ފިލްމު “ނީނާ“ގެ ލީޑް ނުޒޫގެ ތަފާތު ސިފަތަކެއް ފިލްމުން ފެނިގެންދާނެކަން މީގެ ކުރިން ވަނީ އެނގިފައެވެ. ހަމަ އެހެންމެ “ނީނާ“ގެ ހަޔާތުގެ އެކި ކުލަކުލައިގެ ސަފުހާތަކެއް ފިލްމުން ފެނިގެންދާނެކަން މިމަހު 24 ވަނަ ދުވަހު ރިލީޒްކޮށްފައިވާ ޕޯސްޓަރުން މާ ބޮޑަށްވެސް ސާފުވެއެވެ.

ފިލްމު “ނީނާ“ގެ ރަސްމީ ދެވަނަ ޕޯސްޓަރުން ގިނަ ވާހަކަތަކެއް ކިޔައިދެއެވެ. އެގޮތުން ނީނާގެ ޒަވާޖީ ހަޔާތުގެ ފޮނިމޭވާ އާއެކު، ހިތްގައިމު މާހައުލެއްގައި ފިރިމީހާ އަދި ދަރިފުޅާއެކު ތިބޭތަން ފެނެއެވެ. ޕޯސްޓަރުގެ އެއްފަޅިން މި އުފާވެރި މަންޒަރު ފެންނައިރު، އަނެއް ފަޅިން ފެންނަނީ މުޅިން ތަފާތު “ނީނާ” އެކެވެ. ބޭސްބޯޅަ ދަބައެއް ހިފައިގެން ނީނާ އެހުރީ ލ. މާންދޫގައި އޮންނަ ރީތި ރުއްގަނޑުތެރޭގައެވެ. ރުއްގަނޑު ކިތަންމެ ރީއްޗަށް މި މަންޒަރުން ނީނާ އެހުރީ ހަމަ ގައިމުވެސް އުފާވެރި ގޮތަކަށް ނޫނެވެ. ނީނާގެ މޫނު ނުފެނުނަސް، އޭނާގެ މޫނުން ފެންނަން ހުންނާނީ ރުޅިވެރިކަމާ، ބަދަލުހިފުމުގެ ރޫޙްކަން ޔަޤީންކުރެވެއެވެ. އިނގިރޭސި ބަހުން ބުނާނަމަ ނީނާ އެ ހުރީ ‘ކިލަރ ލުކް’އެއްގަ އެވެ.

ފިލްމު “ނީނާ“އަކީ ވަރުގަދަ އެކްޝަން ސީންތަކެއް ހިމެނޭ ވަރުގަދަ ފިލްމެއްކަން މިހާތަނަށް އާއްމުކޮށްފައިވާ މަންޒަރުތަކުންވެސް އެނގެއެވެ. ފިލްމަށްޓަކައި ނުޒޫ މާޝަލް އާޓްސް ދަސްކުރިކަން ވެސް އޮތީ ހާމަކޮށްފައެވެ. އެހެންކަމުން 06 އޯގަސްޓް 2023ވަނަ ދުވަހުގެ ރެއިން ފެށިގެން އޮލިމްޕަސް ސިނަމާ އާއި ރާއްޖޭގެ ބައެއް ސަރަހައްދުތަކުން “ނީނާ“ގެ ވަރުގަދަކަން ފެނިގެންދާނެ އެވެ. ނީނާއަށްޓަކައި ނުޒޫ ތަޅަން ދަސްކުރީ ކީއްވެގެންކަމާ، ފިލްމުގައި ހިމަނާފައިވާ ތަޅާފޮޅާ މަންޒަރުތަކުގެ ހުރި ކޮލިޓީއެއްވެސް ފެންނާނެއެވެ. އައިފިލްމްސް އިން އުފެއްދި އެ ޕްރޮޑަކްޝަންގެ ފުރަތަމަ ފީޗަރ ފިލްމު “ބަވަތި“އިން ޑައިރެކްޓަރ އިލްޔާސް ވަހީދު (އިއްލެ) ދައްކާލި ހުނަރުވެރިކަން އަނެއްކާވެސް ތަފާތު ފިލްމަކުން ފެނިގެންދާނެ އެވެ.

ތަކުރާރުކޮށް މުނިއަވަސް އިން ރިޕޯޓްކުރަމުން އަންނަ ފަދައިން މިއީ ވަރަށް ތަފާތު ދިވެހި ފިލްމަކަށްވެގެންދާނެ ފިލްމެކެވެ. ފިލްމުގެ ޓީޒާތަކާއި ޓްރެއިލާތައް ނޫސްވެރިންނަށް ދައްކައިލުމަށް ބޭއްވި ޚާއްޞަ އިވެންޓަށް ފަހު މުނިއަވަސްގެ ސީއީއޯ އަޙްމަދު ރަޝީދު (އަންނާރޭ) ބުނީ މިއީ ސުޕަހިޓް ފިލްމަކަށް، މޮޅު ފިލްމަކަށް ވެގެންދާނެކަމާމެދު އެއްވެސް ޝައްކެއް ނެތް ކަމަށެވެ.

މުނިއަވަސް އިން އޮންލައިން މީޑިއާ ޕާޓްނަރުކަން ކުރަމުން އަންނަ ފިލްމު “ނީނާ“އާ މެދު މުނިއަވަސްގެ ފައުންޑަރ އަދި އެޑިޓަރ އަޙްމަދު ރަޝީދު (އަޅުގަނޑު) ވެސް މި ފިލްމަކީ މޮޅު، ވަރުގަދަ، ރީތި ފިލްމަކަށް ވާނެކަމަށް ބުނަން ކެރެނީ ފިލްމުގެ ޝޫޓިން ގާތުން ފެނިފައިވުމާއި ފިލްމުގެ ރަފް އެޑިޓިންގެ ބައެއް މަންޒަރުތައް ފެނިފައިވާތީވެ އެވެ.

ފިލްމު ”ނީނާ”ގެވެސް އޮންލައިން މީޑިއާ ޕާޓްނަރަކީ ފިލްމު ”ބަވަތި“ގެ ވެސް އޮންލައިން މީޑިއާ ޕާޓްނަރުކަންކުރި މުނިއަވަސް އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: