ގާތްގަނޑަކަށް ދޮޅުގަޑިއެއްހާ އިރުގެ މަންޑާރިން ބަހުން ކުޅެފައިވާ ފިލްމު “ސާރކަލް ލައިން”އިން ދައްކައިދެނީ ސަބްވޭ ރޭލެއްގައި ދަތުރުކުރަމުން ދިޔަ މީހުންތަކެއްގެ ރޭލު އޭގެ މަންޒިލަށް ނުގޮސް ފަޅުކޮށް ދޫކޮށްލާފައިވާ ޓަނަލަކަށް ވާޞިލުވުމަށްފަހު އެތަނުން ކުރިމަތިވާ ކަންތައްތަކެކެވެ. ގޮތް ނޭނގޭ ބިރުވެރި ފުރޭތައެއް ފަދަ މަޚްލޫޤެއް އެމީހުންނާ ކުރިމަތިލައެވެ. ރޭލުން ދަތުރުކުރި ދެތިން މީހުން ފިޔަވާ ދެން ތިބި އެންމެން މަރާލައެވެ.

ތަފާތު އިމޯޝަންތަކެއް، ތަފާތު ވާހަކަތަކެއް ފެނިގެންދާ މި ފިލްމަކީ ހަމަ ގައިމުވެސް ދިވެހީންނަށް ޚާއްޞަވާންޖެހޭ ފަދަ ފިލްމެކެވެ. ރާއްޖޭގެ ފަންނާނެއްގެ ފަންނުވެރި މަސައްކަތްތަކެއްގެ ހިއްސާއެއް މި ފިލްމުން ފެނިގެންދާތީ އެވެ. ގޭމާއިި ފިލްމުތަކަށް ކްރީޗަރ އަދި ކެރެކްޓަރ ފަރުމާކޮށްދެމުން އަންނަ އަޙްމަދު އަފާޒިލްގެ ހިއްސާ، ފިލްމު “ސާރކަލް ލައިން”އިން ފެންނަނީ ވަރަށް ފުރިހަމަކޮށެވެ.

މިހިސާބުން، މި ފިލްމުގެ ރަސްމީ ޓްރެއިލާ ބަލައިލަމާދޯ އެވެ. އޭގެ ފަހުން އިތުރު ވާހަކަތަކަށް ޖެހިލާނަމެވެ.

މުނިއަަވަސް އިން އަފާޒިލްއާ ވާހަކަދައްކައިލީމެވެ. މާ ގިނަ ވާހަކަތަކެއް ނޫނެވެ. ކުރުކޮށް ފޮނިކޮށް ދެތިން ސުވާލެއް ކޮށްލައިގެން ބޭނުންވާ އޮއްޓަރުހުރި މަޢުލޫމާތު ނެގީމެވެ.

އަފާޒިލަށް މި ފުރުޞަތު ލިބުނީ ކިހިނެއް؟

  2018 ވަނަ އަހަރު އަހަރެން އޮމެންސް ސްޓޫޑިއޯސް (މެލޭޝިއާ)އިން ލީޑް 3ޑީ މޮޑެލަރެއްގެ ގޮތުގައި ވަޒީފާއަށް ނެގީ އެމީހުންގެ ފިލްމު ސާރކަލް ލައިންގައި މަސައްކަތް ކުރުމަށް. ސިންގަޕޫރުގައި ހުންނަ އޮމެންސް ސްޓޫޑިއޯސް އާއި ޓައިޕަން ފިލްމްސް އިން އޭރު ކުރަމުން ދިޔަ މަސައްކަތަކީ ސިންގަޕޫރުގެ ފުރަތަމަ މޮންސްޓާ ފިލްމެއް އުފައްދުމުގެ މަސައްކަތް.

މި ފިލްމަށް އަފާޒިލް ކޮންޓްރިބިއުޓްކުރީ ކިހިނެއް؟ ކިހާވަރަކަށް؟

  އަހަރެންނަށް މުހިންމު ގޮތެއްގައި ޙަވާލުކުރެވުނީ ފިލްމުގައި ދައްކައިދޭ މެއިން ކްރީޗަރ ނުވަތަ މައިގަނޑު މަޚްލޫޤާއި އޭގެ ހެޗްލިންގްސްއަށް (ޅަދަރިންތައް) މޮޑެލިންގ، ޓެކްސްޗަރިންގ އަދި ލޫކް ޑިވެލޮޕްމަންޓް ހެދުމަށް. ލީޑް މޮޑެލަރެއްގެ ގޮތުގައި އަޅުގަނޑުގެ މަސްއޫލިއްޔަތުތަކުގެ ތެރޭގައި ސީޖީ ސުޕަވައިޒަރާއި ގާތުން މަސައްކަތްކޮށް ފިލްމަށް ބޭނުންވާ ކްރީޗާރ މޮޑަލިން ތައްޔާރުކުރުން ހިމެނޭ.

މޮޑެލަރުންގެ ޓީމެއް ލީޑްކޮށްގެން މަސައްކަތްތައް މަތީ ފެންވަރުގެ މިންގަނޑަކަށް ފެތޭގޮތަށް، ބޭނުންވާ ވަގުތަށް ނިންމޭތޯ ބެލުން. ފިލްމުގެ މަސައްކަތްކުރުމާ ގުޅޭގޮތުން ޝޯ ސުޕަވައިޒަރާއި ޕްރޮޑިއުސަރާއި ގަވާއިދުން ގުޅުން ބަދަހިކޮށްގެން ގުޅިގެން މަސައްކަތްކުރުން. އަޅުގަނޑާ ހަވާލުކޮށްފައިވާ ރެެފަރެންސް މެޓީރިއަލް އަދި ކޮންސެޕްޓަށް ބަލައިގެން އަމިއްލަވަންތަ، ޞައްޙަ ޑިޖިޓަލް އެސެޓްތައް އުފެއްދުން އެއީވެސް މިކަމުގެ މުހިންމު ބައެއް.

މިކަމުގަ ކުރިމަތިވި ގޮންޖެހުންތަކަކީ ކޮބާ؟

  މިއީ އަހަރެންގެ ފުރަތަމަ ވީއެފްއެކްސް ފީޗާ ފިލްމު ތަޖުރިބާ. މިއީ އަހަރެންގެ މަސައްކަތުގެ ޓެކްނިކަލް އަދި އާޓިސްޓިކް ދާއިރާއިން ވެސް ވަރަށް ބޮޑު އުނގެނުމުގެ ތަޖުރިބާއެއް ލިބުނު ކަމެއް. އަހަންނަކީ ޓްރޭޑްގެ ގޮތުން 3ޑީ ކެރެކްޓަރ މޮޑެލަރެއް ކަމަށްވެފަ އެ ދާއިރާއަށް ޚާއްޞަ މީހެއް ނަމަވެސް މި ފިލްމު އުފެއްދުމުގެ މަސައްކަތްތަކުގެ އެކި ކަންކަމުގައި ބައިވެރިވުމުގެ ފުރުސަތު ލިބުނު. އެންމެ ގޮންޖެހުން ބޮޑު އެއް ބަޔަކީ އަހަރެންގެ ވަގުތާއި އަހަރެންގެ ޓީމުގެ ވަގުތު މެނޭޖްކޮށްގެން ފިލްމު އުފެއްދި މީހުން ބޭނުންވާ ފެންވަރުގެ މަސައްކަތްތަކެއް ކޮށް ވަގުތަށް ނިންމައިދިނުން.

ނެޓްފްލިކްސްއަށް މިމަހު ފަސްވަނަ ދުވަހު ރިލީޒްކުރި”ސާރކަލް ލައިން” ރާއްޖެ ސަރަޙައްދުން ނެޓްފްލިކްސް ބަލާ މީހުންނަށް ލިބެން ނެތްކަމަށް އަފާޒިލްގެ ޓްވީޓެއްގައި ބުނެފައިވެއެވެ. ނަމަވެސް މުނިއަވަސް އިން އަފާޒިލް އާ ސުވާލުކޮށްލުމުގެ ކުރިން މި ފިލްމު ބަލައިލީމެވެ. ފިލްމުން ފެނިގެންދަނީ ހިތްގައިމު ސަޅި މަސައްކަތެކެވެ. އަފާޒިލްގެ ކްރީޗަރ ވަރަށް ފުރިހަމަ އެވެ. އޭގެ ހެޗްލިންސް ނުވަތަ ޅަދަރިންތައްވެސް ހަމަ އެހާ ސަޅިއެވެ.

އަފާޒިލް ހުރީ އޭނާގެ މަސައްކަތްތައް ދިވެހި ފިލްމުތަކުގައިވެސް ދައްކާލަން ބޭނުންވެފައެވެ. ބިރުވެރި އަދި ސުޕަނެޗްރަލް ފިލްމުތައް ހަދާ ފަރާތްތަކުން ރާއްޖޭގެ ހުނަރުވެރި ފަންނުވެރިއެއްގެ އެހީތެރިކަން ބޭނުންނަނަ އަފާޒިލް ހުރީ އެކަމަށް ތައްޔާރަށް ކަމަށް ބުންޏެވެ.

ރާއްޖޭގެ ފިލްމީ ދާއިރާގެ ފަރާތްތަކަށް އަދި އަފާޒިލްގެ މަސައްކަތުގެ ދާއިރާއާ ގުޅުންހުރި މަސައްކަތްތައް ކޮށްދިނުމަށް ބޭނުންކަމަށް ބުނެފަ އެބަ އޮތް. އެކަމާމެދު އިތުރަށް ބުނެލާނީ ކީކޭ؟

  އެހެން މީހުންނަށް އެއްބާރުލުން ދިނުމަކީ އުފާވާ ކަމެއް. ވީއެފްއެކްސް ނުވަތަ ވީޑިއޯގޭމް ޕްރޮޖެކްޓްތަކަކީ ރާއްޖޭގައި މާ އާންމު ކަމެއް ނޫން ނަމަވެސް، އާ ފުރުސަތުތައް ހޯދުމާއި، އެއްކަހަލަ ޝައުގުވެރިކަމެއް ހުރި މީހުންނާ އެކު މަސައްކަތް ކުރުމަށް އަޅުގަނޑު މިހުރީ ތައްޔާރަށް. މިހާތަނަށް އަޅުގަނޑުގެ ގިނަ ތަޖުރިބާތަކަކީ ރާއްޖެއިން ބޭރުގައި މަސައްކަތް ކުރަމުން ދަނިކޮށް ނުވަތަ ފްރީލާންސް މަސައްކަތްތަކުގެ ތެރެއިން ބައިނަލްއަޤްވާމީ ކްލައިންޓުންނާ އެކުގަ ލިބިފަވާ ތަޖުރިބާތަކެއް.

އިތުރު ކަމަކަށް ފާހަގަކޮށްލަން ބޭނުންވާ ކަމެއް އެބައޮތްތަ؟

 ކެރިއަރެއްގެ ގޮތުން ރާއްޖޭގައި އާޓްގެ މަސައްކަތްކުރުމަކީ ކިހާވަރެއްގެ އުނދަގޫ ކަމެއްކަން ފާހަގަކޮށްލަން ބޭނުން. މި ފަންނުން ކިޔެވުމަށްޓަކައި ފައިސާ ހޯދުމަށް ވަރަށް ދަތިވި. ކިޔެވުމަށް ފައިސާދެއްކުމަށްޓަކައި ލޯނު ނަގަން ޖެހުނު. ކޯހުގެ އަގާއި ގުޅުން ހުރި މިންވަރު ހަޔާ އެޑިއުކޭޝަން މިނިސްޓްރީއަށް ގަބޫލުކޮށްދިނުމަކީ ގޮންޖެހުން ބޮޑު އަދި ބުރަ ކަމެއް ކަމަށް ވެސް ވި.

މީގެ އިތުރުން، މި މަސައްކަތަކީ މިއަދު އާއްމު މަސައްކަތަކަށް ވެފައި ވިޔަސް، ކުރިން ނުލިބޭ ފަދަ ފުރުޞަތުތައް މިހާރު ލިބޭ. އެހެންނަމަވެސް އާޓާ މެދު ދެކޭގޮތަކީ އަދިވެސް ކޮންމެވެސް ވަރަކަށް ނެގެޓިވް އަދި ހޮބީއެއްގެ ގޮތުގައި އަހަރުމެން ކުރާ ކަމެއް ކަމަށް ދެކޭ ގޮތެއް. އެހެންކަމުން ރާއްޖޭގެ އާއްމުންނާ ކުންފުނިތަކުން އާޓްގެ މަސައްކަތަކީވެސް ވިޔަފާރިއެއްގެ ގޮތުން ކުރާ ކަމެއްކަަމަށް ދެކެން ފަށަން އެބަޖެހޭ. ކެރިއަރެއްގެ ގޮތުގައި އާޓް ކުރިއަށް ގެންދަން ބޭނުންވާ ކޮންމެ މީހަކަށް ވެސް ފަސޭހައިން އުނގެނުމުގެ ފުރުޞަތު ލިބޭނެ ގޮތް ހެދުމަކީ މުހިންމު ކަމެއް. އަހަރުމެން އަމިއްލައަށް މި މަގުގައި ދަތުރުކުރަން ދޫކޮށްލުމަކީ ހިތާމަހުރި ކަމެއް. އަހަރުމެން މަސައްކަތް ކުރަންޖެހޭނީ، ޝައުގުވެރިވާ ފަންނާނުންނަށް އެމީހުންގެ ލަނޑުދަނޑިތައް ޙާޞިލުކުރުމަށްޓަކައި ބޭނުންވާ ވަސީލަތްތަކާއި އެހީތެރިކަން ލިބިގެންދާނެ ގޮތަކަށް.

މީގެ އިތުރުން އަހަރެން މިކުރާ މަސައްކަތްތައް އަހަރެންގެ މައިންބަފައިންނަށް އެހާ އަހުލުވެރި ނުވިޔަސް، އެ މީހުންގެ ފަރާތުން ލިބެމުންއަންނަ އެއްބާރުލުން ވަރަށް ޝުކުރުވެރިކަމާއެކު ފާހަގަކޮށްލަން. އެމީހުންނަކީ ވަރަށް އަންޑަސްޓޭންޑިންގ އަދި ވަރަށް ހިތްވަރުދެމުން އަންނަ ބައެއް. އަހަންނަށް އެމީހުން ލިބުމަކީ ލިބުނު ނިޢުމަތެއް.

އަދި އެންމެ ފަހު ކަމަކަށް ފާހަގަކޮށްލަން ބޭނުންވަނީ އަހަރެންގެ ދިރިއުޅުމުގައި އަބަދުވެސް އަލިކަމުގެ ދޯއްޖެއްގެ ގޮތުގައި ހުންނަ އަހަރެންގެ އަންހެނުންނަށް ވެސް ބޮޑު ޝައުޓްއައުޓެއް ދޭން ބޭނުމޭ.

ނިންމާލަމުން އަފާޒިލް ތި ފާހަގަކޮށްލީ ސަޅި ތައްކޮޅެކެވެ. އަހަރުމެން ކުރާ މަސައްކަތުގެ ކާމިޔާބިގެ ފަހަތުގައި އަބަދުވެސް ތިބޭ ބަޔަކީ މައިން ބަފައިންނެވެ. އަނބިދަރިންނެވެ. ކޮންމެ ކާމިޔާބު ފިރިހެނެއްގެ ފަހަތުގައި އޭނާގެ އަނބިގޮއްޔެ ހުރެޔޭ ބުނާ ބުނުން އަފާޒިލްވެސް ތިއޮތީ ތަކުރާރުކޮށްފައެވެ. އަފާޒިލްގެ އިތުރު މަސައްކަތްތަކާއި ގުޅޭނެ ގޮތްތައް https://www.artstation.com/afazil އަދި https://instagram.com/afaziill/ މިތަނުން ލިބޭނެ އެވެ.

މުނިއަވަސް އަށް މި ފުރުޞަތު ދިންކަމަށްޓަކައި އަފާޒިލްއަށް ވަރަށް ބޮޑަށް ޝުކުރުވެރިވަމެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: