުރޯގެ ނަންވެސް ފާހަގަކޮށްލެވެ އެވެ. ބުރޯ އަކީ ލިޔުންތެރިއެއްގެ ގޮތުގައިވެސް ފާހަގަކޮށްލެވޭ ފަރާތެކެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: