ޑާކްރެއިން އެންޓަޓެއިންމެންޓުން މިއަހަރު ނެރުމަށް ޝެޑިއުލްކޮށްފައިވާ ދެވަނަ ފިލްމު ‘ގޮށްރާޅު’ އެޅުވުން ވަކި މުއްދަތެއް ނެތްގޮތަށް ފަސްކޮށްފިި އެވެ.
މޫމިން ފުއާދުގެ ވާހަކައަކަށް ޢަހުމަދު ޝިނާން ޑައިރެކްޓް ކުރާ ‘ގޮށްރާޅު’ ޕްރިމިއާ ކުރުން ލަސްކޮށްފައި ވަނީ މިމަހު 5 ގައި ރިލީޒްކޮށްފައިވާ ޑާކްރެއިންގެ ފިލްމު ‘ވަކިން ލޯބިން’ އަށް ލިބެމުން އަންނަ ބޮޑު ތަރުހީބަށް ބަލާފައި ކަމަށް މަޢުލޫމާތު ލިބެއެވެ. އެގޮތުން ‘ވަކިން ލޯބިން’ ގެ އިތުރު ޝޯ ތަކެއް ދެއްކުމަށް ބެލުންތެރިން އެދެމުންދާތީ އާއި އޮލިމްޕަހުގައި ފިލްމު އެޅުވުމަށް ބުކިން ލިބިފައި ހުރީ އެކި ދުވަސްވަރަށް ކަމުގައި ވާތީ ‘ގޮށްރާޅު’ ޕްރިމިއާކުރުން ފަސްކޮށްލީ ކަމަށް މަޢުލޫމާތު ލިބެއެވެ.
ޑާކްރެއިން އެންޓަޓެއިންމެންޓް ގެ މި ފިލްމު ޕްރޮޑިއުސް ކޮށްފައި ވަނީ މުޙައްމަދު އަލީ (މޮގަރ) އާއި އާއިޝަތު ފުވާދު ތައުފީޤެވެ. ‘ގޮށްރާޅު’ ފިލްމުގައި ކެމެރާގެ ކުރިމަތިންނާއި، ކެމެރާގެ ފުރަގަހުން ވެސް ފިލްމް އިންޑަސްޓްރީއަށް ގިނަ އަދަދެއްގެ އާ ފަންނާނުން ނެރޭނެއެވެ.
ފެބްރުއަރީ ދެވަނަ ދުވަހުގެ ރޭ ބޭއްވި ރަސްމިއްޔާތެއްގައި ‘ގޮށްރާޅު’ ގެ ޕޯސްޓަރު ވަނީ ރިލީޒްކޮށްފަ އެވެ. މީގެއިތުރުން ގޮށްރާޅު ގެ ޕޭޖުގައި ފިލްމުގެ މޯޝަން ޕޯސްޓަރެއް ވެސް ވަނީ ރިލީޒްކޮށްފައެވެ. މި މޯޝަން ޕޯސްޓަރުން ފެންނަނީ ފިލްމުގެ ލީޑް ޖުމައްޔިލް ނިމާލް (ޖުމަލް) ރަސްމީ ހެދުމެއްގައި ހުއްޓައެވެ. އަނިޔާތަކެއް ލިބިފައިވާ ނުވަތަ އެހެންވެސް ސަބަބަކާހުރެ ޖުމަލް ގެ އަނގައިން ދަވަ އާއި ލޭ ފައިބަމުންދާތަން ފެނެއެވެ.
‘ގޮށްރާޅު’ ގެ ޕޯސްޓަރާއި އެނިމޭޓެޑް ޕޯސްޓަރުންވެސް ޖުމަލް ގެ ބޮލުގެ އިސްތަށިގަނޑެއް ނުފެނެ އެވެ. އަދި މި ފިލްމުގެ ޝޫޓިން ފެށިފަހުން ޖުމަލް ފެންނަނީ ބޮލަށް ކޯރިއެއް މަހައިގެން ހުންނަތަނެވެ. އެހެންކަމުން މި ފިލްމުގައި ޖުމަލް ގެ ބޯ ބާލާފައި ހުންނަނީ ކަމަށް ގަބޫލުކުރެވެ އެވެ.
ފިލްމުގެ ލީޑް ގައި ހަރަކާތްތެރިވަނީ ޖުމައްޔިލް ނިމާލް އެވެ. ޖުމައްޔިލްގެ އިތުރުން މި ފިލްމުން ދެން ފެނިގެންދާނީ، މޯލްޑިވިއަން އައިޑަލް އިން ފެނިގެންދިޔަ ހަސަން އިރުފާން (ޒަކިއްޓެ)، އައިމިނަތު ރަޝްފާ، ޢައިޝަތު ތަސްނީމާ، ޢަބްދުﷲ އަޒާން، ނުޒުހަތު ޝުޢައިބު (ނުޒޫ)، ނާޝިތު މުޙައްމަދު، ހަމްދާން ފާރޫޤް، މަރިޔަމް ޝަކީލާ އަދި އިސްމާއިލް ރަޝީދެވެ.
ޑާކްރެއިން އެންޓަޓެއިންމެންޓުން މިއަހަރު ރިލީޒްކުރި ފުރަތަމަ ފިލްމު ‘ވަކިން ލޯބިން’ ގެ ޝޯތައް މިހާރު އޮލިމްޕަހުގައި އަދި ރާއްޖޭގެ ބައެއް ސަރަހައްދުތަކުގައި ދައްކަމުން އަންނައިރު މި ފިލްމަށް ބޮޑު ތަރުހީބަކާއި ތަޢުރީފެއް ލިބެމުން އަންނަކަން ފާހަގަކޮށްލެވެއެވެ.
ލިޔުންތެރިޔާގެ ފުރަމަލަ
- ތަފާތު މަޢުޟޫތަކަށް ދީމާ ލިޔާނެއެވެ. އެންްމެ ޝައުޤުވެރިވަނީ ފިލްމީ ދާއިރާ އަށެވެ.
މި ލިޔުންތެރިޔާގެ ބައެއް އެހެން ލިޔުންތައް
- 25 މާރޗް 2024ރަހަފަތްއާފަލު ކޭކު – މުނިއަވަސް ރަހަފަތް
- 24 މާރޗް 2024ރަހަފަތްގާލިކް ބްރޮއިލްޑް ޗިކަން – މުނިއަވަސް ރަހަފަތް
- 23 މާރޗް 2024ރަހަފަތްބިސް ޗީޒް ޕެޓީސް – މުނިއަވަސް ރަހަފަތް
- 18 ސެޕްޓެމްބަރ 2021ޚަބަރުވަންރާޖްގެ މޫނުމަތީގައި އަނޫޕަމާ މިފަހަރު ޖެހީ ވަރަށް ވަރުގަދަ ތަފާލެއް!
