މުނިއަވަސް އިން ފިލްމީ އުފެއްދުންތަކަށް މާބޮޑަށްވެސް ތަޢުރީފުކުރަނީއޭ ކިޔާ ބަޔަކު ކިޔަސް ހަމަ އޯކޭއެވެ. ނަމަވެސް ކޮންމެކޮންމެ އުފެއްދުމަކަށް އަހަރުމެންވެސް ‘އޭ ފާހެއް’ ނުދެމުއެވެ. ނަމަވެސް ފިލްމެއް މޮޅަށް ޑެލިވަރީކޮށްދީފައި ވާނަމަ، އެއީ މޮޅު އެއްޗެކޭ ނުބުނެ ދައްކާނެ ވާހަކައެއް ނުވެސް އޮންނާނެދޯ އެވެ.

ދިވެހި ފިލްމު އުފެއްދުމުގައި ތަފާތުތަކެއް ދައްކައި، އައު ހަރުފަތަކަށް ދިވެހި ފިލްމީ މަސައްކަތްތައް އުފުލައިލަދިން ހުނަރުވެރި ޑައިރެކްޓަރަކަށް އިލްޔާސް ވަހީދު (އިއްލެ) ނުވާނެ ގޮތެއް އެއީ ހަމަ ނެތް ގޮތެކެވެ. ފިލްމު “ބަވަތި”، “ނީނާ” އަދި “ބިރުވެރި ވާހަކަ” ސީރީޒާއި “މަޒްލޫމް” ސީރީޒުން އެކަން އެއޮތީ ސާބިތުކޮށްދީފަ އެވެ. ތަފާތު ސްޓައިލަކަށް ތަފާތު ޖޮންރާތައް ޑެލިވަރީކުރަމުން އަންނަ އިއްލެ މިފަހަރު ޑެލިވަރީކޮށްދިން “ފްރީ ޑެލިވަރީ”އަކީ ދިވެހި ޑާކް ކޮމެޑީގެ މާސްޓަރޕީސްއެއް ކަމަށް ބުނަން ޖެހެއެވެ. އެވަރަށް އެ ފިލްމުގެ ކަންކަން ޑެލިވަރީކޮށްދީފައިވެއެވެ.

ކަޒްމިކް އިންޓަނޭޝަނަލްގެ ފުރަތަމަ ފީޗަ ފިލްމު “ފްރީ ޑެލިވަރީން” ފިސާރި ރަނގަޅަށްވެސް ހުނުން ޑެލިވަރީކޮށްދީފައި ވާކަން ފިލްމު ބަލައިލުމުން އެނގޭނެއެވެ. މި ހިއްސާކޮށްލަނީ މުނިއަވަސް އިން ރެކޯޑްކޮށްފައިވާ އަޑުކޮޅެކެވެ. ފިލްމު ބަލަން ތިބި މީހުން ސިނަމާހޯލު ތެރޭގައި ހެމުންދިޔަ އަޑު މެދުނުކެނޑި އިވޭނެ އެވެ.

@muniavas FREE DELIVERY From Olympus #fvpviral #foryou #foryoupage #fvpシ #muniavasnews #dhivehifilm #freedelivery @Kazmik ♬ original sound – MUNIAVAS

އަސްލު ކޮމެޑީއެއްގެ އުންސުރުތައް ހަމަވޭ

އެކްސްޕާޓުންގެ ލިޔުންތަކުން މަޢުލޫމާތު ހޯދައިގެން މީގެ ކުރިން މުނިއަވަސް އިން ގެނެސްދިން “ހެއްވާ މަޖާ ފިލްމު، ހެއްވާ މަޖާ ފިލްމަކަށް ވަނީ ކީއްވެ؟” އާޓިކަލްގައި ބުނާ ހުރިހައި އުންސުރެއް ކަހަލަ ގޮތަކަށް މި ފިލްމުގައި ފުރިހަމަވާކަން ފާހަގަކޮށްލެވެއެވެ. ފިލްމު އެންމެ ބޮޑަށް ކަމުދިޔަ މައިގަނޑު ސަބަބަކީ، ފިލްމުގެ ކެރެކްޓަރތައް އަމިއްލައަށް މާބޮޑަށް މަޖާވެގަނެގެން އުޅެފައިނެތުން ނެވެ. އެހެން ގޮތަކަށް ބުނާނަމަ މިއީކީ ‘ފޯރސްޑް ކޮމެޑީ’އެއް ނޫނެވެ. ނުހޭން އިންނަ މީހާއަށްވެސް މި ކޮމެޑީ ބަލަމުންދާއިރު ހޭން ޖެހޭނެއެވެ.

ފިލްމު “ފްރީ ޑެލިވަރީ” ޕްރިމިއާ ތެރެއިން – ފޮޓޯ: ކަޒްމިކް އިންޓަނޭޝަނަލް

އައު ތަރިންވެސް ވަރަށް މޮޅު

ފިލްމުގެ ވާހަކައާއި ފިލްމުގައި ވާގޮތް ކިޔައިދޭކަށް ނެތީމެވެ. އެހެނަސް، ފިލްމުން ފެނިގެންދާ އައު ތަރިންގެ އެކްޓިންގެ މޮޅުކަމުގެ ވާހަކަތައް ދައްކައިލަން ޖެހެއެވެ. އެކްޓިން އެހާވެސް ނެޗުރަލްވެފައި ސަޅިއެވެ. އަލަށް އެކްޓިންއަށް ނުކުތް ކުދިންކޮޅެކޭ ހީވެސްނުވާހާ ފުރިހަމައެވެ.

އިއްލެގެ ބައެއް އުފެއްދުންތަކުން ސީރިއަސް ރޯލުން ފެނިފައިވާ ތާތި އާދަމްގެ މި ފިލްމަށްފަހު ހަމަ ގައިމުވެސް ތާތިގެ ހުވަފެން ހަޤީޤަތަކަށް ވެއްޖެކަމަށް ބުނަން ޖެހެއެވެ. އެންމެ ކުޑައިރުއްސުރެން އެކްޓަރަކަށް ވާން ބޭނުންވި ތާތި މިއަދު ތިޔަ ހުރީ ހުނަރުވެރި އެކްޓަރަކާ ހަމައަށް ވާޞިލުވުމަށް އަޅަން ޖެހޭ އެންމެ މުހިންމު ފިޔަވަޅުއެޅިފައެވެ. ދެން އޮތީ އިތުރަށް ހުނަރު ތަރައްޤީކޮށް ތަފާތު ޖޯންރާތަކާއި ކެރެކްޓަރތައް އެކްސްޕްލޯކޮށް ތަފާތު ދެއްކުމުގެ މަރުހަލާއެވެ.

ރައުފަތު ޞާދިޤް އަދި އައިޝާގެ ވާހަކަ ހަމަ ކޮންމެހެންވެސް ފަލަސުރުޚީކޮށްލަން ޖެހެއެވެ. މީގެ ކުރިން އައިޝާ ފެނިފައިވަނީ ސީރީއަސް ރޯލުތަކުންނެވެ. ހިތާމަވެރި، ނުލަފާ ނުވަތަ މަކަރުވެރި ރޯލުތަކުންނެވެ. ނަމަވެސް، ކޮމެޑީއަކީވެސް އައިޝާއަށް ކުޅެވޭނެ ޖޮންރާއެއްކަން މާރަނގަޅަށްވެސް މިފަހަރު ތިޔަވަނީ ސާބިތުކޮށްދީފައެވެ.

ރަޢުފަތު ޞާދިޤް ފުރަތަމަ ފެނިގެންދިޔަ ފިލްމީ އުފެއްދުމަކީ “ކަރުހަކުރު” ސިޓްކޮމް އެވެ. އެ ސީރީޒް ބެލި މީހުންނަށް ހަމަ ގައިމުވެސް ރައުފަތުގެ ހުނަރުވެރިކަމާމެދު ސުވާލެއް ނުއުފެދޭނެ އެވެ. ފިލްމު “ފްރީ ޑެލިވަރީ” ބެލި ގިނަ މީހުންނަށް އެންމެ ކަމުދިޔަ، އެންމެ މަޖާ ކެރެކްޓަރއަކީ ރައުފަތު ގެނެސްދިން ކެރެކްޓަރ އެވެ.

@kazmik.intFree Delivery Trailer 2 NOW Screening at Olympus Hotline : 7242 555♬ Free Delivery – Free Delivery & Bajikko & Humae

އިއްލެގެ ސްކްރީން ރައިޓިން އަދި ޑައިރެކްޝަން މިފަހަރުވެސް އެހެން ލެވަލްއެއްގަ

އިއްލެއަކީ ވަރަށް ސީރިއަސް މިޒާޖެއްގެ، ރުންކުރު މީހެއް ކަމަށް އިއްލެގެ ބިޔަކަމުން ހީވެދާނެއެވެ. ނުވަތަ ކޮމެޑީއަކީ އިއްލެގެ އެއްޗެއް ނޫންކަމަށްވެސް ހީވެދާނެއެވެ. ނަމަވެސް މިހައިތަނަށް އިއްލެ ކޮށްފައިވާ ކޮންމެ މަސައްކަތަކުންވެސް ފެނިފައިވަނީ ތަފާތު ކަމެކެވެ. އިއްލެގެ ސްކްރީން ރައިޓިންގެ ތަފާތުކަމުން ފެށިގެންގޮސް ޑައިރެކްޝަންގައި އެ ބޭނުންކޮށްލާ އުކުޅުތަކުގެ ތަފާތުކަންވެސް ވަނީ ފެނިފައެވެ. ނަމަވެސް ކޮމެޑީއެއް އެހާ ފެންވަރުގައި އުފެއްދިދާނެބާއޭ ހިތަށްއެރި މީހުންނަށް “ފްރީ ޑެލިވަރީ”އަކީ އިއްލެގެ ރައްދެެކެވެ.

ހުރިހައި ތަރިންގެ އެކްޓިންއަށްވެސް ހަމަ އޭ ފާހެއް

އިއްލެގެ އުފެއްދުމެއްގައި ސައިޑް ކެރެކްޓަރއަކަސް، ނުވަތަ އެހެން ކެރެކްޓަރއެއް ނަމަވެސް އެއީކީ ކުޅިކުޅިވަރަށް ދޫކޮށްލާ ކެރެކްޓަރއެއް ނޫންކަން އިއްލެގެ ފިލްމުތައް ބެލި ފަރާތްތަކަށް އެނގޭނެއެވެ. އެކަން އަދި އެންމެ ބޮޑަށް އެނގޭނީ އެފަދަ ކުދިކުދި ރޯލުތައް ކުޅުމުގެ ނަސީބު ލިބުނު ފަރާތްތަކަށެވެ. މިކަން މި ފާހަގަކުރަނީ އިއްލެގެ “ނީނާ”ގައި އެފަދަ ތަޖުރިބާއެއް ކުރުމުގެ ފުރުޞަތު ޚުދު އަހަންނަށްވެސް ލިބިފައިވާތީއާވެސް އެކުގައެވެ. އެ ތަޖުރިބާގެ ރެވިފުކެއްހާ މިންވަރެއް ހިއްސާކޮށްލާނަމެވެ. ފިލްމު “ނީނާ”ގައި ނީނާ ހޭ އަރާ ވަގުތު ނީނާގެ ހާލަތު ކިޔައިދޭން ހުންނަ ފިރިހެން ޑޮކްޓަރުގެ އެ ކުޑަކުޑަ ރޯލުވެސް އެއީކީ ހަމަ ތިބެލާފަ އެއް ޓޭކުން ދުއްވާލި ރޯލެއް ނޫނެވެ. އެއަށް ވުރެން ބޮޑަށް، އެ ކުޑަކުޑަ ކެރެކްޓަރ އަދާކުރަނީ ކިހާ މުހިންމު ރޯލެއްކަން ދެނެ ތިބެ، އެ ކެރެކްޓަރ ޑެލިވަރީކޮށްދީފައިވަނީ އެންމެ ބަރާބަރަށްކަން އިއްލެގެ އިތުރުން ފިލްމުގެ އެސިސްޓެންޓް ޑައިރެކްޓަރ އިފްނާޒްވެސް ޔަޤީންކުރި އެވެ.

ފިލްމުން ފެންނަ ތަރިންގެ ތެރެއިން މިހާރުވެސް ވިދަމުން އަންނަ ބައެއް ތަރިން ދައްކާފައިވަނީ ތަފާތު މޮޅު އެކްޓިންއެކެވެ. ވާޝިޔާ މުޙައްމަދު މި ފިލްމުންވެސް މިވަނީ އޭނާގެ ހުނަރުން ފުރިގެންވާ އެހެން ސައިޑެއް ދައްކައިދީފައެވެ.

ފިލްމު “ފްރީ ޑެލިވަރީ” އަކީ މިފަދަ ޓެންޝަން ބޮޑު ދުވަސްވަރެއްގައި ހާސްކަން ފިލުވައިލަން ބަލައިލަން ހަމަ އެއްވަނައިގެ ފިލްމެކެވެ. 04 ނޮވެމްބަރުގައި ޕްރިމިއާކުރި މި ފިލްމު، ޑިސެމްބަރު މަހުގެ ތިންވަނަ ދުވަހާއި ހަމައަށް ކުރިއަށްދާނެ އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: