އައި ފިލްމްސްގެ ދެވަނަ ފީޗާ ފިލްމު “ނީނާ“ގައި ހިމެނޭ ސަޅި ލަވަތަކުގެ ތެރެއިން އެންމެ ސަޅި ލަވަ ‘އައްޒަ‘ގެ ކޯވަރެއްގެ މިންވަރު މިއަދު ދައްކާލައިފި އެވެ. ލަވައިގެ ޓްރެއިލާއެއް ގޮތަށް އައި ފިލްމްސްގެ އިންސްޓަގްރާމް މެދުވެރިކޮށް މިއަދު ހަވީރުގެ ވަގުތެއްގައި ހިއްސާކޮށްފައިވާ ވީޑިއޯކޮޅު ބެލުމަށްފަހު ލަވައަށް ބައެއް ފަރާތްތަކުން ތަޢުރީފުކޮށްފައިވެއެވެ.

މިމަހު 06 ވަނަ ދުވަހުގެ ރޭ އޮލިމްޕަހުގައި ޕްރިމިއާކުރި މި ފިލްމު ބެލުމަށްފަހު ‘އައްޒަ‘ ލަވަ ރިލީޒްކުރާނެ ވަގުތެއްގެ އިންތިޒާރުގައި ތިބިކަމަށް ފިލްމުބެލި ގިނަ ބަޔަކު ބުނެފައިވެއެވެ. މިއީ އައްޒައަށް ޚާއްޞަކޮށް، ލަވައިގެ ޅެންވެރިކަން، ލަވައިގެ ނެށުންތައް ޚާއްޞަކޮށްފައިވާ ލަވައެކެވެ.

‘އައްޒަ‘ ލަވައަކީ މި ފިލްމުގެ އެންމެ ވަރުގަދަ ލަވައެވެ. ލަވަ ކިޔާފައިވަނީ އަޝްފާ އަދި މުޙައްމަދު ޢަބްދުލްޣަނީ (ތޭރަ) އެވެ. ލަވައިގައި ހަރަކާތްތެރިވަނީ މަރިޔަމް އައްޒަ އެވެ. އައިޓަމް ލަވައެއްގެ ގޮތުގައި ހިމަނާފައިވާ މި ލަވައިން އައްޒަގެ ހުނަރުވެރި ނެށުންތައް އޭނާގެ ފަރިފަރި އަދާތަކާއެކު ދައްކައިދޭ އިރު، ފިލްމުގެ މައިގަނޑު ވާހަކަ އާއި ގުޅުންހުރި މުހިންމު ކަންތައްތަކެއްވެސް ހިނގައެވެ.

މި ލަވައިގައި ޚާއްޞަކޮށް ފާހަގަކޮށްލެވޭ އެހެން ކަމެއްވެސް އެބަ އޮތެވެ. ‘އައްޒަ އައްޒަ އައްޒާ’ މި ބައި ކިޔާފައިވަނީ އައި ފިލްމްސްގެ ފުރަތަމަ ފިލްމު “ބަވަތި”ގެ ލީޑް ކުޅުނު އިފްނާޒެވެ. މިއީ ލަވަ އަޑުއަހާފައިވާ ފަރާތްތަކަށްވެސް ފާހަގަނުކުރެވި އޮތް ކަމަކަށްވެދާނެ އެވެ.

‘އައްޒަ‘ ލަވައިގެ މަންޒަރުތަކުން ފިލްމު “ނީނާ“ގެ ވަރުގަދަ ލީޑް ކުޅެފައިވާ ނުޒޫ ފެނިގެންދާނީ މި ފިލްމުގައި އޭނާ ފެންނާނެ ކަމަށް އައި ފިލްމްސް އިން ބުނަމުން އައި ‘ލުކްސް’ތަކުގައި ނުހިމެނޭ ވަރަށް ތަފާތު ލުކެއްގައެވެ. މީގެ އިތުރުން ފިލްމުގެ ވަރުގަދަ ވިލަން ހަމްދޫން ފާރޫޤް (އައްކި)ގެ އާދަޔާޚިލާފު މަޖާ ހަރަކާތްތަކެއްވެސް ލަވައިން ފެނިގެންދާނެ އެވެ.

އިލްޔާސް ވަހީދު ލިޔެ ޑައިރެކްޓްކޮށްފައިވާ ފިލްމު “ނީނާ“ގައި ހިމެނޭ އެންމެ ސަޅި ލަވަ، އޮލިމްޕަހުގެ ޒަމާނީ ސައުންޑާއެކު ބޮޑު އިސްކިރީނުން ބަލައިލުމަށް ދެން ފުރުޞަތު އޮތީ މަދު މިންވަރަކަށެވެ. ފިލްމުގެ އެންމެ ފަހު ޝޯތައް މިހާރު ދައްކަމުން އަންނައިރު، މި ފިލްމަށް ބެލުންތެރިން ދީފައި ހުރި ކޮމެންޓްތައް ބަލައި ދިރާސާކޮށްލުމަށްފަހުގައި ނަމަވެސް މިއީ ހަމަ ނުބަލާ ދޫކޮށްލާވަރު ފިލްމެއް ނޫންކަން ފާހަގަކޮށްލަމެވެ.

🎦 ފިލްމު “ނީނާ”ގެ އޮންލައިން މީޑިއާ ޕާޓްނަރަކީ މުނިއަވަސް އޮންލައިން

 

View this post on Instagram

 

A post shared by I Films (@ifilmsmv)

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: