04 ނޮވެމްބަރު 2023ވަނަ ދުވަހުގެ ރޭ އޮލިމްޕަސް ސިނަމާގައި ދައްކަން ތައްޔާރުވެފައިވާ ފިލްމު “ފްރީ ޑެލިވަރީ”ގެ ޕްރޮމޯޝަނަލް ލަވަ 22 ސެޕްޓެމްބަރު 2023، ހުކުރު ދުވަހު މެންދުރުފަހު 14:00ގައި ރިލީޒްކުރަން ނިންމާފައިވާކަމަށް ‘ކަޒްމިކް އިންޓަނޭޝަނަލް’އިން ބުނެފިއެވެ.

ފިލްމު “ފްރީ ޑެލިވަރީ”ގެ ޕްރޮމޯޝަނަލް ލަވައިގެ އިތުރު މަޢުލޫމާތު މުނިއަވަސްއާ ހިއްސާކުރަމުން، މި ފިލްމުގެ ޑައިރެކްޓަރު އިލްޔާސް ވަހީދު (އިއްލެ) ބުނީ މައިގަނޑު ގޮތެއްގައި ލަވަ ކިޔާފައިވަނީ ބަޖިއްކޮ އަދި ހުމޭ ކަމަށެވެ. ނަމަވެސް ލަވައިގެ ބައެއް ބައިތައް މި ފިލްމުން ފެނިގެންދާ ދެ ތަރިން ކަމަށްވާ އިފްނާޒް އަދި ޝާރިފް ވެސް ކިޔާފައިވާކަން އިއްލެ ފާހަގަކުރިއެވެ.

ފިލްމު “ފްރީ ޑެލިވަރީ”ގެ ޕްރޮމޯޝަނަލް ލަވައިގެ މިއުޒިކް ހެދީ ޝަހީދު ލިގެސީ އެވެ. ރާގު ހެދީ އިލްޔާސް ވަހީދެވެ. ޅެން ހަދާފައިވަނީ އިލްޔާސް ވަހީދުގެ އިތުރުން ޕްރޮޑިއުސަރ އާސިމް ޢަލީ (ސިމްބެ)އެވެ.

ކޮމެޑީ ފިލްމު “ފްރީ ޑެލިވަރީ” އަކީ ބިޔަ ކާސްޓެއް ހިމެނޭ ފިލްމެކެވެ. އެގޮތުން ތާތި އާދަމް، އައިޝާ ޢަލީ، ރައުފަތު ޞާދިޤް، އަޙްމަދު ޝާރިފް، ވާޝިޔާ މުޙައްމަދު، ހާޒިފް މުޙައްމަދު، ފަޒިލް ފަޔާޒް، އިމާދް ޢަލީ، ފާޠިމަތު ލަޠީފާ، މަރިޔަމް ވަހީދާ (ޔަމް)، މުޙައްމަދު ސާމިހް، ޢަބްދުﷲ ސަމޫހް، މުޙައްމަދު މައިޝަމް، ޢަލީ އިނާޒް، އިބްރާހީމް ފައިރޫޒް، ސާމީ ޙުސައިން ދީދީ އަދި އަޙްމަދު ޝާކިރު (ޝާއްކޮ އައްމަޑޭ) ހިމެނެއެވެ.

މި ފިލްމަކީ އާސިމް ޢަލީ އަދި އާމިރާ ޢަލީގެ ދެބެއިންނާއި އިލްޔާސް ވަހީދު (އިއްލެ) ޕްރޮޑިއުސްކޮށްފައިވާ ފިލްމެކެވެ.

ފިލްމުގެ އެޑިޓިން ހެދީ މުޙައްމަދު ޢަބްދުލް ޣަނީ (ޑޫ މޯރ) އެވެ. މިއުޒިކް ހަދާފައިވަނީ އިއްލެގެ “ނީނާ”ގެ ވެސް ހިތްގައިމު މިއުޒިކް ހެދި ޝަހީދު ލިގެސީ އެވެ.

ކަޒްމިކް އިންޓަނޭޝަނަލްގެ ފުރަތަމަ ފީޗާ ފިލްމު “ފްރީ ޑެލިވަރީ”ގެ އޮންލައިން މީޑިއާ ޕާޓްނަރަކީ މުނިއަވަސް އޮންލައިން އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: