🎦 ފިލްމު “ނީނާ”ގެ އޮންލައިން މީޑިއާ ޕާޓްނަރަކީ މުނިއަވަސް އޮންލައިން

06 އޯގަސްޓް 2023 ވަނަ ދުވަހުގެ ރޭ އޮލިމްޕަސް ސިނަމާގައި ދައްކަން ފަށާ ދިވެހި ފިލްމު “ނީނާ“ގެ ވަރަށް ގިނަ ވާހަކަތައް، ޚަބަރުތައް މުނިއަވަސް އިން ގެނެސްދެވިއްޖެ އެވެ. ނަމަވެސް މި ފިލްމު ބަލައިލަން ވީ ސަބަބުތައް ދިވެހި ފިލްމު ބަލާ އޯޑިއަންސާހަމައަށް ސީދާ ގެނެސްދެވިފައެއް ނުވާނެއެވެ.

ފިލްމު “ނީނާ” ބަލަންވީ ސަބަބުތައް ބައިވަރެވެ. އެގޮތުން މި ފިލްމު ބަލަންވީ ސަބަބުތައް ފިލްމުގެ ވާހަކަ ލިޔެ ޑައިރެކްޓްކޮށްފައިވާ ހުނަރުވެރި ޑައިރެކްޓަރު އިލްޔާސް ވަހީދު (އިއްލެ)ގެ ފަރާތުން ހިއްސާކޮށްލާނަމެވެ.

“ފިލްމު “ނީނާ” ބަލަންވީ ސަބަބުތައް ބައިވަރު. ފުރަތަމަ ކަމަކީ މިއީ ދިވެހި ފިލްމަކަށްޓަކައި މާޝަލް އާޓްސްގެ ޓްރެއިނިންތައް ހަދައިގެން ގެނެސްދޭ ފުރަތަމަ ދިވެހި ފިލްމު. ދެ މަސްދުވަހުގެ މާޝަލް އާޓްސް ޓްރެއިނިން މި ފިލްމުގެ ލީޑް ނުޒޫ އަދި އައްކި ހަދާފަވޭ.” ފުރަތަމަ ސަބަބު ހާމަކުރަމުން އިއްލެ ބުންޏެވެ.

“ދެވަނަ ކަމަކީ ފިލްމުގެ ތަރިން ފިޓްނަސް ޓްރެއިނިން ހެދި. މޭކަޕް އާޓިސްޓް ރުޠުބާގެ މޭކަޕްކުރުމުގެ ތަފާތު ހުނަރުތަކެއް މި ފިލްމުން ފެންނާނެ.” އިތުރު ސަބަބުތައް އިއްލެ ހާމަކުރިއެވެ.

އަނެއް ސަބަބަކީ މިއީ އިއްލެގެ ދެވަނަ ފިލްމެވެ. އެހެންކަމުން މި ފިލްމަށް ކުރެވޭ ‘ހައިޕް’ގެ އުއްމީދުވެސް ބޮޑެވެ. އިއްލެގެ ފުރަތަމަ ފިލްމު “ބަވަތި” ބެލި ހުރިހާ އެންމެންވެސް އިއްލެގެ މަސައްކަތަށް ސާބަސްދީފައިވެއެވެ. ދިވެހި ފިލްމެއްގައި މީގެ ކުރިން ދައްކާފައި ނުވާ އެތައް ކަމެއް އެ ފިލްމުން ދައްކުވައިދީފައިވެއެވެ. އެހެންކަމުން އިއްލެގެ ދެވަނަ ފިލްމުން، އިތުރު އައު ކަންތައްތަކެއް ފެންނާނެކަމާމެދު ޝައްކުކުރާނެ ޖާގައެއް ނެތެވެ.

ދެން އޮތް ސަބަބަކީ މި ފިލްމަކީ ރާއްޖޭގެ ވެޓަރަން އެކްޓްރެސް މަރިޔަމް ރަޝީދާ ފިލްމީ ދާއިރާއާއި ދުރުގައި ހުންނަތާ 30 އަހަރު ފަހުން ސްކްރީނުން ފެންނަ ފުރަތަމަ ފިލްމެވެ. ފިލްމު “އިތުބާރު”ން ދިވެހި ފިލްމީ އޯޑިއަންސްގެ އިތުބާރު ހޯދާފައިވާ އޭރުވެސް އަދި މިހާރުވެސް ހިތްގައިމު އެކްޓްރެސް މަރިޔަމް ރަޝީދާ މި ފިލްމުގައި ފެނިގެންދާނީ ވަރަށް ތަފާތު ވަރުގަދަ ކެރެކްޓާއަކުން ކަން ފިލްމުގެ ޓްރެއިލާ ބަލައިލުމުންވެސް އެނގިގެންދެއެވެ.

ފިލްމު “ނީނާ”ގެ މަންޒަރެއް، ލ. ގަމުގައި ޝޫޓްކުރުމަށް ތައްޔާރުވަނީ – ފޮޓޯ: މުނިއަވަސް

ދެން އޮތީ އިއްލެ އެންމެ ފަހުން ފާހަގަކުރި ނަމަވެސް އުއްމީދީ ސަބަބެކެވެ. މި ފިލްމަކީ އައު އެކްޓަރުންތަކެއް މި ދާއިރާއަށް ނެރެދޭ ފިލްމެކެވެ. މިއީ މިހާރު ގިނަ އުފެއްދުންތަކަކުން ހުނަރުވެރި އެކްޓިންއެއް ދައްކަމުން އަންނަ ޝަރަފުއްދީން ޢަބްދުﷲ (ޝަރަފް)ގެ އަލަތު ފިލްމެވެ. އިއްލެ ބުނަނީ މި ފިލްމުގެ ފަހުން ޝަރަފް ކުޅެފައިވާ ބައެއް ފިލްމުތައް ބެލިއްޖެ ކަމަށާ ނަމަވެސް މި ފިލްމުގައި ޝަރަފު ދައްކައިދީފައިވާ ފަދަ މޮޅު އެކްޓިންއެއް އަދި ފެނިފައި ނުވާކަމަށެވެ.

“ފިލްމު “ނީނާ” ބަލަންވީ ސަބަބުތަކުގެ ތެރެއަށް މުނިއަވަސް އިންވެސް ބައެއް ސަބަބު އިތުރުކޮށްލާނަމެވެ. މި ފިލްމުގެ ޓެކްނިކަލް މަސައްކަތްތަކުގެ ފަހަތުގައިވެސް ތިބީ ފިލްމު “ބަވަތި”ގެ ޓެކްނިކަލް ޓީމެވެ. ކެމެރާކުރީ ކެމެރާކުރުމަށް މިޔަ ތޫނު ‘އިބްރާހީމް ވިސާން (ކަނޑި)’ އެވެ. މީގެ އިތުރުން މި ފިލްމުގެ ބޮޑުބައި ޝޫޓްކުރީ ލ. ގަން، މާންދޫ އަދި ކައްދޫގައެވެ. ލާމަސީލު ލާމުގެ އެންމެ ހިތްގައިމު ސަރަޙައްދުގެ ތެރެއިން ތިން ސަރަހައްދެއްގައެވެ.

ނުޒުހަތު ޝުޢައިބް ،ޝަރަފް ޢަބްދުﷲ، ވެޓަރަންސް އެކްޓްރެސް މަރިޔަމް ރަޝީދާ އަދި މަރިޔަމް ޝަކީލާގެ އިތުރުންވެސް ފާހަގަކޮށްލެވޭ އިތުރު ތަރިންތަކެއް މި ފިލްމުން ފެނިގެންދާނެ އެވެ. އެގޮތުން ހަމްދޫން ފާރޫޤް (އައްކި)ގެ ވަރުގަދަ ރޯލެއް މި ފިލްމުން ފެނިގެންދާނެ އެވެ.

ފިލްމު “ނީނާ“އަކީ ވަރުގަދަ ފިލްމަކަށް ހެދުމަށްޓަކައި ޓެކްނިކަލް އެހީތެރިކަން ދިނީ މުނޯ، ޒިއްޕެ އަދި ޙުސައިން އެވެ. ފިލްމެއްގެ ހައިބަތު އިތުރުކުރުމަށް ފިލްމުގެ ބެކް މިއުޒިކަކީ ކިހާ މުހިންމު އެއްޗެއްކަން މިއީ އެންމެންވެސް ދަންނަ ކަމެކެވެ. މިފަހަރު އައިފިލްމްސްގެ ފީޗާ ފިލްމު “ނީނާ“ގެ މިއުޒިކް ހެދީ އިތުރު ތަޢާރަފަކަށް ބޭނުންނުވާނެ ޝަހީދު ލިގެސީ އެވެ.

ފިލްމު “ނީނާ”ކެމެރާކުރަނީ ވިސާން، އެސިސްޓެންޓް ޑައިރެކްޓަރަކީ އިފްނާޒް – ފޮޓޯ: މުނިއަވަސް

ފިލްމު “ބަވަތި“ން ހައިރާންކުރުވަނިވި ތަފާތު، މޮޅު މަންޒަރުތަކެއް ގެނެސްދިނުމުގެ ފަހަތުގައި ތިބި އޯކޭޒް އިންކްގެ ޓީމަކީ މި ފިލްމުގެވެސް ޕޯސްޓް ޕްރޮޑަކްޝަން، އެޑިޓިން އަދި ވިޒުއަލްސް ހެދި ޓީމެވެ. ވަކީން ޚާއްޞަކޮށް އޯކޭޒް އިންކްގެ ސާމީ އަކީ މިކަންކަމުގެ އިސް މޭސްތިރިއެވެ.

ޕްރޮޑަކްޝަން މެނޭޖަރެއްގެ ގޮތުގައިި ތާތި އާދަމް ހަރަކާތްތެރިވި މި ފިލްމުގެ އެސިސްޓެންޓް ޑައިރެކްޓަރަކީ އަޙްމަދު އިފްނާޒް ފިރާޤް އެވެ. ޕްރޮޑިއުސްކުރީ އާސިމް ޢަލީ، އަޙްމަދު ވަހީދު އަދި އިލްޔާސް ވަހީދު (އިއްލެ) އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު

ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

މި ލިޔުންތެރިޔާގެ ބައެއް އެހެން ލިޔުންތައް

• 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
• 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
• 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
• 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!