🎦 ފިލްމު “ނީނާ”ގެ އޮންލައިން މީޑިއާ ޕާޓްނަރަކީ މުނިއަވަސް އޮންލައިން

މިމަހު 06ވަނަ ދުވަހުގެ ރޭ އޮލިމްޕަސް ސިނަމާފައި ޕްރިމިއާކުރާ އައި ފިލްމްސްގެ ދެވަނަ ފީޗާ ފިލްމު “ނީނާ” އަކީ ކޮންމެހެންވެސް ބަލައިލަން ޖެހޭ ފިލްކެވެ. އޭގެ ސަބަބުތައް ބައިވަަރެވެ. ފިލްމު “ޔޫސުފް އެންޑް ޒައިނަބު”، “ލޭކަރުނަ”، “އިތުބާރު” ފަދަ ދިވެހި ފިލްމުތަކުގެ އަންހެން ލީޑް ކުޅުނު މަރިޔަމް ރަޝީދާ މި ފިލްމުން ފެނިގެންދިއުމަކީވެސް ފިލްމު ބަލައިލަން ޖެހޭ ސަބަބެކެވެ.

އެކްޓަރު މުހައްމަދު ރަޝީދު (ދަރާ) އާ އެކު މަގުބޫލު ސްކްރީން ޖޯޑެއްގެ ގޮތުގައި މަޝްހޫރުވެގެން ދިޔަ މަރިޔަމް ރަޝީދާ 30 އަހަރު ފަހުން ފީޗާ ފިލްމެއްގެ މުހިންމު ރޯލަކުން ފެންނާނީ ފިލްމު “ނީނާ” އިންނެވެ. ފިލްމުގެ ލީޑް “ނީނާ”ގެ މަންމަގެ ރޯލު ކުޅުނު މަރްޔަމް ރަޝީދާ އާއި މުނިއަވަސްގެ ފަރާތުން ބައްދަލުކޮށްލައި، މުހިންމު ބައެއް ސުވާލުތައް ކޮށްލީމެވެ.

ފިލްމު “ނީނާ“ގެ ޝޫޓިން ކުރިއަށްދިޔަ އިރު، ސީދާ ސެޓަށްގޮސް މަރިޔަމް ރަޝީދާއާ ވާހަކަދައްކައިލީމެވެ. ވަރަށް ރަހުމަތްތެރި މިޒާޖެއްގެ މަރިޔަމް ރަޝީދާއާ ފުރަތަމަ ފަހަރަށް ބައްދަލުވެވުމުން ދައްކަން ކިތަންމެ ގިނަ ވާހަކައެއް ހުއްޓަސް ސުވާލުތައް އަމާޒުކުރީ މި ފިލްމާބެހޭ ގޮތުންނެވެ. އެގޮތުން މި ފިލްމުން މަރިޔަމް ރަޝީދާއަށް ފުރުޞަތުލިބުނީ ކިހިނެއްތޯ އަހައިލީމެވެ.

“އެއްދުވަހަކު އަހަރުމެންގޭ ކައިރީ ހުންނަ ފިހާރައެއްގެ ތެރެއަަށް ވަނީމަ އެތާނގަ ހުރި ކުއްޖަކު ބުނީ އިލްޔާސް އެބައުޅެޔޯ ނުގުޅިގެން. ދެން ނަންބަރު ދިނީ. ނަންބަރު ދިނީމަ ދެން އިލްޔާސް ގުޅީ. ގުޅީމަ ދެން އިލްޔާސް އެ ވާހަކަ ދެއްކީ. ދެއްކީމަ ދެން އަޅުގަނޑަކަށްވެސް އަނެއްހެން ނޭނގޭ ދެން ވީއެއްޗެއް. އަސްލު ދެން ހަމަ އާނއެކޭ ބުނެވުނީ ކުޅޭ ހިތުންގޮސް. ދެން ހިތަށް އެރީ އާނ ރަނގަޅު ފުރުޞަތެކޭ މީވެސް. އަނެއްކާވެސް އާއްމުންގެ ތެރެއަށް ދެން ނުކުމެލަން ބޭނުންވެފަ ހުރީވެސް. ދެން އެގޮތަށް، މިކަންތައް މިގޮތަށް ދިމާވީ.”

“ނީނާ” އަކީ 2019ވަނަ އަހަރު އައި ފިލްމްސް އިން ގެނެސްދިން ކާމިޔާބު ފިލްމު “ބަވަތި” އަށް ފަހު އެ ޕްރޮޑަކްޝަނުން ހަދާ ވަރަށް ތަފާތު ކޮންސެޕްޓެއްގެ ފިލްމެކެވެ. ފިލްމުގެ ލީޑް ތަރިންނަކީ ނުޒުހަތު ޝުއައިބް (ނުޒޫ) އާއި ޝަރަފުއްދީން ޢަބްދުﷲ އެވެ. ވެޓަރަންސް އެކްޓްރެސް މަރިޔަމް ރަޝީދާ އަދި މަރިޔަމް ޝަކީލާގެ އިތުރުންވެސް ފާހަގަކޮށްލެވޭ އިތުރު ތަރިންތަކެއް މި ފިލްމުން ފެނިގެންދާނެ އެވެ. އެގޮތުން ހަމްދޫން ފާރޫޤް (އައްކި)ގެ ވަރުގަދަ ރޯލެއް މި ފިލްމުން ފެނިގެންދާނެ އެވެ.

ފިލްމު “ޔޫސުފް އެންޑް ޒައިނަބް”ގައި މަރިޔަމް ރަޝީދާ

މީގެ 10 ދުވަސްކުރިން ފިލްމުގެ ކައުންޓްޑައުން ފަށާފައިވާއިރު، ފިލްމު އެޅުވުމާމެދު ބާކީ އޮތީ ދެން އެންމެ ހަތަރު ދުވަހެވެ. ކައުންޓްޑައުން ވީޑިއޯތައް ހިއްސާކުރަމުން އަންނައިރު އެންމެ ފަހުން ހިއްސާކޮށްފައިވާ ވީޑިއޯއިން، ރާއްޖޭގެ އެންމެ މަޝްހޫރު އެއް ބަޠަލާ މަރިޔަމް އައްޒަ ފެނިގެންދެއެވެ. އައްޒަ ފެންނަނީ އައިޓަމް ލަވައަކުންނެވެ. މިކަމުގެ އިތުރު ތަފުޞީލަށް އެހެން ފަހަރަކުން ޖެހިލާނަމެވެ.

 

View this post on Instagram

 

A post shared by I Films (@ifilmsmv)

ކުރިއަށް ހުރި ޝޯތަކުން ޓިކެޓް ހޯދުމަށް 7242555 ނަންބަރަށް ގުޅައިގެން ނުވަތަ އޮލިމްޕަސް ޓިކެޓްކައުންޓަރަށް ގޮސްގެން ކުރިއަށްގެންދެވޭނެ އެެވެ.ޓިކެޓްގެ އަގަކީ 150ރުފިޔާ އެވެ. މި ފިލްމުގެ 30 ޝޯ އޮލިމްޕަހުގައި ދެއްކުމަށް ހަމަޖެހިފައިވެ އެވެ.

މިއީ އިލްޔާސް ވަހީދު (އިއްލެ) ޑައިރެކްޓްކޮށްފައިވާ ފިލްމެކެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: