ދިވެހި ޓިކްޓޮކް ކޮމިއުނިޓީން އިސްނަގައިގެން ފަލަސްޠީނުގެ މުސްލިމުންނަށް އެހީވުމަށް އެންމެ ދޮޅުގަޑިއިރުން 59000 (ފަންސާސް ނުވަހާސް) އަށް ވުރެން ގިނަ ފައިސާ ހޯދައިފި އެވެ. މި ފައިސާ ހޯދީ މިރޭ 20:30 ން 22:00 އަށް މަޝްހޫރު ޓިކްޓޮކް ފަންނާނު މަރިޔަމް ސަމާ ޝަރީފް ހިންގާ ‘ހިތުން ހިތަށް’ ލައިވްގެ ޚާއްޞަ ޝޯއެއްގެ ތެރެއިންނެވެ.

މި ލައިވް ތެރެއިން 51225 (ފަންސާސް އެއްހާސް ދުއިސައްތައް ފަންސަވީސް) ރުފިޔާ އަދި 550 (ފައްސަތޭކަ ފަންސާސް) އެމެރިކާ ޑޮލަރު ހޯދާފައިވެއެވެ.

މިރޭ ހޯދި ފައިސާގެ ތަފުސީލުތައް ޝޯ ކުރިއަށް ދިޔަ ވަގުތު ދެފުށްފެންނަ ގޮތަށް ޖަމާވި އަދަދުވެސް ހިއްސާކޮށްފައިވެއެވެ. ހަމަ އެހެންމެ ހޯދުނު ފައިސާގެ ޓްރާންސްފަރ ސްލިޕްވެސް ލައިވް ތެރޭގައި ދައްކާލާފައިވެއެވެ. މީގެ އިތުރުން މީސްމީޑިއާ މަންސަތަކުގައިވެސް ޓްރާންސްފަރ ސްލިޕް ހިއްސާކޮށްފައިވެއެވެ.

ރާއްޖެއިން ފަލަސްތީނަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަ އިންޓަނޭޝަނަލް އެއިޑް ކެމްޕެއިން ( އޭއައިސީ )އަށް ޜާއްޖޭގެ ޓިކްޓޮކް ކުދިން ހޯދި ފައިސާ ޓްރާންސްފަރ ސްލިޕް

މިއީ ޓިކްޓޮކް ފަންނާނުން ކުއްލި ގޮތަކަށް ރާވާލައިގެން ޓިކްޓޮކްް މެދުވެރިކޮށް ކާމިޔާބު ލައިވް ޝޯތަކެއް ގެނެސްދެމުން އަންނަ މަރިޔަމް ސަމާ ޝަރީފްގެ ލައިވް މެދުވެރިކޮށް ބޭއްވި އިވެންޓެކެވެ. މި ލައިވް އިވެންޓްގައި ހާހަކަށް ވުރެން ގިނަ މީހުން ބައިވެރިވި އެވެ. ސަމާއަކީ މިފަދަ ލައިވްތައް މެދުވެރިކޮށް ބޭސްފަރުވާއަށް ބޭނުންވެ އެހީތެރިކަމަށް ބޭނުންވެފައިވާ ފަރާތްތަކަށްވެސް ފަންޑް ރެއިޒްކޮށްދީ އެހީވަމުން އަންނަ ފަންނާނެކެވެ.

ގިނަ ބަޔަކަށް އެހީވުމަށް ޓިކްޓޮކްގައި ‘ހިތުން ހިތަށް’ ލައިވް ޖައްސަމަުން އަންނަ ސަމާ – ފޮޓޯ: ސަމާ އިންސްޓަގްރާމް

ޓިކްޓޮކް ބޭނުންކުރާ މަދު ފަރާތްތަކެއްގެ ސަބަބުން ޓިކްޓޮކާމެދު އާއްމުން ދެކޭ ގޮތް ތަފާތު ނަމަވެސް، ޓިކްޓޮކް މެދުވެރިކޮށް ދިވެހި ޓިކްޓޮކަރޒް އިން މިފަދަ ފައިދާހުރި އެތައް ކަމެއް ކުރަމުން އަންނަކަން ފާހަގަކޮށްލެވެއެވެ.

“ޓިކްޓޮކް ތެރޭ އުޅޭތާ ގިނަ ދުވަސްތަކެއް ވެއްޖެ. ވަރަށް ގިނަ ކަންތައްތަކެއް ޓިކްޓޮކް ލައިވް ތެރެއިން ފެނިއްޖެ. މިހާރު ދިވެހިންތެރޭގައި ޓިކްޓޮކް ލައިވްތަކުގައި ގޭމްކުޅުމާ، ހުނަރުތައް ދައްކައިލުމާ، ރައްޓެހިން އެއްވެ ވާހަކަދެއްކުމާ، މިހެން ގޮސް ހަލަބޮލިވެގެން ދާ ފަހަރުވެސް ކުރިމަތިވޭ. އެކަމަކު މިކަހަލަ، މުޖުތަމައަށް ފައިދާހުރި ކަންކަން ދިވެހި ޓިކްޓޮކް ކޮމިއުނިޓީ ތެރޭގައި އިސްނަގައިގެން ކުރިއަށް ގެންދާތަން ފެނުނީމަ ވަރަށް ފަޚުރުވެރިވޭ. ބައިވެރިވެ ސަޕޯޓްދޭ ހިތްވޭ.

‘ހިތުން ހިތަށ’ް އިސްނަގައިގެން ސަމާ ލައިވް ތެރޭ މިހާރު ވަނީ ވަަރަށް ކުޅަދާނަކަމާއެކު ބޭސްފަރުވާއަށް ބޭނުންޖެހިފައިވާ ދެތިން ކުއްޖަކަށްވެސް ބޮޑު އަދަދަކުން ފަންޑު ހޯދައިދީފަ. ވަރަށް ޓްރާންސްޕޭރަންޓްކޮށް.

މިއަދު ފަލަސްތީނަށް އެހީތެރިކަން ފޯރުކޮށްދިނުމަށް ސަމާ ލައިވް މެދުވެރިކޮށް ޓިކްޓޮކް ލައިވް ކޮމިއިނިޓީ އެކަތިގަނޑަކަށްވެ މިވަރުގެ އެމައުންޓެއް ރެއިޒްކުރީމަ ވަރަށް އުފާވެއްޖެ. އަލްޙަމްދުލިﷲ.

ހަމަ ބުނެލަން ބޭނުން ސަމާ ޓީމް / ހިތުން ހިތަށް އަދި ކޮންޓްރިބިއުޓްކުރި ހުރިހާ ކުދިންނަށް އައްސަރިބަހާ ސާބަސް.”

– ޓިކްޓޮކްގެ ނަމުންނަމަ މަންމަ މޯލްޑިވްސް (އިވްރިޝާ ޝަފީޤް)

މި ކެމްޕެއިންގައި ލިބުނު ފައިސާ ރާއްޖެއިން ފަލަސްތީނަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުން އަންނަ އިންޓަނޭޝަނަލް އެއިޑް ކެމްޕެއިން (އޭއައިސީ)ގެ އެކައުންޓަށް މިރޭ ވަނީ ޖަމާކޮށްފައެވެ. ޖަމާކުރި ފައިސާގެ ސްލިޕު ސަމާގެ އިންސްޓްރގްރާމްއާއި ޓިކްޓޮކްގައި ހާމަކޮށްފައިވެއެވެ. އެގޮތުން ފައިސާ ޓްރާންސްފަރ ކުރަމުން ސަމާ  ރާއްޖޭގެެ ޓިކްޓޮކް ކޮމިއުނިޓީ ފަލަސްތީނާއާއި އެކު އޮތްކަން ރިމާކްސްގައި ފާހަގަކޮށްފައެވެ.

ސަމާ ފަދައިން ޓިކްޓޮކް މެދުވެރިކޮށް ދިވެހީންނަށާ އަދި އިތުރު ފަރާތްތަކަށްވެސް ފައިދާހުރި މިފަހަދަ ކަންކަން ކުރަމުން އަންނަކަމީ ޝުކުރުވެރިކަމާއެކު ބަލައިގަންނަން ޖެހޭ ކަމެކެވެ. މުނިއަވަސް ޓީމުންވެސް މި ހަރަކާތުގައި ބައިވެރިވި ހުރިހައި ފަރާތްތަކަށް ޝުކުރުވެރިވަމު އެވެ.

 

View this post on Instagram

 

A post shared by Mariyam Sama Shareef (@mariumsummer)

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: