ފިލްމު ބަލައި ނިމޭއިރު ތިބެވޭނީ ކުރި އަސަރެއްގެ ސަބަބުން ހިތް ނުތަނަވަސްވެފަ އެވެ. ހަމަ އެހެންމެ ފިލްމުގެ މޮޅުކަމާ ރީތިކަމުން ހިތްހަމަވެސް ޖެހިފައެވެ. މި ހުރިހައި ކަމެއްގެ އިތުރުން ފިލްމު ބަލައި ނިމޭއިރު މި ފިލްމުގެ މައިގަނޑު ލީޑް މަރިޔަމް މަޖުދާ އަކީ ހަމަ ކޮންމެ ރޯލެއްވެސް ކުޅެން ނުހަނު ހުނަރުވެރި އެކްޓަރެކޭ ހިތާހިތާ ބުނެވޭނެއެވެ. މި އަހަރު ޑިސެމްބަރު މަހު 04ވަނަ ދުވަހުގެ ރެއަށް ތައްޔާރަށް ތިބޭށެވެ.

ފިލްމު “ނޮވެމްބަރ” ވެގެން ދާނީ ތަފާތުކަން ބޮޑު، ތަފާތު ވާހަކައެއް ގެނެސްދޭ އަސަރުގަދަ ލޯބީގެ ފިލްމަކަށެވެ. ލޯބީގެ ވާހަކަތަކެއްގެ ތެރެއިން، ރާއްޖޭގެ މާހައުލުގައި އެކަމަކާމެދު އާއްމުން ހޭލުންތެރިކުރުވަން ޖެހިފައިވާ ސީރިއަސް ކަންތައްތަކަކަށް ފިލްމުގެ ވާހަކަ ބިނާކޮށްފައިވާކަމަށް މަޢުލޫމާތު ލިބެއެވެ. އަންހެނުން ބާރުވެރިކުރުވުމުގެ ކަންތައްތަކެއް ފެނިގެންދާނެ ކަމަށްވެސް މަޢުލޫމާތު ލިބެއެވެ.

ފިލްމު “ނޮވެމްބަރ”ގައި މަޖޫ ފެނިގެންދާނީ ވަރަށް ތަފާތު ގޮތަކަށެވެ. ތަފާތު ލުކެއްގައެވެ. މުޅީން ތަފާތު އިހްސާސެއްގައެވެ. ފިލްމުގެ ޝޫޓިން މާންދޫ ހޮރައިޒަން ފިޝަރީޒްގައި ކުރިއަށްދިޔަ އިރު، ޝޫޓިން ނޯންނަ ވަގުތުތަކުގައި މަޖޫ އެ އިންނަ ގޮތް ފެނި ‘އާ ޔޫ އޯކޭ ހެއްޔޭ’ މަޖޫ ގާތުގައި އަހައިލަން އަހަންނަށްވެސް ޖެހުނެވެ. ޖަވާބުގައި ބޮލުގެ އިޝާރާތުން އާނއެކޭ ބުނެލުން ފިޔަވައި އެހެން ކަމެއް ނުކުރެއެވެ. މަޖޫގެ މި މިޒާޖާބެހޭ ގޮތުން ފިލްމު ކްރޫއާ ވާހަކަދައްކައިލުމުން އެނގުނީ މަޖޫ އެ އިންނަނީ އޭނާގެ ކެރެކްޓަރ ތެރެއަށް ވަދެ އެ ކެރެކްޓަރއިން ބޭރަށް ނުނިކުމެވި ކަމަށެވެ. މިއީ މިވަގުތަށް މަޖޫގެ ކެރެކްޓަރއަކީ ކޮބައިކަން ބުނެވެން އޮތް މިންވަރެވެ.

ހަމަ ގައިމުވެސް މި ފިލްމުން މަޖޫ ދައްކާ މޮޅު އެކްޓިންގެ ވާހަކަ، ފިލްމު ބަލައި ނިމިގެން ދައްކަން މަޖުބޫރުވާނެ އެވެ. ފިލްމުގައި ކިޔައިދޭ ވާހަކައިގެ އަސަރުގަދަކަމުގެ ވާހަކަވެސް ދައްކާނެއެވެ.

އަސަރު ގަދަ ލޯބީގެ ވާހަކައެއް ކިޔައިދޭ ފިލްމު“ނޮވެމްބަރ”ގެ އެކިއެކި ރޯލުތަކުން ބޮޑު ކާސްޓެއް ފެނިގެންދާނެއެވެ. ލީޑްގައި މަޖޫގެ ބައިވެރިއެއްގެ ގޮތުގައި ފެނިގެންދާނީ ޖުމައްޔިލް ނިމާލެވެ. މީގެ އިތުރުން އިސްމާޢީލް ވަޖީހް، އާއިޝަތު ޔާދާ، އައިޝަތު ޢަލީގެ އިތުރުންވެސް ޑާކްރެއިންގެ ފިލްމުތަކުން ފެންނަ ބައެއް އެހެން މޫނުތައްވެސް ފެނިގެންދާނެއެވެ.

ފިލްމު“ނޮވެމްބަރ”ގެ ސްކްރީންޕްލޭ ލިޔުނީ ޢާއިޝަތު ފުއާދު އާއި ޢަހްމަދު ޠަލާލް އެވެ. ޑައިރެކްޓްކޮށް ކެމެރާކުރީ ޝިފާއު (ޗިއްޕެ) އެވެ. ކޯ-ޑައިރެކްޓަރެއްގެ ގޮތުގައި ހަރަކާތެރިވެފައި ވަނީ އާއިޝަތު ފުއާދެވެ. ޗިއްޕެއާއެކު ކެމެރާކުރުމުގައި އަޙްމަދު ޝިނާން ވެސް ހަރަކާތެރިވިއެވެ.

🎦 ފިލްމު “ނޮވެމްބަރ”ގެ އޮންލައިން މީޑިއާ ޕާޓްނަރަކީ މުނިއަވަސް އޮންލައިން

@muniavas ‘November’ release date announcing soon @darkrainentertain #NOVEMBER_TheMovie @mazdamajoo @jumayyilnimal #muniavasnews #maldives #dhivehi #foryoupage #fyp #contentcreators #muniavas #dhivehifilm ♬ original sound – MUNIAVAS

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: