ދިވެހި ފިލްމީ ދާއިރާއަށް 2019 ވަނަ އަހަރު އަރައިގެން އައި އުއްމީދީ ޑައިރެކްޓަރު އިލްޔާސް ވަޙީދުގެ ކާމިޔާބު ފިލްމު “ބަވަތިި” އަށްފަހު، އޭނާގެ ޕްރޮޑަކްޝަން ހައުސް ‘އައި ފިލްމްސް’ އިން މަސައްކަތް ނިންމާފައިވާ އެ ޕްރޮޑަކްޝަންގެ ދެވަނަ ފީޗާ ފިލްމު “ނީނާ“ ވެގެންދާނީ މިއަހަރު އޮލިމްޕަހުގައި އަޅުވަން ހުރި ފިލްމުތަކުގެ ތެރެއިން ވަރުގަދަ ފިލްމަކަށެވެ. ފަހަރުގައި މިއީ މި އަހަރު އަޅުވާނެ އެންމެ ވަރުގަދަ އަދި އެހާމެ ތަފާތު ފިލްމަށް ވެގެންދިއުމަކީވެސް ހަމަ ވަރަށް ގާތް ކަމެކެވެ.
ފިލްމު “ނީނާ“ގެ ފަސްޓްކަޓް އެޑިޓިންގެ ބައެއް މަންޒަރުތައް ބަލައިލުމުގެ ފުރުޞަތާއި ފިލްމުގެ ޝޫޓިންތައް ގާތުން ބަލައިލުމުގެ ފުރުޞަތު ލިބިފައިވުމުން މި ފިލްމުން ފެންނާނެ ފައިޓް ސީންތަކާމެދު ކުރެވޭ އުއްމީދު ވަަރަށްވެސް ބޮޑެވެ. މީގެ އިތުރުން މި ފިލްމަށްޓަކައި ފިލްމުގެ ލީޑުން ފެނިގެންދާނެ ނުޒުހަަތު ޝުޢައިބް (ނުޒޫ) އަދި މުހިންމު އެހެން ރޯލަކުން ފެނިގެންދާނެ ހަމްދޫން ފާރޫޤް (އައްކި) މި ފިލްމަށްޓަކައި ކޮށްފައިވާ ބުރަ މަސައްކަތްތައް ދައްކުވައިދޭ ވީޑިއޯ ބަލައިލުމުން އެކަން އަދި މާރަނގަޅަށްވެސް ސާފުވެއެވެ.
އައިފިލްމްސްގެ ޔޫޓިއުބް ޗެނަލް މެދުވެރިކޮށް މިމަހު 07ވަނަ ދުވަހު އާއްމުކޮށްފައިވާ “ނީނާ- ޓްރެއިނިންގ އެން މާޝަލް އާޓްސް” ވީޑިއޯ އިން މި ފިލްމުގައި ނުޒޫ އަދި އައްކި ދައްކާނެ ތަފާތު ހުނަރުތަކުގެ ވާހަކަތައް ކިޔައިދެއެވެ. އަދި އެ ހުނަރުތައް ހޯދުމަށްޓަކައި ޕްރޮފެޝަނަލް މީހުންގެ އެހީގައި ހެދި ތަމްރީނުތައްވެސް މި ވީޑިއޯއިން ފެނިގެންދެއެވެ.
“ނީނާ“ގެ މައި ތަރިންގެ ތެރޭގައި “ބަވަތި“ގެ ލީޑުން ހުނަރުވެރި އެކްޓިންއެއް ދެއްކި ނުޒުހަތު ޝުޢައިބް ހިމެނޭއިރު، ފިލްމީ ދާއިރާއަށް އަލަށް ތަޢާރަފުވާ ޝަރަފް ޢަބްދުﷲ، ހުނަރުވެރި ތަރި ޖުމައްޔިލް ނިމާލްގެ އިތުރުން ވެޓަރަންސް އެކްޓްރެސް މަރިޔަމް ރަޝީދާއާއި މަރިޔަމް ޝަކީލާ ހިމެނެއެވެ.
މީގެ އިތުރުން އާދަމް ރިޒްވީ (ރެކްސް)، ނަތާޝާ ޖަލީލް، ޢަލީ އިނާޒް، ފީޗާ ފިލްމަކަށް އަލަށް ތަޢާރަފްވާ ޓިކްޓޮކްގެ މަޝްހޫރު ތަރި އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން (ޝިންޓޭ) އަދި އައިޝާ އަލީ ހިމެނެއެވެ.
“ނީނާ” ލިޔެ ޑައިރެކްޓްކުރީ އިލްޔާސް ވަހީދު (އިއްލެ) އެވެ. ފިލްމުގެ މިއުޒިކް ހެދީ ހުސައިން ތައުފީގެވެ. މޭކަޕް ހަދައިދިނީ ”ބަވަތި“ގައި ފެނިގެންދިޔަ ފުރިހަމަ މޭކަޕްތައް ހެދި އާޓިސްޓް ރުޠުބާ އަޙްމަދު އެވެ.
މި ފިލްމުވެސް ކެމެރާކުރީ ”ބަވަތި“ ކެމެރާކުރި ހުނަރުވެރި ކެމެރާމަން ވިޝާން (ކަނޑި) އެވެ. އެޑިޓިން އާއި ޕޯސްޓް ޕްރޮޑަކްޝަން ހެދީ ”ބަވަތި“ ގައި ވެސް އެ މަސައްކަތްތައް ވަރަށް ފުރިހަމައަށް ކޮށްފައިވާ ’އޯކޭޒް އިންކް‘ އިނެވެ. ވިޝުއަލް ހެދީ އޯކޭޒް އިންކް ގެ ސާމީ އެވެ.
“ނީނާ“ގެ ބޮޑު ބައި ޝޫޓްކޮށްފައިވަނީ ލ. ގަން، މާންދޫ އަދި ކަައްދޫގައެވެ.
ފިލްމު “ނީނާ“ގެވެސް އޮންލައިން މީޑިއާ ޕާޓްނަރަކީ ފިލްމު ”ބަވަތި“ގެ ވެސް އޮންލައިން މީޑިއާ ޕާޓްނަރުކަންކުރި މުނިއަވަސް އެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 9 ނޮވެމްބަރ 2024ޚަބަރު“ދޭދަރު ރުއިން” ގެ ޓިކެޓް ވިއްކަން ފަށައިފި
- 8 ނޮވެމްބަރ 2024ޚަބަރުހިލްމީގެ “ލަމްހާ” ގެ ނަން އާއްމުކޮށްފި
- 6 ނޮވެމްބަރ 2024ޚަބަރު“ދޭދަރު ރުއިން” ޓްރެއިލާއިން އެހެން ޝަރަފެއް
- 1 ނޮވެމްބަރ 2024ޚަބަރުނޫމާއަށް އެކްޓްކުރަން އެންމެ ފަސޭހައީ ކާކާ އެކުގައިބާ؟
