މި އަހަރުގެ އަޟްހާ ޢީދާއި ދިމާކޮށް ހދ. މަކުނުދޫގައި ތަފާތު ގޮތަކަށް މެހެމާނުންނަށް މަރުޙަބާ ކިޔައިފިއެވެ.
މި ދިޔަ މަހު 30 ވީ ބުރާސްފަތިދުވަހު، ކުޅުދުއްފުށި ސީ ކްއީން ބޯޓުން މާލެއިން މަކުނުދޫއަށް އައުމަށްޓަކައި އަދަދު ނޭނގޭ ވަރަށް މެހެމާނުން ދަތުރު ފެށިއިރު މި ބޭފުޅުންނަށް ކުލަ ގަދަ ގޮތެއްގައި މެހެމާންދާރީ އަދާކުރުމަށް ރަށުގެ ކުދި ބޮޑު ރައްޔިތުން ފާލަންދޮށަށް ޖަމާވިއެވެ. މީގެ އިތުރުން، މަކުނުދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެމްބަރުންވަނީ މެހެމާނުންނަށްޓަކައި ރަތް ދޫލަ ފަތުރާލައި، މަދިރި މަރާ ރެކެޓާއި ބުރުމާ ބޭނުންކޮށް، މަޖާ މާހައުލެއްގައި މެހެމާނުންގެ ހުން ބަލާ، ސްކޭން ކޮށްފައިވެއެވެ. އަދި ރަށަށް ޒިޔާރަތްކުރި ކުޑަކުދިންނަށް ތަބަކުގައި މެޓާ ބަހާ، މަކުނުދޫގެ އެކުވެރިކަމާއި އޯގާތެރިކަން ދައްކުވައިދީފައިވެ އެވެ.
ކޮވިޑް19 ގެ ބަލިމަޑުކަން ފެތުރި ދެ އަހަރުވަންދެން ޢީދުގެ ފޯރި ނުނެގި މަޑުޖެހިފައިވީ ހިނދު، މި އަހަރުގެ އަޟްހާ ޢީދު ފޯރި ގަދަކޮށް މަކުނުދޫގައި ފާހަގަކުރުމަށް މަކުނުދޫ ކައުންސިލުން އިސްނަގައިގެން ވަރަށް ގިނަ މަސައްކަތް ކުރައްވަމުން ގެންދަވާކަން ފާހަގަ ކޮށްލެވެއެވެ. އޭގެ ތެރޭގައި ރަށުތެރޭގެ ޢިޖުތިމާއީ ސަރަހައްދުތައް ކުނިކަހާ ސާފުކުރުމާއި، ރަށަށް ޒިޔާރަތްކުރައްވާ މެހެމާނުންނަށާއި ރައްޔިތުންނަށް ޢީދު ޓީޝާޓު ފޯރުކޮށްދިނުން ހިމެނެއެވެ.
ޒަމާނުއްސުރެ، ހދ. މަކުނުދުއަކީ މެހެމާނުންނަށް ކަމޭހިތާ، ގުޅުން ބަދަހިކުރުމުގައި ނަމޫނާ ރަށެއްކަން ފާހަގަކޮށްލެވެއެވެ. އަދި ހަމަ އެހެންމެ، އަޟްހާ ޢީދު ޚާއްސަކޮށް ކުލަގަދަކޮށް ފާހަގަ ކުރުމަށްޓަކައި ކުލަ ޖެހުމާއި، ޢީދު ބޮނޑި އަޅާ، މާލި ނެރެ، ވަގު ކުޅުމުގެ އިތުރުން، ބޮޑުމަސް ނެރުމާއި، ދަފިނެގުމާއި، މަގުމަތި ދަނޑި ޖެހުމާއި ޢީދު ޝޯވ ފަދަ ތަފާތު ސަޤާފީ ކުޅިވަރުތަކަށް ދުރާލާ ތައްޔާރުވެ ވަރަށް ފުރިހަމައަށް ކުރިއަށް ގެންދެއެވެ.
މި ފަހަރު މަކުނުދޫއަށް ޢީދު ފާހަގަ ކުރުމަށް ޒިޔާރަތްކުރެއްވި އެންމެހާ މެހެމާނުންނަށް މަރުޙަބާ ކިޔުމުގެ ހަރަކާތްތައް ނިންމާލާފައިވަނީ ޢީދު ކުޅިވަރުތަކުގައި ވީހާވެސް ގިނަ ބޭފުޅުން ބައިވެރިވުމަށް ދަޢުވަތު ދެމުންނެވެ.
ލިޔުންތެރިޔާގެ ފުރަމަލަ
- ސަމްރާއަކީ ޕްރޮގްރާމު ހުށައެޅުމުގެ ފަންނުވެރިކަން ހުރި، ޚަބަރު ލިޔުމުގައިވެސް ހަރަކާތްތެރިވާ ބެންބަރެކެވެ.
