ބޮލީވުޑްގެ ކާމިޔާބު ބިރުވެރި ފިލްމު “ޖުނޫން” ރިލީޒްކުރިތާ އިއްޔެއަށް 30 އަހަރު ވީއެވެ. ފިލްމު ރިލީޒްކުރީ 18 ސެޕްޓެމްބަރ 1992 ގައެވެ. “ޖުނޫން” ރިލީޒްކުރިތާ 30 އަހަރު ވީނަމަވެސް މިއީ އަދިވެސް ބިރުވެރި ފިލްމުތައް ބަލާ މީހުންގެ މެދުގައި “ފޭވަރިޓް” އެކެވެ.
ރާހުލް ރޯއީ، ޕޫޖާ ބަޓް އަދި އަވިނާޝް ވަދަވަން ލީޑް ރޯލުތަކުން ފެނިގެންދިޔަ “ޖުނޫން” ގެ މައިގަނޑު އެހެން ރޯލުތަކުން ފެނިގެންދިޔަ ތަރިންގެ ތެރޭގައި ޓޮމް އެލްޓާ، ރާކޭޝް ބޭޑީ، އަވްތާރް ގިލް، ކޭ.ޑީ. ޗަންދްރަން އަދި މުޝްތާޤް ޚާން ފަދަ ތަރިން ހިމެނެއެވެ.

“ޖުނޫން” ގައި ކިޔައިދެނީ ހަނދު ފުރިހަމަވާ ރެޔެއްގައި ޝިކާރައަށް ނުކުންނަ ވިކްރަމް ކިޔާ ޒުވާނެއްގެ ވާހަކައެވެ. ޝިކާރައަށް ނުކުމެ އުޅުމުގެ ތެރޭގައި ރޫޙާނީ ބާރުތަކެއް ލިބިފައިވާ މިނިކާވަގެއްގެ ހަމަލާއަކާ ކުރިމަތިވެއެވެ. އަދި ވިކްރަމް ހޮސްޕިޓަލަށް ގެންގޮސް ފަރުވާ ދެނިކޮށް މަރުވިކަމަށް ޑޮކްޓަރުން ނިންމައެވެ. ނަމަވެސް ރޫޙާނީ ބާރަކުން ވިކްރަމްގެ ދިރުން އައިސް އޭގެ ފަހުން ކޮންމެ މަހެއްގެ ހަނދު ފުރިހަމަވާ ރޭގައި ވިކްރަމް މިނިކާވަގަކަށް ބަދަލުވެއެވެ. އޭގެ ފަހުން ފިލްމުގައި ހިނގާ ކަންތައްތައް ފިލްމުން ބަލައިލާށެވެ.

 

މި ލިޔުމުގައި ބަލައިލާނީ “ޖުނޫން” އާއި ބެހޭގޮތުން މީހުންނަށް އެހާ ނޭނގޭ ނުވަތަ އެހާ އާންމު ނޫން ބައެއް ވާހަކަތަކަށެވެ.

 

* އޮރިޖިނަލް ހިންދީ ފިލްމެއް ނޫން

“ޖުނޫން” އަކީ އޮސްކާ އެވޯޑް ހާސިލްކޮށްފައިވާ 1981 ވަނަ އަހަރުގެ އިނގިރޭސި ހޮރޯ-ކޮމެޑީ ފިލްމު “އޭން އެމެރިކަން ވާރވުލްފް އިން ލަންޑަން” އަސްލަކަށް ބަލައިގެން ހަދާފައިވާ ފިލްމެކެވެ.

 

 

* ތަރިން
ރާހުލް ކުޅުނު ވިކްރަމް ނުވަތަ ވިކީގެ ރޯލަކީ މި ފިލްމުގެ ދިރުމެވެ. އަދި މިއީ ރާހުލްގެ ފިލްމީ ކެރިއަރުގެ އެންމެ ފާހަގަކޮށްލެވޭ ރޯލުކަންވެސް ގައިމެވެ. ނަމަވެސް މި ރޯލަށް ފުރަތަމަ ހޮވީ ރާހުލްއެއް ނޫނެވެ. ރާހުލްއަށް މި ރޯލު ލިބުނީ ކަމާލް ސަދާނާ މި ރޯލު ޤަބޫލުނުކޮށް ދޫކޮށްލުމުންނެވެ.

1990 ގައި މި ފިލްމު ލޯންޗު ކުރިއިރު، ޕޫޖާ ކުޅުނު ނީތާގެ ރޯލު ކުޅެން ފުރަތަމަ ސޮއިކުރީ ސްރީދޭވީއެވެ. ސްރީދޭވީ ފިލްމުން ވަކިވީ ކޮން ސަބަބަކާ ހުރެ ކަމެއް ނޭނގެއެވެ. ޕޫޖާ ސޮއިކުރީ ސްރީދޭވީ ފިލްމު ދޫކޮށްލުމުންނެވެ.

ފިލްމުގައި އަވިނާޝް ކުޅުނު ރަވީގެ ރޯލަކީވެސް ވަރަށް ގިނަ ތަރިންނަށް ހުށަހެޅި ރޯލެކެވެ. އޭގެ ތެރޭގައި ޑީޕަކް މަލޯޓްރާ، ޑީޕަކް ތިޖޯރީ އަދި އަރްބާޒް ޢަލީ ޚާން ހިމެނެއެވެ. އަވިނާޝްއަށް ރަވީގެ ރޯލު ހުށަހެޅީ މި 3 ތަރިންވެސް އެ ރޯލަށް ނޫނެކޭ ބުނުމުންނެވެ.

 

 

* “ޖުނޫން” އަކީ 1990 ވަނަ އަހަރު ރޮމޭންޓިކް މިއުޒިކަލް ފިލްމު “އާޝިޤީ” އަށްފަހު ރާހުލް ރޯއީގެ ކާމިޔާބުވި ހަމައެކަނި ފިލްމެވެ. އަދި މި ފިލްމުން އޭނާ ވަނީ ފިލްމްފެއަރ ބެސްޓް އެކްޓަރުގެ އެވޯޑަށް ނޮމިނޭޓް ވެފައެވެ.

 

* ފިލްމުގެ ލަވަތައް

“ޖުނޫން” ގެ ލަވަތައް ވަރަށް ހިތްގައިމެވެ. ލަވަތަކުގެ މިއުޒިކް ތައްޔާރުކޮށްދިނީ މަޝްހޫރު މިއުޒިކް ކޮމްޕޯޒިންގ ޑުއޯ ނަދީމް-ޝްރަވަންއެވެ. ފިލްމުގެ ލަވަތައް ހިތްގައިމު ނަމަވެސް އެމީހުން “ޖުނޫން” ގެ ކުރިން މިއުޒިކް ތައްޔާރުކޮށްދިން ލަވަތަކާ ގާތަށްވެސް މި ފިލްމުގެ ލަވަތައް މަޝްހޫރެއް ނުވިއެވެ. އޭގެ ސަބަބެއް ކަމަށް އެމީހުން ބުނަނީ ކުމާރު ސާނޫ އާއި އުދިތު ނަރަޔަންގެ ލަވަތައް ނެތްނަމަ އަލްބަމްތައް ނުހިނގި ދުވަސްވަރެއްގައި ގުލްޝަން ކުމާރުގެ އެންގުމަށް ވިޕިން ސަޗްދޭވާ ލައްވާ ފިލްމުގެ ލަވަތައް ކިޔުއްވަން ޖެހުމެވެ.

 

* ފިލްމުގެ ލަވަ އަލްބަމްގައި ހިމެނޭ “ޖޯ މެރެ ދިލް މޭ ހޭ” ލަވައަކީ ސައުންޑް އޮފް މިއުޒިކްގެ “މައި ފޭވަރިޓް ތިންގްސް” އަސްލަކަށް ބަލައިގެން ހަދާފައިވާ ލަވައެކެވެ.

 

* ފިލްމުގައި ރާހުލް މިނިކާވަގަކަށް ބަދަލުވާ މަންޒަރަކީ މައިކަލް ޖެކްސަން 1982 ގައި ނެރުނު ހިޓް ލަވަ “ތުރިލާ” އިން ނަކަލުކޮށްފައިވާ ޚިޔާލެކެވެ.

 

* ކޮންސެޕްޓް
“ޖުނޫން” އަކީ އޭރު ބޮލީވުޑްގައިވެސް އުފައްދަމުން ދިޔަ ބިރުވެރި ފިލްމުތަކާ މުޅިން ތަފާތު ފިލްމަކަށް ވާތީ 1992 ވަނަ އަހަރު ބެލުންތެރިން އެންމެ އިންތިޒާރު ކުރި ފިލްމެވެ.

“ޖުނޫން” އުފެއްދުމުގެ ކުރިން “ޑަރް” ގެ ނަމުގައި މިއާއި ދާދި އެއްކަހަލަ ކޮންސެޕްޓަކަށް ފިލްމެއް ހަދަން އުޅުނެވެ. ޑީޕަކް ޕަރަޝަރް، މޯނިޝް ބޭލް، ހެމަންތު ބިރްޖީ، އަމަރް އުޕަދިޔާއި، ޖޭސްމިން، ސާރިކާ، ޕްރީތީ ސަޕްރޫ، އަނިރުދް އަގަރްވާލް އަދި މަނޯޖް ޕަހްވާ އާއެކު ގެނެސްދޭން އުޅުނު “ޑަރް” އަކީ ތުލްސީ އަދި ކޭޝޫ ރަމްސޭ ޑައިރެކްޓްކުރަން ހަމަޖެހުނު ފިލްމެކެވެ. އަދި އެ ފިލްމަކީ “ކެޓް ޕީޕްލް” ގެ ހިންދީ ރީމޭކެއްގެ ގޮތުގައި ގެނެސްދޭން އުޅުނު ފިލްމެކެވެ. “ކެޓް ޕީޕްލް” އަކީވެސް “ޖުނޫން” އާއި ދާދި އެއްކަހަލަ ކޮންސެޕްޓެއް ހިމެނޭ ފިލްމެކެވެ.

“ޑަރް” ގެ ކޮސްޓިއުމްތައްވެސް ތައްޔާރުކޮށް ނިމިފައި ހުއްޓާ، އެތައް ފަހަރަކު ފިލްމު ލަސްވަމުން ގޮސް ފިލްމު ނުހެދޭނެހެން ހީވުމުން، މުކޭޝް ބަޓް އޭނާގެ ކުންފުނިން “ޖުނޫން” އުފައްދަން ނިންމީއެވެ. އެކަމާ ޑީޕަކް ވަރަށް ހިތްހަމަނުޖެހިގެން އޭނާގެ ފިލްމުގެ ކޮސްޓިއުމްތަކާއެކު ފޮޓޯތަކެއްވެސް އާންމުކުރިއެވެ.

https://www.youtube.com/watch?v=LOmUEK2mLuk

 

މުކޭޝް ބަޓްގެ ވިޝޭޝް ފިލްމްސް އިން ޕްރޮޑިއުސްކޮށް ގެނެސްދިން “ޖުނޫން” ގެ ވާހަކަ ލިޔުނީ ރޮބިން ބަޓް އަދި ސުޖީތު ސެންއެވެ. ޑައިރެކްޓްކުރީ ކްރައިމް ތުރިލާ އަދި ލޯބީގެ ފިލްމުތައް އުފެއްދުމަށް މަޝްހޫރު ޑައިރެކްޓަރ މަހޭޝް ބަޓްއެވެ. އަދި މިއީ އޭނާ ޑައިރެކްޓްކޮށް ގެނެސްދިން ހަމައެކަނި ބިރުވެރި ފިލްމުކަންވެސް ފާހަގަކޮށްލެވެއެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: