ރާއްޖޭގެ މިއުޒިކް އިންޑަސްޓްރީއަށް 20އަހަރަށްވުރެ ގިނަ ދުވަހު ޚިދުމަތްކޮށްފައިވާ ކުޅަދާނަ ފަންނާނު އަދި ސައުންޑް އިންޖިނިއަރ އިބްރާހިމް ނިޝާމް (ޕައިޑޭ)ގެ ފުރަތަމަ ސޯލޯ އަލްބަމް “އިންފިނިޓީ” ބައިސްކޯފުގައި ރިލީޒްކޮށްފިއެވެ. 28 އޮގަސްޓް 2022ވީ އާދީއްތަ ދުވަހު މި އަލްބަމް ރިލީޒްކޮށްފައިވަނީ ބައިސްކޯފުގައި މިކަމަށް ހާއްސަކޮށްގެން ބޭންވުނު އެއްވުމެއްގައި، މިއުޒިކް ދާއިރާގައި ހަރަކާތްތެރިވާ އަދި ދާއިރާއަށް ގިނަ ޚިދުމަތްކޮށްދެއްވާފައިވާ ފަރާތްތަކުގެ ބައިވެރިވުމާއެކުއެވެ.

“އިންފިނިޓީ” އަކީ ޒަމާނީ ގޮތަށް ދިވެހިވަންތަ ސިފަތަކެއް އެކުލެވޭ 04ޓްރެކްގެ އިންސްޓްރޫމެންޓަލް އަލްބަމެކެވެ. އެއީ:-

1- މިސްޓިކަލް ވޮއިޑް
2- އަދަރ ސައިޑް
3- އެޕިކް ޕީކްސް،
4- އެގްޒޯޓިކް މެޓަރ އެވެ.

މި އަލްބަމްގައި ފީޗަރކުރެވިފައިވާ ފަންނާނުންގެ ތެރޭގައި ނާނު، ފަސީ، ތޫ އަދި ރިފޫ ހިމެނެއެވެ. ޕައިޑޭގެ އުފަންދުވަހު ރިލީޒްކުރެވުނު މި އަލްބަމާ ގުޅޭގޮތުން ވާހަކަދައްކަމުން ޕައިޑޭ ފާހަގަކުރިގޮތުގައި، މި އަލްބަމަކީ ހުރިހާ ގޮތްގޮތުންވެސް ޕައިޑޭއަށް ވަރަށް ހާއްސަ އަލްބަމެކެވެ. އެގޮތުން މި އަލްބަމްގައި ޕައިޑޭ މަސައްކަތްކޮށްފައި ވާނީ އެކުގައި މަސައްކަތްކޮށްފައިވާ ފަންނާނުންގެ ރަހަތަކާ ސްޓައިލްތަކާ ވީހާވެސް އެއްގޮަތް ޓްރެކްތަކެއް ހެދޭތޯއެވެ. އަދި އަލްބަމް ހެދުމުގައި އެހީތެރިކަމާއި އެއްބާރުލުން ފޯރުކޮށްދީފައިވާ ފަރާތްތަކަށް ޕައިޑޭ ވަނީ ޝުކުރު އަދާ ކޮށްފައެވެ.

”މި ފުރުސަތުގަ، އަލްބަމް ހެދުމަށް އެންމެބޮޑު އެއްބާރުލުމެއްދެއްވި ފަރާތްތަކަށް، ހާއްސަކޮށް އަޅުގަނޑުގެ އަންހެނުންނާއި ރައްޓެހިން އަދި ބައިސްކޯފު ޓީމަށް ވަރަށް ބޮޑު ޝުކުރެއް އަދާކުރަން. އަދި އަލްބަމް ލޯންޗްކުރުމުގައި ޝަރަފްވެރި މެހެމާނެއްގެ ގޮތުގައި ބައިވެރިވި، މިއުޒިކަށް އެކި ގޮތްގޮތުން އެހީތެރިކަން ފޯރުކޮށްދީފައިވާ އަލްފާޟިލް އަބްދުލް މާޖިދް އަށް ވަރަށް ހާއްސަ ޝުކުރެއް ރައްދުކުރަން.“ އަލްބަމް ނެރުމަށް ބޭއްވި ހަރަކާތުގައި ޕައިޑޭ ފާހަގަކުރި އެވެ.

ޕައިޑޭ އެންމެ ފުރަތަމަ މިއުޒިކް ކުޅެންފެށީ އުމުރުން 14އަހަރު ގައި ”ޓްރަބަލްމޭކާސް“ އާ އެކުއެވެ. އޭގެ ފަހުން 1995ވަނަ އަހަރު ”ލެވެލް ބޭންޑް“ އާއެކު ޕައިޑޭގެ މިއުޒިކް ކެރިއަރ ފެށިގެން ދިޔައެވެ. 1996ގައި ޕައިޑޭ ވަނީ ”މެޒޯ“ ބޭންޑާއި ގުޅި، 02 އަލްބަމް އުފައްދާފައެވެ. އޭގެ ފަހުން 2014ވަނަ އަހަރާ ހަމަޔަށް ”ވޫޑޫ“ގެ ނަމުގައި އެކުވެރި ފަންނާނުންނާއެކު ބޭންޑެއް އުފައްދައި، ހަރަކާތްތެރިވަމުން ދިޔައެވެ. 2014އަށްފަހު މިއުޒިކް ދާއިރާއިން ބޮޑު ބްރޭކެއް ނެގުމަށްފަހު ޕައިޑޭ މިހާރު ދަނީ
ބައިސްކޯފާއި ގުޅި، ބައިސްކޯފުގައި ސައުންޑް އިންޖިނިއަރެއްގެ ގޮތުގައި މަސައްކަތްކުރަމުންނެވެ. އެގޮތުން ރާއްޖޭގައި ނަންކިޔާ ގިނަ ފަންނާނުންނާއި ބޭންޑްތަކާ އެކު ޕައިޑޭ ވަނީ މަސައްކަތްކޮށްފައެވެ.

“އިންފިނިޓީ” އަލްބަމް ބައިސްކޯފު އެޕުން މިހާރު އަޑުއަހާލެވޭނެއެވެ.

މޯބައިލާއި ޓީވީއިން ބަލާލެވޭ ’ބައިސްކޯފު‘ އަކީ ރާއްޖޭގައި މިވަގުތު އެންމެ ކުރިއަރާފައިވާ އަދި ނަން ހިނގާ ސްޓްރީމިންގ ޕްލެޓްފޯމެވެ. ބައިސްކޯފް ވެބްސައިޓް www.baiskoafu.com އިން ބީއެމްއެލް ޕޭމަންޓް ގޭޓްވޭ އަދި ދިރާގު ސަބްސްކްރިޕްޝަން ޕޯޓަލް މެދުވެރިކޮށް ބައިސްކޯފަށް ސަބްސްކްރައިބްކުރެވޭނެ އެވެ.
އަދި ބައިސްކޯފު ސަބްސްކްރިޕްޝަން އާ ގުޅޭ މައުލޫމާތު ބައިސްކޯފުގެ ސޯޝަލް މީޑިއާ މެދުވެރިކޮށް ނުވަތަ ބައިސްކޯފު ވައިބަރ ސަޕޯޓް 7983863އާ ގުޅުއްވުމުން ލިބިވަޑައިގަންނަވާނެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: