ވިހޭގޭތެރޭގައި މައިމީހާގެ އެންމެ ގާތް އެކުވެރިޔާއޭ ލިޔެ، މިފަދަ ފޮޓޯއެއް ހިއްސާ ކުރުމުން، ދައްކާން މިއުޅެނީ ކޮންވާހަކައެއް ކަން އަދުގެ ޖީލަށް ނޭނގުމަކީ ދުރުކަމެއް ނޫނެވެ. ސަބަބުތައް ގިނަވެފައި ދިވެހީން މިއަދު ތިބި ހާލަތު ވެސް ތަފާތެވެ. ދިވެހި ކާބަފައިންގެ ޒަމާނަކީ ދަނޑިފަނުން ގެދޮރު އަޅައި ނުހަނު ސާދާ ދިރިއުޅުމެއް އުޅެފައިވާ ޒަމާނެކެވެ. ގިނަ ރަށްތަކުގައި ކޮންމެ ގެއަކަށް ފެންވަޅެއް ނުހުރެއެވެ. އެޒަމާނަށް ބަލާއިރު މާޅެންދޫ ފަދަ ވިއްސަކަށް ގޭބިސީ ހުރި ރަށެއްގައި ނަމަ، މުޅި އާބާދީގެ ޒަރޫރީ ބޭނުންތައް ފުއްދުމަށް ޖުމްލަ ގޮތެއްގައި ހުރިިކަމަށް ވަނީ ހައެއްކަ ފެންވަޅެވެ. އެޖީލަކީ ދިވެހި ޤައުމު ދުށް އެންމެ އެކުވެރި ޖީލު ކަމީ ހިތުގައި އެއްވެސް ޝައްކެއް ހިނގާ ކަމެއް ނޫނެވެ. އެދުވަހުގެ މުޖުތަމަޢުއަކީ އިޖުތިމާޢީ ގުޅުން ވަރުގަދަ އެއްއާއިލާއެއްގެ ގޮތުގައި އޮތް ބަދަހި މުޖުތަމަޢުއެކެވެ. އެއީ ޖެހިގެން ހުރި ބަދިގޭން އައިމިނަ ބަތްތަވާގެ ފޫކަހާލާ އަޑުއިވުމުން، އެއަޑުއެހި ދޮންކަމަނަ ބަތްކަނހަބެއް ގެންގޮސްދިން ފަޚުރުވެރި ޖީލެކެވެ.

އަދުގެ ތަރައްގީ މިވަނީ ދުނިޔެ މިހާތަނަށް ނުދެކޭހާ ބަދަލުތައް ނެސްދީފައެވެ. އެތަރައްޤީގައި މިކުޑަކުޑަ ދިވެހިރާއްޖެ ހުރިހާ ރޮނގަކުން މިދަނީ އަރާ ފައިހަމަ ކުރަމުންނެވެ. އަދުގެ ވިހޭގެތަކުގައި އަލަގަނޑާއި، ތުޅާއެއް ނުހުންނާނެއެވެ. ބަދަލުގައި ހުރީ ވެޓްޓިޝޫ އާއި، ތަފާތު ބޭބީސެޓުތަކެވެ. ތުއްތު ދަރިފުޅު ސާފުކުރުމަށާއި، ފެންވެރުވުމަށް، ބޭނުންކުރާ ތަފާތު އާލާތްތަކާއި، އެކި އެކި ވަސީލަތްތަކެވެ.

މިމައުޟޫގައި ކުޑަނަމަވެސް ތަޢާރަފެއް މިހާރު ލިބިފައި ވާނެކަމަށް އުންމީދު ކުރަމެވެ. އެހެންވީމާ ދެން މިހާހިސާބުން އަލަގަނޑަކީ، އަދި ތުޅާ އަކީ ކޮންއެއްޗެއްތޯ ބަލާލަމާތޯއެވެ. އަދި ކާބަފައިން މިތަކެތިން ހިފައިއުޅުނީ ކޮންބޭނުމެއްތޯ ބަލާލަމާތޯއެވެ.

މީގެ ފަންސާހަކަށް ފަސްދޮޅަހަކަށް އަހަރުގެ ކުރިއަށް ޖެހިލާނަމެވެ. އެޒަމާނުގައި ކާބަފައިންގެ ޤަބޫލުކުރުންތަކާއި، އާދަކާދަ އޮތްގޮތުން އަންހެނަކު މާބަނޑުވެ ބަނޑަށް ހަތްމަސް ފުރުމުން އެކަމަށްޓަކާ ވާ ތައްޔާރީތަކާއި، ވިހެއުމުގެ ތެރޭގައި ހިނގާ އެންމެހާ މަރުހަލާތަކާ، އަދި ވިހެއުމަށްފަހު ހަތަރުމަސް ނުވަތަ ފަސްމަސް ވަންދެން ހިނގާ އެންމެހާ މަރުހަލާތަކަށް ކިޔާ އުޅުނީ، ވިހޭގޭގެރޭގާ ހިނގާ ކަންކަމުގެ ގޮތުގައެވެ. ނުވަތަ ވިހޭގެއަށް ތައްޔާރުވުމަށް ކުރި ކަންކަމުގެ ގޮތުގައެވެ.

އަލަގަނޑާއި ތުޅާއަކީ ވިހޭގޭތެރޭގައި އެޒަމާނުގެ މައިންގެ އެންމެ ގާތް އެކުވެރިޔާއޭ ދެންނެވުމަކީ ޙައްޤު ބަހެއް ކަމުގައި އަޅުގަނޑު ދެކެމެވެ. އަލަގަނޑަކީ ވިހޭގޭތެރޭގައި މައިމީހާއާއި ކުޑަ ދަރިފުޅު ފެންވަރުވާ ސާފުކުރުމަށްޓަކާ އުތުރުއެނދާއި ދެކުނުއެދާއި ދެމެދު އޮންނަ ހުސްހާޖަ ނުވަތަ ދެއެނދު ދޭތެރޭގައި ފެންއަޅާފައި ބަހައްޓާ އެއްޗެކެވެ. އަލަގަނޑެއް ނެތްހާލަތުގައި ބަހައްޓާ އުޅުނީ ރުނބައެކެވެ. ތުޅާއަކީ އަލަގަނޑުން ނުވަތަ ރުބައިން ފެންނެގުމާއި، ފެންވެރުވުމަށް ދާންޏެއްގެ ގޮތުގައި ބޭނުންކުރި އެއްޗެކެވެ. އެދުވަސްވަރުގެ އާދަކާދަ އޮންނަ ގޮތުން ވިހޭގޭތެރޭން ދަރިފުޅު ބޭރަށްލައި އުޅުނީ ހަތްދުވަސް ވުމުންނެވެ. އަދި މައިމީހާ ބޭރަށްލައި އުޅުނީ ތިންދުވަހާއި ނުވަދުވަހާއި ދެމެދުގެ މުއްދަތެއްގައި ކަމަށްވެއެވެ.

މައިމީހާވެސް އަދި ދަރިފުޅުވެސް ބޭރަށް ލުމަކީ ވަރަށް ޚާއްސަ އިހުތިފާލެކެވެ. ކޮންމެ ރަށެއްގައިމެ އެކަން ކޮށްއުޅުނީ އެކަމަށް ޚާއްސަ ވެފައި ހުންނަ އެދުރެކެވެ. މިކަންހިނގަނީ ރައްކާތެރިކަމުގެ ގޮތުން ކިޔަވާ ތަފާތު ކިޔެވެލި ތަކާއެކު ކަމަށް ވެއެވެ. ބޭރަށްލުމާ ދެމެދު ހިނގާ މުއްދަތުގައި މުޅިންވެސް ބޭނުންކޮށް އުޅެނީ އަލަގަނޑުގައި ހުންނަ ފެންކަމަށް ވެއެވެ. އަދި އަލަގަނޑަށް ފެންއެޅުމުގައި ވެސް ކާބަފައިން އުޅުނީ ޚާއްސަ ޤަވާއިދަކަށް ތަބާވެގެންނެވެ. އެގޮތުން އަލަގަނޑަށް އަޅަން ގިފިލި ވަޅުން ނުވަތަ އެނޫންވެސް ވަޅަކުން ފެންގެނެސް ފެންއަޅާ އުޅުނީ އިރުއޮއްސުމުގެ ކުރިން އޮންނަ ވަގުތުގައެވެ.

ކަންމިހެން ހުރުމާއި އެކު އަލަގަނޑާ، ތުޅާ ވެފައިވަނީ ވިހޭގޭތެރޭގައި މައިމީހާގެ އެންމެގާތް އެކުވެރިޔާ އަށެވެ. ރޭގަނޑު ދަންވަރެއްގައި ދަރިފުޅު ރޯނަމަ ހޭހަންކުރުމަށް ވެސް އަލަގަނޑުން ދެތިން ފެންތުޅާ ނަގާ ދަރިފުޅު ފެންވަރުވާ ހޭހަންކުރުވައެވެ. ދުވާލުގެ ގަދަހޫނުން ދަރިފުޅު އުދާސްވެ އުނދަގޫވާ ވަގުތު ތަކުގައިވެސް ކަންކުރަނީ ވެސް ހަމަ މިބީދައިންނެވެ. ކާބަފައިންގެ ރިވެތި ސާދާ ދިރިއުޅުމުގެ ކޮންމެ ކަމެއްވެސް ވަނީ އެބައިމީހުންގެ ދިރިއުޅުމުގައި ހުރި ތަރުތީބުތަކާއި ރިވެތި އަޚުލާގުން ޒީނަތްތެރި ވެފައެވެ. އެއީ އެއްބައިވަންތަކަމުގެ ޖީލެކެވެ. އެއީ މިރާއްޖެ ދުށް މަސައްކަތްތެރިކަމުގެ ޖީލެވެ. އެއީ މިރާއްޖެ ދުށް ނަމޫނާ ޖީލެވެ.

ނޯޓް: މިފޮޓޯއިން ތިޔަ ފެންނަ އަލަގަނޑާ ތުޅާއަކީ ނ. މާޅެންދޫ ހޮޅިގޯތި، ނުވަތަ ނިވާދަށުގޭގައި ބޭނުންކުރި އަލަގަނޑާ ތުޅާއެވެ. ނ. މާޅެންދޫ ހޮޅިގެއަކީ އަޅުގަނޑުގެ ކާބަފައިން ވެސް އެގެއަކަށް ނިސްބަތްވި ޝަރަފްވެރިގެއެވެ. އަދި މިގެއަކީ އަދުގެ ޒުވާން ޖީލަށް ކާބަފައިންގެ މަސައްކަތްތެރިކަމާއި، ގެދޮރު އެޅުމުގެ ވައްޓަފާޅި ދައްކުވައިދިން މާޅެންދޫގައި ހުރި މިފަދަ އެންމެ ފަހުގެ އަސާރެވެ. މިގެއަކީ ރުށްވަކަރާއި ބަނބުކެޔޮފިލާ، އަދި ދަނޑިފަނުން ގާފޮޅުމަތީގައި ބަހައްޓާފައިވާ ހުރި ދުވަސްވީ މުހިންމު އަސަރެކެވެ. އެތެރޭގެ ބިތްތައް ހަދާފައިވަނީ ދުނބުރި ދަނޑިން ގާތާ އެމުނިފައިވާ ރީތި ހާރެއް ފަދައިންނެވެ. ހޮޅިގޯތި ނުވަތަ ނިވާއިދަށުގެ ރޫޅާލާފައި ވަނީ 24 ޑިސެމްބަރު 2022 ވަނަދުވަހުގެ ހެނދުނު ނުވަގަޑި ތިރީހާއި މެންދުރު 11:00 އާއި ދެމެދުގައެވެ. އެވަގުތު ވެގެންދިޔައީ ވަރަށްވެސް ފުންއަސަރުތަކެއް ކުރުވި ވަގުތަކަށެވެ. ނަމަވެސް ޤަބޫލުކުރަން މަޖުބޫރުވި ޙަގީގަތަކީ ދިރިއުޅުމުގެ ވައްޓަފާޅިއަށް އަންނަ ބަދަލުތަކާއެކު ކުރިއަށް ފުރުޞަތު އޮތުމަކީ ކޮންމެ މީހަކަށްމެ ލިބިގެންވާ ޙައްޤެއް ކަމެވެ. މިފަދަ އާސާރީ އެތައް އާލާތެއް ރައްކާތެރިކަމާއެކު އަދިވެސް ބަހައްޓައިގެން އުޅޭކަމީ ބަކުރުބެއަށާއި، ހޮޅިގޯތިގެ އެންމެހާ ބޭފުޅުންނަށް ޝުކުރު ހައްގު ކަމެކެވެ. (މިފަދަ މުހިންމު އާސާރެއް، މިއަދުގެ ޖީލަށް ފެންނާނެ މަގު ފަހިކޮށްދެއްވައިފައިވާތީ، ހޮޅިގޯތިގެ ޢާއިލާއަށް ހިތުގެ އިޚުލާސްތެރި ލޯތްބާއި ޝުކުރު ދަންނަވަމެވެ.)

(.ތާރީޚީ ގޮތުންނާއި، ސަޤާފީ ގޮތުން އަޅުގަނޑު ހިއްސާކުރާ ކޮންމެ މައުލޫމާތަކީ، އެތައް ބަޔަކާ ބައްދަލުކޮށް، ކިތަންމެ ބަޔަކާއި ވާހަކަދައްކާ، އެތައް އޯޑިއޯ އަކާއި ކިތަންމެ ވީޑިއޯއެއް ރެކޯޑް ކުރުމަށް ފަހު އޭގެ މައްޗަށް ހިއްސާކުރާ މަޢުލޫމާތުތަކެކެވެ. އަޅުގަނޑުގެ ނެތް މައުލޫމާތެއް އެހެން ބޭފުޅެއްގެ ހުރުމަކީ އަޅުގަނޑުގެ މަޢުލޫމާތުގެ އުނިކަމެއް ކަމުގައި ނުދެކެމެވެ. އަދި އަޅުގަނޑުގެ ހުރި މައުލޫމާތެއް އެހެން ބޭފުޅެއްގެ ނެތުމަކީ އެބޭފުޅެއްގެ މައުލޫމާތުގެ އުނިކަމެއް ކަމުގައި ނުދެކެމެވެ.)

 

ލިޔެ ލިޔުއް ފޮނުއްވީ: ✍️އަކޫ

ލިޔުން ނެގީ: ހުވާސް ފޭސްބްކްޕޭޖް

ލިޔުންތެރިޔާގެ ފުރަމަލަ

ރަން ގަލަން
ރަން ގަލަން
މުހިންމު ބޭނުންތެރި ލިޔުންތައް އެކިއެކި ވަޞީލަތް ތަކުން ނަގައިގެން، ލިޔުމުގެ އަސްލު މުސައްނިފް ލިޔުއްވި ލިޔުމެއްކަން އެނގޭ ގޮތަށް 'ރަން ގަލަން' ޕޯސްޓް ކުރާނެ އެވެ.

ގުޅުންހުރި ލިޔުން: