އޫޕްސް!!….

މި ދެވުނީ އަނެއްކާ ރަނގަޅު ޚަބަރެއްބާއޭ ހިތަށް އަރާފާނެއެވެ. އާނއެކެވެ. ކަޒްމިކް އިންޓަނޭޝަނަލްގެ ފުރަތަމަ ފީޗާ ފިލްމު “ފްރީ ޑެލިވަރީ” އަކީ މާރޑަރ މިސްޓްރީއެކެވެ. ފިލްމުގެ މައިގަނޑު ވާހަކަ ބިނާވެފައިވަނީ ގޮތް ނޭނގޭ މަރެއްގެ މައްޗަށެވެ. އެ މަރުގެ ކަންތައްތަކެއް ފިލްމުގެ ވާހަކަތެރޭގައި ދައުރުވާނެއެވެ. މިދެވުނީ އަނެއްކާ ސްޕޮއިލަރ އެލާޓަކަށްވެސް ވެދާނެއެވެ.

ޑާކް ކޮމެޑީ “ފްރީ ޑެލިވަރީ”އަކީ އިލްޔާސް ވަހީދު (އިއްލެ) ލިޔެ ޑައިރެކްޓްކޮށްފައިވާ ފިލްމެކެވެ. ފިލްމަކީ ޑާކް ކޮމެޑީއެއް ނަމަވެސް ފިލްމު ތެރެއިން ސީރިއަސް މައްސަލަތަކަކަށް ބަލައިލާފައި ވާނެ ކަމަށް އިއްލެ ބުނެއެވެ.

“ޑާކް ކޮމެޑީއަކީ ސީރިއަސް މަޢުޟޫއެއް، ކޮމެޑީ ގޮތަކަށް ގެނެސްދިނުން.”

– ޑައިރެކްޓަރ އިލްޔާސް ވަހީދު

“ފްރީ ޑެލިވަރީ” އަކީވެސް އިއްލެގެ ފުރަތަމަ ފިލްމު “ބަވަތި”ން ގެނެސްދީފައިވާ ފަދަ ނަފުސާނީ މައްސަލައަށް އަލިއަޅުވާލާފައިވާ ފިލްމެކެވެ. ގިނަ އިޖްތިމާޢީ މައްސަލަތަކެއް މި ފިލްމުން ފެނިގެންދާނެ އެވެ. އެގޮތުން މީހުންގެ ހުންނަ ސިފައަށް މަލާމާތްކޮށް ބުލީކުރުން، މިސާލަކަށް ފަލަ މީހުންނަށް ނުވަތަ ކުރު މީހުންނަށް މަލާމާތްކޮށް ޖެއްސުމުގެ ބަސްތައް ބުނުން، އިންޓަނެޓަށް މީސްމީހުންގެ ބަރަހަނާ ފޮޓޯ ލީކްކުރުން ފަދަ ކަންކަމަށްވެސް މިފިލްމުގައި ބަލާލާފައިވެއެވެ.

“ފްރީ ޑެލިވަރީ”ގައި ވަނީ ކިހިނެއް؟

ތާތި އާދަމް (ސަނާ) ޑެލިވަރީއަކަށް ދެއެވެ. ޑެލިވަރީއަށް ދާތަނުން ސަނާއަށް ފެންނަނީ ބަޔަކު މީހުންވެގެން މީހަކު މަރާލާފައި، މަރުވެފައިވާ ހަށިގަނޑު ނަގަނިކޮށްނެވެ. ސަނާއަށް ލިފްޓަށް އެރެނީ ހަމަ ކިރިޔާއެވެ. އޭނާއަށް ލިފްޓަށް އެރެނީ ކްރައިމް ސީން ހިނގި ސަރަހައްދައް ޕާރްސަލް އަދި ސަނާގެ ނޭމް ޓެގް ވައްޓައިލެވިފައިވާ ހާލަތުގައެވެ. ކުށް ކުރި މީހުން ސަނާ އުޅޭ ރެސްޓޯރެންޓަށް މީހުން ފޮނުވަނީ ސަނާ ކިޑްނެޕްކުރުމަށެވެ. ރެސްޓޯރަންޓަށް ދާއިރު އެތަނުން ދިމާވާ ސަނާއަކީ އައިޝާ ޢަލީ އެވެ. މާނައަކީ އައިޝާ ކުޅެފައިވާ ކެރެކްޓަރއަށް ވެސް ކިޔަނީ ސަނާ އެވެ.

މިހިސާބުން ކަންތައް ވީގޮތް އެނގިއްޖެދޯ؟…… އެމީހުން ކިޑްނެޕްކޮށްގެން ގެންދަނީ އަސްލު އެމީހުން ހޯދަން ބޭނުންވި ސަނާއެއް ނޫނެވެ. ކޮންމެއަކަސް، ސަނާ ކިޑްނެޕްކޮށްގެން ގެންދިއުމުން އައިޝާ ޢަލީ (ސަނާ) ސަލާމަތްކުރުމަށް ތާތި އާދަމް (ސަނާ) އަދި ރަޢުފަތު ޞާދިޤް (ބިލީ) ދެއެވެ. އެމީހުން ދަނީ އެއްވެސް ބެކްއަޕް ޕްލޭނެއްވެސް ނެތިއެވެ. ދެން ކަންތައް ވަނީވެސް ތިޔަ ހީކުރެވުނު ގޮތަށެވެ. އެ ދެމީހުންވެސް ނުބައި މީހުންގެ އައްދަށުވެ ހައްޔަރުވެއެވެ. މިހިސާބުން ކަންތައްތައް ހިނގާނީ ކިހިނެއްބާ؟…….

ދެން ކަންވާނެ ގޮތް އޮލިމްޕަހަށް ގޮސް “ފްރީ ޑެލިވަރީ” ބަލައިލުމުން އެނގޭނެއެވެ. ޓިކެޓް ނަގަންވެސް ވަރަށް ފަސޭހަވާނެ އެވެ. 7242555 އަށް ވައިބަރުން މެސެޖެއްކޮށްލާށެވެ. ހަމަ ގައިމުވެސް މި ފިލްމު ބަލާފައި އެބުނާ ރިގްރެޓެއް ކުރާކަށް ނުޖެހޭނެއެވެ. ފިލްމު ބަލާފައި ނުކުންނަ މީހުން ތިބެނީ ހީނހީނ ހަލާކުވެފައި ކަމަށް އެމީހުންގެ ކޮމެންޓްތަކުން އެނގެއެވެ. އޮލިމްޕަސް ހޯލުތެރެއިން އިވެނީ:

“ހީނހީނ ބަނޑަށް ތަދުވެއްޖެ!”

“އައްދިއްޔޯތް…. ހީނހީނ ހަލާއްކުވެއްޖެ!”

ފިލްމަށް ދިއުމުގެ ކުރިން ފިލްމު ބެލި މީހެއްކުރެން އަހައިލިޔަސް މި ފިލްމާމެދު އަހަރުމެން މި ދައްކަނީ ތެދުވާހަކަތަކެއް ކަން އެނގޭނެ އެވެ. ފިލްމު ބަލައިލުމުން މިއީ ތޯތޯ ވާހަކައެއް ނޫންކަން އެނގޭނެއެވެ.

@muniavas FREE DELIVERY Trailer @kazmik.int #freedelivery #FREEDELIVERY_TheMovie #fvpシ #fvpviral #maldivestiktok #muniavasnews #maldives #dhivehi #foryoupage #fyp #contentcreators #OnlineMedia ♬ original sound – MUNIAVAS

ޑާކް ކޮމެޑީއަކީ ކޮބާ؟

ޑާކް ކޮމެޑީ، ބްލެކް ކޮމެޑީ ނުވަތަ ބްލެކް ހިއުމަރ އަކީ ކޮމެޑީ ފިލްމު ޖޮންރާގެ ތެރޭގައި ހިމެނޭ ކޮމެޑީގެ ބާވަތެކެވެ. ޑާކް ކޮމެޑީ އަކީ ފިލްމެއް، ޓީވީ ޝޯއެއް، ނާވިލެއް، ޕޮޑްކާސްޓެއް ނުވަތަ އެހެން ވެސް ނެރެޓިވް އާޓެއް ކަމަށް ވެދާނެ އެވެ.

ޑާކް ކޮމެޑީތަކުގައި ގެނެސްދެނީ ސީރިއަސް ގޮތެއްގައި ދައްކައިދެވިދާނެ ބައެއް ކަންކަން ތަންކޮޅެއް މަޖާ ސްޓައިލެއްގައެވެ. މާނައަކީ ސީރިއަސް ހާދިސާއެއްވެސް ތަންކޮޅެއް ލުއިކޮށް ގެނެސްދިނުމެވެ. މަޤުޞަދަކީ ސީރިއަސް މައްސަލައެއް ގެނެސްދިނުމުގެ ތެރެއިންވެސް ބެލުންތެރިން، އެހުންތެރިން ނުވަތަ ކިޔުންތެރިން ހެއްވައިލުމެވެ. އާއްމު ބަހުރުވައިން ބުނާނަމަ، ތަންކޮޅެއް މުޑުދާރު ހާލަތެއްގައިވެސް ބެލުންތެރިން ހެއްވައިލުމަކީ ޑާކް ކޮމެޑީގެ ޚާއްޞަ ސިފައެކެވެ.

ސްކްރީނުން ފެންނަ ހިތާމަވެރި ހާދިސާތަކުން ފިލްމު ބެލުންތެރިން ހެއްވާލާ ނަމަ އެއޮތީ ޑާކް ކޮމެޑީއަކަށްވެފައި ކަމަށް ބެލެވިދާނެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: