ޕާކިސްތާން ޑްރާމާ “ތަޤްދީރް” ދައްކަން ފަށައިފިއެވެ.

“ބޭއިންތެހާ (2017)”، “ތޯ ދިލް ކާ ކިޔާ ހުއާ (2017)” އަދި “ޚުދްގަރްޒް (2017)” ފަދަ ޑްރާމާތަކުން މޮޅު އެކްޓިންގއެއް ދެއްކި ޕާކިސްތާން އެކްޓަރ ސާމީ ޚާންއާއި އަލީޒޭ ޝާހް ލީޑް ރޯލުން ފެނިގެންދާ މި ޑްރާމާގެ މައިގަނޑު އެހެން ރޯލުތަކުން ފެނިގެންދާ ތަރިންގެ ތެރޭގައި ޒައިން އަފްޒަލް، އަމްނާ މާލިކް، އާސިމް މަހްމޫދު، ޖާވިދް ޝެއިޚް، ސަބާ ފައިސަލް، އާލިޔާ ޢަލީ އަދި މަރިޔަމް ނޫރް ހިމެނެއެވެ.

“ތަޤްދީރް” ގައި ކިޔައިދޭނީ މުއްސަނދި އާއިލާއެއްގެ ޒުވާން އަންހެންކުއްޖަކަށް އާދައިގެ ފިރިހެނަކުދެކެ ލޯބިވެވިގެން ކުރާ ކައިވެންޏަށްފަހު އެ އަންހެންކުއްޖާގެ ދިރިއުޅުމުގައި ދިމާވާ ގޮންޖެހުންތަކުގެ ވާހަކައެވެ. މި ޑްރާމާގައި ލޯތްބާއި ހިތް ހަލާކުވާފަދަ ހިތާމަވެރި އެތައް ހާދިސާއެއްވެސް ދައްކުވައިދޭނެ ކަމަށް ޚަބަރުތައް ބުނެއެވެ.

ބިގްބޭންގް އެންޓަޓެއިންމެންޓްގެ ކުޑައިގެ ދަށުން ޑރ. ޢަލީ ކަޒްމީ އާއި ފަހަދު މުސްތަފާ ޕްރޮޑިއުސްކޮށް ގެނެސްދޭ “ތަޤްދީރް” އަކީ ޑޯރވޭ އެންޓަޓެއިންމެންޓުން ލިޔެދީފައިވާ ޑްރާމާއެކެވެ. ޑްރާމާ ޑައިރެކްޓްކުރީ “ރަބް ރާޒީ (2016)”، “ބަދްނާމް (2017)”، “ސަރާބް (2020)” އަދި “ބީބާކް (2021)” ފަދަ ހިތްގައިމު ޑްރާމާތަކެއް ގެނެސްދީފައިވާ ޑައިރެކްޓަރ މުހްސިން ތައްލަތުއެވެ.

ރޭ (10 އޮކްޓޯބަރ) ގައި އޭއާރްވައި ޑިޖިޓަލްއިން “ތަޤްދީރް” ދައްކަން ފެށިއިރު، ޑްރާމާގެ އާ އެޕިސޯޑްތައް ގެނެސްދޭން ނިންމާފައިވަނީ ހަފުތާގެ ހޯމައިން ބުރާސްފައްޗަށް ކޮންމެ ރެޔަކު ރާއްޖެ ގަޑިން 21:00 ގައެވެ. މީގެ އިތުރުން އޭއާރްވައި ޑިޖިޓަލްގެ ރަސްމީ ޔޫޓިއުބް ޗެނަލުންވެސް މި ޑްރާމާގެ އެޕިސޯޑްތައް ބަލައިލެވެން ހުންނާނެކަން ފާހަގަކޮށްލެވެއެވެ.

ސާމީގެ ފާހަގަކޮށްލެވޭ އިތުރު ޑްރާމާތަކުގެ ތެރޭގައި “ސަބްޒް ޕަރީ ލާލް ކަބޫތަރް (2012)”، “ދާނީ (2016)”، “އިންކާރް (2019)”، “އިޝްޤް ޒަހެނަސީބް (2019)”، “ސަރާބް (2020)” އަދި “ދިލް ޒާރް ޒާރް (2022)” ހިމެނެއެވެ. އަދި އެންމެ ފަހުން ޑްރާމާ “ބޭބަސީ (2021)” އިން ފެނިގެންދިޔަ އަލީޒޭގެ ފާހަގަކޮށްލެވޭ ޑްރާމާތަކުގެ ތެރޭގައި “ދަލްދަލް (2017)”، “އިޝްޤް ތަމާޝާ (2018)” އަދި “އެހްދޭ ވަފާ (2019)” ފަދަ ޑްރާމާތައް ހިމެނެއެވެ.

މިއަހަރުގެ މިހާތަނަށް 4 ޑްރާމާއަކުން ފެނިގެން ގޮސްފައިވާ ސާމީ، އަންނަ ނޮވެމްބަރު މަހު ދައްކަން ތައްޔާރުވަމުން އަންނަ “މޮހައްބަތު ކީ އާޚްރީ ކަހާނީ” އިންވެސް ފެނިގެންދާނެއެވެ. އެއީވެސް އަލީޒޭ އާއެކު ސާމީ ލީޑުން ފެނިގެންދާ ޑްރާމާއެއްކަން ފާހަގަކޮށްލެވެއެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: