އަންހެން ކުއްޖެއްގެ މަރުގެ ޙަގީގަތް ހޯދުމަށް ފުލުހުންގެ ޓީމަކުން ކުރާ އިންވެސްޓިގޭޝަން އެއް ދައްކުވައިދޭ ތުރިއްލާ ފިލްމު ‘ދެވަންސޫރަ’ މިރޭ (17 ފެބްރުއަރީ 2018 ދުވަހުގެ ރޭ) ބ. ތުޅާދޫ އެމްޑީޕީ ހަރުގޭގައި ރަށު ރައްޔިތުންނަށް އާއްމުކޮށް ހުޅުވާލައިގެން ދެއްކުމަށް ތައްޔާރުވެއްޖެ އެވެ.

މަޝްހޫރު އެކްޓަރ/ޑައިރެކްޓަރ އަދި ސްކްރީން ރައިޓަރ ޔޫސުފް ޝަފީޢު (ޔޫއްޕެ) ގެ ސްކްރީންޕްލޭ އަކަށް ތައްޔާރުކޮށްފައިވާ ފިލްމު ‘ދެވަންސޫރަ’ ފެބްރުއަރީ 06 ގައި ރިލީޒް ކުރެވުނު ފަހުން އަތޮޅުތެރޭ ރަށްރަށުގައި އަންނަނީ ދައްކަމުންނެވެ. ނަމަވެސް ބ. ތުޅާދޫ ގައި ‘ދެވަންސޫރަ’ ދެއްކުން މިވަނީ ވަރަށް ތަފާތު ކޮށްލާފައެވެ.

ތުޅާދޫ ރަށުކައުންސިލް މެންބަރެއް މުނިއަވަސް އަށް ވިދާޅުވީ މި ހަރަކާތަކީ ތުޅާދޫ އެމްޑީޕީ ގެ ފަރާތުން، ގުޅިފައިވާ ސިޔާސީ ޕާޓީތަކާއިއެކު، ރަށުގެ ރައްޔިތުންނަށް އާއްމުކޮށް ހިންގާ މުނިފޫހިފިލުވުގެ ހަރަކާތެއް ކަމަށެވެ. މީގެ އިތުރަށް ފިލްމުގެ ޕްރޮޑިއުސަރުންނަށް ދައްކަން ޖެހޭ ފައިސާ އެއް ދައްކައިގެން ރަށުގެ ރައްޔިތުންނަށް އެއްވެސް އަގަކާއި ނުލައި ފިލްމު ބަލައިލުމަށް މި ހިންގާ ހަރަކާތަކީ އެރަށުގައި ގުޅިފައިވާ ޕާޓީތަކުން ހިންގާ ހަރަކާތްތަކަށް އިތުރުކޮށްލެވުނު ކަމެއް ކަމަށެވެ.

ފިލްމު ‘ދެވަންސޫރަ’ އިގެ ޕްރޮޑިއުސަރ އަހްމަދު ޝާހް ބުނީ ތުޅާދޫ އެމްޑީޕީ އާއި ގުޅިފައިވާ ޕާޓީތަކުން އިންތިޒާމުކޮށްގެން ތުޅާދޫ އެންމެންނަށް ހިލޭ ފިލްމު ބަލައިލުމުގެ ފުރުސަތު ދިނުމަށް ނިންމާފައި ވާކަމަށެވެ. އެގޮތުން މިރޭ 0900 ގައި ތުޅާދޫ އެމްޑީޕީ ހަރުގޭގައި ފިލްމު ދެއްކުމަށް ހަމަޖެހިފައިވަނީ ފިލްމުގެ ޕްރޮޑިއުސަރުންނަށް ގެއްލުމެއް ނުވާނޭގޮތަކަށް، އެ ރަށުގެ ރައްޔިތުންނަށް އާއްމުކޮށް ހުޅުވާލައިގެން ކަމަށެވެ.

ދެވަންސޫރަ ޕްރޮޑިއުސަރުން ބުނީ މި ފުރުސަތަކީ ރާއްޖޭގެ ކޮންމެ ރަށެއްގެ، ކޮންމެ ސިޔާސީ ޕާޓީ އަކަށްވެސް ހުޅުވާލެވިފައިވާ ފުތުސަތެއް ކަމަށެވެ.

މަޢުލޫމާތު ލިބިފައިވާގޮތުން ރާއްޖޭގައި އުފައްދާފައިވާ ފީޗާ ފިލްމެއް، އެ ފިލްމު ރިލީޒް ކުރިތާ ވަރަށް ކުޑަދުވަސްކޮޅެއްގެ ތެރޭގައި ރަށެއްގެ އާއްމު ރައްޔިތުންނަށް އޯޕަންކޮށް ހުޅުވާލައިގެން ދައްކާ މިއީ ފުރަތަމަ ފަހަރެވެ.

ލިޔުންތެރިޔާގެ ފުރަމަލަ

ޢަލީ އަޖްވާން
އަޖްވާން އެންމެ ޝަޢުޤުވެރިވަނީ ފިލްމީ އަދި މިއުޒިކީ ޚަބަރާއި މަޢުލޫމާތު ގެނެސްދިނުމަށެވެ.

ގުޅުންހުރި ލިޔުން: