“އަނދަމުންދާ އަލިފާނާ އެކު ލޯބި މަގޭ ހުރި އުނިވެއްޖޭ” – މިއީ މިމަހު 03ވަނަ ދުވަހު އައިފިލްމްސް އިން ދޫކޮށްލި “އަލިފާން” ލަވައިގެ ކުޑަކުޑަ ކަންޏެއްގެ ތަންކޮޅެކެވެ. ލަވައިގެ މާނަ ފުން ޅެމުން ތަންކޮޅެކެވެ. ބޮޑު ތަރުހީބެއް ލިބެމުން އަންނަ “އަލިފާން” މިއީ އައިފިލްމްސް އިން 06 އޯގަސްޓް 2023ގައި ނެރުމަށް ތައްޔާރުވެފައިވާ ވަރުގަދަ އެކްޝަން ފިލްމު “ނީނާ“ގެ ޕްރޮމޯޝަން ލަވައެވެ.

އަބަދުވެސް ތަފާތު އުފެއްދުންތަކެއް ނެރެމުން އަންނަ އައިފިލްމްސްގެ ފިލްމު “ނީނާ“ގެ ޕްރޮމޯޝަން ލަވަ “އަލިފާން” ކިޔާފައި ވަނީ ހިތްގައިމު ލަވަތަކެއް ގެނެސްދެމުން އަންނަ ހުނަރުވެރި ޒުވާން ލަވަކިޔުންތެރިޔާ އަންދަލާ ހަލީމް އެވެ. މިއުޒިކް ހެދީ ރެޕް މިއުޒިކްް އުފެއްދުމުގެ އެންމެ ކުރީ ސަފުގައި އުޅޭ ފަންނާނު މިސްޓީ އެވެ. ލަވައިގެ ލިރިކްސް ހެދީ މި ފިލްމުގެ ޕްރޮޑިއުސަރ/ޑައިރެކްޓަރ އިލްޔާސް ވަހީދު (އިއްލެ) އަދި ޕްރޮޑިއުސަރ އާސިމް ޢަލީ އެވެ. ރާގު ހަދާފައިވަނީ ވެސް އިއްލެ އެވެ.

ލަވަކިޔުންތެރިޔާ އަންދަލާގެ އިތުރުން މި ލަވައިގެ މަންޒަރުތަކުން މިފިލްމުގެ ލީޑު ނުޒުހަތު ޝުއައިބު (ނުޒޫ) ފެނިގެންދެ އެވެ.

🎶…….

އަނދަމުންދާ އަލިފާނާ އެކު ލޯބި މަގޭ ހުރި އުނިވެއްޖޭ
މިތަނުގަވާ ނަފުރަތުގާ އެންމެން އެކީ ފަނާ ވެއްޖޭ
ވިހަޔަށް ހޭނިފަ އިންސާނާ، ނުކުރި މިއަސަރެއް ހިއްސާވާ

ކަނޑުއަޑިޔަށް ދިޔަޔަސް ފީނާ ހޯދާނަން އޮތްތާކުން އޭނާ
ނޫނީ މަށަށް ނުކިޔާނޭ ނީ-ނީ-ނީނާ
ނޫނީ މަށަށް ނުކިޔާނޭ ނީ-ނީ-ނީނާ

…….. 🎶

ޕްރޮމޯޝަން ލަވަ “އަލިފާން“ގައި ކިޔައިދެނީ ނީނާގެ ހިތުގައި އަލިފާނުގެ ހުޅު ރޯވި ސަބަބުތަކާއި އެ އަލިފާނުގެ ސަބަބުން އޭނާގެ ހަޔާތަށް ލިބުނު ގެއްލުންތަކުގެ ބަދަލުހިފުމުގެ ވާހަކައެވެ. އޭނާއަށް ހާލުޖެއްސި މީހާ ކޮންމެ ހިސާބެއްގައި އޮތްނަމަވެސް ހޯދާނެ ވާހަކައާއި އެމީހާ ހޯދައިގެން ބަދަލުނުހިފައިފި ނަމަ ނީނާގެ ނަމަކަށް ނީނާ ނުކިޔާނެ ވާހަކައެވެ.

“ނީނާ“ގެ މުހިންމު ބައިތައް ކުޅެފައިވާ ތަރިންގެ ތެރޭގައި އައިފިލްމްސްގެ ފުރަތަމަ ފިލްމު “ބަވަތި“ގެ ލީޑުން ހުނަރުވެރި އެކްޓިންއެއް ދެއްކި ނުޒުހަތު ޝުޢައިބް ހިމެނޭއިރު، ހުނަރުވެރި އެކްޓިންއެއް ދައްކަމުން އަންނަ ޝަރަފް ޢަބްދުﷲ، ހުނަރުވެރި ތަރި ޖުމައްޔިލް ނިމާލްގެ އިތުރުން ވެޓަރަންސް އެކްޓްރެސް މަރިޔަމް ރަޝީދާއާއި މަރިޔަމް ޝަކީލާ ހިމެނެއެވެ.

މި ފިލްމުގައި ވެޓަރަންސް އެކްޓްރެސް މަރިޔަމް ރަޝީދާ ފެނިގެންދާނީ މީގެ ކުރިން އޭނާ ފެނިފައި ނުވާފަދަ ވަރުގަދަ ކެރެކްޓަރއަކުންނެވެ. މީގެ އިތުރުން ފިލްމު ލިޔެ ޑައިރެކްޓްކޮށްފައިވާ އިލްޔާސް ވަހީދު މީޑިއާތަކަށް ބުނެފައިވަނީ ޝަރަފްގެ އެކްޓިން އެހެން ފިލްމުތަކާ ސީރީޒްތަކުން މިހާތަނަށް ފެނިފައި ވިޔަސް، މި ފިލްމުގައި އޭނާ ދައްކާފައިވާ ވަރުގެ ހުނަރުވެރި މޮޅު އެކްޓިންއެއް އަދި ފެނިފައި ނުވާކަމަށެވެ.

ފިލްމުން ފެނިގެންދާނެ އިތުރު ތަރިންގެ ތެރޭގައި އާދަމް ރިޒްވީ (ރެކްސް)، ނަތާޝާ ޖަލީލް، ޢަލީ އިނާޒް، ފީޗާ ފިލްމަކަށް އަލަށް ތަޢާރަފްވާ ޓިކްޓޮކްގެ މަޝްހޫރު ތަރި އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން (ޝިންޓޭ) އަދި އައިޝާ އަލީ ހިމެނެއެވެ.

“ނީނާ” ލިޔެ ޑައިރެކްޓްކުރީ އިލްޔާސް ވަހީދު (އިއްލެ) އެވެ. ފިލްމުގެ މިއުޒިކް ހެދީ ޝަހީދު ލިގެސީ އެވެ. މޭކަޕް ހަދައިދިނީ ”ބަވަތި“ގައި ފެނިގެންދިޔަ ފުރިހަމަ މޭކަޕްތައް ހެދި އާޓިސްޓް ރުޠުބާ އަޙްމަދު އެވެ. ލަވަތަކުގެ މިއުޒިކް ހުސައިން ތަޢުފީޤް އެވެ. ޕްރޮމޯ ލަވައިގެ މިއުޒިކް ހެދީ މިސްޓީ އެވެ.

މި ފިލްމުވެސް ކެމެރާކުރީ ”ބަވަތި“ ކެމެރާކުރި ހުނަރުވެރި ކެމެރާމަން ވިޝާން (ކަނޑި) އެވެ. އެޑިޓިން އާއި ޕޯސްޓް ޕްރޮޑަކްޝަން ހެދީ ”ބަވަތި“ ގައި ވެސް އެ މަސައްކަތްތައް ވަރަށް ފުރިހަމައަށް ކޮށްފައިވާ ’އޯކޭޒް އިންކް‘ އިނެވެ. ވިޝުއަލް ހެދީ އޯކޭޒް އިންކް ގެ ސާމީ އެވެ.

”ނީނާ”ގެ ބޮޑު ބައި ޝޫޓްކޮށްފައިވަނީ ލ. ގަން، މާންދޫ އަދި ކަައްދޫގައެވެ.

ފިލްމު ”ނީނާ”ގެވެސް އޮންލައިން މީޑިއާ ޕާޓްނަރަކީ ފިލްމު ”ބަވަތި“ގެ ވެސް އޮންލައިން މީޑިއާ ޕާޓްނަރުކަންކުރި މުނިއަވަސް އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: