އައިފޯނެއް ނުވަތަ ކެމެރާ ފީޗާތައް ރަނގަޅު އެހެން ބްރޭނޑެއްގެ ފޯނެއް ހިފައިގެން އަހަރުމެން ވީޑިއޯއެއް ނަގަން އުޅުމުން މީހުން ހަޖޫޖަހައެވެ. ދިވެހީން ދިވެހީންނަށް ވަނީ މިހެންވެގެން ކަމަށްވެސް ވެދާނެ އެވެ. ނަމަވެސް ހޮލީވުޑާއި ބޮލީވުޑްގައި ފޯނު ބޭނުންކޮށްގެން ފިލްމު ޝޫޓްކުރުން މިއީ ފެންނަ ކަމެކެވެ.

ދާދިފަހުން ބޮލީވުޑްގެ މަޝްހޫރު ޑައިރެކްޓަރ ވިޝާލް ބަރަދްވާޖް ވަނީ އައިފޯން 14 ޕްރޯއެއް ބޭނުންކޮށްގެން 30 މިނެޓްގެ ކުރު ފިލްމެއް ޝޫޓްކޮށް ރިލީޒްކޮށްފަ އެވެ. ފިލްމު “ފުރްސަތު”ގެ ހުރިހައި މަންޒަރެއް ވެސް ޝޫޓްކުރީ އައިފޯނު ބޭނުންކޮށްގެންނެވެ. މިއުޒިކަލް ލަވް ސްޓޯރީ “ފުރްސަތު” ޝޫޓްކުރުމުގައި އައިފޯނުގެ އެންމެ ފަހުގެ ވާޝަންގައި ހިމެނޭ ޝައުޤުވެރި ފީޗާތައް ކަމަށްވާ އެކްޝަން މޯޑް އަދި ސިނެމެޓިކް މޯޑް ބޭނުންކޮށްފައިވެ އެވެ.

ފިލްމު “ފުރްސަތު”ގެ ލީޑްގައި ހަރަކާތްތެރިވަނީ ފިލްމު “ދަޅަކް”އިން ތަޢާރަފުވި އިޝާންގެ އިތުރުން ވެބް ސީރީޒްތައް ކަމަށް “ގްރަހަން”، “މައީ”އިން ފެނިގެންދިޔަ ވަމީގާ ގައްބީ އެވެ. ފިލްމުގެ ޑައިރެކްޓަރ އޮފް ފޮޓޯގްރަފީ ހެދީ ސްވަޕްނިލް ސޮނަވާނޭ އެވެ.

މި ފިލްމުގައި ކިޔައިދެނީ އާކިއޮލޮޖިސްޓް ނިޝާން އަށް މުސްތަޤުބަލުގައި ވާންހުރި ކަންކަން ބަލައިލެވޭކަހަލަ ޤަދީމީ އާލާތެއް ފެނި އެ ބޭނުންކޮށްގެން ކުރިމަގުގައި ހިނގާންހުރި ކަންކަން ނިމުތުކުރުމާއި އެކަން ކުރުމުގައި ކުރިމަތިވާ ކަންތައްތަކެކެވެ.

އައިފޯން 14 ޕްރޯގެ އެކްޝަން މޯޑް ބޭނުންކޮށްގެން އެއްވެސް ވަރެއްގެ ގުޑުމެއް ނުހުންނަ ގޮތަށް އޮމާން މަންޒަރުތައް ޝޫޓްކުރެވެއެވެ. މިއީ ދުވާ މަންޒަރުތަކާއި އެކްޝަން މަންޒަރުތައް ނެގުމުގައިވެސް ބޭނުންކޮށްލަން ސަޅި ފީޗާއެކެވެ. ސިނެމެޓިކް މޯޑް ބޭނުންކޮށްގެން 4ކޭ ކޮލިޓީގައި ޝޫޓްކޮށްލެވެ އެވެ. މީގެ އިތުރުންވެސް، ފިލްމެއްގެ މަންޒަރުތައް ނެގުމަށް ބޭނުންވާ އެތަކެއް ޚާއްޞަ ކަންތައްތަކެއް މި މޯޑުގައި ހުރެއެވެ. ސިނެމެޓިކް މޯޑް ބޭނުންކޮށްގެން ޑޮލްބީ ވިޒަން އެޗްޑީއާރްކޮށް މަންޒަރު ނެގެއެވެ.

މީގެ އިތުރުން އެހާ އަލި ނޫން ތަންތައް ޝޫޓްކުރުމަށް މެކްރޯ މޯޑް ބޭނުންކޮށްގެން ތިންގުނަ ސަޅިކޮށް މަންޒަރު ނެގެއެވެ. އޭގައި ހުންނަ 48 މެގަ ޕިކްސެލް ކްއާޑް-ޕިކްސެލް ސެންސަރ އަކީވެސް މުހިންމު ދައުރެއް އަދާކުރާ ފީޗާއެކެވެ.

“ފިލްމު ނަގަން ބޭނުންމިކުރާ އާދައިގެ ކެމެރާ ބޭނުންކުރުމަށް 10 މީހުން، ތިން އެޓެންޑެންޓުން އަދި 10 ފޮށި ލެންސް ހިފައިގެން އުޅެން ޖެހޭތީ އެހާ ހަލިކޮށް ނޫޅެވޭ. ނަމަވެސް އައިފޯނު ބޭނުންކޮށްގެން އެ ހުރިހައި ކަމަކުން ލުއި ލިބުނު. އަހަރެން އެންމެ ސަޕްރައިޒްވީ އެކްޝަން މޯޑާއި މެދުގަ. ފިލްމު ‘ފުރްސަތު’ގަ އެތަަކެއް ބައިވަރު އެކްޝަން މޯޑްތަކެއް ހުންނާނެ. ފިލްމުގެ ރޯ-ފުޓޭޖްތައް ފެނިއްޖެއްޔާ ފާހަގަވާނެ އެތަކެއް ލޮޮޅުންތަކެއް ހުންނަ މަންޒަރުތަކެއް. އެކްޝަން މޯޑްގަ މަންޒަރުތައް ވަރަށް އޮމާން. މިކަން ޤަބޫލުކުރުމަށް ފިލްމު ބަލައިލަން އެބަ ޖެހޭ.” ވިޝާލް ބަރަދްވާޖްގެ ފިލްމު ރިލީޒްކުރަމުން އޭނާ ބުންޏެވެ.

ފިލްމު “ފުރްސަތު” ޔޫޓިއުބުން ބަލައިލެވޭނެ އެވެ. މީގެ އިތުރުން ފިލްމު އުފެއްދުމުގެ ވީޑިއޯތައްވެސް އާއްމުކޮށްފައިވެއެވެ.

https://www.youtube.com/watch?v=f1VEks-QQ4Y

https://www.youtube.com/watch?v=svpvEfQ1cp8

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: